XVIII л е к ц и я: Гижанногö велöдан уджъяс

1. Гижанногö велöдан методъяс да удж ногъяс.

Улыс классъясын гижанногö велöдöмын сöвмöма куим нырвизь да на гöгöр и котыртчисны велöдан методъяс. М.Р. Львов тадзи сикасалö тайö нырвизьяссö, мыджсян подувъяссö да методъяссö.

Уджын мыджсян подув	Нырвизь	Методъяс
Графика да гижанног правилöяс	Шыпасъясöн фонема (шы) пасйöм	Шы да шыпас костын йитöд видлалöм – анализ, синтез
Вежöр вылö мыджсьöм, запоминайтöм	Тöд вылö пуктöм, наизусть велöдöм	Имитация метод, унаысь образец серти гижöм, списываниеяс
Рассуждение, доказательство	Грамматика теория вылö мыджсьöм	Орфографическöй, грамматико-орфографическöй задача вöчöм

Имитация пырö репродуктивнöй метод чукöрö, орфография задача вöчöм – корсьысяна, поисковöй, проблемный да весиг туясяна (исследование) метод чукöрö, анализ да синтез – челядьлысь велöдчан активность кыпöдан метод чукöрö [Львов и др. 2002: 314].

2. Гижанногö велöдан уджъяс.

Гижанногö велöдан уджъяс позьö юклыны а) зэв стöч, конкретнöй операция вöчöм серти кыдзи орфограмма аддзöм, сійöс шуöм, тöд вылö правилö уськöдöм, а сідзжö б) комплекснöй уджъяс вылö, кöні колö öтвыв вöчны некымын операция ыджыд объема уджын кыдзи диктант.

Гижанногысь уджъяслöн лоöны

- орфограмма аддзöм

- орфограмма тöдмалöм

- орфограмма правилö тöд вылö уськöдöм

- орфография задача решайтöм

- орфография разбор

- списывание, сылöн сикасъяс

- диктант, сылöн сикасъяс

2.1. Кыв анализ да синтез.

Шыяс да гижанног боксянь öтув кыв видлалöм (фонетико-орфографическöй разбор) öтувтö кык боксянь кыв видлалöм. Татшöм удж дырйиыс

- кыв видлавсьö шысяньыс, а оз шыпассянь

- бура тыдовтчö челядьлы шыяслысь торъя шыпасъяслöн небыдлун да чорыдлун петкöдлöм

- бура тыдовтчö кывйын орфограмма, да челядь сразу вöчöны орфографияысь задача.

Вермас нуöдсьыны кыдзи асшöр удж, но позьö сійöн вöдитчыны и мукöд уджъяс нуöдігöн.

Шы да слог видлалöм да шуалöм. Л.Н. Назарова вылö донъялö тайö уджсö челядьлысь грамотность кыпöдöмын. Слог серти шуалігöн челядь стöча кылöны слогысь быд шы, видлалöны сійöс. Слогъясöн кыв шуалöмöн гижöд 1-2 классъясын колö нуöдны систематическöя.

2.2. Списывание, либö гижöм.

Став удж пиысь медтöдчанаöн лоö видзöдöмöн гижöм, либö списывание. Талунъя методикаын сöвмöма уна сикас списывание: быд кыв гижöмöн (дословнöй), бöрйысьöмöн (выборочнöй), сьöктöдöмöн (осложненнöй), свободнöй, паметь серти гижöм да контрольнöй.

Быд кыв гижöмöн унджыкысьсö паныдасьлö грамотаö велöдігöн да первой классын. Тайö зэв тöдчана удж первой класса велöдчысьяскöд, но быд кыв гижöмöн списывание оз тырмымöн сöвмöд гижанногысь зоркость.

Бöрйöмöн (выборочнöй) гижöд дырйи велöдысь тшöктöм серти челядь бöрйöны сетöм текстысь индöм либö велöдöм орфограммаöн кывъяс, кывтэчасъяс. Например, сетöм текстысь öти столбикö гижны і шыпаса, мöд столбикö – и шыпаса кывъяс.

