XIV л е к ц и я: Кадакыв велöдöм

Кадакывлöн грамматикаысь улыс класса челядь тöдмасьöны кадакывлöн быд форма дорö юалöмъясöн, лыд, кад, морт серти вежласьöмъясöн. Медводдза да мöд классын кадакыв дорö пуктыссьö став юалöмыс эмакывсянь да нимвежтассянь: Мый вöчны? Мый керны? Мый вöчö? Мый вöчис? Мый вöчис? Мый вöчас? Мый вöчан? Мый вöчин? Мый вöчас? Мый вöча? Мый вöчи? Мый вöчöны? Мый вöчисны? Мый вöчасны? Мый вöчанныд? Мый вöчинныд? Мый вöчасны? Мый вöчам? Мый вöчим?

Выль уджтас серти мöд классын мунö тöдмасьöм кадакывкöд кыдзи кывсикаскöд: «Действие петкöдлысь кывъяс шусьöны кадакывйöн». Мöд классын жö кадакыв гöгöрвоöдчö кыдзи юöрпас. Кыввор вежöртас вылын удж мунö грамотаö велöдöмсянь да пыр паськалö. Кадакыв петкöдлö пространствоын мунысь действие (котöртö), керöм-вöчöм (петкöдчö, киськасьö), петкöдлö вежöр удж (мöвпалö, решайтö), сьöлöмкылöм (эмоциональнöй), да психическöй состояние (радлö, нимкодясьö, шогсьö), физическöй состояние (доймö, висьö) состояние да признак вежсьöм (бурдö, пöрысьмö, томмö, вижöдö, чорзьö).

3 классын уджтас серти мунö водзö кадакывлысь кыввор вежöртас паськöдöм, кадакывъяслöн лыд да кад серти вежласьöм, кадакывъяслöн суффиксъяс серти артмöм.

4 классын уджтасö пыртöма кадакывлöн морт серти вежласьöм, кывподöн тöдмасьöм, кыка кадакывъяс артмöм да найöс гижöм.

Кадакывлысь лыд, кад да морт серти вежласьöм видлалігöн велöдчысьяс тöдмасьöны найöс петкöдлан кыв вежлалан суффиксъясöн. Грамматика формаяс велöдан формальнöй видзöдлас топыда колö йитны и наöн петкöдлан грамматика вежöртасöн (мый петкöдлö колян кад, морт, лыд) да коммуникативнöй функцияясöн. Коммуникативнöй функция петкöдчö сёрникузяын, текстын. Та понда кадакывлысь грамматика формаяс велöдігöн велöдчысьяс наблюдайтöны, асьныс лöсьöдöны сёрникузя, текстъяс кадакыв формаясöн, исправляйтöны текстысь грамматикаын тырмытöмторъяс.

Кывпод – кадакывлöн шöр вежласьтöм форма. Сылöн эм кыввор вежöртас, но сійö оз петкöдлы ни лыд, ни кад, ни морт. Кывпод вочавидзö мый вöчны? мый керны? юалöмъяс вылö. Колö петкöдлыны, мый кывпод оз ло öтвужъя кывйöн, а сійö кадакывлöн шöр форма.

Удж сикасъяс

I. Кадакыв кыдзи кывсикас, сылöн кыввор вежöртас, определение тöд вылö уськöдöм.

- сетöм текстысь кадакыв аддзöм

- сетöм юалöм вылö (мый вöчис?) лöсялана кыв (кадакыв) вайöдöм

- индöм (сетöм) кадакыв дорö юалöм пуктöм

- сетöм кывъяс дорö юалöм серти кадакыв вайöдöм: ю (мый вöчö?) …

- кадакывлысь юалöмъяс вайöдöм

- кадакывлысь сёрникузяын юкöд тöдмалöм: Гажаа ломалö бипур.

- сёрникузяын чутъяс местаö лöсялана кадакыв пуктöм: Нывка … град.

- сетöм кадакыв дорö антоним (синоним) вайöдöм

- грамматика боксянь кыдзи кывсикас видлалöм

- мукöд кывсикасысь кадакыв артмöдöм

- кывбердлы, эмакывлы öтвужъя кадакыв вайöдöм

- кыдзи тöдмавны кадакыв? юалöм вылö вочавидзöм

II. Кадакывлöн лыд серти вежласьöм

- сёрникузяын (текстын) кадакыв дорö юалöм пуктöм: Челядь важöн нин мунісны гортаныс (С.Р.)

- уна лыда кадакывъясысь öтка лыдаöс артмöдöм: видзöдöны - …, мунім - …, да мöдарö

- öтка лыда кадакывъяс дорö юалöм сетöм: кынмис, олö, муна да, мöдарö, уна лыда формаяс дорö юалöм сетöм

- сетöм сёрникузяын колана лыда кадакывъяс гижöм: Векньыдик пода туй писькöдч… кузь сук турун пöвстті (С.Р.)

