XX л е к ц и я: Талунъя велöдöм дорö корöмъяс

1. Олöм да челядьöс велöдöм образование да воспитание водзын талун сувтöдö татшöм корöмъяс:

- велöдны челядьöс велöдчыны да сетны сэтшöм тöдöм да кужанлунъяс, кодъяс отсаласны челядьлы налöн аскиа олöм да уджалöмын

- сöвмöдны челядьлысь вежöр да сям, олан да ёртасян культура

- велöдны челядьöс öтув либö ёрта-ёрткöд уджавны, воöдчыны öти кывйö

- велöдны донъявны ассьыс тöдöмлунъяс да кужанлунъяс

- велöдны уджавны разнöй информация технологияясöн, кыдзи выльясöн, сідзи и педагогикаын важöн тöдсаясöн.

Татшöм пöрадокын пуктöм могъяс корöны выль ногöнджык видзöдлыны велöдан процесс вылö, öнія терминологияöн кö, «деятельностный подход», либö «учебная деятельность» пуктöм –котыртöм вылö (кыдзи да кутшöм ногöн велöдны) … «Деятельностный подход» вылö колö видзöдны да донъявны сійöс некымын боксянь:

- репродуктивнöй да творческöй уджъясöн удж котыртöм

- вежöр сöвмöдан (развивающöй) функцияяс боксянь – восприятие, внимание, воображение, мышление, паметь, сёрни, ас удж бöрся видзöдöм (самоконтроль), ас удж донъялöм (самооценка)

- репродуктивнöй (вынсьöдан) уджъясöн вöдитчöм боксянь – лыддьыны, гижны, висьтавны лыддьöмтор, мöдпöвйöвтны, уськöдны тöд вылö

- творческöй, поисковöй, туялана (исследовательскöй) уджъясöн вöдитчöм боксянь – гöгöрвоöдны (объяснитны), докажитны, донъявны, вочаавны, öткодявны, аддзыны тырмытöмтор, содтыны тырмытöм тшупöд, вöчны кывкöртöд, сетны ним, лöсьöдны план

- выльтор тöдмалан сикас да туй («метод познания») боксянь – наблюдение, опыт, выль тöдöмлун корсьöм, вочаалöм да öткодялöм, лыддьöм (словарö велöдчан небöгö, справочный литератураö, интернетö ёртъяс, гырысь йöз дорö шыöдчöм), мукöд тöдысь йöзлысь юалöм («Кыдзи вöчöны пыж»)

- велöдан материал содержание боксянь - грамматика, гижанног, фонетика, кыв тэчас да артманног, сёрни сöвмöдан, лексика да кывкудöн удж, фразеология

- велöдчан (учебный) да практическöй могъяс пыртöм боксянь (велöдчан уджö да операцияясö велöдöм- велöдчан мог, став мукöдыс – практическöй могъяс)

- велöдчан мог пыртöм боксянь – велöдны аддзыны колана грамматика формаын либö кыввор вежöртаса кыв, донъявны сетöм кыв грамматика вежöртас боксянь (грамматическöй разбор), кутны пыртны грамматика формаын сетöм кыв сёрникузяö, юалöмъяс да вежöртас серти йитны сёрникузяын кывъяс, гижны сёрникузя, правилö вылö подуласьöмöн пуктавны колана пунктуация пасъяс, аддзыны сюрöса да содтана юкöдъяс, грамматика подув, сложнöй сёрникузяысь аддзыны прöстöй сёрникузяяс да с.в.

«Деятельностный подход» кытшын колö видзöдны татшöм выль технологияясысь уджъяс вылö кыдзи проект дасьтöм да дорйöм, портфолио дасьтöм презентация, кыдзи творческöй уджъяс. Кыдзи торъя удж сикасъясöн лоöны и ассьыд да йöзлысь удж донъялöм, уджысь (кокньыдджык – йöз уджысь кö) тырмытöмторъяс прогнозируйтöм, аддзöм да öшыбка помка корсьöм да тöдмалöм, чукöрöн да параясöн удж вöчöм.

Вылö донъявсьö колана ног öта-мöд бöрся удж вöчны велöдöм. Торъя ыджыд тöдчанлуныс тайö кужöмыслöн изложение, диктант, сочинение гижигöн, кöні öтувтчöма уна удж операция – кывзöм, гöгöрвоöм, гижöм, колана пасъяс пукталöм, прöверитöм. Тайö и уджлы план лöсьöдöм, и планысь либö текстысь тырмытöмторъяс аддзöм, и удж вöчан пöрадок мöд пöв казьтылöм, и текстысь и уджысь тырмытöм либö торкöм тшупöд аддзöм.

