По рукописи Ундольского ф. 310 № 345.

Житие Нила Столобенского

По рукописи Ундольского ф. 310 № 345.

XVII век. Полуустав. В 4-ку.

(л. 25) Месяца декабря в 7 день житие преподобнаго отца нашего Нила Столбенскаго Новгородцкаго новаго чюдотворца, благослови, отче.

Сей убо преподобный отец наш Нил, яко же слышахом, родися во единой от веси Великаго Нова града Деревския пятины Жабенскаго погоста. От какову же родителю, не обретохом прехождения ради многих лет, но вы//(л. 25 об.)шняго Иерусалима гражданин, отца имеяше всех создателя, к нему же весь возложися от юности, матере же – горний Сион, сродники же – лики святых, с ними же днесь ликовствует. Или коликими леты возраста своего тогда, егда во образ иноческаго житиа прииде, и колико лет в монастыре пребысть, но едино точию обретохом, яко во едином от монастыреи Псковския области, зовомыя Крыпцы, пострижеся.//(л. 26)

О древосечцех и о угашении огненом молитвами преподобнаго Нила.

По временех же неколицех, видевше же мужие, живущии близ езера противу о//(л. 33 об.)строва того, начаста же видети, блаженному глаголюще сице: «Мы ближае паче всех наследницы острова того. Хощем же и мы тамо участие имети в наследие по отечеству себе, и чадом нашим, и в прочая родов наших лета». И пришедше на остров тои, начаша лес сещи на сеяние хлеба. Преподобныи же начат их молити глаголя: «О мужие, оставите ми едину гору бору». Они же не токмо на милосердие преклонишася, но научением//(л. 34) бесовским от зависти побеждаемы, помышляху преподобнаго согнати со острова того или смерти предати и посекоша весь лес, умыслиша сице: «Како начнем ляда жещи, да и келиа его огнем згорит?» И егда запалиша древие, тогда пошла сила огнена велика. Преподобному же на молитве стоящу, в той час и со многими слезами глаголаше сице: «Боже, в помощь мою воньми. Господи, помощи ми потщися. Да постыдятся и посрамятся ищущеи душа моея, да//(л. 34 об.) возвратятся вспять и постыдятся мыслящеи ми злая» и прочее псалма (Пс 69:2-3). Милосердыи же и человеколюбивыи Господь Бог нашь не оставляет раб своих, уповающих нань. Молитву их услышит и спасет их, хранит Господь вся любящая его (Пс 144:19-20). И абие в той час посла Господь милость свою рабу своему. И егда прииде пламень той зелныи до горы, аки от воды, угасе внезапу. Преподобныи же, видев скорое посещение Божие, возрадовася духом, воспеваше Бога,//(л. 35) глаголя: «На того бо, рече, упова душа моя, и помилова мя». Они же немилосердии со студом отидоша от во своя си.

По посещении Божии и по отшествии жителей тех, но и паче начат труды преподобныи ко трудом прилогати и подвиги к подвигом. Пребывающу же преподобному на месте том во всяцех трудех и терпениих мнозех, ненавидяи же добра роду человечу враг диявол не оставляет ратовати работающих Богови, но всякими мечтанными привидении во//(л. 35 об.) дни и в нощи видимо и невидимо страшаще преподобнаго, аще подробну писати постигнет мя лета, повести деюща, но аще кто от боголюбивых и разсудителных мужей помыслит прочих пустынножителей, яко же просияша святии преподобнии отца в палестиньских странах и в римских до времене и в визаньтииских, но и паче в нынешняя последняя лета, в не же достиже кончина века, а в Росииской земли наипаче просияла благочестивая//(л. 36) христианская вера святых и преподобных отец наших руских чюдотворцов жития и чюдеса, просияша аки звезды небесная по различным градом, и святым местом, и по островом морским проходящих пустынное жестокое житие, сице и сей преподобный отец наш Нил подобно тех святых и преподобных отец житию подобяся и всякоя борения, находящее от врага, доблествено терпяше, молитвами своими и слезами без вести сих творяще и//(л. 36 об.) врага побежаше, но ненавистник не престает ратовати многими козньми, научает на него злых человек, си речь разбойников.

Слово о разбойницех.

