О явлении преподобнаго Ферапонта, како явися первие священноиноку старцу Пафнутию.

Времени же некоему мимошедшу, во едино от нощей по нощном правиле и по хождении на гроб Пафнутий старец иде во отходную келию опочинути, и возлеже на рогозиницы своей, и бысть в тонце сне, и видех некоего человека, пришедша к нему, и рече ему: «Пошли подруга своего старца Андреяна на взыскание места того//,(л. 37) его же ты видев на востоце зарю, и церькви, и кресты, и явится на том месте человек свят. И невдалече место то от сего растоянием поприщь пятьдесять». Пафнутий же вопроси его: «Кто еси ты, и како нарицается имя твое, и како знаеши место оно?» И отвеща ему человек той: «Не будет тебе в жительство место то, понеже не леть тебе будет». И рече ему Пафнутий: «Ты коего града еси?» Он же точию отвеща: «Сожитель есмь Василиев, иже есть на Москве». И не виде его старец//(л. 37 об.) ктому. Возбнув же Пафнутий, и иде ко Андреяну, и поведа ему человека того, его же виде, и како повеле его послати на взыскание места и разстояние поведа. Андреян же слышав, и радостен быв, и разуме, яко не презре Бог моления его.

И приим благословение от старца Пафнутия, и изыде из манастыря, и иде в весь Галицкия области, иже нарицается Корежьская волость по реке, глаголемей Кореге, и прииде к некоей церкви тое же веси, иже нарицается Вшушкодоме//(л. 38). Церковь же та во имя Пречистыя Богородицы Честнаго и Славнаго Ея Собора. И вопроси старец тое церкви священника имянем Еупла: «Где есть близ места сего церковь пуста между реками?» Они же поведаша ему: «В нощную страну от сего места растояние имый десять поприщь. Место же то пусто, дебри имуще непроходны, точию един путь прилежащь от града, нарицаемаго Соли Галицькие, рекою Костромою струги ходять с солию и со инеми товары купецькими»//(л. 38 об.). И вопроси старец: «Обретает ли ся человек, иже бы на месте том селитву имел?» Отвещаша ему: «Ни. Точию едино древодели, делающе насады великия, приходяще от града Костромы и от иных весей, по времени же отходяще». Слышав же старец, и радостен бысть, и моли их, дабы ему путь поведали. Они же проводиша его до места, нарицаемаго Устье. И прииде старец на место, идеже церковь стоит, и позна его, яко то есть место, его же ви//(л. 39)дев с Пречистою Богородицею и его же издавна желаше видети. И вшед в церковь, и обрет образ, на месте стояще Пречистыя Богородицы Честнаго и Славнаго Ея Благовещения, иже той образ и доныне обретается во обители той. Храм же той Пречистыя Богородицы Честнаго Ея Благовещения вельми ветх, едва стояше. Обхожаше же старец место то и видех, яко красно место к жительству и покойно к службам манастырьским, и леса ко строению церквам, и келиям, и к хлебной пашне, и к по//(л. 39 об.)ставлению деревень, и на реках к строению мельнишному, и к рыбной ловле, и всякими житейскими угодии место сияющи.

