II л е к ц и я: Школаын коми кыв велöдан методъяс

«Кыдзи велöдны» юалöм вылö корсьысигöн педагог мытшасьö методö. Метод – велöдан процессын медшöр юкöн, сiйö йитö велöдан мог да челядьлысь тöдöмлун да кужанлун костысь чепсö [Подласый 2005: 470]. Асьсö метод понятие педагогикаын öткодялöны кристаллкöд, кодлöн эм уна пельöса веркöс. Методъяс позьö сикасавны уна подув серти –

1) тöдöмлун босьтöм серти (практика, наглядность, теория велöдöм)

2) велöдöмлöн коланлун серти (выль тöдöмлун босьтöм, кужанлун да велалöм сöвмöдöм), тöдöмлунöн вöдитчöм, творческöй удж лöсьöдöм, тöдöмлун да кужанлун донъялöм, информация босьтан туй тöдмалöм)

3) дидактика могъяс серти (выль тöдмалöмтор тöд вылö босьтан методъяс, тöдсатор вынсьöдан методъяс)

4) выльтор тöдмалан удж сикас серти (познавательная деятельность сикас серти) (обьяснительно-иллюстративнöй, репродуктивнöй, проблемнöя выльтор сетöм, частично-поисковöй, туялана) [Подласый 2002: 473-486]

Кыв велöдан методикаын тадзи сикасавсьöны кывйö велöдан методъяс:

- кыв видлалöм (анализ - грамматика, лексика, фонетика боксянь да с.в.)

-конструируйтöм

- сравнительно-историческöй

- петкöдлана (нагляднöй)

- велöдысьлöн висьталöм

- корсяна, туялана (поисковöй), либö эвристика

- ворсöм

- коммуникативнöй

- программирование метод

- моделирование

Кыв видлалöм (анализ , разбор)

Кыв видлалöм челядьöс велöдöмын кутö тöдчана места. Анализ, либö разбор дырйи кывсö юклöны уна пельö кывйöн петкöдлан грамматика, либö лексика, либö мукöд вежöртас серти, медым бурджыка пырöдчыны велöданторйö.

Быд классын кыв анализ абу öткодь, кыв анализ мунö сöмын сiйö кыв признакъяс серти, мый велöдöма уджтас серти. Анализ сикасъяс овлöны:

- текст видлалöм

- синтаксис боксянь видлалöм (сёрникузя)

- морфология боксянь (кыдзи кывсикас)

- кыв тэчас (морфемаяс) боксянь

- кыв артманног боксянь

- лексика боксянь

- фонетика боксянь (шы, шыпас, слог)

М.Р. Львов гаралö и мукöд анализ кыдзи стилистика, сёрни этш донъялан, мича сёрни донъялан, риторика корöмъяс серти дон сетöм.

Вомгора сёрни донъявсьö дикция, артикуляция, шуанног боксянь.

Торъя тшупöдын кыв петкöдчöмлы методикаын лöсьöдöмаöсь торъя тэчасъяс (схемаяс, алгоритм), унджык велöдчан небöгын найöс сетöма тема велöдöм бöрын либö небöг помын, либö небöг форзацын.

Морфология (кывсикас) боксянь видлалан тэчас: тöдмавны кывсикас; висьтавны шöр, подув формасö (нимтан вежлöгын эмакыв); тöдмавны грамматика вежöртас: эмакывлысь – лыд, вежлöг, морт, кадакывлысь – лыд, кад (4 классын морт); индыны кыв вежлалан суффиксъяс.

Синтаксисын кыв юкöдъяс боксянь сёрникузя видлалан тэчас: мöвп да юалöм серти подувпас аддзöм, сiйöс öти визьöн пасйöм; подувпассянь мый вöчö? мый вöчис? юалöм, сетöм да юöрпас тöдмалöм, графическöя кык визьöн юöрпас пасйöм; подувпассянь да юöрпассянь мукöд кывъяс дорö юалöмъяс сетöм; подувпассянь али юöрпассянь сетчö юалöм содтана юкöд дорö тöдмалöм да стрелкаясöн тайö йитöдъяссö петкöдлöм.

Кыв анализöн вöдитчöны и улыс классъясын, и шöр школаын.