Не в кое время приидоша к нему разбойницы, зовомы кочененки. Бысть же преподобныи в то время вне келия своея тружаяся. Они же вопросиша его с великим прещением, глаголюще: «Старче, где твое сокровище, повеждь нам». Преподобныи же глагола им: «Чада, все//(л. 37) мое сокровище во угле келейном». Они же, вшедше в келию, абие ослепоша, и от страха падоша, и начаша у преподобнаго прощения просити о согрешениих своих, и поведаша преподобному помышления своя. Преподобный же глаголаше им: «Почто и да пришли есте, то и собирайте». Они же начаша излиха вопити, горко плачущеся на долг час и глаголюще умиленными глаголы: «Отче, отче, прости нас Бога ради, яже к Богу согрешихом и к тебе, и помолися//(л. 37 об.) о нас». Преподобный же, видев их сокрушенным сердцем вопиющих, и милосердова о них, и начат молитися Богу на мног час. О велико человеколюбие Божие, колико творит волю раб своих! В той час абие разбойницы оны прозреша. Преподобныи же, наказав их ктому таковая не творити, и отпусти их с миром, и заповеда им никому же сего поведати. Они же тогда умолкоша, по преставлении же святаго всем ясно поведаша.

О рыболове. //(л. 38)

Посещаша же преподобнаго, ловитву рыбную деюще, на езере том богобоязнивии человецы, приношаху к нему ловитвы рыбныя. Преподобныи же аки от Бога посланное приимаше благодарствено, и от того питашеся. Во един же от днии, ловитву рыбную деющеи человецы, приставше ко острову тому, послаша единого от ловцев преподобному с рыбою, яко же обычай имеяху. Преподобныи, увидев пловца того издалеча идуща к келии его, абие оконцо в келии// (л. 38 об.) закры от ловца того, ни ответу ему даде. Ловец же той возвратися к дружине своей, поведа им вся по ряду о преподобном. Они же рекоша ему: «Брате, егда грех некий сотворил еси, яко святыи отвратися от тебе». Он же поведа им грех свой. Бе бо в нечистоте телесней. Они же другаго ловца послаша ко преподобному с рыбою. Преподобныи же с радостию прият и, благословив, отпусти его. Они же, дивящеся о прозрении преподобнаго,// (л. 39) отоидоша во своя си, радующеся и славя Бога, творящаго дивная святыми своими дарованием различных чюдес.

О древосечце.

Обаче же ни сие умолчано будет Божие изволение, идеже восхощет Бог угоднику своему жительствовати невидимою силою, не даст озлобити работающих ему. Человек некий от некоторыя веси, зовом Шам Стефан, приехавшу ему нощию на остров тои, и начат лес сещи на строение домовное. И, насек//(л. 39 об.)ши, восхоте отойти. И абие яко гром страшен бысть и глас велий, глаголя сице: «Престани, человече, отселе пакости деяти». Он же от грома того и великаго гласа паде аки мертв на долг час. И потом аки от сна убудився, хотяше отехати паки с возом своим, иже бе на острове том насек. Животное же его не можаше двигнутися с возом тем. И много тружався, ничто же возможе, и разуме, яко удер//(л. 40)жан бысть молитвами преподобнаго Нила. И паки складе древиа с воза своего, и обещася ктому на острове том древия не сещи. И тако отиде с острова того без пакости, дивяся бывшему. Се же человек той поведа по преставлении святаго сие чюдо. Мы же, сие слышавше, прославихом Бога, прославляющаго святых своих.

О Феодоре Харитонове.

Ин же некто поселянин имянем Феодор Харитонов прииде к преподобному Нилу спроста, яко же обычай неразумным бысть//(л. 40 об.) и нерадивым о своем спасении. Бяше бо преже прихода ко преподобному впаде в нечистотный грех, тело осквернив блудным падением. Преподобныи же обличи его о гресе том и наказав его ктому таковая не творити. Он же от того часа вниде в страх Божий, и ко преподобному начат велию веру имети, и поучение от него, приходя, приимаше, и поживе в добре исповедании, славя Бога и угодника его преподобнаго Нила. Многа же и ина//(л. 41) исповедаша христолюбивии людие, жители осташковские, о преподобнем, яко же сотвори Бог многа чюдеса угодником своим преподобным Нилом. С верою призывающим на помощь преподобнаго Нила плавающим человеком на езере том от ветра на тишину преложи. Аще поведанное все подробну писати, постигнет мя лета повести деюща[1], но мало нечто от многих речено бысть на пользу слышащим ко уверению.