Велöдчан удж котыртöмын, либö деятельностный подход кытшын, велöдöм подуласьö личностно-ориентированный подход вылö. Разнöй способностьяса челядь уджалöны да босьтöны тöдöм да кужанлунъяс асланыс вермöмъяс серти. Та боксянь налы вöзйöны торъя тшупöдъяса (разноуровневые) уджъяс да тшöктöмъяс.

Челядьöс критическöя мöвпавны велöдöм сідзжö лоö урок да велöдöм дорö талунъя выль корöм пиысь öтиöн. Уджавны велöдöмын тöдчана места босьтö мотивация - мыйла колö тайöс вöчны, кужны, велöдны, мыйла татшöм пöрадокын колö вöчны да стрöитны текст, разбор, орфографическöй задача, пуктыны колана пунктуация пас, аддзыны грамматика подув да с.в.

Талунъя методикаын век зумыдджыка юклöны став велöдан уджсö татшöм мог чукöръяс вылö:

- велöдчан уджö велöдöм

- предметысь, дисциплинаысь тöдöм да кужöмлун сетöм

- тöдöмлунъясöн вöдитчыны велöдöм

- кужöмлунъяс вынсьöдöм

- творческöй могъяс (уджъяс) олöмö пыртöм да вöчöм.

Талунъя педагогика корö, мед велöдчысь лоис эз велöдан объектöн, а велöдан субъектöн, мед велöдчысь учитель да велöдан система отсöгöн ачыс велöдчис босьтны тöдöмлунъяс, кужанлунъяс, мед сійö велаліс аддзыны, мый сылы колö велöдчöмсьыс, мед велаліс пуктыны удж водзын шöр мог, пöртны сійöс олöмö, дорйыны ассьыс уджсö мукöд водзын, донъявны сійöс. Велöдчöм дорö татшöм матыстчöмыс донъявсьö кыдзи «личностно-ориентированный подход» и петкöдчö «деятельностный подход» пыр [Сластенин 2002: 86-87].

«Деятельностный подход» сямöн котыртöм велöдчöмлöн эм татшöм психология тэчас:

1. Мыйла меным тайö колö? юалöм вылö вочавидзöм, либö удж вöчан мотив;

2. Мый колö вöчны сы могысь, мед вöчны тайö уджсö, рочöн кö, «целеполагание»;

3. Кутшöм уджъяс (операцияяс) колö вöчны та могысь;

4. Кыдзи колö нуöдны, вöчны тайö уджсö, кутшöм условиеяс дырйи да мый отсöгöн; асьсö уджсö вöчöм;

5. Кывкöртöд, удж результат (Сластенин 2002: 86-87).

«Деятельностный подход» пыр велöдчöмö челядьöс колö велöдны, сыысь кындзи, колö, мед челядь окотитісны велöдчыны. Деятельностный подход позьö пыртны уна сикас удж вöчигöн, диктант, изложение, сочинение гижигöн, грамматикаысь, гижанногысь, кыв составысь торъя уджъяс вöчигöн. «Деятельностный подход» серти уджö велöдöм вермас лоны торъя кужöмлунъясöн вöдитчыны велöдöм пыр (Мыйла колö тöдны ас нимъяс? Кыдзи тöдмавны эмакывлысь вежлöг? Лыд? Мый колö вöчны, медым гижны текст паметь серти?).

Медся тырбура «деятельностный подход» олöмö пöртчö проект вылын удж пыр.

Проект кыдзи метод, либö технология.

Проект технологиялöн тöдчанлуныс:

- челядь велöдчöны аддзыны уджлысь коланлун (мотивация), пуктыны удж водзын мог, стрöитны уджлысь план, дорйыны да донъявны ас удж

- ас кежысь уджавны велöдчöм

- туялан да сяма уджö велöдчöм

- предметлöн, дисциплиналöн некымын юкöнысь, а, гашкö, и мукöд предметысь тöдöмлунъяс да кужöмлунъяс öтувтöм

- öтвылысь уджавны сöвмöм

- велöдан материал пыдіа да паськыдджыка аддзöм да гöгöрвоöм

- челядьлöн активнöй мöвпалан уджö пырöдчöм

- öта-мöдкöд сёрнитöмöн, дискуссияын сöвмö туясян вежöр.