Сьöктöдöмöн (осложненнöй) гижöд дырйи списывайтан удж сьöктöдчö мукöд тшöктöмъясöн: точкаяс местаö гижны колана шыпас, кыв, содтыны текстö лöсялана пом, панас, вежны кыв синонимöн, вайöдны паныд вежöртаса кыв да гижны. Списывание вермас лоны сьöктöдöма гижанногысь, грамматикаысь, лексикаысь, стилистикаысь содтöд тшöктöмъясöн.

Свободнöй списывание дырйи медводз челядь лыддьöны текст, видлалöны сійöс велöдыськöд либö ас кежысь, а сы бöрти пöдлалöны небöгсö да гижöны сійöс, мый босьтісны тöд вылö.

Паметь серти гижигöн челядьлöн тöдчымöн сöвмö гижанногысь зоркость. Тайö уджсö нуöдны колö тшöкыда, систематическöя. Прозаöн либö кывбурöн гижöм текст челядь велöдöны наизусть, бура видлалöны кывъяслысь гижанног, пунктуация пасъяс да велöдöм текстсö гижöны паметь серти небöг пöдлалöмöн.

Контрольнöй списывание вылö уджтасын урчитöма уджлöн ыдждаыс татшöм лыдпасъясöн.

1 класс 12-18 кыв

2 класс 20-25

3 класс 35-40

4 класс 55-70

2.3. Диктант сикасъяс, найöс гижöм

Мог серти диктантъяс овлöны велöдана (обучающöй) да контрольнöй. Текстъяс серти диктантъяс сідзжö торъялöны. Первой классын диктант текстъясöн вермасны лоны шыпасъяс, слогъяс, кывъяс, торъя сёрникузяяс, дженьыдик текстъяс. 2-4 классын текстъяс пыдди вермасны лоны торъя кывъяс, а унджыкысьсö - текст. Текстъяс пыдди овлöны и кывпесан, и кывбур, и шусьöг, и сьыланкыв, и мойд, и висьт, и описание.

Диктант, кыдзи и видзöдöмöн гижöм (списывайтöм), форма серти овлö сідзжö уна пöлöс: комментируйтöмöн, öлöдана (предупредительнöй), видзöдöмöн (зрительнöй), гöгöрвоöдöмöн, серпасъяс серти (картинный), велöдчысьöн аснас донъялана, нöдкыв тöдмалöм серти, паметь серти, творческöй, контрольнöй диктант.

Комментируйтöмöн гижигöн диктуйтöм сёрникузяысь кывъяссö велöдчысь шуалö слогъясöн дзик сідзи, кыдзи гижсьöны , висьтавлö налысь гижанногсö, гöгöрвоöдö мыйла тадзи колö гижны. Сэсся ставöн öттшöтш гижöны кывсö. Пример: Алöй кыа ойдöдіс енэжсö гижигöн велöдчысь комментируйтö: «Алöй кывйын кык слог. Первой слогыс – а, гижам ыджыд А: алöй кыв сулалö сёрникузя водзын. Тайö кывсö вуджöдны оз позь, сы вöсна мый первой слогыс артмöма öти гласнöйысь. Мöд слогыс -лöй. Помас гижам й (гижöны). Кыа кывйын кык слог. Первой слогыс -кы, к бöрас гижам ы. Мöд слогыс –а. Кывсö вуджöдны оз позь, сы понда мый мöд слогыс артмöма öти гласнöйысь (гижöны). Ойдöдіс кывйын куим слог. Первой слогыс -ой, о бöрын гижам й, мöд слогыс –дö, д бöрын гижам ö, коймöд слогыс -діс, д бöрын гижам і, сы понда мый д – чорыд, параа согласнöй. Ойдöдіс кывсö позьö вуджöдны тадзи: ой-дö-діс (челядь гижöны). Медбöръя кывйыс -енэжсö. Первой слогыс –е, гижам йотируйтöм öти шыпас е, мöд слогыс -нэж, н бöрын гижам э, сы вöсна мый н – чорыд параа согласный, гижам кö е, артмас неж (енеж). Коймöд слогыс –сö, кыв помас гижам ö. Кывсö позьö вуджöдны: енэж-сö. Енэжсö кыв бöрын пуктам точка: серникузя помасьö (челядь гижöны)». Позьö тшöктыны быд кыв комментируйтны торъя велöдчысьöс.

