ПЕРА-БОГАТЫРЬ ЙЫЛIСЬ ЭШÖ ÖТIК ЛЕГЕНДА

Коми-Пермяцкöй народлöн эпическöй герой Пера-богатырь йылiсь не етша ни гижöм. Эм быдса сборник, кытöн йитöмöсь сы йылiсь быдкодь преданнёэз, кöднö öктiсö не öтiк местаын и не öтiк кадö уна исследователлез. Кыным унажык ми интересуйтчам асланым фольклорöн, сыным унажык адззам сыын сё виль, видзчисьлытöм явленнёэз. Сiдз адззисис Пера-богатырь йылiсь преданнёлöн эшö öтiк вариант, кöда йылiсь ме и мöда эстöн висьтасьны. Вот мый баитсьö сыын:

«Пера-богатырьсö кöркö еныс колдуйтöма — пöртöма изовöй глыбаö. Öтчид Пераыс мырсьö-уджалö, дорö кöртовöй бедь. Локтас сы дынö старик и юалö:

— Мый керан?

— Бедь кöртовöйö дора. Му шарсö мöда тай бергöтны.

— Кыдз тэ сiйö бергöтан?

— Пысала бедь вылам да пельпон омöнням и чапка.

— Мыйлö бы тэ сiйö бергöтан? — юалö бöра старикыс.

— Медбы шонытжык татöн вöлi. Отирыс уджалö-уджалö, а олан сылöн умöлик, кöдзыт. А мунны миянлö татiсь оз туй, — шуö паныт Пера.

— Дак тэ вон мый думайтан. Сэтчин, лунланяс, отирыс юрбитö, а тэ... (Пераыс абу юрбитлöм, вöлöм неверитiсь.) Пöр жö тэ изö! — старикыт ачыс еныс вöлöма и пöртöма Перасö изö.

Дыр Пера олас изöн. Бöра ен-старик локтас сы дынö и шуö:

— Но, сё мöдан Му шарсö бергöтны?

— А кысь ни! Адззан, кинкö менö кыдз керис, изö пöртiс. Вот бы мездiс кин...

— Ло тэ моз. Тэ лоан сэтшöм, кытшöм вöлiн, но и муыс ась кольччö сэтшöмöн жö, кыдз вöлi.Сiдз и лоас.

Ми адззам, что эта легендаыс отир творчествоись особöй торья произведеннё, сыын Пера-богатырьлöн чертаэз мыччассьöны унаöн мöднёж, нежели быдöс одзжык тöдса преданнёэзын да легендаэзын. Жаль только, что эта преданнёыс почти öшис ни. Быдсöн сiйö меным висьтасис 1959 годö только öтiк морт — Батуев Михаил Степанович — Кочёвскöй районын Отопкова деревняись важ олiсь. Ме старайтчи гижны преданнёсö сы кыввезöн, медбы кольччис ыджытжык документальность. М. С. Батуевлö висьтасьлöма эшö челядься кадö 90-годся бабыс, кöда тöдлöма öддьöн уна сказкаэз да быд берся мöдiкö, сiдз кыдз челядься кадсянь новйöтлöма свет кузя ассис слепöй айсö. Ачыс пö, бытьтö, вöлöма коми-зырянка. М. С. Батуев мылякö чайтiс, что легендаыс локтiс Печорасянь, коми-зыряна дынсянь.

Сiя кадсянь ме уналаöт кошши эта преданнёлiсь варианттэсö, но сэсся почти нем эг адззы. Абу сiя и Печора береггез дорын. Сэтчин вообще абуöсь Пера йылiсь преданнёэс. Невна нiя эмöсь Коми АССР-ись лунвывся районнэзын, но нiя локтöмась миян округись и öддьöн вачкисьöны мукöд варианттэз вылö, кöднö öктiс Д. И. Гусев да лэдзис аслас сборникын [11]. Öддьöн слабöй отголосоккез виль адззöм преданнёлöн эмöсь Кочёвскöй да сыкöт ордча Косинскöй районнэзын. Сiдз, Кочёвскöй жö районын деревня Боринаись 83-годся олiсь Пойлов Алексей Яковлевич висьтасис меным то мый:

«Курöг-кар мыс пытшкас бытьтö овлöмась пö. Асывланьсяняс воротаэз пö, пыранiн вöлöм. Ворота вевдöрас колокол öшалöм. Пера-богатырьсö пö Господьыс изö пöртöм, и сiя пö öнöдз сэтчин пукалö. Натьтö, изас пöртöма сiйöн, мыля отирсö уна торкöм.

Кыдз инман воротаас — сэк жö колö пö вартны колоколö, а то сiя ыкöстас. А богатырьыс кыдз ыкöстас, дак быдса губерния пö народыс торксьö — сэтшöм завет пуктöм.