Конструируйтöм метод

Конструируйтöм тайö вежöрлöн синтез операция, кор ичöтджык юкöнъясысь да торъясысь чукöрмö, артмö ыджыдджык единица. Кыв велöдöмын лöсьöдöны

- кыв торъя шы, шы чукöр да слогъясысь

- гижöда сёрниын кыв торъя шыпасъясысь (и,к,ь,ö,л,ч)

- кыв торъя сетöм морфемаясысь (-ч, -öд, -ысь, -вел, -лöн)

- öтвужъя кывъяслысь чукöр (поз)

- грамматика признак серти кыв формаяс артмöдöм: артмöдны вежлöг формаяс вöр кывлысь, вежлавны морт серти керка кыв, кад серти – мунö кадакыв

- Кывтэчасъяс сетöм кывсикасöн, сетöм кывйöн, сетöм шöр (йитчысь) кывйöн (кыö кодлы? кыö мый? кыö кыдзи?)

- торъя сикаса сёрникузяяс – шуанног, мог боксянь, паськöдöм – паськöдтöм, прöстöй-тэчаса, сетöм грамматика подулöн, öтсяма юкöдъясöн

- текст-вомгора, гижöда, сочинение, юöртана, серпасалана, мöвпалан; учебнöй

- öтсяма юкöдъяс йылысь текст, мойд да с.в.

Сравнительно-историческöй метод

Тайö методыслöн кык нырвизь: позьö öткодявны да вочаавны, öти-кö, талунъя да историяысь важ петкöдчöмъяс, мöд-кö, талунъя коми кывйысь лексика, грамматика, морфемика явлениеяс татшöм жö явлениеяскöд мукöд рöдвуж да абу рöдвуж кывъясысь.

История боксянь öткодялiгöн унатор тыдовтчас челядьлы кыв историяысь, сöвман законъясысь, чужтас уна юалöм да интерес кыв дорö. Уна юалöм, а сiдзжö и вочавидзöм чужтас коми топонимъясöн, антропонимъясöн, сложнöй кывъясöн удж. Кутшöм вошöм кывъяс йылысь висьталöны татшöм сложнöй эмакывъяс кыдзи зарава, килутш, сэрапом?

Кутшöм вöлöма вежöртасыс мын кывлöн: комын, нелямын, ветымын, квайтымын кывъясын?

Уна тöдöмлун воссяс кыв этимологияысь, кыв мотивируйтан подувъясысь мыйла тадзи шулöмаöсь Кöрткерöс, Сирвад? юалöмъяс вылö вочавидзöм корсигöн.

Роч да коми кыв вочаалiгöн выль ног петкöдчасны абу рöдвуж кывлы лöсялан грамматика категорияяс кыдзи род, вежлöг, асалöм вежöртасъяслöн, фонетикаын да шуанногын аслыспöлöслунъяс, öта-мöд бöрся тыдовтчасны рочысь пырöм лексика пластъяс да заимствуйтiгöн шыяслöн вежсьöмъяс, кыв тэчасын лоöм опрощение, ударение вежсьöм (кильчö, кöш, пöнар, сакар).

Тайö методыс сетö позянлун тöдмавны уна гусятор рöдвуж фин-угор кывъяс олöмысь (Кытысь тöдса мый öти, кык, куим, нель, вит, квайт, ки, син кывъяс вöлöмаöсь фин-угор кадколастö на?)

Нагляднöй, либö петкöдлан метод.

Кыв йылысь сёрнитiгöн наглядность улын медводз гöгöрвосьö пельöн кылантор петкöдлöм, слогъяс вылö кыв юклыны петкöдлöм.

Пельöн кылантор петкöдлöм, либö слухöвöй наглядностьöн вöдитчöны оз сöмын фонетика велöдiгöн, но и шуанногö (орфоэпияö), интонацияö, дикцияö, гöлöсöн диалогын да монологын вöдитчöмö, выразительнöя лыддьысьöмö, сёрникузяын логическöй ударение да пауза, ритм пуктöмö велöдiгöн. Быд выль пыртан кыв, кывтэчас, зумыд кывтэчас, сёрникузя медводз шусьö велöдысьöн.

Зрительнöя, синмöн аддзантор, наглядность паныдасьö графикаын шыпас велöдiгöн (печатный, прописнöй, строчнöй, заглавный), шыпасъяс костын йитöдъяс (соединение) велöдiгöн, каллиграфия боксянь кыв гижны велöдiгöн, орфографияö велöдiгöн.