Грамотаö велöдігöн челядь комментируйтöны да гижöны кывъяссö слогъясöн.

Öлöдана (предупредительный) диктант комментируйтöмöн диктантысь торъялö сійöн, мый кывъяс гижанног вылас челядь уджалöны оз гижигас, а гижтöдзыс. Первой да мöд класса велöдчысьяс видлалöны кывъясыслысь гижанногсö быд сёрникузяысь торйöн, а коймöд да нёльöд классын гижöны текстсö юкöнъясöн, гижтöдзыс öтпырйö уджалöны некымын предложение вылын.

Видзöдöмöн (зрительный) диктант – сідзжö öлöдан диктант. Торъялö сöмын сійöн, мый текстыс гижсьö дöска вылö, орфограммаяс местаö пуктыссьöны чутъяс. Кывъяс гижанног вылын уджалöм бöрын точкаяс местаас шыпасъяс гижсьöны мöд рöмöн либö карточкаяс отсöгöн. Гижигöн текстыс дöска вылын тупкыссьö, а сэсся прöверитöм могысь велöдысь бöр восьтö сійöс. Челядь быдöн асьныс лыддьöны уджсö, прöверитöны дöскавывса текст серти, сідзи-ö гижисны.

Гöгöрвоöдöмöн (объяснительный) диктант дырйи челядь водзджык гижöны, а сэсся бöрын объясняйтöны орфограммаяс. Медвойдöр уськöдöны тöд вылö повторитöм правилöяссö, кодъясöс колö тöдны. Диктантсö гижöм бöрас визьнитöны улітіыс колана орфограммаяс, а кодъясöс колö гöгöрвоöдны.

Серпасъяс серти (картинный) диктант дырйи велöдчысьяс гижöны сöмын кывтэчасъяс (рисуноклысь нимсö да предметлысь признаксö) либö кывъяс (предмет нимсö, действие нимсö, кодöс вöчö предметыс) предметлысь признак. Кывъяс гижанног вылас, кыдзи и объяснительнöй диктант дырйи, челядь уджалöны гижöм бöрас.

Бöрйысьöмöн (выборочный) диктант дырйи, кыдзи и выборочнöя списывайтігöн, челядь гижöны сöмын сэтшöм кывъяс, кывтэчасъяс, кодъяс лöсялöны тшöктöмлы. Татшöм диктантыс босьтö этша кад. Тайö öти. Мöд-кö, велöдö челядьöс бура кывзыны учительлысь висьталöмсö да корсьны колана орфограммаяс да грамматика петкöдчöмъяс. Выборочнöй диктант отсöгöн позьö сідзжö тöдмавны, кыдзи челядь гöгöрвоöмаöсь уроквывса материал.

Велöдчысьöн аснас донъялöм диктант.

Диктант вылö, кодöс велöдчысьяс прöверитöны асьныс (самопроверочнöй), текстсö колö босьтны «Коми кыв» учебникысь либö лыддьысян небöгысь. Объяснительнöй диктант дырйи моз жö первой челядь тöд вылö уськöдöны гижан правилöяссö, кодъяс ковмасны уджас, сэсся пöдлалöны книгаяс да гижöны сёрникузяяссö. Та бöрын найö восьтöны небöгъяссö да сы серти öткодялöны правильнö-ö гижисны. Позьö сідзжö вежсьыны парта серти ёртыскöд тетрадьясöн да прöверитны уджсö öта-мöдлысь. Öшыбкасö кö велöдчысьыс аддзöма ачыс, оценкасö оз ков чинтыны.