Татöн Курöг-кар мыс, Архиповын Быльдог мыс, Ошын — Ош мыс. Нiя куим зон чугуннöй беддезöн мыс вывсянь мыс вылö чапкасьлöмась. Лупьяэзас вынаöсь пö отиррес вöвлöмась...»

Эта жö районын Отопкова деревняись 80-годся Е. А. Балуев висьтасис: «Богатыррес эд уна одзжык вöлöмась, но нiйö изö пöртöмась, колдуйтöмась. Одзжык öддьöн колдуйтчылöмась. Богатыррес — верзьöмöн öнöдз пö изовöйöсь кытшöмкö пещераэзын. Одзза мировöй войнаыс одзын висьтасьлiсö: война лоас, вöввес гöрдлöны. Этö — богатырскöй вöввез».

Вот и быдöс, пожалуй, виль преданнёэзiсь ыджытжык торрес. Эмöсь эшö кыв-мöдöн, но ны йылiсь ми баитам улынжык.

И сiдз, позьö висьтавны: легенда öшö ни, но сёжö эшö эм. Видзöтам сылiсь содержаннёсö. Вились адззöм легендаын Пера-богатырьлöн образ примитöма эшö мöдiк, öнöдз адззывлытöм чертаэз. Одзжык ми тöдiм Пера-богатырьöс кыдз öддьöн вына мортöс, кöда вермö и пруддьыны шор, и бöбавтöн чапкыны тыра додь быдсöн вöвнас керку крыша вылö... Эта легендаын Пералöн вын тырмö сэтчöдз, медбы бергöтны Му шар. Конечно, колö висьтавны öнi жö, что «Му шар» эта легендаын, натьтö, миян кадся грамотнöй информаторрезлöн содтöм. Натьтö, кöркö легендаас баитсис просто Му йылiсь, — сiдз, кыдз висьталiс öтiк информатор: «Богатырресö, тыдалö, еныс сiйöн пöртöма изö, что нiя мöдöмась Мусö ребро вылас сувтöтны» [12]. Вот эстöн ми быль адззам Му форма йылiсь важжык представленнё: Му, бытьтö, вöлöма ляпкöса тор, кöдö позьöм бергöтны да сувтöтны ребро вылас. Шарöн ли отир представляйтiс Мулiсь формасö либо ляпкöсаöн, сiя бура тöдiс, муыс не учöт и медбы бергöтны сiйö, колö ыджытся-ыджыт вын. Сэтшöмсö — не мортлiсь ыджыт вынсö — сiя сетiс аслас геройлö, Пера-богатырьлö, кöдаын сiя йитiс ассис думаэз, мый сiя видзчисис, мый йылiсь сiя вöрдiс [13]. Пералöн вын — эта коми-пермяцкöй йöзлöн вын. Отир лыддис даже нiя важся каддэзö, кöр аркмис эта легендаыс, ассис вынсö сэтшöм ыджытöн, нельки и сэк ни вермис вежны ассис олансö, керны буржыкöн, шонытжыкöн.

Пера-богатырь уна легендаэзын мыччассьö сэтшöм геройöн, кöда сувтö дорйыны ассис отирсö враггез шогья: то сiя вермасьö Ваиськöт да Вöриськöт — эта сэрпа лёк выннэзкöт, то сiя петö паныт уна юра змейлö, кöда тешитчö отирыс вылын, то сiя мунö походö öтлаын Московскöй царькöт дорйыны ассис мусö кытшöмкö страшнöй колесоа чудовище шогья. Быдлаын мыччассьö Пералöн ыджыт патриотизм. Эта жö патриотическöй мотивöн тырöм и миян виль легенда. Только эстöн Пералöн патриотизмыс, натьтö, унаöн ыджытжык, лэбтöм сы вылына, медбы сетны шондiа, шоныт и югыт бур олан аслас чужанiнлö, аслас отирлö. Пера думайтö, тöждiсьö сы йылiсь, что быдöс коми йöзыс олö кöдзытiнын, умöля, гажтöма и, натьтö, тшыгйöн. Сiя бы бергöтö Мусö, медбы лоны матынжык шондiлань.

Сьöкыт висьтавны, кыдз миян прадеддэзным, кöдна керисö легендасö, представляйтiсö му бергöтöм йылiсь. Либо эта вöлi дума быль му да шондi строеннё йылiсь, либо вöлi кытшöмкö социальнöй переворот йылiсь вöрдöм. Чожажык Пера, мöднёж шуны йöзыс, кöда аркмöтiс сiйö, думайтiс, кыдз бы вежны умöль, сьöкыт, векся конечтöм уджын олансö. Но эта думаыс сетöма легендаас не öддьöн яснöя.

