О збытии пророчества преподобнаго, како прорицаше о месте, «идеже услышите звоны и пения церковная».// (л. 47)

Времени же некоему мимошедшу, приближися время святаго и великаго поста и минувши недели поклонения Честнаго и Животворящаго Креста в четверток же тоя крестопоклонныя недели, слышав старец, и братия, и вси людие, живущие в манастыре, благовест в великий колокол к заутреннему пению, еще тме сущи. И изыде старец, и братия, и сущии с ними вне манастыря на слышание то. Слышав же и звон велик по обычаю три часы//(л. 47 об.), стояше же на долг час и вопрошаху друг друга, откуду звон сей слышашеся тяжьки, камбанария имущи окрест наю, не вемы такого звону.

В тои же день празднующе память святых великомученик четыредесять, иже в Севастии, ни храма вемы мучеников, где бе. Глагола же старец: «Того есть места звон. Се же ми поведа явивыися человек, его же Иев видех». Звон же слышашеся сверху реки Моньзы, точию места//(л. 48) не ведех, кое бе. Старец же по времени иде к сущим окрест их людий и вопроси их, слышаху ли на праздник святых мученик четыредесят, иже в Севастии, к заутреннему пению благовест и звон велик. Живущие же людие, иже есть древодели, делающе насады на бреге реки Моньзы на месте, нарицаемем Вонгомаз, сии глаголаху: «Слышахом, отче, у вас в манастыре звон велик. Откуду убо привезоша великия колоколы или хто их вдаде в манастырь? Мы//(л. 48 об.) же радостию радовахся о великом строении том». Старец же глаголаху: «Мы слышахом и чаяхом от вашего жительства звон той, негли хозяин привезе великия колокола». В то же время не бе его ту. Старец же отоиде от них, скорбя вельми о неведении места.

И прииде старец на починок новы, иже нарицается Стенино, его же зачат в пожитие некий человек имянем Иоанн по реклу Вакорин. Жена же его имянем Пелагея, и вопроси их старец о зво//(л. 49)ну том. Они же отвещаше ему: «Слышахом в твоем манастыре звон велик и радовахуся, откуду Бог тебе дарова такия великия колокола». Он же рече им: «Не в манастыре бе звон тои». Жена же глаголаху: «Аз разумно слышах, яко в манастыре звон той и мужеви своему глаголах: “Звон той выше манастыря на реке, на Моньзе, идеже есть бор и сосеник. Велие место же то конец нашего поля вниз по реке по Моньзе”».

Старец же иде на место, идеже поведа//(л. 49 об.) ему жена, и обрете бор велик близ того Стенина, идеже живяше прежереченый Иоанн Вакорин, и взыде старец на место высоко бору того от Моньзы реки, аки вержение камени. И видев, яко красно место и леса угодны к строению церквам и манастырю, точию во округ прилежаше блато велие непроходно, обхожаху бо его по брегу Костромы реки. Печаль же имеяше старец, видя место непространно на хлебной пашне, и помолив//(л. 50)ся Пречистой Богородице, и назнаменав место, и постави крест медян в древе, имый в мысли своей, негли Господь Бог и Пречистая Мати Божия и паки явит о месте том. И надеяся на явившагося ему человека, точию имый в мысли, яко не знаяше его, и иде же старец в манастырь, и поведа братии и всем сущим с ними, яко звон той слышах вси людие, яко и место обрете, точию и еще не смеяше истинныя мысли изложити на то место, яко бы зачати здания здати.

Тако же//(л. 50 об.) приспе празник Пресвятыя Владычицы Нашея Богородицы Честнаго и Славнаго Ея Благовещения, и вси людие празноваху той торжественный день и снидошася в манастырь на всенощную молитву к церковному пению. И егда же приспеваше время пению, тогда слышаша вси людие на преже реченнем месте на бору благовест и звон ко всякой церковной службе, яко же и преже слышаху, и дивишася вельми людие таковому чюдеси. От того же торжественнаго праздника звон бываше//(л. 51) по вся дни на месте том, овогда един звон, овогда трезвон великий правилу церковнаго пения. Во святую же неделю цветоносия слышав той же звон на том же месте на бору. И по престатии звону старец, поем с собою прежереченнаго Иева старца, и иде на место, идеже бе звон и идеже первие крест поставил, и не дошед место, яко вержение камени, и слышах лики поюще согласно. Речи же их не бе разумеша, и дивишася старцы чюдеси тому, и отоидоша// (л. 51 об.) в манастырь свой.

В ту же неделю цветоностную прииде в манастырь некий древодел имянем Климант, и той делаше суды с людьми своими на реце, глаголемей Моньзе. Случися ему делати противу того места, идеже слышаху звон и пение на друзей стране реки Моньзы. И пришед, поношая, вопрошаше старцов и всех, иже сущих ту, како оставяше церковь и пояше на пусте месте, идеже слышашеся звон, негли звон той от некое//(л. 52)го привидения: «Мы же тамо слышаше и говор людей многих». Старцы же и сущии с ними глаголюще ему: «Никто же от нас сего дни исходяще из манастыря, точию един Андреян, да и той сам совершив божественую литургию во святей Божии церкви». Древодел же, дав милостыню братие, и отоиде здания здати.

Приспе же день самого живоноснаго светлаго Воскресения Христа Бога нашего, и снидошася людие в манастырь, во святую Божию церковь. И ожидающе того же звону (л. 52 об.), яко же и первие слышаху. В подобно же время святаго пения бысть благовест и звон на том же прежереченнем месте на бору, и потом звону всякое церковное пение совершающе. Во время же святыя Божия литургии вси людие идяху ко святей Божии церкви, идяху же и древодели от заделия своего по брегу реки Моньзы. С ними же и хозяин, зовомый по реклу Богдан, и жена его Парасковия. И приидоша противо места того, идеже бяху звон, и вопрошаше Богдан//(л. 53) той: «Что есть звон велик?» Жена же его Парасковия реша ему: «Той звон во вес святый и великий пост слышах по вся дни». И сташа людие близ места того, слушающе звону того и чюдящеся. По престании же звону слышах и пение вельми красно поюще, а никого же видяще//(л. 53 об.), точию древие велие и чащи леса, во округ же блата облежаще. И прииде в манастырь и поведающе старцу Андреяну и всей братии, яко слышаху звон и пение и никого же видяще. Прежереченный же Богдан родом плесенин вдаде в манастырь милостыню довольну и обещася на месте том пребывать до кончины живота своего, яко же и бысть.

По празднице же Светлаго Воскресения Христа Бога Нашего от того преже реченнаго звону не вси людие слышаху, но ему же Бог дарова слышати того же манастыря живущии в починьках мужи и жены, их же имяна суть Никон, Исидор, Козма, Феодор, Иоанн, Климант, жены же Мария, Па//(л. 54)расковия, Пелагия, их же и преже именовахом. Тии слышах овогда великий звон, овогда малый. По празднице же Пянтикостия никто же от ту живущих слышах звон. Когда точию мимо грядущии людие овии реками плаваху, инии сухим путем хождаху и ездяху, тии слышаху звон и вопрошаху ту живущих: «Что есть се, иже на пусте месте звон велий, ниже людий, ниже церкви имуще?» И отвещаше им ту живущии: «Звон той всегда бываше». И мно//(л. 54 об.)зи людие дивишася таковому чюдеси и подаяху в манастырь милостыню велию. Старец же Андреян во многие времена глаголаху братии и всем людем, иже с ним, поставити на том месте молебный храм, сиречь часовня, и вси глаголаху тому быти.