Тöдмалöм нöдкыв серти диктант.

Велöдысь лыддьö нöдкыв. Челядь тöдмалöны сійöс да висьталöны, кутшöм признакъяс серти найö гöгöрвоисны сійöс. Та бöрын челядь гижöны тöдмалöм кывсö да визьнитöны велöдан орфограммасö.

Паметь серти диктант: 1) Гижны паметь серти индöм тема вылö либö индöм орфограмма вылö кывъяс (льöм, пелысь, бадь, ньыв); 2) паметь серти гижны а) і шыпаса; б) ыджыд шыпассянь гижсьысь; в) сложнöй эмакывъяс; г) пемöс кличкаяс.

Контрольнöй диктант нуöдсьö сы могысь, медым тöдмавны, став велöдчысьыс-ö кужöны гижны велöдöм правилö серти. Уджыс нуöдчö тема помалöм бöрын, четверть помын, во джын велöдчöм бöрын да во помын. Велöдчысьяс гижöны дзик асшöрöн. Пыдди пуктыссьöны тöдса правилöяс вылö став торкöмыс, каллиграфия.

Контрольнöй диктантö оз позь пыртны материал гижанногысь да пунктуацияысь велöдтöм правилöяс вылö. Паныдасясны кö татшöм кывъясыс, найöс колö гижны дöска вылö.

Текстын стöча артавсьö кывъяслöн лыдыс. Списывайтöмлöн да диктантлöн кыв лыдыс примернö öткодь. Во помын уджтас серти велöдчысьяс гижöны 1 классын 18-20 кыв, 2 классын 30-35 кыв, 3 классын 45-55 кыв, 4 классын 65-75 кыв.

Велöдчысьлы колö тöдны, мый став диктантъяссö нуöдöм вылö позьö бöрйыны кыдзи торъя кывъяс да торъя сёрникузяяс (медся нин велöдан уджъяссö), сідзи и йитöса текстъяс. Контрольный диктант вылö колö босьтны йитöса текст.

Сяма (творческий) диктант. Сетöм кыв да кывтэчасъяс вылö мыджсьöмöн велöдчысьяс асшöрöн лöсьöдöны йитöса текст. Сяма диктант вылын удж сöвмöдö челядьлысь асшöрöн уджавны кужöм, йитöса сёрни, челядьлысь вежöрсö. Сы отсöгöн позьö мöдпöвйöвтны велöдöмтор. Тані вермас лоны и кывзöмöн, и видзöдöмöн диктантлöн юкöн. Гижанторйыс кадысь кадö сетчö сьöкыдджык. Водзджыксö сёрникузяяс лöсьöдöм вылö сетчöны торъя кывъяс, либö сёрникузялöн панасыс, мед челядь найöс помалісны. Бöрынджык вермасны лоны мыджсяна (опорнöй) кывъяс, и найö йитчöмаöсь öти сюжетöн. Воддза сёрникузяяссö велöдыськöд öтвыв челядь видлалöны вежöртас петкöдлöм, стöча да бура лöсьöдöм боксянь, колана орфограмма пыртöм боксянь.

Мыччöд: öтсяма юкöдъяс костын но кывйитöд водзын … (пуктыссьö чутік); öтсяма юкöдъяс костын да кывйитöд водзын …(чутік оз пуктыссьы).

Либö велöдысь гижö кывтэчасъяс роч кыв вылын, челядь вуджöдöны коми кыв вылö да гижöны: синяя кофта (лöз ковта), красный сарафан (гöрд сарапан), новые туфли (выль тупли) [Полякова 2004: 220].

Кывъяс гижöм (словарный диктант).

