VII л е к ц и я: Коми кыв велöдан небöгъяс
1. Учебниклöн ин да функцияяс.
2. Учебникын текстъяс дорö корöмъяс.
3. Коми кывйысь учебникъяс.
4. Учебник серти удж сикасъяс.
Коми кыв велöдан небöгъяс да УМК.
1.Учебниклöн ин да функцияяс.
Велöдчан небöг, либö учебник, коми кыв велöдöмын лоö шöр велöдöм котыртысьöн. Учебникö пыртöма уджтасын корöмъяс – сюрöс да методика подув (дидактика) боксянь, та понда стандарт, уджтас да велöдчан небöг артмöдöны öтув нырвизь велöдöм да велöдан сюрöс вылö.
Велöдчан небöгын методика да сюрöс боксянь стöча котыртöма быд тема велöдöм, быд урок. Небöг котыртö уджсö и велöдысьлысь, и велöдчысьлысь. Сэні сетöма и теорияысь тöдöмлунъяс, выль материал кузя практическöй удж. Учебник веськöдöма выль материал сетöм, сійöс вынсьöдöм, тема серти кывкöртöд вöчöм да тöдöмлун кужанлун донъялöм вылö.
Быд урок серти мöвпыштöма гортын асшöрöн вöчан удж.
Учебник да содтöд велöдчан небöгъяс босьтöны ас вылас
1) челядьöс воспитывайтан
2) коми кывйысь выль тöдöмлун сетан
3) челядьлысь вежöр, сям да кужанлунъяс сöвмöдан функцияяс.
Велöдчан небöг дорö корöмъяс:
1) Сюрöс боксянь.
Челядьлы гöгöрвоана бур литературнöй кыв вылын гижöм текстъяс да мукöд сикас лингвистикаысь материал сетöма да тэчöма öта-мöд бöрся лöсялана ногöн, стандартлы да уджтаслы лöсялöмöн.
2) Кывлöн мукöд юкöнъяскöд йитчöм боксянь. Кыв тöдмалöм да велöдöм котыртöма комплекснöя кыв велöдöм подув вылын. Унджыкысьсö текст подув вылын челядь тöдмасьöны грамматика гижанног, фонетика, кыв тэчас, кыв сöвмöдöмысь тöдöмлунъясöн.
3) Методика боксянь. Удж дорö тшöктöмъяс артмöдöны методика аппарат. Методика аппарат веськöдöма тема кузя тöдöмлунъяс вынсьöдöм, кужöмлунъяс босьтöм, важöн велöдöмтор тöд вылö уськöдöм, челядьлысь уджавны кужöмлунъяс вынсьöдöм, кывкöртöдъяс вöчöм, тöдöмлунъяс да кужанлунъяс систематизируйтöм вылö. Методика аппарат тöдчöдö удж дорö тшöктöмъяс, юалöмъяс, правилöяс, грамматика да мукöдтор видлалан тэчасъяс (памятка, алгоритм), определениеяс да велöдан тема дорö содтöд пасъяс.
2.Учебникын текстъяс дорö корöмъяс.
Учебникъясын пöшти быд урок вылö сетöма текст. Текстлöн коланлуныс зэв тöдчана: тайö и коммуникативнöй метод пыр челöдьöс кывйö велöдöм, кыв дорö функциональнöя матыстчöм, медбур текстъяс вылын челядьлысь кыв гöгöрвоöм сöвмöдöм.
Сідз, выль 3 класслы дасьтöм учебникö пыртöмаöсь текстъяс В.Савинлöн, А. Мишариналöн, В.Лыткинлöн, Л.Лыткинлöн, Н.Куратовлöн, И.Белыхлöн, Г.Юшковлöн, А. Ванеевлöн, Е.Козловалöн, И. Коданевлöн, В. Тиминлöн, С.Раевскийлöн, С.Поповлöн, В.Лодыгинлöн, З.Шиликовалöн, И. Тороповлöн, М.Лебедевлöн, А.Поповлöн, А.Некрасовлöн, Э.Тимушевлöн, Е.Рочевлöн.
