О пришествии преподобнаго Ферапонта в Благовещенской манастырь на устье Монзы реки ко старцу Андрея//(л. 79)ну и к братии.

Прииде же преподобный Ферапонт от града, нарицаемаго Костромы. Тамо бо есть обитель, именуема Воздвиженьский манастырь. Тамо бе пребываше преподобный Ферапонт. В том же манастыре и прият ангельский образ. А иже града, или веси, или родителю его пребывания нами не обретохом, или коликими леты возраста своего бе, егда во образ иноческаго жития прииде, но едино точию обретохом от туду живущих мних и от боголюбивых мужей. Бесед духовных в мале от сих//(л. 79 об.) истязах беседами великими в пользу духовную хотящим спасения душам своим и сих ревновати по Бозе житию, яко же сей преподобный Ферапонт, жительствуя в преже реченней обители с пребывающими тамо мнихи и соодолев тем послушанием ко архимариту и всей, еже о Христе, братии в заповеданых ему службах. К сему же многим воздержанием изнуряше тело свое и соодолеваше всем бесовским страстем. Любим же бе и славим от всех тамо пре//(л. 80)бывающих и от самого архимарита обители тоя за многое послушание, и кротость, и смирение, яко образ ему быти во всех добродетелех тамо пребывающих и исправлениих жития.

Почиташа же его и приходяще к нему вси людие града того от мала даже и до велика и до самых началнейших людей, рекше воеводы, и дьяки, и всяких чинов людие града того. И прошаше благословения от него. Преподобный же Ферапонт овем любезне благословенныя глаголы изглаголаша и молитвы//(л. 80 об) творяше о них, овем же прещением запрещаше от слабаго жития и не прилежати в пустошьных мира сего, и возбраняше от злаго наука пиянственнаго, и к беззаконным нечистотам прикасающихся крепце утвержая, да бы целомудренно житие имели. И славим бе по всему граду. Он же уклоняяся от славы человеческия. Архимарит же тоя обители вельми его прославляше и свята его мужа нарицая.

Блаженный же Ферапонт утаився архимарита и всех сущих тоя обители, отойде во область града Гали//(л. 81)ча, в весь, нарицаемую Корежьскую, в Благовещенской манастырь на устье Монзы реки, идеже Андреян живяше, и прият благословение от старца и от всей братии, и молиша их, да бы препочинути у них. Старец же и братия молиша его, дабы и жительство имел с ними. Во един же от дний позна преподобнаго Ферапонта старец Иев, его же и выше именовахом. И глагола Андреяну: «Не презре Бог моления нашего. Сей старец, иже ныне прииде во обитель сию, той есть//(л. 81 об.) иже являшеся в зачале места сего, и мнози видевше его в явлении воистинну». Той есть, его же и ты виде на оном месте, идеже Нифонт и ты хотех манастырь сей воздвигнути». Старец же, слышав се от Иева и аки от сна мыслию воспрянув и рече, яко «той есть, его же аз видех на оном месте, идеже хотех манастырь воздвигнути».

В то же время прииде в манастырь некий человек преже помянутыя деревни Григорьева имянем Феддей//(л. 82 об.) по реклу Дружина Глухой да тое же деревни Григорьева вторый человек Потапий Дружина по реклу Голова. И видевше преподобнаго Ферапонта, и познаша его, яко той есть, его же встрете, егда идяху на поможение молитвеннаго храма здати на сем месте. И глагола Андреяну: «Сей старец, иже прииде ныне во обитель твою, той есть его же мы и видехом на пути, егда идоша молитвеннаго храма здати на сем месте. Он нам рече о месте сем, яко свято есть и//(л. 82 об.) явитца на нем человек свят. Тогда его видехом прост людин, ныне же одеян во иноческий образ. Воистинну той есть». Андреян же истинно разуме, яко той есть, иже многим являяся благими явленьми, и о месте прорицаше, яко свято есть, и будет манастырь, и явится человек свят. Но не смеяше его вопрошати подробну и являющагося ему извести, да бы его в глаголание привести, негли речет, яко «аз есмь, его же вы видеша». Старец же Андреян ко преподобно//(л. 83)му многими беседами духовными беседоваше и вопрошаше обещания его, которыя обители суть и где жительство имеяше. Он же отвещав: «Постриженик Воздвиженскаго манастыря града Костромы и пришлец бех в царьствующий град Москву, и живях близ дому блаженнаго Василия о едином тыну». Андреян же, слышав сия от преподобнаго и радостен быв вельми, яко истинно уведав иже являшеся и в явлении глаголаше: «Сожитель есмь Василиев, иже есть//(л. 83 об.) на Москве». Воистинну той есть, точию размышляше житие блаженнаго Василия, яко покрова не име и наго хождаше, преподобный же дом имяну и тын помянув. И прохождаше слава о нем повсюду окрест Благовещенскаго манастыря, яко прииде в манастырь преподобный старец и велми свят муж.

