IX л е к ц и я: Грамматикаысь, кыв тэчасысь да артманногысь понятие сöвмöдöм

1. Улыс классъясын велöдан кыв понятиеяс.

2. Урок вылын выль грамматика, кыв тэчас понятие пыртöм.

3. Кыв йылысь понятиеяс тöдöмлунъяс системаö вайöдöм(?) да велöдöмын функциональнöй да коммуникативнöй нырвизь.

1. Улыс классъясын велöдан кыв понятиеяс.

Быд теория велöдöмын подулöн лоöны наука понятиеяс. Кутшöм кыв понятиеяс пыртны улыс класса челядьöс велöдöм могысь? Тайö методикалöн зэв тядчана мог. М.Львов шуö, мый роч кывйö велöдöмын улыс класса челядьöс тöдмöдöны 120 унджык понятиеöн. [Львов 2002: 202]

Кыв наука юкöнъяс да наука серти видлалігöн тайö татшöм понятиеяс: кыв да сёрни понятиеяс: сёрни, кыв, текст, вомгора сёрни, гижöда сёрни, лыддьöм, гижöм, кывзöм, висьталöм, сёрникузя, кыв вежöртас, текст-юöртана, серпасалана, мöвпалана;

Фонетикаысь: шы, слог, кыв, ударение, гласнöй, согласнöй, гора да гортöм согласнöй, небыд да чорыд согласнöй, кост (пауза), шуанног, гöлöс да мукöд;

Графикаысь: шыпас, заглавнöй да строчнöй, печатнöй да прописнöй, чут, чутік, юалана да горöдан пас, визь (тире), гöрд строка, абзац;

Грамматикаысь: кывсикас, эмакыв, кадакыв, нимвежтас, кывберд, кывйитöд, вежлöг, лыд, кад, морт, юкöд, грамматика подув, подувпас, юöрпас, сюрöса, сюрöстöм юкöд;

Морфемика да кыв артманногысь: кыввуж, кыв вежлалан суффикс, кыв артмöдан суффикс, усялысь шы, вежласьысь шыяс, öтвужъя кывъяс;

Лексикаысь: кыв вежöртас, вуджöдöм вежöртас, синоним, антоним, уна вежöртаса кыв, торъя профессиялы лöсялана кывъяс;

Кыв теория да йитöса сёрниысь: сочинение, диалог, этш тöдана сёрни, изложение, шмонь монолог висьталöмлöн адресат.

Понятие – ас гöгöрса олöмлöн тöдчана признакъяс пыр петкöдчöмторъяс йылысь абстрактнöй мöвпалан форма. Челядь вежöрын понятие сöвмö оз сразу, сы сöвмöмын М.Р. Львов индö татшöм тшупöдъяс [Львов 2002:202]:

1. Эмпирическöй, либö опытнöй. Челядь вöдитчöны кывйöн, наблюдайтöны сы бöрся, унатор тöдмалöны сы йылысь, сылöн мукöд кывъяскöд йитöдъяс да лöсялöмъяс йылысь, тöдчана признакъяс йылысь. Тайö тшупöдын кыв йылысь понятие сöвмö во гöгöр велöдöмöн.

2. Теория тшупöд. Кыв понятиелы сетчö термин. Уна понятиелы сетчö и определение (эмакыв, кадакыв, подувпас да с.в.).

Определение овлö описательнöй, либö серпасалана (öткодь вужъя кывъяс шусьöны öтвужъя кывъясöн. Подувпас – сійö серникузяын сюрöса юкöд. Сійö петкöдлö, код йылысь либö мый йылысь висьтавсьö сёрникузяас. Подувпас вочавидзö коді? да мый? юалöмъяс вылö), функциональнöй (Кывйитöд йитö кывъяс да сёрникузяяс. Кыв вежлалан суффикс йитö серникузяясысь кывъяссö öта-мöдыскöд да отсалö стöча гöгöрвоны висьталан мöвп), да структурно-логическöй:

кадакыв – 1. тайö асшöр кывсикас;

2. сылöн тöдчана признакъяс

- вежласьö лыд серти;

- вежласьö кад серти;

- вежласьö морт серти;

3. сёрникузяын функция: векджык овлö юöрпасöн.

Структурно-логическöй определениеын понятие тöдчöдöма 1) сылöн гырысьджык понятие дорö отношение пыр (тайö кывсикас); 2) индыссьöны медтöдчана признакъяс; 3) гöгöрвоöдчö функция боксянь.

3. Понятие джудждаммöдöм.

4. Понятие сöвмö выль признакъяс тöдмалöм пыр. Öти понятиеяс улыс школаын гöгöрвосьöны став, куимнан тшупöд пырыс, кыдзи шы, шыпас, сёрникузя, эмакыв, кадакыв, кывберд, кыввуж, суффикс, мукöдъяс – сöмын öти тшупöд вылын кыдзи ногакыв, ногапас. Наöн челядь вöдитчöны сёрниын, вермöны сетны юалöм.

Урок вылын выль грамматика, кыв тэчас понятие пыртöм.

Традиционнöй методикаын выль грамматика понятие пыртöм тэчсьö логика боксянь нёль тшупöд вылö:

I. Кывйысь конкретнöй материал пыртöм. Тайö вермас лоны текст, сёрникузя, кывъяс, кыв форма (гижöда да вомгора ногöн, мед сійöс öтьведайтны (наблюдайтны) да аддзыны налысь медтöдчана признакъяссö. Тайö тшупöдас колö öтдортчыны конкретнöй кыввор вежöртасысь да видзöдны кывлöн грамматика аслыспöлöслун вылö абстрагирование да анализ юр вежöр операцияяс пыр.