Тэчас серти проект вермö лоны туясяна, информацияöн юксяна, рольяс серти ворсöм сяма. Удж материал сюрöс серти проект овлö öти предмет, либö весиг öти кутшöмкö тема серти, а сідзжö предметъяскостса (коми кыв да лыддьысьöм). Удж вöчысь челядь серти проект овлö öти мортлöн, паралöн, котырлöн да весиг быдса класслöн. Проект вöчан кад серти удж вермас мунны öти урок чöж, а сідзжö и дыр мунана уджöн-урокысь кындзи челядь уджалісны сы вылын и гортын, урок бöрти. Проект уджын медтöдчанаöн лоö челядьлöн асшöрöн, гашкö, дзик на вöвлытöм аддзöмторъясö воöдчöм. Велöдысь вермас сöмын веськöдлыны, кöнкö отсыштны, ышöдны челядь удж. Удж вöчöм бöрын проект дорйыссьö челядьöн.

Улыс классъясын проект технологияöн вöдитчöмö челядь велöдчöны на, сы понда унджыкысьсö тайö уджыс мунö классын урок вылын учитель веськöдлöм улын. Та понда проект лöсьöдöм вылын удж мунö либö став классöн, либö торъя чукöръясöн.

Проект вылын удж тэчас.

№ п\п	Проект уджлöн тшупöдъяс	Проект вылын удж тшупöдъяс
	Удж бöрйöм	Уджлысь тема бöрйöм. Улыс классын тема сетö велöдысь.
	Мотивация	Мыйла меным колö вöчны тайö уджсö? Мый сійö меным сетас? (Кöсъя тöдмавны бурджыка тема, кöсъя пöлучитны бур оценка – тожö мотивация)
	Мог пуктöм (целеполагание)	Дасьтысьны тема серти да висьтавны (дорйыны проект) класса водзын. Гижны сочинение, стенгазетö заметка, чолöмалöм. Лöсьöдны журнал, газет тема вылö да с.в. Тайö тшупöдас стöчмöдчöны проект дорö корöмъяс (критерийяс): - велöдчан небöгысь (мукöд источникысь) определение, правилö босьтны кужöм - лöсялана мыччöдъяс (примеръяс) вайöдöм - сяма уджъяс - корöмъяс серти удж (проект) оформитöм - удж (проект) петкöдлыны кужöм, сійöс дорйöм
	Удж планируйтöм	Тема бöрйöм да сійöс вöчан удж планируйтöм: урок вылын, гортса удж материал корсян öшмöсъяс мöвпыштöм. Удж котыртöм йылысь мöвпалöм (öткöн, параöн, чукöрöн).
	Материал чукöртöм да проект вöчöм	Тöдчöдны тема, сылысь коланлун, мог. Сетны определение сійö петкöдчанторйыслы (кыввуж, кыв артмöдан суффикс). Вынсьöдны примеръясöн. Вайöдны примеръяс художественный литератураысь, ворсöмъяс, текст, графическöя петкöдлöм модельяс да с.в.
	Проект петкöдлöм (дорйöм)	Быд морт либö быд чукöр вöзйö кывзыны ассьыс уджсö
	Проект донъялöм да рефлексия	Чукöръяс донъялöны ассьыныс и мукöдъяслысь уджсö. Мый артмис, мый эзджык артмы, мый вылын колö нöшта на уджавны. Позьö вöдитчыны донъялан шкалаöн да торъя пасъясöн.
	Редактирование	Уджъяс редактируйтöм: мый позьö содтыны, мый колö вежны. Гижанногысь, пунктуацияысь да стильын тырмытöмторъяс бурмöдöм.

Литература:

1. Истомина Т.Б. Метод проектной деятельности в литературном образовании лицеистов. – Совершенствование содержания образования в условиях введение ЕГЭ и перехода на профильное обучение. Сыктывкар, 2006. С. 111-114.

2. Львов М.Р., Горецкий В.Г. и др. Методика преподавания русского языка в начальных классах. М., Академия, 2000.

3. Подласый И.П. Педагогика. Общие основы. Процесс обучения. М., Адос, 2005.

4. Сластенин и др. Педагогика. М., Академия, 2002. С. 86-87.

5. Сурнина С.Н. Личностно-деятельностный подход в обучении коми языку как неродному. – Совершенствование содержания образования в условиях введения ЕГЭ и перехода на профильное обучение. Сыктывкар, 2006. С. 181-183.