- шуöм тема вылö öтка (уна) лыда кадакывъяс вайöдöм велöдчан предметъяс, гортса уджъяс вöчöм, ывлаын петкöдчöмъяс йылысь да с.в.

- öтвужъя уна лыда кадакывъяс вайöдöм: дöзмис - …

- зумыд кывтэчасъяс сэтшöм жö лыда лöсялана кадакывъясöн вежöм: юрси сувтiс - …, места вылын кынмылі - …

- уна лыд петкöдлысь суффикс индöм: котöртам, котöртанныд, котöртöны

- öти лыд мöд лыд вылö вежöм: муна → …(мунö)

- кыдзи тöдмавны лыд? юалöм вылö вочавидзöм.

III. Кадакывъяслöн кад серти вежласьöм.

- тшöктöм када кадакыв артмöдöм: артмöд колян када кадакыв босьтны кывлысь

- сетöм кадакывъяслысь кад тöдмалöм: Öтчыд гожöмнас ме дорö карысь локтіс Андрей (С.Р.)

- индöм кадлысь став юалöмсö тöд вылö уськöдöм

- юалöм дорö вайöдны лöсялана када кадакывъяс: мый вöчин? Мый вöчöны?

- кадакывлысь кад серти вежласьöм таблицаын петкöдлöм, таблица лöсьöдöм

- кад петкöдлысь суффиксъяс кывйысь петкöдлöм

- öти кад мöд кад вылö вежöм: лыддян → …(лыддин)

- сёрникузяын лöсялана када кадакывъясöн вöдитчöм: кодкö гöстьяс пиысь горöд …: «Вай биас … да пус …». – Ми юлякöд кай… берегас да биас … (С.Р.)

- паныд (матын) вежöртаса öти и сійö жö када кадакыв вайöдöм: босьтіс - … , лэптіс - …

- кыдзи тöдмавны кад? юалöм вылö вочавидзöм.

IV. Кадакывлöн морт серти вежласьöм.

- сетöм кадакыв морт серти вежлалöм

- сетöм кадакывлысь морт тöдмалöм

- морта форма дорö юалöм сетöм

- юалöм серти морта форма тöдмалöм (вайöдöм)

- öти морта форма мöд морта формаöн вежöм

- текстö лöсялана морта кадакыв пыртöм (артмöдöм): Карса гöстьяскöд ми вуграс … (С.Р.)

- кадакывлысь морт серти вежласьöм таблицаын петкöдлöм, таблица лöсьöдöм

- морт серти вежласян формаяс пиысь тырмытöмсö тöдмалöм: ньöба, ньöбан, ньöбö, ньöбам, ньöбöны

- грамматика боксянь кадакыв кыдзи кывсикас видлалöм

- кыдзи тöдмавны кадакывлысь морт юалöм вылö вочавидзöм

V. Кывпод форма

- кывпод дорö юалöм пуктöм

- юалöм вылö кывпод форма вайöдöм

- морта, када да лыда формаяслысь кывпод аддзöм

- кывподлысь суффикс индöм

- кывподöн сёрникузя лöсьöдöм

- кывподысь морта, када, лыда формаяс артмöдöм

- кыдзи тöдмавны кывпод? юалöм вылö вочавидзöм

Литература

1. Прокушева Т.И. Методика обучения коми языку в начальных классах. Грамматика и орфография. Учебное пособие для студнтов ФПМНО.

2. Прокушева Т.И. Улыс классъясын коми кыв велöдан методика. Грамматика да гижанног. ФПМНО-са студентъяслы велöдчан пособие.

3. Баранов М.Т., Ладыженская Т.А. и др. Методика преподавания русского языка. Для филологических факультетов. М., 1990.

4. Мельникова Е.Л. Проблемный урок , или Как открывать знания с учениками. Пособие для учителя. М., 2002.

5. Сажина М.И. Пути повышения качества обучения коми и русскому языкам в начальной школе. Сыктывкар, 1990.

6. Артемова Е.Г., Сажина М.И., Грабежова В.М. Начальнöй школаын коми кыв велöдöм кузя методика. Сыктывкар, 1990.

7. Полякова Э.И. Коми кыв. Мöд класслы велöдчан небöг. Пробный учебник. Сыктывкар, 2006.

XV – XVI л е к ц и я: Улыс классъясын синтаксис да пунктуация велöдöм.

1. Улыс классъясын синтаксис да пунктуация велöдан предмет.

2. Сёрникузя, сылöн аслыспöлöслунъяс могъяс да нырвизьяс

3. Улыс классъясын сёрникузя велöдан тшупöдъяс

4. Сёрникузя вылын удж

5. Пунктуация вылын удж

6. Кывтэчас да кыв вылын удж

1. Улыс классъясын синтаксис да пунктуация велöдан предмет.