Унаöн буржыка мыччассьö легендаас Пералöн атеизм. Пераыс абу веруйтiсь, сiя оз юрбит енлö, сiя аслас киэзöн бы керö сiйö, мый бы вермис керны — важся представленнёэз сьöртi — только ачыс еныс. И не весь жö Пералö паныт петö ен, христианскöй ен, кöда берегитö ассис паствасö Пераыс шогья: «Дак тэ вон мый думайтан! Сэтчин (лунланяс, кытöн шондiа оланыс) отир юрбитö, а тэ...» — шуö Пералö ен и пöртö сiйö изö. Преданнёас öддьöн бура тыдалö, что отир сочувствуйтö Пераыслö, но ен вöлöма мылякö вынажык и вермöма Перасö. Кыдз сiдз? Отирлöн любимöй герой, кöда йылiсь веккезын олöны и быдмöны быдкодь легендаэз, вдруг лоöма енся вынтöмжык и ен сiйö вермöм. Эта явленнёыс не случайнöй. Именно эта миянöс вайöтö сiя каддэз дынö, кöр аркмöма легендаыс. Христианскöй вера лоöма языческöйся вынажык да вермöма сiйö. Не сiдз я вöлi 14–15 веккезö, кöр коми йöзсö (перво коми-зырянасö, а сыбöрын коми-пермяккесö) пондiсö пыртны христианскöй вераö? Московскöй княззезлö вöлi вель ыджыт выгода видзны асланыс кипод увтын коми крайесö, кöдна пыр мунiсö Сибирьö главнöй туйез и кöдна асьныс вермисö сетны неучöт доход да дорйисö Московскöй княжестволiсь асывланься границаэсö быдкодь враггез шогья. Христианство отсалiс московскöй княззезлö эта политикаын.

Коми-пермяккезлöн княжескöй верхушка вöлi заодно роч княззезкöт и отсалiс пыртны отирсö. Летописьын баитсьö, что епископ Иона 1463 годö пыртiс Пермь Великöйсö и сылiсь князьöс Михаилöс [14]. Князьыслöн нимыс сэк ни гижсис христианскöя — Михаил, но сылöн воеводаэс дас годöн бöртiжык эшö нимтöмась асмознаныс, комиöн — Бурмот, Мичкин, Зыран. Не сразу вöлi пыртöм, конечно, и рядовöй масса. Кöть летопись и мöдiк источниккез öддьöн етша висьтасьöны миянлö сiя кад йылiсь и сы йылiсь, кытшöм экономическöй взаимоотношеннёэзын вöлiсö Московскöй княжество да Пермь Великöй, но бура тöдчö, что христианство вайис бöрсяняс социальнöй угнетеннёлiсь виль формаэз, аркмöтiс быдкодь виль господаöс да тшöктiс подчиняйтчыны нылö. Натьтö и коми-пермяккез дынö сiдз жö, кыдз коми-зыряна дынö, вöлiсö сувтöтöмöсь «тивуннэз да доводчиккез», и «приставниккез» [15] и нiя сiдз жö терпитiсö «удж насилие, тивунскöй вузалöм да сьöкыт воттэз» [16], — кыдз жалуйтчис коми-зыряналöн сотник[…]

[1] иньпöлöсыс

[2] Быдлаын шусьö неöтмоза: чуддэз, чуддез, чуттэз, чучкöйез; рочöн — чудь, чуди, чучкие, чудской народ.

[3] Могилаэз, могильниккез.

[4] Коми-пермяцкöй эпосiсь Кудым-Ош и Пера-богатырь тожö шусьöны чудскöйезöн.

[5] Преданнёыс гижöма Зубова А.Д., Зубова К.А., Боталова Р.М. и уна мöдiккез висьтасьöм сьöртi.

[6] Видзöт: Н.Н. Чебоксаров. Этногенез коми по данным антропологии. Ж. «Советская этнография» № 2, 1946, стр. 54–58.

[7] Угорскöй йöз — öння ханты, манси да венгррезлöн предоккез.

[8] Видзöт: О.Н. Бадер и В.А. Оборин. На заре истории Прикамья. Стр. 145–156.

[9] Видзöт: В. А. Оборин. К истории земледелия у древних коми-пермяков. Ж. «Советская этнография» № 4, 1956.

[10] Сэтчин жö.

[11] Гусев Д. И. «Коми-пермяцкие народные предания о Пере-богатыре». Кудымкар, 1956.

[12] А.И. Вавилина висьтасьöмись.

[13] Вöрдiс — мечтайтiс.

[14] Полное собрание русских летописей, т. 6, 1463 г.

[15] Никоновская летопись, стр. 148.

[16] Житие Стефана Пермского, стр. 30, 39.