Преподобный же Ферапонт молиша священноинока старца Андреяна, дабы умолчал о нем и не яви его творил. И просиша у него, да бы его приял сына духовнаго//(л. 84). Старец же радостию радовахся прияти его в духовенство, да бых уведал житие его, и творяше молитвы исповеданию. Во исповеди же преподобный ни единаго греха именовав на себе, точию молиша Андреяна, а ино прещением прещаше, да не яви дела его творит, доньдеже в житии сем, и удержит глагол сей, иже являшеся древле на месте сем, и прорицаше о месте, яко свято есть и много от духовных глагол глаголаша преподобный Андреяну старцу//(л. 84 об.). О чюдо, яко сын отца наказуя и уча духовными глаголы. Андреян же, пад на нозе его, поклонися и рече: «Не требуют здравии врача (Мф 9:12; Мк 2:17; Лк 5:31), ты же цел еси, како прииде к недужному целитися?» Преподобный же рече ко старцу: «Помысли его же еси древле видел на бреге Костромы реки, на месте, идеже ты хоте манастырь сей воздвигнути и рекох ти: “Отец ми еси будеши и имя мое увеси”. Се ныне исполнися, яко отец ми еси и имя мое знаеши, но паки мо//(л. 85)лю тя, да не повеси никомуже реченнаго мною иже глаголяй с тобою. И буди, яко истиннии отцы хранителие тайнам человеческим. Ты же сохрани глаголы моя, яже ти глаголах, донелиже есмь в житии сем». И назнаменаше отшествие свое от жития сего и рече Андреяну: «От днешняго дне яже ти исповедах грехи своя по прехождении дву лет и шести месяц узриши о мне, яже Бог повелит». По том же времени преподобный Ферапонт на всяк день старца Андреяна приимаше благословение, изхождах //(л. 85 об.) из манастыря и прехождаше реку Монзу, и хождаху в дебри в чащи леса, и молящеся Богу наедине, дабы никто его ведал, укрывашеся от славы человеческия.

Един же от братии старец имянем Кирил той поропта на преподобнаго, иже исходит из манастыря по вся дни, а с ними не обреташеся на страде манастырьской. И бысть во едину от нощей той преже реченный Кирил видит пришедших к нему в келию множество ефиоп черных, и похваляху его велми о ро//(л. 86)птании на преподобнаго и рече ему: «Отгоните от места сего, на него же ты поропта, ленив бо есть и нерадив о работе манастырьской. Его же вы туне питаете, пред вами ся творит аки свят, отходя же в чащи леса спит, точию нам спону велию творит». Старец же Кирил, воспрянув, вельми ужасеся и едва избеже ис келии своея, испаде лице его от страха, и иде ко Андреяну, и поведа ему все по ряду, како к нему прииде беси яве, и глагола изгнати преподобнаго от места, и «мене//(л. 86 об.) похваляху о роптании». Старец же Андреян, знаменав его крестным знамением и отосла его паки в келию его. Кирил же помолився, и возлеже паки на одр свой, и паки прииде к нему беси, и рыкающе на него, аки львы дивии, и скрегчюще зубы своими, да бы его жива пожерьли, и глаголюще ему: «Почто поведах совет наш старцу, иже ти реша на лениваго вашего, на него же ты добре поропта? Мы поведах ти леность//(л. 87) его и порадовахся о роптании твоем, да бы больши воздвигл еси гнев на него. Ты же оклевета нас старцу». Старец же Кирил, аки мертв от страха, лежаше, ни двигнутися можах. И прииде ему во ум преподобный Ферапонт, и не можаху уст своих отверсти, точию в мысли своей моляшеся и прощения просяше от него о роптании своем на преподобнаго и да бы ему помог в беде той.