Улыс классъясын синтаксис велöдöм улын гöгöрвосьö кывтэчас, сёрникузя да текст вылын удж. Медыджыд удж мунö сёрникузя вылын, этшаджык – кывтэчас вылын. Текст вылын удж мунö йитöса сёрни сöвмöдöм пыр, сы понда тайö юкöнас текст оз ло синтаксис темаяс пиын.

2. Сёрникузя, сылöн аслыспöлöслунъяс да сёрникузя велöдöм водзын сулалысь могъяс да нырвизьяс. Мый сэтшöмыс сёрникузя?

Мый колö тöдны улыс класса велöдчысьлы сёрникузя йылысь да кыдзи сетны челядьлы?

Сёрникузя – тайö грамматика боксянь колана ногöн йитлöм кывъясысь артмöдöм сёрнилöн медічöт единица, кодлöн эм помасьöм вежöртас да шуанног (интонация).

Кутшöм нырвизьяс пыр колö видзöдны сёрникузя вылö? Öти –кö, сёрникузя – сёрнилöн единица (юкöн), и сы дорö лöсялöны кыдзи и сёрни дорö корöмъяс (висьтавны, шуны коланлун, либö мотивация, висьталантор).

Мöд-кö, сёрникузя-грамматикаысь, синтаксисысь единица, кöні кывъясыс топыда йитчöмаöсь öта-мöдыскöд грамматика боксянь да артмöдöмаöсь торъя тэчасъяс да сёрникузя сикасъяс – горöдана – горöдтöм, чуксалана – юалана – юöртана, паськöдöм – паськöдтö да с.в.

Коймöд-кö, сёрникузялöн эм öтув вежöртас да пом, сідзкö, колö уджавны сёрникузялöн вежöртас вылын, вежöртаслöн рöмъяс вылын, сёрникузялöн тэчас да логическöй ударение понда вежласьысь вежöртас вылын.

Например, кыдзи торъялöны öта-мöдсьыс сёрникузяяс, налöн-кö логическöй ударение усьö разнöй кыв вылö – Öшинь улö сувтіс машина. Öшинь улö сувтіс машина. Öшинь улö сувтіс машина.

Нёльöд-кö, сёрникузяын тöдчана интонациялöн местаыс. Сідзкö, челядьöс колö велöдны аддзыны интонация да вежöртас костысь йитöдъяссö (горöдана, горöдтöм, юалан; юалан, юöртана да чуксалан).

Сідзкö, сёрникузя вылын удж улыс классъясын котыртсьö некымын нырвизьöн да сы водзын сулалöны могъяс.

1. Сёрникузя йылысь грамматика понятие сöвмöдöм.

2. Сёрникузялöн тэчас вылын удж (грамматика подув, сюрöса да сюрöстöм юкöдъяс, сёрникузяын кывъяслöн веськыд да мöдара пöрадок, паськöдтöм да паськöдöм, öтсяма юкöдъяса сёрникузя).

3. Велöдны вöдитчыны сёрниын уна пöлöс сёрникузя сикасöн:

1) висьталан мог серти (юöртана, юалана, чуксалана), 2) шуанног серти (горöдтöм, горöдана, юалан), 3) сёрникузя тэчас да сикас серти (сложнöй, прöстöй, тырмана, тырмытöм, öти тэчаса, кык тэчаса). Велöдны кужана интонацияöн лöсьöдны да висьтавны сёрникузя.

4. Велöдны кужöмöн вöдитчыны сёрниын колана кывйöн, кывтэчасöн, пыдди пуктыны логическöй ударение, стилистикаысь корöмъяс.

5. Лöсялана препинание пасъясöн велöдны гижны сёрникузя.

Сёрни сöвмöдан могъяс олöмö пыртсьöны öтлаын синтаксисысь понятие сöвмöдöмкöд да гижöда сёрниын вöдитчыны велöдöмкöд.

Быд нырвизь да мог öта-мöдыскöд йитчöмаöсь зэв топыда, но торъя классын да торъя тшупöдъясын кутшöмкö мог петö водзöджык:

1 класс - сёрни сöвмöдöм

2, 3 класс - грамматика

4 класс - пунктуация

5 класс - грамматика да пунктуация

8-9 класс - грамматика да пунктуация

Сёрникузя – шöр велöдантор. Синтаксис, либö сёрникузя подув вылын пуктыссьö морфология да лексика велöдöм, сёрникузяын стöча петкöдчö кывлöн лексика вежöртас.

3. Улыс классъясын синтаксис велöдан тшупöдъяс.

