X л е к ц и я: Кывлысь тэчас да артманног велöдöм

1. Кывлысь тэчас велöдöмын шöр тэчасъяс.

2. Кыв тэчас велöдöмлöн могъяс, тöдчанлун да ин.

3. Кывлысь тэчас велöдан подувъяс.

4. Морфемикаысь да кыв артманногысь кужöмлунъяс.

5. Уджын нырвизьяс.

6. Öтвужъя кывъяс вылын удж.

7. Удж сикасъяс.

1. Кывлысь тэчас велöдöмын шöр пасйöдъяс.

Коми кыв методикаын кыв состав велöдан традицияяс абу на тыр зумыдöсь, сы вöсна мый коми языкознаниеын дыр эз вöв туялöма кывлöн морфема тэчас.

Талунъя языкознаниеын стöчмöдöмаöсь морфема сикасъяс. Медуна сьöкыдлун вöлі суффикс донъялöмын. Коми кывйын функция серти суффиксъяс юксьöны куим пельö: 1) кыв вежлалан (эмакывлöн лыд, вежлöг асалан), 2) кыв артмöдан, 3) форма артмöдан (шöркывлöн, ногакывлöн, инфинитивлöн да мукöд). Улыс классъясын удж мунö сöмын кыв вежлалан да кыв артмöдан суффиксъясöн, налы методикаын ми вöзъям и торъя графика пасъяс: ⌂ - кыв вежлалан суффикс, ^ - кыв артмöдан суффикс ^.

Кывйын ёна паськалöмаöсь морфонология петкöдчöмъяс, улыс класса челядь тöдмасьöны некымын петкöдчöмöн. Тайö 1. в – л вежласьöм (чередование): вöв – вöлыс, кöмавны – кöмалі; 2. й, к, м, т шыяслöн эмакыв кыввужйын усялöм: зепт-ыс - зеп, корй-ыс - кор, синм-ыс – син, лыск-ыс – лыс.

Й, к, м, т шыяса да усьöм шыяса кыввужлöн вежöртасыс öткодь, найö торъялöны сöмын шыяс боксянь, тайö алломорфъяс.

В – л вежласьöмъяс паныдасьлöны кыдзи кыввужйын, сідзжö и кыв артмöдан суффиксын да сідзжö лоöны öти и сійö жö морфемаöн, либö алломорфъясöн: пом-ав-ны - пом-ал-і.

Кыв тэчас велöдан методикаын мыджсям роч методикаын примитöм принципъяс да велöдан пöрадок вылö.

2. Кыв тэчас велöдöмлöн могъяс, тöдчанлун да ин.

Могъяс

- тöдмöдны кыввужйöн кыдзи кывлысь шöр кыввор вежöртас новлöдлысь юкöнöн

- тöдмöдны öтвужъя кывъясöн кыдзи челядьлысь тöдчана кыв озырмöдан туйöн да кывлысь кыввор вежöртас гöгöрвоöдан средствоöн

- тöдмöдны кывлöн морфема тэчасöн: кыввуж, кыв вежлалан суффикс, кыв артмöдан суффикс

- тöдмöдны суффиксъяслöн торъя функцияясöн да вежöртасöн: вежлöг, лыд, кад, морт да кыв артмöдысь суффиксъяс

- тöдмöдны, мый разнöй кывсикасъяслы лöсялöны торъя кыв вежлалан да кыв артмöдан суффиксъяс: -яс – эмакывлы, -ышт – кадакывлы, -са – кывбердлы; - тöдмöдны ясыд да кокни примеръяс вылын кыв артман элементъясöн.

Кывтэчас велöдöмлöн тöдчанлун.