Чюдо преподобнаго.

И внезапу предста преподобный у одра его, куколь имый на//(л. 87 об.) главе своей и в руце жезл, и пхающе демоны коегождо жезлом своим. Они же аки прах без вести творяшеся вси, и изчезоша. Преподобный же запрещаше старцу никому же поведати сего. И не виде его ктому. Востав же старец Кирил и поведа все видение старцу, иже с ним живяше во единой келии имянем Иеву, его же и выше именовахом. Иев же велми блажа преподобнаго Ферапонта и поведа Андреяну, яже слышах от старца Кирила. Андреян же//(л. 88) поведая запрещение преподобнаго, дабы не яве его творили. Времени же некоему мимошедшу, древний злобник и ненавидяй добра роду человеческому враг диявол, иже и древле всеявый многия плевелы посреде пшеницы, тако и ныне вложи ненависть на святое место, и на строителя и священноинока старца Андреяна, и на братию тоя обители многим детем боярским, иже жительство имеяху во округ обители тоя, да бы их изгнати от места того. Паче же преже//(л. 88 об.)помянутый Алексей по реклу Нелюдов много оскорьбляше старца Андреяна, и братию, и прочих живущих ту, иже в починнах живущих, овых биюще, овых же насилующе. Не пущаше в лесы входити и на реки ездити никакого ради орудия, повсюду земли своя именоваху, и грабляху, и обнажаху манастырьския люди, всякую тесноту и гонение творяху, дабы и разорити хотех святое место и своих ему наущаху на изгнание манастырьских людей.

Преподобный же Фе//(л. 89)рапонт глаголаше Андреяну и братии: «Крепце терпите всякая озлобления». И полагаше вину на диявола, «озлобляющих же сие место вину их явит коньчина их, месть приимут зде и в будущем веце». Старец же Иев, его же и многажды именовахом, научением бесовским не положи совета с старцем Андреяном и з братиею, и иде во область града Вологды в преже реченный в Павлов манастырь. И навади того манастыря игумена, да бы владети Благовещенским монастырем и во//(л. 89 об.)тчиною к Павловским вотчинам и не дати бы во обиду окрест живущим детем боярьским. Игумен же Иоиль писаше к старцу Андреяну, дабы им именоватися Павлова манастыря вотчина и самого старца называя «нашея церкви причетник сей». Старец же вельми печалию одержим, да бы не приединити к Павловским вотчинам и скорьбяше на Иева вельми.

Преподобный же Ферапонт утешаше старца и братию не скорбети о сем: «Место сие не имать быти в//(л. 90) повинутии у иного манастыря или в поддании иные области. Старцу же Иеву не будет сие место в покойно, в разстоянии иныя веси коньчина ему явит его». Павлова же манастыря игумен Иоиль вельми належа на старца Андреяна//(л. 90 об.) и хотех его взяти во свой манастырь. И приехав во обитель Андреянову, старец же и братия разыдошася. Ко игумену же приехаша многие дети боярьския и наущая его, дабы ему владети Благовещенским манастырем, а старца свести во свой манастырь. Игумен же, поискав старца Андреяна, и не обрете его, и братия разбегошася. И вложи бес во ум, да бы опустели церкви Божия. Игумен же Иоиль собра вся книги церковныя и отвезе во свой манастырь. По отехании же игумена Иоиля прииде в манастырь старец Андреян и видех преподобнаго ходяща по манастырю, и обоима крылома мантии своея метуща манастырь, и глаголюще во услышание всем: «Прах и смрад твой да изыдет с тобою, и козни бесовския//(л. 91 об.) да изженутся». Старец же Андреян вельми плакася о книгах. Преподобный же Ферапонт назнамянуя день, яко привезут книги сея церкви, понеже игумен впаде в лют недуг. По оздравии же отойдет от Павлова манастыря, яко же и бысть. Времяни же малу мимошедшу, и привезоша вся книги ис Павлова манастыря ко Андреяну, и просяще прощения, и вдаша писание преподобному Ферапонту от игумена Иоиля. Преподобный же никому же поведах пи//(л. 91 об.)сания, токмо глаголаше: «Да не прельщается сердце его о мне, грешнем муже».