Сёрникузя велöдöм пансьö грамотаö велöдöмсянь. Челядь тöдмасьöны сёрникузялöн шöр признакъясöн: сёрникузя петкöдлö помасьöм мöвп, сёрникузялöн эм помасяна шуанног (интонация), сійö артмöма торъя кывъясысь.

Челядь велöдчöны юклыны сплошнöй сёрни сёрникузяяс вылö, петкöдлöны серникузялысь тэчассö графическöя, лöсьöдны сёрникузяяс торъя темаяс вылö, торъя кывъясöн. Грамотаö велöдігöн на челядь велöдчöны тöдмавны, код да мый йылысь мунö сёрниыс, мый висьтавсьö подувпас йылысь (терминъяс пырттöг), велöдчöны пуктыны юалöмъяс öти кывсянь мöд дорö.

Мöд классын уджтасö пыртöма грамматика подулöн, подувпасöн да юöрпасöн тöдмасьöм: «Сёрникузяын эм медшöр кывъяс. Найö шусьöны сюрöса юкöдъясöн да артмöдöны сёрникузя подувсö. Шонді нюмъялö – тайö сюрöса юкöдъяс» (Э.И. Полякова 2 кл.).

«Подувпас – сійö сёрникузяын сюрöса юкöд. Сійö петкöдлö, код йылысь либö мый йылысь висьтавсьö сёрникузяас. Подувпас вочавидзö коді? да мый? юалöмъяс вылö». «Юöрпас – сійö сёрникузялöн сюрöса юкöд. Юöрпас петкöдлö, мый висьтавсьö подувпас йывсьыс».

Подувпас гöгöрвосьö сöмын нимтан падежын сулалысь эмакывйöн, юöрпас – öнія када коймöд морта кадакывйöн.

Мöд классын пыртöма тöдмасьöм сёрникузя сикасъяскöд – горöдана, абу горöдана, юалана да сёрникузя помын препинание пасъяс пуктöмöн. Мунö тöдмасьöм кывтэчас, сюрöса да йитчысь кыв понятиеöн. Мöд классын зэв ёна джудждаммö синтаксис велöдöм: найö вöдитчöны теория понятиеясöн да терминъясöн, уджалöны сёрникузя тэчас да кывъяс костын йитöдъяс вылын. Кывтэчас да сёрникузя велöдöм пыртöма во заводитчигöн, на вылын удж кутас мунны во чöж мукöд темаяс велöдігöн.

3 классын уджтасö пыртöма сёрникузяын содтана юкöдъяс велöдöм. Терминъяс абу пыртöма. Челядь тöдмалöны содтана юкöдъяс юалöмъяс пыр: подувпассянь пуктысьöны кутшöм? да кодлöн? юалöмъяс, а юöрпассянь кöні? кор? кыдзи? мыйла? кодöс? да мукöд. Практическöя паськалö подувпас да юöрпас петкöдлöм: подувпас вермö петкöдлыссьыны кывтэчасöн (Катя мамыскöд), нимвежтасöн, юöрпас-кывбердöн (Пыжйыс выль). Челядь велöдчöны паськöдны да дженьдöдны сёрникузя, вынсялöны да вайöдсьöны системаö шуанног да мог серти корсьöны, грамматика подув, сёрникузяын сюрöса юкöдъяс.

Нёльöд классын уджтас тшöктö тöдмöдны челядьöс öтсяма юкöдъясöн, на костын препинание пасъясöн. Чутік пуктыссьö öтсяма юкöдъяс костын а) найö кö йитчöмаöсь сöмын интонацияöн (Кöрзинаын вöліны ягсеръяс, масленик), б) на костын кö эмöсь а, но йитöдъяс (Ывлаын шоныд, но зэра). Практическöя, понятие да терминтöг, челядь тöдмасьöны сложноподчиненный сёрникузяын препинание пасöн: кыдзи, кор, сы вöсна мый, мый, кöні кывъяс водзын пуктыссьö чутік.

4. Сёрникузя вылын удж.

Сёрникузя донъявсьö уна боксянь – вежöртас, тэчас, мог, шуанног, кывъяс костын йитчöмъяс боксянь, препинание пасъяс боксянь, паськöдтöм да паськöдöм серти, сёрникузяын кывъяс вылö логическöй ударение усьöм серти, юкöдъяс серти – сюрöса да сюрöстöм да с.в.

Та понда грамотаö велöдöмсянь нин серникузя вылын удж нуöдсьö комплекснöя. Челядькöд уджын ыджыд пай босьтö и графическöя (гижöдын) сёрникузя петкöдлöм, а сідзжö гижöдысь сійöс аддзöм да кужöмöн лыддьöм.