- челядь бурджыка да пыдіджыка гöгöрвоöны кывлысь кыввор вежöртас да суффикс отсöгöн артмöм рöмъяс

- кывсикас велöдігöн кыв вежлалан суффиксъяслысь вежöртас велöдöм отсалö пыдіджыка тöдмавны кывлысь торъя грамматика вежöртас

- уналаын морфема тэчас отсалö кыв гижанногын кыдзи кызджык,вöтчыны кывъясын

- öтвужъя кывъясöн тöдмасьöм озырмöдö кыввор, отсалö пыдіджыка кывлысь вежöртас гöгöрвоöдöмын

- кывтэчасöн уджъяс сöвмöдöны челядь вежöр

Кыв состав велöдöм заводитчö мöд классянь öтвужъя кывъяс велöдöмсянь. Коймöд классын кывлöн тэчас велöдöм мунö элементарнöя: челядь вынсьöдöны кыввуж да тöдмасьöны кыв вежлалан да кыв артмöдан суффиксъясöн. Водзö, коймöд классын, кывсикасъяс велöдігöн мунö кывсикасъяслöн кыв вежлалан да кыв артмöдан суффиксъясöн, сложнöй эмакыв тэчасöн тöдмасьöм. Быд кывсикас велöдігöн пыртöмаöсь кыв артмöм вылö сетöм урокъяс. 4 классын кывлöн тэчас да артманног сöвмöны водзö. Форма артмöдан суффиксъяс (эмакывлöн -ук, -иль, -тор, кывбердлöн -ик, -иник, кадакывлöн -ышт, -ав, -ась, -öд) улыс классъясын видлавсьöны кыдзи кыв артмöдан: нылук, кöчиль, нöктор, дженьыдик, важиник, сейыштны, петавны, юктасьны, нуöдны.

3. Кывлысь тэчас велöдан подувъяс.

1) Кыв тэчас велöдсьö топыд йитöдын.

А. Кывлöн кыввор вежöртаскöд

Б. Кыв артманногкöд

В. Кывлöн стилистика вежöртаскöд (ручиль, чойиль, нылук, воканöй, зыньгун)

Г. Кывлöн морфонология петкöдчöмъяскöд (в\\л, й, к, м, т \\ ф, ы,ö \\ ф).

2) Кыв тэчас видлавсьö сöмын лексика боксянь бура гöгöрвоана кывъяслöн.

3) Морфема тэчас видлавсьö сöмын тэчас боксянь ясыд кывъяслöн.

4) Наглядность, торъя нин графическöй пасъясöн вöдитчöм: ∩ - кыввуж, ⌂ - кыв вежлалан, ^ - кыв артмöдан суффикс пасъясöн.

5) Удж пуктыны сідзи, мед сійö отсаліс гöгöрвоны коланлунсö, кутны инсö да вежöртассö быд велöдан морфемалысь, уджын практическöй нырвизь.

6) Рочысь пырöм кывъяс оз ков босьтны морфемаяс серти видлалöм вылö.

4.Морфемикаысь да кыв артманногысь кужöмлунъяс.

- öткодь кыввужъя кывъяс тöдмалöм да аддзöм

- öткодь кыввужъя кывъяс торъя кыв грамматика формаясысь торйöдöм

- эмакывлысь, кадакывлысь лыд, вежлöг, асалан, кад петкöдлысь кыв вежлалан суффиксъяс кывйысь аддзöм

- ясыд вежöртаса кыв артмöдан суффиксъяс кывйысь аддзöм

- кыв тэчас да кыв артманног серти ясыд тэчаса кывъяс видлалöм

- кыввужйысь й, к, м, т усялысь шыяс, в\\л да ö, ы \\ аддзöм

- кокньыдджык кывъяслысь суффикс отсöгöн да кык кыв содтöмöн артманног тöдмалöм.

5. Уджын нырвизьяс.