Прежереченный Иев старец, убоявся Андреяна, и иде во ину весь, иже нарицаетца Жилино, тамо есть место пустое Городище на реце, глаголемей Езоне. И пребываше на месте, и тамо прославляше преподобнаго Ферапонта. Осени же наставши, приидоша на старца Иева злии разбойницы, и убиша его, и в градный ров вкопаша его. Мощи же его тамо лежаше и до сего дне. Збысться слово//(л. 92) преподобнаго Ферапонта, егда в явлении глаголаше Иеву не молитися о месте, идеже Нифонт хотех манастырь сей воздвигнути, и прорече ему: «Не будет ти в покой и сие новое место. Ты же разстояние имети будеши от сего места тридесят поприщ».

Преподобный же Ферапонт в день исхождаше из манастыря и моляшеся на едине, в нощи же без сна пребываше, и писаше божественыя книги, и велию веру имяше к великому чюдотворцу Николе, и почиташе//(л. 92 об.) житие и чюдеса его день и нощь. Во един же от дний изшедшу преподобному вне манастыря и прешедшу реку Монзу, и отиде на обычное свое место молитися, да бы его никто же ведал. И бе некая жена имянем Пелагея, хождах в лесе, берущи овощие. И ощутих преподобнаго в чаще леса на бреге реки Монзы прешедша враг, иже нарицается медьвежей, и видех его седяща на колоде обнаженна до пояся. Тело же его обливашеся кровию от ядения пауков, и комаров, и мшицы//(л. 93). Оваду же над ним аки столпу стоящу множество много. Жена же, приближився к преподобному и хотех тужити, яко же и всякая жена, и абие ослепе и не виде преподобнаго, ни места. И осязаше руками древие, дабы ити ей в путь свой. И возопи гласом велиим: «Святче Божий, прости мя грешную». И абие прозре и обретеся на друзей стране прежереченнаго врага и вельми ужасеся, и иде в дом свой, и хотех мужеви своему и домашним поведати, и не могох ничтоже рещи. По некоем же//(л. 93 об.) времени сказаша Андреяну вся бывшая, еже ей преподобный сотвори. Старец же рече ей никому поведати бывшаго. Она же глаголаше, аще хотех кому поведати, но не могу, аки некая сила возбраняет мя.

Ино чюдо преподобнаго.

Некий человек тоя же обители имянем Петр служебник бе того манастыря, видев преподобнаго идуща вне манастыря на реку Монзу, и позрех на него, и видех его искусно грядуща, и глаголах в лице ему: «Древен еси деньми, а ступание устрояешь и//(л. 94) мантия твоя не движется на тебе, аки пловешь ногами своими». Преподобный же ответа не даст ему, иде во путь свой. Прежереченный же Петр иде в манастырь, и абие нападе на него недуг лют: болеша глава его и шея. И обратися лице его на плещу ему. И поведанно бысть Андреяну, яко зол недуг нападе на Петра. Старец же Андреян рече ему: «Не видех ли сего дни Ферапонта?» Он же исповедах, яко «видех грядуща его на реку Монзу». Старец же//(л. 94 об.) Андреян рече: «Что глаголах с ним, негли поношая ему нечто?» Петр же исповедах вся по ряду, яже глаголаше преподобному. И рече Андреян: «Помолися ему в тайне и испроси прощение от него, негли Бог помилует тя и исцелит его святыми молитвами». Вечеру же наставшу, обретеся преподобный во обители на вечернем пении и иде из церкви в келию свою. Болящии же Петр тече во след его и паде на нозе его, и просяще прощение от него. Преподобный же Ферапонт подем его и ося//(л. 95)за руками своими главу и шию его. И абие обратися лице его, яко и бысть. Петр же не чюяше болезни своея. Преподобный же много его наказав о добродетели, да не осуждает никого же и поношения не приемлет на ближняго своего (Пс 14:3). И иде от преподобнаго исцелен. И запрети ему преподобный, да никому же повесть сия, еже ему бысть.