Кывзöмöн либö видзöдöмöн диктант сикас. Аслыспöлöслуныс сыын, мый велöдчысьяс гижöны кывъяс, а оз сёрникузяяс. Гижöм вылö бöрйöны колана орфограммаясöн кывъяс. Кывъяс гижöм овлö öлöданаöн, гöгöрвоöданаöн, донъяланаöн. Тайö диктантыс видзö кад, öтывтö челядьлысь орфограмма аддзан да гижан сям, озырмöдö да сöвмöдö кыввор. Öтка кывъяс гижöм пыртö уджö мырдöн сяма сер, дерт жö, сёрникузя да текст гижöм донъявсьöны вылöджык.

Кывъяс гижöмлöн тöдчанлуныс нöшта и сыын, мый челядь асьныс велалöны лöсьöдавны гижанногысь уджъяс индöм орфограмма вылö, вайöдны сетöм орфограммаа кывъяс дорö мукöдъясöс. Тайö бур велöдан метод: сійö отсалö пуктыны колана велöдчан мотивация, сöвмöдö кужанлун, ас удж бöрся видзöдöм да ассьыд кужöмлунъяс донъялöм. Сöмын челядьлы колö тöдны донъясян критерийяс.

Кывъяс гижöм удж вöчигöн колö велöдны челядьöс вöдитчыны орфография кывчукöрöн, мед найö велалісны и словарöн вöдитчыны, и видлавны, тöдмавны, прöверяйтны ассьыныс кужöмлунъяс.

Свободнöй диктант. Велöдысь диктуйтö текст торъя юкöнъясöн, челядь ас вöлясьыс гижöны гöгöрвоöмсö. Тайö кывъя диктант да изложение костын вуджана сикас да пуктö бур подув челядьöс изложение гижны велöдöмын. Сійö сöвмöдö челядьлысь внимание да паметь, велöдö корсьны лыддьöмторйысь медколанасö да медтöдчанасö, аддзыны логическöй йитöдъяссö кывзöм юкöнысь да гижны ас кывйöн.

Текстъяс пыдди вермасны лоны быдса висьтъяс, ыджда сертиыс найö 1,5 пöв ыджыдджыкöсь быд кывйöн гижан диктант серти.

Свободнöй диктант вылö текст дорö корöмъяс: йитöса текст, кокниа юксьö мöвп сертиыс юкöнъяс вылö (либö абзацъяс вылö), челядьлы гöгöрвоана, интереснöй ; юöртана, проза ногöн гижöм текст.

Свободнöй диктант нуöдан методика. Велöдысь лыддьö текстсö ставнас. Сы бöрын велöдысь лыддьö торъя юкöнъясöн быд юкöнлысь шöр мöвпсö гöгöрвоöдöмöн. Челядь устнöя висьталöны текстсö ставнас, сы бöрын текст лыддьыссьö бара торъя юкöнъясöн. Та бöрын челядь гижöны 3-5 сёрникузяöн быд юкöн.

Литература:

1. Баранов М.Т. Работа по орфографии – Обучение русскому языку в 4 классе. Методические указания. Пособие для учителя. Под ред. Т.А. Ладыженской. М, 1981. С. 7-26.

2. Львов М.Р., Рамзаева Т.Г., Светловская Н.Н. Методика обучения русскому языку в начальных классах. М., Просвещение, 1987.

3. Львов М.Р. Словарь-справочник по методике преподавания русского языка. М., Просвещение, 1990.

4. Львов М.Р., Горецкий В.Г., Сосновская О.В. Методика преподавания русского языка в начальных классах. М., Академия, 2002. С. 318-332.

5. Полякова Э.И. Уроки обучения русской грамоте. Пособие для учителя. Сыктывкар, 2004.

6. Полякова Э.И. Грамотаö велöдан урокъяс. «Анбур» дінö методическöй индöдъяс. Сыктывкар, 2003.