Грамотаö велöдчигöн на сёрникузя гöгöрвоöдчö кыдзи помасьöм мöвп петкöдлысь единица. Вомгора сёрниын сійö торъялö мöд серникузяысь костöн (паузаöн). Сёрникузя артмö öти либö некымын кывйысь, сёрникузяын найö торйöдсьöны öта-мöдсьыс. Гижигöн сёрникузя помын пуктыссьö чут, либö горöдана, либö юалан пас. Шуанног серти найö овлöны горöданаöн да горöдтöмöн.

Сёрникузяын вермö мыйкö юавсьыны, сэки помас пуктыссьö юалан пас. Сёрникузяын кывъяс йитчöмаöсь öта-мöдыскöд юалöм да вежöртас серти. Со мыйта тöдöмлун босьтöны челядь сёрникузя йылысь 1 классын.

Улыс классъясын сетан быть колана кужанлунъяс

- сёрникузяяс вылö юклытöм текстысь аддзыны да торйöдны сёрникузяяс

- сёрникузяысь аддзыны грамматика подув

- сёрникузяысь торйöдны кывтэчасъяс, аддзыны сюрöса да йитчысь кывъяс

- аддзыны содтана юкöдъяс юалöмъяс серти

- аддзыны öтсяма юкöдъяс, вöдитчыны сёрниын öтсяма юкöдъясöн

- лöсьöдны да вöдитчыны уна сикас тэчаса сёрникузяясöн вомгора сёрниын

- аддзыны сёрникузяын подувпас, юöрпас, грамматики подув

- вöдитчыны сёрникузя помын чут, юалана да горöдана пасъясöн

- вöдитчыны чутік пасöн öтсяма юкöдъяс костын, сложнöй сёрникузяясын мый, кор, кöні, кыдзи, сы вöсна мый кывъяс водзын.

Сёрникузя кыдзи синтаксис единица

- лöсьöдны сёрникузя индöм тема вылö

- сёрникузяяс вылö юклытöм текстысь торйöдны сёрникузяяс

- гижöм текстысь колана шуанногöн сёрникузяяс лыддьöм

- 2-3 прöстöй сёрникузя йитöм да сложнöй сёрникузя лöсьöдöм

- серпас серти сёрникузяяс лöсьöдöм

- сетöм кыв тэчасъяс сёрникузяö пыртöм

- сетöм кывъяс вылö мыджсьöмöн сёрникузя лöсьöдöм

Сёрникузялысь тэчас гöгöрвоöдöм вылö (грамматика подув, юкöдъяс, öтсяма юкöдъяс)

- сетöм сёрникузяысь аддзыны грамматика подув

- лöсьöдны сёрникузя сетöм подувпас серти (гожöм)

- лöсьöдны сёрникузя сетöм юöрпас серти (воссисны)

- паськöдны сёрникузя (Челядь велöдчöны)

- лöсьöдны сёрникузя сетöм графическöй схема серти

- лöсьöдны сёрникузя, мед кутшöмкö юкöдъяс (подувпас, юöрпас, содтана юкöд) вöлісны öтсямаöн

- юалöмъяс отсöгöн видлавны сёрникузя юкöдъяс серти

- сетöм текстысь аддзыны урчитöм тэчаса сёрникузя

- сёрникузялы тэчас схема сетöм

- деформируйтöм текстысь сёрникузяяс лöсьöдöм (ракаяс, сьöд, позъяс, лöсьöдöны, вылын, пуяс).

- паськöдöм сёрникузя грамматика подулöдз дженьдöдöм

Сёрни сöвмöдöмкöд йитöдын сёрникузя вылын уджъяс

- лöсялана антонимъяс аддзöмöн сёрникузя лöсьöдöм: Ю паськыд, а шор …

- лöсялана фразеологизмöн сёрникузяысь кыв вежöм: Тöвся луныд дженьыд (семудия ылнаын, кöч бöж кузя, вöчтöм гыр кодь)

- фразеологизмын паныдасьлысь (зэв конкретнöй) вежöртаса кывъяс дорö сёрникузяын лöсялана кыв содтöм: Пуяс вылын гора кравзöны … (ракаяс). Ывлаын увтчö … (пон).

- лöсялана öтвужъя кывъяс сёрникузяö пыртöм: Пöльтö вильыш (тулыс) тöв. Масленик быдмö (турун) местаын. Шливгö- киссьö (ар) зэр.

- суффикс отсöгöн артмöдöм лöсялана вежöртаса кывъяс сёрникузяö пыртöм: Кыдз мича, а кыдзпи … (мичаник). Кöч еджыд, а кöчпи …(еджыдіник).

- сёрникузялысь грамматика подув сетöмын видöвöй понятие родовöй понятиеöн гöгöрвоöдöм: Пера – сійö коми легендаяслöн герой. Тулан – хищнöй вöрса пемöс. Ниа – войвылын гежöда быдмысь пу.

