О преставлении преподобнаго Ферапонта.

Раб же Божий Ферапонт пребываше во мнозех трудех и воздержании, и поминая память смертную, и суда Божия в себе всегда имети хотя, и понужая себе на делание и плачь. И по вся дни исходя ис келии своея в предел в церковь великаго чюдотворца Николы и плачася душа своея, яко о мертвецы. Писано бо есть: «Воздыхания и скорьбения вопиют ко Господу, а еже от страха слезы, та молят Бога». И тако все свое время//(л. 99) во иноческом житии, сице пожив благочестне, яко ни дне, ни часа отщетитися, никогда же хотя от трудов и славословия Божия, но Господеви сия вся изнуряше, образ добр оставляет пребывающим тамо иноком.

По сих же убо разумев преподобный еже к Богу свое отшествие, и призывает священноинока Андреяна, и отца его себе имянуя. Созывает же и прочую братию и рече им: «Се уже конец живота моего приближается, и аз убо отхожу от жития сего и предаю дух мой в руце Божии//(л. 99 об.). И Той да сохранит вы и утвердит в любви его. Аз же, аще и телесне отхожу от вас, но духом с вами неотступен буду, аще любовь будет межь вами». И тако блаженый вся со слезами изглаголаше еже о спасении души и богоугоднем житии. Целовав братию, и отпусти их во свои келии. Андреяна же молих преподобный, дабы по святей Божией литоргии сподобил его причастити святым Божиим тайнам, телу и крови Христа Бога Нашего. И завещав ему глаголя: «Во утрий день узри//(л. 100)ши яже о мне. По смерти же моей даждь ми в причастие святаго просвещения святых Богоявлении от священныя воды».

Андреян же отиде от преподобнаго во святую Божию церковь и совершив божественую литурьгию. Преподобный же стояше во святей Божии церкви и комкав святое и божественое тело и кровь Господа Нашего Бога и Спаса Христа. И паки рече Андреяну: «По преставлении моем причастити мене богоявленскою водою». И разыдошася по келиям, и снидошася на трапезу. Братия же глаголю//(л. 100 об.)ще Андреяну: «Ферапонт глаголет о преставлении своем, еще здрав сый». Келарь же поведает: сию седьмицу Ферапонт ни пищи, ни питию не причастихся с нами, ни в келии своей не ведех, коли укруг взимах или квас. Не вемы, чем питается». Старец же возбраняше о нем глаголати: «Таковых убо Бог весть». И заповедает старца имянем Евсевию, да зрит преподобнаго, егда ис келии изыдет или како в келию внидет, да весть вход и исход его, и поведает старцу.

Едино//(л. 101)ю же идущу Андреяну ко преподобному в келию, и видех его стояща и молящася, и рече Андреяну: «Отче святый, во утрий день прииде в келию мою и принеси от священныя воды богоявленьския и сотвори о мне, яже ти молихся в церкви». И испроси от старца прощения. И прият благословение от него, и отпусти ис келии своея, то же слово рек — во утрии приити в келию его. Старец же размышляше, егда глаголаше ему по смерти его причастити богоявленьскою водою, ныне же велит//(л. 101 об.) во утрии принести воды, негли хощет преставитися. А видех его здрава суща и бодро ходяща, и недоумевашеся старец. Нощи же наставши, старец же аки огнем распалаем и о преподобнем, да бы видел отшествие его к Богу, веруя бо словесем его, яко же бо выше глаголах, о преставлении своем и братию поучих о богоугодном житии.

И иде старец нощию х келие преподобнаго, и ста близ келии, да бы слышати нечто. И слышах в келии гласы поющих и глаголющих//(л. 102), речи же их не бе разумети, и дивися старец вельми ужасаяся, ведяще, яко един в келии пребывает. Гласи же многи слышася, и не смеяше старец молитвы сотворити или вопреки внити, и отойде во свою келию, ведяще его по всему свята мужа, и мняше, яко сила Божия извеща ему преподобие его. Приспевши же времени заутренняго пение, бе же день недельный, в ню же празднуется память святых праотец пред Рожеством. Восклепавши же утреню, и снидошася братия во церковь. Прии//(л. 102 об.)де же и преподобный, и по отпущении утреняго пения просиша у старца благословения и прощения и, целовав преподобныи всю братию, и отиде в келию свою, еще тме сущи.