Текстъяс пыртöмаöсь, мед петкöдлыны выль велöдантор, а сідзжö грамматикаысь, лексикаысь петкöдчöм аддзöм да видлалöм могысь, выразительнöя лыддьöм, гижöм, план лöсьöдöм, текстлы ним пуктöм, текстлысь тэчас, сикас тöдмалöм да мукöд удж вöчöм могысь.
Текст дорö методика корöмъяс:
А) челядьлысь кыв да вежöр сöвмöдысь мича кывйöн гижöм художественный прозаöн да кывбурöн лöсьöдöм текст
Б) делöвöй стильöн стöч литература кывйöн вöчöм гижöдъяс
В) талунъя актуальный тема вылö да озыр содержаниеа гижöдъяс
Г) текстын эмöсь велöдан тема вылö петкöдчöмъяс
Д) стиль боксянь öта-мöдсьыс торъялана текстъяс
Е) лексика боксянь озыр текстъяс
Ж) коми гижысьяслöн либö роч кыв вылысь бур вуджöдöмъяс
3. Коми кывйысь учебникъяс
Коми кывйысь учебник лöсьöдан удж заводитчис Октябр революция бöрын. Учебниклöн быд поколениеын петкöдчö коми языкознание наукалöн тшупöдыс. Наука сöвмöмкöд сöвмö и школаын велöдчан небöг.
Воддза поколениеса велöдчан небöгъяс вöлі лöсьöдöмаöсь формально-грамматическöй подув вылын.
Öнія олöм корö, мед челядьöс велöдöмын ыджыдаліс коммуникативнöй да функциональный метод, мед вöлісны развивайтан, туялана, сравнительно-историческöй методысь корöмъяс да элементъяс. Та понда коми кыв учебник некыдз оз öтдорт грамматика подувсö, но содтöд подуласьö тэчас (структура), семантика, функция да коммуникативность видзöдласöн (Львов 2002: 223). Коми челядьöс велöдан учебнöй планъясын абуöсь челядьлысь сёрни сöвмöдан торъя дисциплинаяс, сёрни сöвмöдöм мунö коми да роч кыв урокъяс пыр. Та понда коми кыв учебник кутö ас вылас комплекснöя челядьöс сöвмöдан могъяс велöдны тшöтш и текстысь тöдöм да кужанлунъясö: велöдны аддзыны, тöдмавны, донъявны, видлавны текст, лöсьöдны торъя сикасъяса текстъяс.
Учебник лöсьöдöма концентризм подув вылын.
Быд учебник да содтöд небöг видлалö, донъялö да вöзйö школаын уджалöм вылö коми Республикаса йöзöс велöдан да вылыс тöдöмлун министерство.
4. Учебник серти удж сикасъяс.
Учебник веськöдöма быд тшупöдын материал велöдöм вылö: выль явлениеöн тöдмасьöм, сійöс кывйысь аддзöм, вынсьöдöм, мукöд кыв петкöдчöмкöд öтувтöм, вочаалöм, сійöс текстö пыртöм да тöдöмлун да кужанлун донъялöм вылö.
Та боксянь учебникын удж сикасъясöн лоöны аддзы, инды, бöрйы мукöд пöвстысь, öткодяв, вочаав мукöд кывъяскöд, петкöдчöмкöд, видлав тэчас серти, тöдмав петкöдланторсö (функциясö), пырт текстö да с.в. Выль учебникö пыртöмаöсь талунъя выль технологияяс серти котыртöм удж сикасъяс кыдзи
- гозйöн да котырöн öтувтöм удж
- проект методöн вöчан уджъяс
- уджысь тырмытöмтор аддзöм
- öшыбка вöчан помка тöдмалöм
- öшыбка бырöдöм
- тема велöдöм водзын проблемнöй юалöмъяс пыртöм
- тема велöдöм, удж вöчöм водзын мотивация гöгöрвоöдöм вылö юалöмъяс
- роч да коми кыв вочаалöм
- выль либö стöч информация тöдмалан туйяс корсьысьöм
- туялана методъяс пыртöм
- «деятельностный подход» сямöн удж тэчас дорö шыöдчöм*
- ассьыд тöдöмлунъяс да кужанлунъяс донъялöм
Учебникын материал юклöма юкöнъяс да урокъяс вылö. Быд уроклöн медшöр тöдчанторйöн лоö текст. Урок тема велöдöм йитчöма сетöм текст серти уджкöд, быд урок котыртöма коммуникативнöй метод серти велöдöм вылын. Челядь лыддьöны текст, донъялöны сійöс уна боксянь, видлалöны текстын сетöм кывйысь материал. Методика аппарат веськöдöма челядь кыввор озырмöдöм вылö, йитöса сёрни сöвмöдöм вылö, сёрни этш сöвмöдöм вылö.