II. Кыв петкöдчöмлысь грамматика аслыспöлöслунъяс аддзöм да öтвывтöм (эмакыв: предмет вежöртаса, вочавидзö коді? мый? юалöм вылö). Термин пыртöм. Ыджыдалöны öткодялöм (сравнение) да синтез операцияяс.

III. Определение сетöм. Явлениелысь признакъяс да йитöдъяс стöчмöдöм. Определение сетны вермасны асьныс челядь, либö велöдыськöд, либö учебник серти.

IV. Выль грамматика понятие дзик выль лингвистика материал вылын вынсьöдöм. Бурджык став классын устнöя удж вöчöм, медым тöдмавны, гöгöрвоисны-ö челядь выль материал. Челядь тöдмалöны выль кыв понятие, форма выль текстысь либö вайöдöны асьныс выль примеръяс [Львов, Рамзаева, Светловская 1987: 202-203].

Мыччöд вылö. Тема: кыв вежлалан суффиксъяс.

I. Текст. Пöль да пöч олöны важ пу керкаын. Миян керкасянь на керкаöдз абу ылын. Пöль керкалань нуö веськыд ордым.

II. Аддзöй да визьнитöй став керка кывсö. Индöй керка кывлысь вежласян юкöнсö, тайö -ын, -сянь, -öдз, -лань. Кыдзи мукöд кывъяскöд йитчöмаöсь тайö кывъясыс? - олöны керкаын, абу ылын керкасянь, абу ылын керкаöдз, нуö керкалань. Эз кö вöвны тайö кыв юкöнъясыс керка кывлöн , ёна-ö эськö позис гöгöрвоны висьталанторсö? (олöны керка, абу ылын керка, …). Сідзкö, мыйла колöны тайö кыв юкöнъясыс? – йитлыны кывъяс öта-мöдыскöд. – Тайö суффиксъяс, стöчджыка кö, кыв вежлалан суффиксъяс. Найö сулалöны кыввуж бöрын.

III. Определение пыртöм. Кывлöн вежласян либö содтысян юкöн шусьö кыв вежлалан суффиксöн. Кыв вежлалан суффикс колö кывъяс öта-мöдкöд йитлöм могысь.

IV. Вайöдöй торъя сёрникузяяс сикт кывйöн, мед сэні вöлісны öта-мöдсьыс торъялана кыв вежлалан суффиксъяс, либö торйöдöй сетöм кывъясысь кыв вежлалан суффиксъяс:

сиктысь сиктлань сиктсянь сиктлöн

3. Кыв йылысь тöдöмлунъяс системаö вайöм да велöдöмын функциональнöй да коммуникативнöй нырвизь.

Челядьлысь кыв йылысь торъя тöдöмлунъяс колö вайöдны системаö, мед челядь аддзисны, кыдзи кывлöн петкöдчöмъяс йитчöмаöсь мукöдъяскöд да мыйла колöны быдöн йöз сёрниын. Челядьлы колö петкöдлыны, мый кыв – уна тшупöда система, и быд тшупöд топыда йитчöма öта-мöдыскöд.

Кыв тшупöдъяслöн система:

вомгора тшупöд: сёрни шыяс, слог, ударение, шуанног, гöлöс;

морфемаяс тшупöд: кыввуж, суффикс;

кыввор (лексика) тшупöд: кыв, кыввор вежöртас;

морфология тшупöд: кывсикас, грамматика вежöртас – лыд, кад, морт, вежлöг, кывлöн вежласьöм, асалан вежöртас;

синтаксис тшупöд: кывтэчас, сёрникузя, сёрникузя сикасъяс, сёрникузяса юкöдъяс, прöстöй, тэчаса сёрникузя;

текст, либö йитöса сёрни тшупöд: текст.

Кыв система йылысь тöдöмлунъяс челядь босьтöны öтув, параллельнöя. Шуам, эмакывлöн уна кыв вежöртаскöд тöдмöдігöн челядь тöдмасьöны уна лыд петкöдлысь –яс суффиксöн, либö грамматика вежöртас тöдмалігöн тöдмалöны и сійöс петкöдлан морфемика юкöнын петкöдчан средствосö – -яс суффикс.

Подувпас велöдігöн тöдмасьöны сійöс петкöдлан морфология средствоясöн – эмакыв, нимвежтас, а сідзжö синтаксисын петкöдчысь единицаöн-кывтэчасöн (Никита дедыскöд лöсьöдчöны чери кыйны). Либö лексика юкöн велöдігöн тöдмасьöны, кутшöм стиля текстын паныдасясны сетöм кывъясыс (шондіöй – мамöй, гöрд сыръя чышъян, эзысь тöлысь).

Функциональнöй нырвизь петкöдчö кывсö, кыв формасö, кыв петкöдчöмсö коланаинö сёрниын да ыджыдджык кыв тшупöдын вöдитчöмын аддзигöн: Кутшöм шытöг слог оз вермы лоны? ( гласнöйлöн функция - слог артмöдöм). Кытшöм кывсикас артмöдöны –са, -тöм суффиксъяс? (суффиксъяслöн функция кыв артмöдöм). Мыйöн петкöдлыссьö сёрникузяын юöрпас? (кадакывлысь синтаксис функция гöгöрвоöдöм вылö).

Коммуникативнöй нырвизь топыда йитчöма функциональнöй нырвизькöд. Коммуникативнöй, либö сёрни могъяслöн коланлун, быд петкöдчöм донъялö да пуктö ас местаö сёрни, текст боксянь.

Литература:

1. Львов М.Р. и др. Методика …, 2002, с. 202 – 209.

2. Львов М.Р. и др. Методика обучения …, 1987. С. 202-203.

3. Русский язык в начальных классах. Теория и практика обучения. Под ред. М.С. Соловейчик. М., Просвещение, 1993. С. 191 – 205.