Андреян же повеле прежереченному старцу Евсевию, да бы был в келии преподобнаго. Преподобный же отсла старца и рече ему, «да посетит мене Андреян преже божественыя литургии во вторый час дни». Прииде же старец и поведа Андреяну, яко же повеле ему преподобный. Наста//(л. 103)вшу же дни, восиявшу солнцу, Андреян же созывает братию во свою ему келию и глаголет о преподобнем, яко хощет преставитися. Братия же реша, яко здрав есть Ферапонт и бывыи у заутреняго пения. Точию размышляше, яко «вчера целовах нас в келии своей, и отшествие свое поведах, и о братолюбии поучих и о любви, и обещася духом быти с нами». Андреян же рече братии: «Идем посетити его и нечто еще духовное слышати от него». И иде х келии преподобнаго Ферапонта//(л. 103 об.)и видех на оконьце келии его голубь бел седяше, трепещуще крылома своима. Приближившимся же старцу и братии х келии, и возлете голубь, и седе верху келии преподобнаго, из окна же благоухание исхождаше и наполняшеся весь манастырь и по-за манастырю, ини же в починьках живущии, растояние имея поприще и больши. И тии наполняшеся тоя благоуханныя вони.

Внидоша же старец и братия в келию преподобнаго Ферапо//(л. 104)нта и обретоша его лежаща в мантии и в куколе, лице же его покровенно парамандом, еже есть воследование крестное, пред образы свещи возженны. Во зглавии же его кадилница со югльми горящими и со благоуханным фимияном. При ногу же его лежаше плесницы плетены от липы, в них же и положен бе преподобный. И приступивше старец и братия, и открывше лице его, и виде его уже отшедша к Богу, лице же его светлостию сияше. Во згла//(л. 104 об.)вии же писание обретох, да не отирают тела его водою, токмо причастити его богоявленьскою водою, святых просвещению.

Андреян же, держа во уме слово преподобнаго, яко и жив глаголаше о причащении воды богоявленския. Принесенне убо бывши воде и отпевше чин на исход души. И наченьше правилу причащению, яко же чин повелевает, аки живу сущу и принесше лжицею освященную воду ко устом преподобнаго Ферапонта. Он же прием воду, аки жы//(л. 105)в, отверзая уста своя, сие трижды сотворих во имя Отца, и Сына, и Святаго Духа. Преподобный же примаше аки жыв, лице же его вельми просвещашеся. Николи же его видех жива тако сияюще лицем, аки цвет некий украшашеся. Един же от братии старец имянем Протасий, стоя у тела преподобнаго, мало свету видех, только блеск ведех. Очи его издетьска боляше. На честныя же мощи преподобнаго совершенне прозре и рече старцу и братии: «Видех лице//(л. 105 об.) преподобнаго аки солнце сияюще и вся келия светящеся от лица его и вас всех совершенно вижду, и болезни не чюях на очию моею». Андреян же и братия вси воздаша хвалу Богу, и Пречистей Его Богоматери, и угоднику их преподобному Ферапонту. И певше надгробная пения, и погребоша тело его честно в пределе в церкви великаго чюдотворца Николы.

Преставися преподобный Ферапонт Усть-Монзенский чюдотворец во области града Галича в веси нарицаемей Корежь//(л. 106)ской на устье Моньзы реки в лето 7094-го (1586) месяца декабря во 12 день на память преподобнаго отца нашего Спиридона чюдотворца, епископа Тримифинскаго, в день недельный во вторый час дни. Прежереченный же голубь седя на келии преподобнаго два дни и две нощи не движеся никако, ни отлетая куды. В третий же день по преставлении преподобнаго во вторник во вторый часъ дни не видех голубя того. В той же день благоухание преста. В ты же дни вси мимогрядущии и ездящии людие во округ//(л. 106 об.) обители тоя слышаше таково благовоние и благоухание и вопрошаше: «Что сие благоухание во округ обители сея?» Вси же поведающе преставление преподобнаго Ферапонта, и дивишася таковому чюдеси вси людие, и прославиша Бога и угодника его Ферапонта. А всего поживе преподобный Ферапонтъ в Благовещенском манастыре во Андреянове пустыне на устье Монзы реки два лета и шесть месяцъ и преставися в вечную жизнь, а во иноческом обещании//(л. 107) всего поживе шесть надесят лет, о них же сам преподобный известих священноиноку Андреяну.