Велöдчан небöг веськöдöма сідзжö челядьлысь тöдöмлунъяс да кужанлунъяс донъялöм вылö.
Литература:
1. Астаева Т.Т. Реализация системно-функционального подхода к языковым явлениям в процессе обучения русскому языку как неродному. – Формирвание и развитие языковой личности в школе и ВУЗе. Сыктывкар, 2004. С. 48-54.
2. Трушова Е.А. О системе использования текстов на уроках русского языка. – Совершенствование содержания образования в условиях введения ЕГЭ и перехода на профильное обучение. Сыктывкар. 2006. С. 129 – 132.
3. Полякова Э.И. Грамотаö велöдан урокъяс «Анбур» дінö методическöй индöдъяс. Сыктывкар, 2003.
4. Елисеева К.И. Коми кыв кузя дидактическöй материал. 3 класс. Сыктывкар, 1978. С. 104.
5. Изъюрова О.И., Кузиванова Е.А., Мишарина С.А., Прокушева Т.И.. Коми кыв коймöд класслы велöдчан книга. Сыктывкар, 2007.
6. Изъюрова О.И., Кузиванова Е.А. Коймöд класслы коми кывйысь дидактическöй уджъяс. Сыктывкар, 1999. С. 72.
7. Канева Н.Н. Коми кывйысь дидактическöй уджъяс. 2 класс. Сыктывкар, 2003.
8. Коми кыв кузя занимательнöй грамматика. Коми отделениеса студентъяслы методическöй индöдъяс. Лöсьöдіс В.Филиппова. Сыктывкар, 1993. С. 35.
9. Львов М.Р. Дидактико-методические основы школьного учебника. – проблемы школьного учебника. XX век. Итоги. Под ред. Д.Д. Зуева. М., Просвещение, 2004.
10. Полякова Э.И. Грамотаö велöдан урокъяс. Методическöй индöдъяс. Сыктывкар 2003. 192 с.
11. Полякова Э.И. Коми кывйысь дидактическöй материал. Сыктывкар, 2006. 71 с.
12. Полякова Э.И. Коми кыв. Мöд класслы велöдчан небöг. Экспериментальный учебник. Сыктывкар, 2006. 88 с.
13. Полякова Э.И. Коми кывйысь ворсöмъяс. Коми кыв велöдысьлы отсасян небöг. Сыктывкар, 2006. 68 с.
14. Прокушева Т.И. Занимательнöй дидактическöй материал коми кыв кузя 1-4 классъяслы. Методическöй пособие коми отделениеса студентъяслы да начальный школаса велöдчысьяслы. Сыктывка, 1992. 92 с.
15. Прокушева Т.И. Лингвистические основы создания учебно-методического комплекта по коми языку как родному для начальных классов. – Гуманизация образования.: 21 век. Матер. 7 пед. чтений. Сыктывкар, 2006.
16. Прокушева Т.И. Коми кыв. 3 класслы велöдчан небöг. (экспериментальный учебник). Сыктывкар, 2007. 125 с.
17. Прошева З.А. Коми кыв кузя диктантъяс. Сыктывкар, 1990.
18. Сажина М.И. Коми кыв. 4 классын велöдчан небöг. Сыктывкар, 2000.
19. Коми кыв да лыддьысьöм 1-4 класса. Уджтас. Сыктывкар, 2002.