- öтвужъя кывъяс аддзöм, гöгöрвоöдöм, наöн кыввор озырмöдöм;

- кыв вежлалан суффиксъяс кывйысь аддзöм, налысь кывсикасын грамматика вежöртас тöдöм (козъяс – яс эмакывлöн уна лыд петкöдлысь суффикс)

- кыв артмöдан (на чукöрын тшöтш и форма артмöдан керкашой, пиук, шочиник, петыштны) суффиксъяс кывйысь торйöдöм, налысь вежöртас тöдмалöм (чукöра, кöмтöм, гажаин, озырлун, солыштны)

- суффиксъяс костын синоним, антоним отношениеяс аддзöм да гöгöрвоöм (номъя – номйöсь, лунъя – лунся, чуня – чуньтöм)

- суффиксъяс костысь омоним отношениеяс аддзöм да гöгöрвоöм: сиктö-локтö, мунны – локтісны, шондіа – гижа)

- морфонология петкöдчöмъяс, либö шы вежласьöм да усялöмъяс вылын удж нырвизь: мöс – мöскöй, гöп – гöптыс, вöв – вöлыд, гöтыр – гöтрасьö

- кыв артманног вылын удж: видз-му ← видз, му; арся ← ар, важмыны ← важ

- кывлысь тэчас тöдмалöм: öшиньтöм,жургö,туйвывса,вежны.

6. Öтвужъя кывъяс вылын удж.

Удж сикасъяс

1) Кыввуж аддзöм, торйöдöм

Индыны кывйысь кыввуж: скöра,скöрмис,скöрысь, скöркодь

2) Öтвужъя кывъяс тöдмалöм да аддзöм:

а) Сетöм кывъяс пиысь öтвужъя кывъяс аддзöм: б) матын вежöртаса пиысь öтвужъяясöс аддзöм: важ, мисьтöм, важся, важиник; в) омонимъяс пиысь öтвужъяясöс аддзöм: сывйыштны, сывъявны, сывдыны; г) сетöм кыв гозъясысь грамматика форма пиысь öтвужъяясöс аддзöм: тыш – тышкасьöны, вöр – вöръяс, пызан – пызансянь; д) сетöм кыв дорö вайöдны öтвужъяöс: тшын - …

7. Кыв вежлалан суффиксъяс велöдöм да налысь грамматика вежöртас гöгöрвоöдöм

А) Эмакывлысь грамматика вежöртас да кыв вежлалан суффикс öткодялöм (тест ногöн удж сетöм):

а) лыд петкöдлысь суффикс пызан - ыс О

б) асалан суффикс вöр - лань О

в) вежлöг суффикс öдзöсъ - яс О

Б) Кадакывлысь лыд, кад, морт вежöртас да сійöс петкöдлан кыв вежлалан суффикс öткодялöм

а) колян кад петкöдлысь суф. гымал – ö О

б) öнія кад 3 морт петк. суф. серал – і – с О

в) медводдза морт öнія кад петк-сь суф. юöрті – н О

г) мöд морт петкöдлысь суф. шойчч – а О

д) 3 морт уна лыд петкöдлысь суф. ньöбасис – ны О

В) Öткодь грамматика вежöртаса суффиксъяс классифицируйтöм .

1) Кык торъя чукöрö сетöм суффиксъяс юклöм: -öй, -сянь, -ыд, -кöд, -ыс, -тöг.

Г) Кывсикас да сылы лöсялысь кыв вежлалан суффикс öткодялöм.

а) Эмакывлы лöсялана суф. -яс

б) Кадакывлы лöсялана суф. -лы

-ысь

-и

- ны

Д) Кыв артмöдан суффиксъяс да налысь вежöртас гöгöрвоöдöм.

1. Сетöм суффиксöн выль кыв артмöдöм да сылысь вежöртас гöгöрвоöдöм вылö

1) Артмöдны выль кывъяс сетöм суффиксöн: -тöм (-а), кизь, чунь, кепысь кывъясысь.

2) Артмöдны кадакывъяс -ышт, -ав, суффиксъясöн сетöм кывъясысь: сёй, сов.

Е) Суффиксъяслысь вежöртас гöгöрвоöдöм вылö

1. Тöдмавны, кутшöм вежöртас сетö кывйыслы -ов суффикс сетöм кывъясын: гöрдов, рудов, лöзов.