По преставлении же преподобнаго в пределе в церкви великаго чюдотворца Николы, идеже бе погребен преподобный Ферапонт, по вся дни хождаше дым тонок видом синь благоюханен вельми от верху и до помосту церковнаго. Егда же отворяху церковные двери и окна, и той благовонный дым не исхождаше из церкви. И бысть до четыредесяти дней таковое чюдо над гробом преподобнаго//(л. 107 об.). В четыредесятый же день по преставлении преподобнаго Ферапонта прииде священьноинок Андреян и вся братия в церковь Николы Чюдотворца на гроб преподобнаго, хотяше сотворити панахидную служьбу о нем и видех во всей церкви свещи возженны, над гробом же преподобнаго стояше свещник, на нем же свеща возженна. Андреян же поноси старца, иже пономарьскую служьбу храняше, что без людей возжег вся свещи и замкнув двери и отойде. Пономарь//(л. 108) же отрицашеся, яко в сий день не бе ходих в церковь сию, ни свещи вжигах, «не вемы, како возгореся свещи». И абие внезапу погасе вся свещи, ни угли видети горяща. Старец же и братия вси падоша на гроб преподобнаго и молящеся со слезами, и просяще прощения, яко не уведе бывшаго чюдеси. И паки восклонихся и видех едину свещу на свещнице возженну паки и радовахся, яко не презре Бог моления их и, певше понахиду, и изыде из церкви, и видев благо//(л. 108 об.)уханный дым восходяще горе, и преклоняшеся на восток. Ветру же дыхающу с востоку, дым же восхождаше противу ветра, и вси дивишася бывшему таковому чюдеси и хвалу воздаваше Богу, и Пречистой Его Богоматери, и преподобному Ферапонту. С того же дни не бысть видети тонькаго дыма того и благоухания.

В первое лето по преставлении преподобнаго Ферапонта прихождаху многие людие града Костромы и молящеся у гроба преподобнаго прощения про//(л. 109)сяше и глаголюще: «Святче Божий, прости наша согрешения, егда нам запрещаше от слабаго жития. Мы же не послушахом твоих премудрых повелений, и много пострадавше от бесовския злобы, и обещахомся ити ко твоей святыни, и облегчение прияхом, и отидоша беси от нас. Ныне же молим тя: прости наша согрешения». И быша вси исцелени от злых духов молитвами преподобнаго, имян же их не описано до сего написания. Ныне же не вемы, како написати имяна их, поне//(л. 109 об.)же многа лета прошла до написания сего по преставлении преподобнаго.

Времени же некоему мимошедшу, бе некий человек имянем Петр, его же и выше именовахом, иже преподобный исцели его от злаго недуга. То идяше от скотскаго двора в манастырь к заутреннему пению, еще тме сущи, и внезапу видех в манастыре церковь горит, пламя вельми высоко восхождаше, а огнь синь и преклоняшеся пламень на реку на Моньзу противу бури ветреныя. Петр же ужасеся вельми,//(л. 110) и трепеташе кости его, видех церковь горящу и тече скорее к манастырю, дабы возвестити всем сущим в манастыре. И прииде в светлости пламеня того до святых врат манастырьских, и видех церковь стоящу от земли и до верха во огни целу, и вниде во врата манастырьская, и не бе огня видети, ни света, тма бысть. И прииде прежереченный Петр ко Андреяну, и поведа ему все по ряду, еже видев. И дивихся на мног час и сия поведах и братие и, уразумевше, глаголаше: «Се пре//(л. 110 об.)подобный Ферапонт от гроба своего сияет, просветивше духа зарями». Старец же и братия, шедше на гроб преподобнаго и молящеся, глаголюще: «Ныне предстоиши со ангелы Святей Троицы и Христа непрестанно славиши и неизреченную славу ясно зря и нас назирающи от небесных круг, приял еси от Бога трудов своих воздаяние. Просвяти душа наша, притекающих к тебе с верою и просящих твоего заступления, преподобне отче Ферапонте, да молитвами твоими сохраня//(л. 111)еми, избавимся геены и вечнаго мучения».