Чюдо преподобнаго Ферапонта, како явися старцу Феодосию, слепу сущу.

Бе некий старец имянем Феодосий того же//(л. 123 об.) Благовещеньскаго манастыря постриженик и в некое время, мелющу ему в жерновы рож на строение хлебом, старец же той слеп бе, ни блеску видех. В полунощи же мелющу ему, и внезапу явися ему свет в храмине той и видех всю пекольницу ясно. И, шед, открыи оконьце храмины тоя и видех по манастырю тма сущи, и зрех к церкви Николы Чюдотворца, идеже погребен бысть преподобный Ферапонт, и видех в церкви свет велий светящеся, и людие хождах//(л. 124) в церкви. Старец же, в велице ужасе быв, яко, слеп сый, видит все ясно, и помышлях ити на гроб преподобнаго, негли и совершенно тамо исцелеет, да и во дни свет видит. Старец той правде муж пребываше в пощении и во бдении и труждаяся день и нощь, мню, яко и той свят есть.

И иде старец Феодосий в церковь Николы Чюдотворца на гроб преподобнаго, и прииде ко дверем церковным, и видех двери отверсты. Преподобный же Ферапонт един стояше про//(л. 124 об.)тиво царьских дверей, от него же свет велий сияше, яко солнце. Старец же не смеяше внити в церковь и, обращься преподобный ко старцу. И рече ему: «Ты убо чего просиши у Господа Бога Нашего Исуса Христа?» Старец же, во ужасе велии быв, и рече к преподобному: «Прошу отпущения грехов моих». И рече ему преподобный: «Иди и подвизайся. Яко же начаток сотворил еси, тако и соверши. И не по мнозе времени имаши видети будущий свет». Он же пад и молихся ему, дабы//(л. 125) даровал ему видети паки сей свет. Рече же ему преподобный: «Сей свет – прелесть века сего суетнаго, ты же сею слепотою избудеши будущия тмы». И абие невидим бысть.

Старец же Феодосий осязаше руками своими двери церковныя и слышав двери затворены и заключенны, яко же и бысть, и не виде ничесоже, яко же и первие. И иде в пеколницу и помолився на долг час, помышляюще видение свое. Обычай же бе ему по вся нощи без сна пребывающе, ово//(л. 125 об.) мелюще, ово молящеся Богу, не даяше покоя себе ни днию, ни нощию. Мельницы же тогда не имущи скудости ради. Феодосий же вся уроки братьския мелюще своими руками, у инех же тайно взимаше и мелюще и муку поставляше. Времени же некоему мимошедшу, старец Феодосий мелюще в полудни. В то же время всем людем обычай есть почивати от трудов и внезапу предста ему преподобный Ферапонт и рече: «Мир тебе и благословение». Феодосий же//(л. 126) видит ясно преподобнаго: в мантии и в куколе стояше пред ним и обувен в лапти. И, пад, поклонися ему до земли, ведяще, яко истинно видех преподобнаго, его же и жива добре сведе, и молящеся вкупе, и рече ему преподобный: «Не по мнозе времени будет глад велий по всей руской стране. Ты же того не дойдеши. Подвизайся же, яко же рех ти исперва. Помале бо времени узриши мя во оном веце. Отселе же зде не имаши видети мене, точию тело твое близ гроба моего погребе//(л. 126 об.)но будет. Ты же повеждь Андреяну тайну тверде, да блюдет жита своя. В ты дни мнози препитаются от места сего и распространятся до земли манастыря и рапространятся же и лесы, и будут деревни». И абие невидим бысть преподобный, и Феодосий ничтоже видех, яко же и первие. И шед поведах Андреяну вся поряду иже и прежде видех преподобнаго. И ныне якоже и о гладе возвести ему.

Андреян же слышах от Феодосия и яко истинно быти сему, веру емлет//(л. 127) ему и своя видения поведает Феодосию и глагола ему, яко да умолчит се, еже о гладе. Извести преподобный, да не возмутити людий, скрываше вся глаголы сия в сердцых своих.

Времени же некоему мимошедшу, преставися старец Феодосий в вечьную жизнь. На преставлении Феодосия тако же седяше голубь бел на келии его, и благоухание бысть по всему манастырю, яко же на преставлении преподобнаго Ферапонта. И погребен бысть Феодосий старец в той же//(л. 127 об.) церкви в пределе Николы Чюдотворца близ гроба преподобнаго Ферапонта. Времени же настоящу осмыя тысящи сто девятое лето исходяще в пост Успения Пресвятыя Богородицы всякия хлебныя плоды позябли велием мразом по всей русской стране, и бысть глад велий повсюду. В ты же времена мнози люди приходяще ко старцу Андреяну в манастырь, и работающе, и питахуся, и поселяшеся на пустоши и на лесы манастырьския, и живяху. Мнози же и дети боярския приезжаху ко//(л. 128) старцу и прошаху хлеба. Старец же даяше им, всю надежу свою возложив на Бога, и на Пречистую Его Богоматерь, и на преподобнаго Ферапонта, имый в мысли своей явление преподобнаго и како ему глаголаше: «В ты дни не оскудеют житницы твои», яко же и Феодосию старцу глаголаше в явлении о неоскудении житниц и о пространстве места. Гладу же належащу по три лета, людии же множахуся ко старцу во обитель. Андреян же до изобилия//(л. 128 об.) всех питаху; житницы никако оскудеваше по глаголу преподобнаго Ферапонта. Старец же и братия, молящеся день и ночь, и хвалу воздаваше Господу Богу, и Пречистой Его Богоматери, и преподобному чюдотворцу Ферапонту, видяще житницы свои не оскудевающе и всякия пища изобилующе молитвами преподобнаго Ферапонта Чюдотворца.