Кывйö велöдiгöн тöдчана места босьтöны таблицаяс, схемаяс, модельяс, морфемикаын да грамматикаын графическöй пасъяс – кыввуж, суффикс, подувпас, юöрпас. Тайö и пунктуация пасъяс, шуанногö велöдiгöн гöлöс чинтöм да содтöм, кост петкöдлысь пасъяс.

Велöдысьлöн висьталöм.

Кыв урокъяс вылын тшöкыда паныдасьлö выль материал сетiгöн. М.Р. Львов пасйö тайö методöн вöдитчан кадсö, тайö 7-8 минут да падвежасьö мукöд методъяскöд.

Туясян, либö поисковöй метод

Тайö методсö сiдзжö шуöны эвристика, либö индуктивнöй, либö наблюдение, либö поискöвöй методöн. М.Р. Львов шуö, мый тайö методъясыс челядьлысь познавательнöй активность сöвмöдöмын лоöны медвылыс тшупöдынöсь.

Туясян методöн вöдитчигöн челядь асьныс велöдысь юрнуöдöм улын наблюдайтöны, аддзöны закономерностьяс да воöны кутшöмкö кывкöртöдö. Челядь асьныс вöчöны ичöтик открытие. Петкöдлам 3 классын «Кыввужйын й, к, м, т, шыяс» велöдiгöн выль тема туясьöмöн пыртöм.

Сетöм чукöръясын сетöмаöсь кыв формаяс:

Мыш – мышкöй, мышкыд, мышкыс

Ноп – нопйöй, нопйыд, нопйыс

Син – синмöй, синмыд, синмыс

Зеп – зептöй, зептыд, зептыс

Колö тöдмавны кыввуж. Быд кыв чукöрын медводдза кывйыс и лоö кыввужйöн: мыш, ноп, син, зеп. Мыйöн торъялöны веськыдвылын сетöм кывъясыс? Мышкöй, мышкыд, мышкыс кывъяслöн вежöртасыс сiйö жö мыш, но сэнi кыввужйö содтыссьö к шы, кодi, тыдалö, лоö кыввуж юкöнöн. Сiдзи жö и мукöд кыв радъяскöд. Кутшöм шыяс водзын мыш, ноп, син, зеп кыввужъясö содтысьöны гласнöй водзын - й, к, м, т? Сiдзкö, вöчам кывкöртöд: öткымын кыввужйö гласнöй шыяс водзын кыввуж помö содтысьöны й, к, м, т шыяс да артмöдöны кык сикас кыввуж: мыш да мышк -, ноп да нопй - , син да синм - , зеп да зепт - .

Туясян метод – тайö проблемнöя велöдöм, либö проблемно-диалогöвöя велöдöм.

Коммуникативнöй методъяс.

Тайö сёрнитны велöдан – аудирование, говорение, лыддьысьöм, гижöмö велöдан методъяс. Кывлöн быд единица йитчöма сёрнитан могъяскöд, та понда кывлöн быд петкöдчöм петкöдлыссьö сёрниын.

Коммуникативнöй методöн вöдитчан примеръяс:

- лöсьöдны диалог юалана сёрникузя велöдiгöн

- лöсьöдны серпасалана текст öтсяма юкöдъяс велöдiгöн

- лöсьöдны мöвпалана текст сы вöсна мый, сы понда мый

кывйитöдъяса сложнöй сёрникузя лöсьöдiгöн гижанногысь орфограммаяс гöгöрвоöдiгöн

- лöсьöдны делöвöй велöдан тема серти текст – гижанног, грамматика, кыв тэчас темаяс вылö

- лöсьöдны юöртана (серпасалана) текст войвывса быдмöгъяс йылысь сложнöй эмакыв велöдiгöн

- лöсьöдны ёрткöд да петкöдлыны класс водзын диалог мойд серти, лоöмтор серти, телевизор пыр видзöдöмтор серти горöдана сёрникузяяс велöдiгöн

- гижны район газетö заметка пöль йылысь ас нимъяс велöдiгöн.

Тайö методыс лоö медшöрöн челядьöс кывйö велöдiгöн.

Литература

1. М.Р. Львов и др. Методика преподавания русского языка в начальных классах. М., 2002. С. 209-220.

2. И.П. Подласый. Педагогика. Общие основы. Процесс обучения. М., 2005. С. 473 – 507.