О видении Никольскаго Коряжемскаго пономаря инока Дионисия, како виде преподобнаго в нощи молящася.

Преподобный отец Трифон, видя к себе народ мног стекающся, и повелевающим им молебная совершати, паче же о чюдесех великаго чюдотворца Николая внимати, еже ему обещанно бысть от него в Пыскорском манастыре, како ему в видении//(л. 208 об.) святый Николае заповеда о себе разумевати и обещася быти ему помощником во всяко дело благо и не точию тамо, но и зде во обители, его же Николая Чюдотворца чюдеса быша преславна. И сего ради преподобный, яко должный раб, господину своему великому чюдотворцу Николаю служа со страхом, и радостию во умилении мнозе, и в слезах непрестанных, в посте и воздержании пре//(л. 209)бываше.

Во един же от дний по отпусте вечерняго пения и по росхождении братии от церкви оста преподобный Трифон един в трапезе, и озревся семо и овамо, и возжег свещи пред святыми иконами, их же с собою имяше, и фимианом облаговонив, начен с вечера по обычаю, благодарныя молитвы своя к Богу, и Пресвятей Богородице, и Николаю Чюдотворцу возсылати, и слезы многи проливаше, яко//(л. 209 об.) и с воплем приглашаше. И непрестанно падаше пред святыми иконами, и на долг час на земли лежаше и моляшеся о святых Божиих церквах, и о царе, и о патриархе, и о всем православном христианстве. И тако моляся, слезы от очию своею точаше во всю нощь, даже и до утренняго клепания. Преждереченному же пономарю Дионисию пребывающу в келарской отай, бяше бо и той пономарь подвижен на духовное//(л. 210) дело. Тако же и правило свое совершаше в молитвах и коленопреклонениих многих. Много же лет и пономарскую службу храняше до старости, даже и до исхода души своея. Пономарь же таяшеся искусне, яко бы мнети от сна воставшу ему, и виде преподобнаго тако всю нощь творяща. В поте же и слезах весь мокр бысть, зря же на него, умилився, и нача плакати жалостне мно//(л. 210 об.)гое время, ревностию бо божественною распалаем бе, и о видении таковом удивляшеся зело и славяше Бога, давшаго таковую благодать рабом своим. И глаголаше в себе: «Благодарю Тя, Господи Боже Мой Иисусе Христе, яко сподобил мя еси видети таковая, елика же никогда видех, яко же о сем преподобнем Трифоне ныне видех преславное».

По сем же преподобный оттоле из манастыря//(л. 211) и иде во град к Соли Вычегоцкой, и тамо наипаче о нем слава прохождаше всюду, и стицахуся к нему мнози ту живущии человецы, иже в Усолском и во Устьюжском уезде, во градех, в селех и в весех по Вычегде и по Двине, и прихождаху знамения ради и чюдес, бываемых от икон, яже бях с преподобным, и поведающе друг другу преславная она, яже бывают молитвами//(л. 211 об.) преподобнаго, и сходящеся видети чюдотворныя иконы и раба Божия Трифона, и радовахуся зело, яко Богу посетившу землю их святыми и чюдотворными иконами и преподобнаго Трифона пришествием. И припающе (так!) к нему с великим усердием и от него благословение приимаху, ему же и честь должную воздающе, яко да Бога о них молит. Приношаху же ему всяких чинов//(л. 212) люди кождо по обещанию своему в дом Пресвятыя Богородицы и Николая Чюдотворца на церковное украшение и на манастырское строение от своих имений ов злато, ов же сребро, ин же к книги, и ризы, и всяких прочих потреб доволно. Преподобный же, яко отец чадолюбивый, всех с любовию приимаше. Мнози же тогда от нищих прихождаху и от убогих сирот благословения ради. Он же всем требующим//(л. 212 об.) от приносимых потребами нищих удовляше и никого же от себе тща без упокоения отпускаше. Они же, приемше от него милостыню, благодарственно отхождаху.

Преподобный же имеяше у себе клирошаны и непрестанно молебная пения совершаше. Всемилостивый же Господь Бог Наш молитв ради Пресвятыя Богородицы и заступлением великаго чюдотворца Николая прославляше//(л. 213) раба своего Трифона и, егда бо скончаваху молебная пения, и по скончании благословяше народы честным и животворящим крестом и кропяше святою водою. И целующе святыя и чюдотворныя иконы, тогда же от образа великаго чюдотворца Николая многаяя исцеления бываху с верою приходящим от недух различных, и исцелевахуся, и здравы в домы своя отхождаху, славяще//(л. 213 об.) и благодаряще Всесилнаго Бога, и Пречистую Его Богоматерь, и великаго чюдотворца Николая, и преподобнаго отца нашего Трифона. А яже от образа Николая чюдотворца каковая исцеления быша, и кому имянем, и от котораго града или кия веси, и коим недугом кто одержим бысть, и како исцеление получи, о том вся писана в книге чюдотворения ве//(л. 214)ликаго святителя Николая числом пять сот чюдес, яже и доднесь свидетельствует во обители Успения Пресвятыя, еже есть близ града Хлынова.