- öтсяма юкöдъяс пыдди кывъяслöн тематическöй чукöръясöн сёрникузяын вöдитчöм: Гыч, сын, ёкыш – юясын да тыясын олысь черияс. Мой, кынь да тулан заводитöны быдтыны зверофермаясын.

Сёрникузяын грамматика боксянь кывъяс йитчанног вылö уджъяс

- сёрникузяын колана кыв вежлалан суффиксöн кыв гижöм: Мам вайöдіс кагасö садй… Чавканъяс овмöдчöма … керка вевт улын.

- петкöдлöм (образец) серти сёрникузяяс лöсьöдöм: Турöб бöрын сразу кöдздöдіс. Нывка мамыскöд весалöны лук град.

- юалöм серти сёрникузя паськöдöм: Арын ош пырö кытчö? – (гу) Пера вермö кодöс? – (гундыр)

- роч кыв вылысь комиö сёрникузя вуджöдöм

- сёрникузяын öти грамматика формаяс мöд вылö вежöм: 1 морта нимвежтас коймöд вылö, öнія када кадакыв колян кад вылö, öтка лыдын сетöм подувпас уна лыд вылö да с.в.

5. Пунктуация вылын удж

Пунктуация торъя юкöнöн оз пыр уджтасö, сійö велöдсьö синтаксискöд йитöдын. Пунктуация правилöяс мыджсьöны вежöртас, синтаксис да интонация вылö.

Челядьöс пунктуация велöдöмын мыджсьöны вежöртас, мöвп петкöдлöм да синтаксис вылö öтвыв.

Грамотаö велöдöм заводитчö сёрникузясянь да сыкöд йитчöм пасъяссянь - .?! Шуан мог серти сёрникузяяс овлöны юöртана, юалан да тшöктана, и гижигöн тайö шуан могыс петкöдлыссьö .?! пасъясöн; знакöн вöдитчöны и торъя чувство петкöдлöмын (повзьöм, радлун, шем да с.в.)

Интонация боксянь сёрникузяяс овлöны горöданаöн, абу горöданаöн да юаланаöн. Шуанног боксянь челядьöс велöдны логическöй ударение пуктыны, содтыны да чинтыны гöлöс, вöчны костъяс сёрникузяын да сёрникузяяс костын.

IV классын пырö ыджыд тема öтсяма юкöдъяс костын чутік, такöд йитöдын челядь тöдмасьöны лыддьöдлана (перечисление) интонацияöн, перечисление дырйи чутікъяслöн функцияöн.

Практическöя челядь тöдмасьöны тиреöн, двоеточиеöн, чута чутікöн, уна чутöн (многоточие).

Пунктуацияысь кужанлунъяс

- аддзыны самый прöстöй пунктограммаяс да кужны гöгöрвоöдны, мыйла;

- объяснитны мукöд сикас позяна вариантъяс да йитны найöс коммуникативнöй коланлунъяскöд (? … : - ,)

- выразительнöя лыддигöн пыдди пуктыны сетöм пасъяссö

- комментируйтны текстысь пунктуация велöдöм правилö вылö

- прöверитны пунктуация боксянь гижöм текст (ассьыс, ёртлысь), кужны исправляйтны

- гижны öшыбкатöг текст диктант дырйи, списывайтігöн

Пунктуацияысь уджъяс

- лыддян текстысь öтьведайтны (наблюдайтны) пунктуация пасъяс

- пунктуация боксянь анализ бöрын лыддьыны колана интонацияöн серникузя

- гöгöрвоöдны смыслöвöй рольсö пунктуация пасъяслысь

- колялöм препинание пасъяс пукталöмöн да найöс гöрвоöдöмöн вомгора да гижöда удж вöчöм

- колана препинание пасъяс пукталöмöн лöсьöдны ассьыд сёрникузяяс

- ас да ёрт текстысь аддзыны пунктуацияысь тырмытöмторъяс, öшыбкаяс бырöдöм да гöгöрвоöдöм

- пунктуация пасъяса сетöм схемаяс серти сёрникузя лöсьöдöм

- кöні вермас лоны öшыбка? юалöм вылö вочавидзöм

Юр вежöр удж серти синтаксис да пунктуацияысь уджъяс

Синтез вылö

- сетöм тема вылö сёрникузя лöсьöдöм (горöдана, юалана, сетöм подувпасöн, юöрпасöн, содтана юкöдъясöн, öтсяма юкöдъясöн, а, но, да кывйитöдъясöн, мый, кор, кыдзи, кöні,кытчöдз, кытысь, кытчö, кутшöм, сы вöснамый кывйитöдъясöн сложный сёрникузя да мукöд)

- деформируйтöм текстысь лöсьöдны грамматика да вежöртас боксянь тыр-бур сёрникузя, текст

- сетöм кывъясöн (кывсикасöн) лöсьöдны кывтэчасъяс

- сетöм юалöмъясöн лöсьöдны кывтэчасъяс

- сетöм тэчас (схема) серти лöсьöдны сёрникузя

_ ‗

↓ ↓

кутшöм? кыдзи?