Поживе же преподобныи Нил на о//(л. 41 об.)строве том 27 лет прежде преставления своего, за много время ископа землю своима рукама в положение телеси своего в часовне, и гроб истесав, своима рукама соделав, и в землю постави, и прихожаше по вся дни над гробом своим плакашеся, и глаголя в себе: «Се покой мой, се жилище мое» (Пс 131:14).//(л. 42)

Чюдо о Иванне Кирове

Человек некии имянем Иван Куров, идущу ему со Осташкова езером Селигером. И пристав ко острову, прииде ко гробу преподобнаго Нила, не бысть бо в то время на острове том живуща никого же, и вражиим наветом прельстився умом, начать с гробницы снимати покров, и абие видит, яко с покровом и гробница воста. Он же ужасеся, а не уцеломудрися. И паки начат снимати и абие разслабе всеми//(л. 49) уды и ума своего изступи. Отвезоша его в дом свой, никому же сего ведуще и продолжися болезни его до полугода, и воспомяну грех свой, повеле вести себе ко гробу преподобнаго и плакася у гроба преподобнаго на долг час о согрешении своем, и абие здрав бысть и целомудр. И отиде в дом свой радуяся, славя Бога и угодника его преподобнаго Нила и поведа всем грех свой.

Чюдо о Феодоре Теляшине.

Человек некий ис того же Осташкова имянем Феодор Теляшин прииде к тому же древу сосне и начат сещи сосну тое и, изломившу ему три топора, а древа того ничем не вредил и позна, яко Бог того не повеле на острове том//(л. 50 об.) взимати никакова древа на строение домовное. И прощение испросив у гроба преподобнаго Нила, и отиде в дом свой, дивяся бывшему.

Чюдо о болящей девице.

Некий сын боярской живяше за езером тем воин Толбузин, у него же дщи болезнию огненою великою одержима бе. И от великия болезни бывшу ей во изступлении, видит себе яко на острове в Нилове пустыни у гроба//(л. 55) преподобнаго Нила многия люди прикладываются (а преже болезни своея не бывала на острове том) и зрит абие, яко преподобныи Нил из гробницы востав, и взят ю за руку, и нача вопрошати ея о болезни. Она же от страха вострепета и бысть здрава от часа того, аки николиже болев, и поведа родителем своим видение, родителие же послаша ю на остров ко святому Богоявлению и ко гробу преподобнаго Нила. Она же, пришедши на остров той, молебная совершив у//(л. 55 об.) гроба преподобнаго Нила и братию учредив пищею, и отиде в дом своих родителеи, радуяся, славя Бога и угодника Его преподобнаго Нила. Бысть же сие чюдо лета 7104-го (1596) году.

Чюдо о двою детищу.

Прихожаше же христолюбивии людие на остров той на праздники, на святое Богоявление и на преставление святаго блаженнаго Василия Христа ради Уродиваго, яко же имут обычай христолюбцы молитися. И приспевшу празднику святаго блаженнаго Василия,//(л. 56) приидоша народи з женами и детми своими молитися к празднику. И во время божественной литоргии вшедше в часовню два детища, идеже лежит во гробницы преподобныи Нил. И от неразумия своего, но младенственным разумом начаша играючи по гробницы из ручь ребиною бросати и абие слышаху, яко гром грозен. Они же от страха падоша на земли и быша, яко мертвы. Родители же их, пришедше, обретоша еле живы, лежаша в часовне у гроба преподобнаго Нила детища своя//(л. 56 об.) и в то время начаша молебен пети и призывати на помощь преподобнаго Нила, и детища помалу оздравеша и начаша вопрошати их, что ся им случило. Они же поведа, егда начаша по гробу ребиною бросати, и «видехом мужа стара, глаголюща нам и претяща: «Престаните, чада, от того». Мы же его не послушахом. Абие бысть аки гром страшен, мы же от страха падохом, яко мертвы». Родителие же их, слышавше, начаша прилежно молитися со слезами у гроба//(л. 57) преподобнаго Нила и совершеное здравие испросиша детищем своим, отидоша во своя си, радуяся и славяще Бога и его угодника преподобнаго Нила Чюдотворца.

Житие Нила Столобенского

По рукописи Ундольского ф. 310 № 345.