И паки отоиде старец во обитель Пресвятыя и Живоначалныя Троицы в Павлов манастырь Обнорскаго Чюдотворца, идеже живяше первие, и прииде к старцу Пафнутию, его же выше именовахом, и поведая ему вся подробну о взыскании места, и како обрете место оно, и каково бе к жительству, и к строению//(л. 40) манастырьскому, и ко всякой селитве, и к поставлению деревням, и на реках к строению мелницы, и к рыбным ловлям. Слышав же Пафнутий о явлении того святаго места, яко же выше написахом, како им явися зарею и церквами, и кресты видеша, и како явися ему человек в тоньце сне, и повеле послати старца Андреяна на взыскание места. И размы//(л. 40 об.)шляше старец Пафнутий по вся дни, како бы ему видети место и жительство имети на том месте. Советовав же с старцем Андреяном, многое время, како бы им тамо преселитися. В то же время прииде повеление от благочестиваго государя царя и великаго князя Иоанна Васильевича всея Русии в Павлов манастырь ево Государева грамота, чтобы его, старца Пафнутиа, поставити на Москве. Старец же вельми печалова//(л. 41)ше и тужаше о повелении царьском, но не весть, како бы сего минути. И призва старца Андреяна, и глагола ему: «Брате, приими от мене милостыню довольну на создание манастырю и начни здати манастырь на онем месте, его же обретох Божиим изолением. Аз же явлюся лицу цареву и возвращуся во обитель сию, но будеве во едином месте вкупе на том Богом показанном святом месте, ты же назидай его, молися Пречистой Богородицы». Не помяну же старец Пафнутий ктому(л. 41 об.) явившагося ему преже и глагола ему: «Не лет ти жити на том месте будет». И вдаде старцу Андреяну милостыню доволну на создание манастыря. И отпусти его паки ити на то Богом показанное место. Старец же Андреян отойде на место, идеже бе первие быв. Игумен же тоя обители молиша старца Пафнутия, дабы повеление царево исполнити вскоре. И отпустиша его к Москве с великою честию. На Москве же понуди его государь в Чюдове быти ахимаритом// (л. 42).

Слышав же Андреян о старце Пафнутии, что изволением царским бысть в Чюдове ахимаритом, и иде Андреян к Москве благословения ради к архимариту Пафнутию. Архимарит же вопроси старца, како пребывает и како место назидается. Он же поведа ему: «Святых ради молитв твоих вмале времени устроих две келии в покой братии». Архимарит же вопроси старца: «Кто есть братии, пребывающии с тобою?» И отвеща ему старец: «Имам три//(л. 42 об.) брата. Первыи Иев, вторыи Ефрем, третий Кирилл». Он же вдаде ему паки милостыню довольну вяще первыя, яже вдасть ему в Павлове манастыре. И повелеша ему на месте том строити, яко же годе есть. Старец же, приим благословение от архимарита Пафнутия, и отыде во свою ему пустыню, нося сокровище немало на создание манастырю. И живяше в пустыни той, прилагаше труды ко трудом, мотыками копаху землю по брегу Костро//(л. 43)мы реки, и сеяху жита, и питахуся от трудов своих. Прихожаху же инии людие на место то и живяху со Андреяном и з братиею, помогаху им созидати келии и о пашне печахуся.

В некое же время приехав некто древодел, хотяше делати насад на реке, называемой Моньзе, и видех на устье реки старцы жительство имеяху и ини люди, с ними пребывающе, и в церкви пение безпрестани, и труды их видев, и прииде в манастырь, вопроси ста//(л. 43 об.)рцов, како жительствуют и питаются и како вмале времени толико келий устроиша. Андреян же ему поведа все по ряду, како ему Бог и Пречистая Мати Божия явиша о месте том. Слышав же человек той, и вдаде ему милостыню довольну, приложи же вдати им две мски в послужение манастырю, и певше молебная пения, и паки отиде, и нача здати насад, и вскоре совершиша его

Старец же Андреян видев, яко//(л. 44) собираются братия к нему и инии людие многи и милостыни довольны подаваша ему, скорбяше же о месте вельми. Место то при двою реках, горы имея ниски к рекам, и бывает потопление велие, покрывашеся место то водою, и открываше брег, пространство же места умаляшеся. Многажды же совет сотвориша з братиею и со инеми людьми, како им пребывати на месте том. И бе некий человек имянем Иоанн стар, знаяше место и перь//(л. 44 об.)вие сего живяше на месте с строителем старцем Нифонтом. И сказаше Андреяну и братие: «Аз есмь живяше на месте сем с древним строителем старцем Нифантом. Нифант же много желаше церковь и келии преносити на ино место от потопления воднаго на брег же рекы Костромы выше месте сего». И показа Андреяну место, желаемое Нифантом, идеже хотех манастырь воздвигнути. Видев же старец и братия место ве//(л. 45)льми выше прежняго места, точию старцу явися угодно, и любьляше его, и хотех на нем манастырь воздвигнути, и хождаше на место по два лета, и моляшеся, дабы ему на том месте манастырь здати.