- гижны диктант

- гижны изложение

- гижны сочинение

- кык прöстöй сёрникузя йитны да артмöдны сложнöйöс: Усис лым. Челядь окотапырысь петісны ворсны ывлаö.

- тырмытöм кыв сёрникузяö содтöм: Тулысын муяс вылын муркöдчöны …(тракторъяс). Пидзöс вылын кургö … (кань).

- точкаяс местаö колана суффикс содтöмöн кыв гижöм: Школа водзын чойöс ошкисны олимпиада … учавствуйтöмысь. Пекнича … культура керкаын вышивайтны велöдан кружок.

Анализ вылö

- сетöм сёрникузяысь подувпас (юöрпас, содтана юкöд), грамматика подув, öтсяма юкöдъяс аддзöм

- сетöм текстысь юалана (горöдана, юöртана, тшöктана, паськöдöм, паськöдтöм) сёрникузя аддзöм

- сёрникузяысь юöрпас дорö лöсялана содтана юкöдъяс (подувпас дорö) аддзöм

- сёрникузяысь кывтэчасъяс торйöдöм

- сёрникузяяс вылö юклытöм текст сёрникузяяс вылö юклöм

- сложнöй сёрникузя прöстöйяс вылö юклöм: Локтіс пуктысян кад, и мам-бать тшöкыда пыравлісны гортö пемыднас нин

- сёрникузя грамматика боксянь видлалöм (разбор)

- содтана юкöд дорö юалöм пуктöм: öдйö ойдіс миян Сыктывным.

Сопоставление да сравнение (öткодялöм да вочаалöм) вылö

- сетöм сёрникузяясысь (кывтэчасъяслысь) öткодьлун да торъялöм корсьöм:

А) шуанногöн торъялысь. Зэрмис. Зэрмис? Зэрмис!

Б) öтсяма юкöдъясöн торъялысь. Мамъяс да челядь гожъялöны ю дорын. Зонпосни купайтчöны, котралöны, резсьöны ваöн.

В) содтана юкöдъяс серти торъялысь. Пуксис тöв. Гежöда кылыштлö лэбачьяслöн дзользьöм.

Г) юалöм отсöгöн торъялысь кывтэчасъяс: велöдчö институтын, велöдчö бура;

Чышкыны джодж, чышкыны тэрыба.

Д) содтана юкöдъясöн торъялысь: Регыд лоасны каникулъяс. Ми классöн мунам походö.

Конкретизация вылö

- сёрникузя помын (öтсяма юкöдъяс костын) колана пунктуация пасъяс пуктöм

- пунктуация пасъяс пыдди пуктöмöн сёрникузя лыддьöм

- сёрникузяын öтсяма юкöдъяс лыддьöдлана (перечисляйтан) интонацияöн лыддьöм

- логическöй ударение пыдди пуктöмöн сёрникузя вомгорöн лыддьöм

- паныд вежöртаса кыв пыртöмöн сёрникузя помалöм: Морков юмов, а кушман … Тöлын войяс кузьöсь, а гожöмын …

- кывтэчасын йитчысь кыв, индöм (керанторъя) вежлöгö пуктöм: вурны (ем, машина)

- грамматика вежöртас петкöдлан кыв средство тöдмалöм. Мыйöн петкöдлöма подувпас, юöрпас, содтана юкöд

- пунктуация пасöн вöдитчан правилö тöд вылö уськöдöм: кутшöм пас пуктыссьö öтсяма юкöдъяс костын?

Классификация вылö

- öти синтаксис тэчасъяс (структураяс) мöдысь торйöдöм, торъя чукöръясö (кывтэчас да сёрникузя вылö) юклöм: увтчö пон, матыстчис керка дорö, кодкö матыстчис, бать петіс, петіс видзöдлыны, локтöма дядь, локтöма гöститны, локтöма миянö

- сюрöса (главный) кыв серти чукöръяс вылö кывтэчасъяс юклöм

- мукöдсьыс торъялысь öткодь кывтэчасъяс аддзöм: асывсяньыс лымъялö, окота купайтчыны, пыдöстöм енэж, джуджыд пу, ылысянь локтö, тулыссяньыс стрöитчö

6. Кывтэчас да сы вылын удж.

Кывтэчас – кыв да сёрникузя костын шöркост единица да лоö кывсянь сёрникузяö вуджан тшупöдöн. Кывтэчас – сійö кык либö унджык кывйысь артмöм тэчас, кöні кывъясыс йитчöмаöсь öта-мöдыскöд вежöртас да грамматика боксянь.