2. Мый öткодьыс суффикс вежöртаслöн сетöм кыв гозъясын?

Сьöдкодь - нюдзкодь, ньöбыштіс - курыштіс, шойччанін - оланін.

1. Сетöм кывбердъясысь суффикс отсöгöн артмöдны меліалан вежöртаса кывъяс. Ичöт, муса, кос.

Ж) Грамматикаысь тöдöмлунъяс да кужанлунъяс сöвмöдöм вылö.

1. Кывсикаслы лöсялана кыв вежлалан суффиксъяс тöдмалöм

1) Кутшöм кывсикаслы лöсялöны сетöм кыв вежлалан суффиксъяс?

-а, -ö, -кöд, -ті, -ла, -н, -с.

2) Тöдмавны тэчасö дзебсьöм кывсикас.

⌂, ∩ ⌂, ∩ ⌂⌂.

3) Вайöдны асалан (вежлöг, лыд) суффиксъяс эмакывлысь.

3) Тöдöмлунъяс системаö вайöдöм могысь

1) Нуöдны водзö кыв радсö: воклысь, чойлы, …

2) Шыбитны лöсявтöм кывсö: надзмис, гöгöрті, лöсьöдча, тэрмасин.

Морфемаяс костын омонимия лöсялöм аддзöм да гöгöрвоöм вылö.

1. Суффиксъяс костысь öткодьлун да торъялöм аддзöм да гöгöрвоöдöм вылö.

1) Сетöм кыв гозъяслöн суффиксъясысь аддзöй öткодьлун да торъялöм.

Ытшкöмин - шуин, шырысь - йöктысь, сиктöд - торйöд.

2) Вежöртас серти лöсявтöм суффикс кывсö торйöдöм: муна, локта, дона, котöрта.

Литература:

1. Прокушева Т.И., Артеева А. и др. Работа над морфемикой и словообразованием по коми языку. – Проблемы начального образования в вузе и школе. Сб. статей по итогам конф. Сыктывкар, 2002. С. 87-88.

2. Прокушева Т.И. Велöдчан небöгъясын кыв тэчас да артманног юкöн вынсьöдöм вылö видзöдлас. – Национально-культурные и гуманистические традиции в развитии образования РК. Матер. конф. Сыктывкар, 2002. С. 161-165.

3. Прокушева Т.И. Структурно-семантическая организация сложных слов - ботанических терминов и приёмы работы в школе. – Краеведение в Республике Коми: история, современность, перспективы. Матер. респ. конф. Сыктывкар, 2004. С. 306-309.

4. Прокушева Т.И. Элементы изучения коми топонимической лексики в начальной школе. – Начальная школа: воспитание, образование. Сборник статей. Сыктывкар, 1995. С. 83-92.

5. Прокушева Т.И. Проблемы работы над составом слова в коми языке в начальных классах. - Непрерывное профессиональное образование: проблемы, поиски, решения. Матер. конф. Сыктывкар, 2000. С. 294-296.

6. Прокушева Т.И. Интегрированный подход к изучению состава слова в младших классах. – Развитие интеграционных процессов в педагогическом образовании. Матер. респ. Конф. Тезисы и доклады. Сыктывкар, 2002. С. 87-88.

7. Львов М.Р., Горецкий В.Г., Сосновская О.В. Методика преподавания русского языка в начальных классах. М. Академия, 2002.

8. Прокушева Т.И. Работа над морфемным составом слова в начальных классах и углублении знаний о мотивированности слова. ж. Чужан кыв. Сыктывкар, 1990, № 5-6. С. 30-32.

9. Прокушева Т.И. Начальнöй коми школаын кыв состав велöдöм. ПМНО-са коми отделение вылын велöдчысь студентъяслы велöдчан пособие. Сыктывкар, 1995.

10. Русский язык в начальных классах. Теория и практика обучения. Под ред. М.С. Соловейчик. М, Просвещение., 1993. С.170-190.