Кывтэчасын öти кывйыс сюрöса (главнöй), мöдыс йитчысь (зависимöй). Ывлаын челядь ворсöны понкöд сёрникузяын кык кывтэчас: 1) ворсöны понкöд, 2) ворсöны ывлаын. Подувпас да юöрпас оз лоны кывтэчасöн, найö артмöдöны грамматика подув. Кывтэчасын сюрöсаöн лоö кыв, кодсянь пуктыссьö юалöм, йитчысь – кыв, коді вочавидзö юалöм вылас: ворсöны (кодкöд?) понкöд.

Велöдны аддзыны сёрникузяысь кывтэчасъяс абу кокни удж, тайö кужöм сöвмöдöмыс корö уна удж. Колö велöдны аддзыны кывтэчасъяс, лöсялана кывсянь пуктыны колана юалöм, велöдны вочавидзны, аддзыны сюрöса да йитчысь кывъяс.

Грамотаö велöдігöн на челядь велöдчöны пуктыны юалöмъяс öти кывсянь мöд дорö. Тайö нин лоö кывтэчасö велöдан пропедевтика. Мöд классын мунö тöдмасьöм кывтэчасöн, сюрöса (главнöй) да йитчысь понятиеясöн, сюрöса кыв петкöдлыссьö х пасöн:

х

Яръюгыд шонді – тайö кывтэчас. Кывтэчасын шонді кывйыс - сюрöса (главный, пасйыссьö х пасöн. Яръюгыд кывйыс – йитчысь. (Полякова 2006:11).

Кывбöра эмакыв, нимвежтас оз лоны кывтэчасöн. Подувпас да юöрпас оз жö лоны кывтэчасöн, тайö грамматика подув, сёрникузя.

3, 4 классын вынсьöдчö кывтэчас тема.

Кывтэчас тöдöмлöн тöдчанлуныс сыын, мый сетö отсöг грамматика да лексика боксянь правильнöя йитлыны кывъяс öта-мöдыскöд.

Удж сикасъяс

- аддзыны сеёникузяысь кывтэчасъяс

- сетöм кыв дорö вайöдны лöсялана кывъяс (мунны …, …пызан, … öдйö).

- сетöм кыв дорö юалöмъяс серти вайöдны лöсялана кывъяс (дзирдалö кыдзи?)

- сетöм кывтэчасъясысь тöдмавны сюрöса да йитчысь кыв (визув кага, дыр мöвпавны)

- сетöм кывтэчасъясöн лöсьöдны сёрникузя

- йитчысь кыв дорö сетны юалöм: турунвиж пызан

- торйöдны сетöм кывтэчасъяс сетöм грамматика подувъясысь: мича нывъяс; Эжва дорö лэччисны, нывъяс лэччисны, пыжö пуксисны.

- торйöдны кывтэчасъяс кывбöра эмакывъясысь да кывбöра нимвежтасъясысь:

Эжва дорö; мöдлапöлас вуджамöй, меысь кындзи, Савинлöн кывбурысь, висьтавны поэт йылысь

- йитчысь кыв дорö корсьны лöсялана кыв да артмöдны кывтэчас: ёртöс (паныдалі, нуöдны, радейтны), ёртлы (рад, сетны, висьтавны)

- öтвужъя кывъясöн кывтэчасъяс лöсьöдöм:

ошкыны – кодöс?

ошйысьны – мыйöн?

велöдны – кодöс?

велöдчыны - кодкöд?

Литература:

1. Актуальные проблемы методики обучения русскому языку в начальных классах. Под ред. Н.С.Рождественского, Г.А. Фомичевой. М., 1973.

2. Григоряно Л.Т. Изучение синтаксиса. – Обучение русскому языку в 4 классе. Мет. Указания к учебнику. Пособие для учителя. Под ред. Т.А. Ладыженской. М., 1981. С. 103-126.

3. Львов М.Р., Рамзаева Т.Г., Светловская Н.Н. Методика обучения русскому языку в начальных классах. М., 1987.

4. Львов М.Р. Словарь-справочник по методике преподавания русского языка. М., Просвещение, 1990. С. 163.

5. Львов М.Р., Горецкий В.Г., Сосновская О.В. Методика преподавания русского языка в начальных классах. М., Академия, 2002.

6. Полякова Э.И. Грамотаö велöдан урокъяс. «Анбур» дінö методическöй индöдъяс. Сыктывкар, 2003.

7. Рамзаева Т.Г. Проблема развивающего языкового образования и её реализация в современной начальной школе. – ж. Начальная школа, 1999, №1.

8. Фомичева Г.А. Работа над словосочетанием и предложением в начальных классах. М., 1981.