О житии, и подвизех, и о списавшем житие преподобнаго.

И се же вам да поведаю, отци святии и братиа о Христе, слышасте житие, и подвизи, и чюдеса святаго и блаженнаго отца нашего Александра, еже святыи измлада Христу поработа и потрудися своего ради спасениа. Мало убо лет поживе в веце сем, но много Богу угодив, и многа чюдеса сотвори. И кто доволен подробну вся написати добродетелны труды его и подвигы? Аз же многогрешныи и неключимыи, грубый разумом священноинок Феодосии, еже писах житие святаго блаженнаго отца Александра, не на разум свои уповая или яко умея что дерзнух мало нечто о блаженнем написати, понеже убо выше моеа силы дело се. Аз же не яко свое мудрование имый, но обаче помощию Божиею и святаго произволением,//(л. 148) паче же и видяще чюдеса его, их же Бог его ради творяше и творит даже и до сего дни, иная же слышах от поведавших ми истинну. И радовахся, и благодаря святаго, яко тако поживе и тако потрудися в последнемь семь веце рода нашего. И пакы еще не бе ни от кого же списано житие святаго, и о сем многа печаль и скорбь одержаше душу мою, паче же и любовию сдержим есм ко святому великому отцу Александру. И того ради покушахся, от многа мало написах, многа же ина чюдеса пременух множества ради, иная же того ради не написана быша, еже не прииде во слухи наша. Аще и помилова их Бог, они же скрыша чюдеса святаго от своего неразумиа и невежествиа, яко студ и срам вменяше быти себе Божие благодеяние и чюдеса святаго. Нам же о том несть ответа, но сам о собе воздасть слово. Нам же ответ//(л. 148 об.) зол, аще слышим и леностию не напишем. Сие же мало нечто писанию предахом, да не в забвение будеть по Бозе доброделное житие святаго и вы да не лиховани будете таковаго дара, еже не ведущи житиа святаго. Списа же ся житие его в ползу духовною, хотящим своего спасениа и ревновати Богоподвижному житию его. И мне же дерзнувшу писати, известно ведущи паче инех и могуща ползу сотворити, и сие молчанием востех скрыти, и убояхся смерти за преслушание, да не уподоблюся осужению оного раба, погребшаго в земли талант. Сего ради аз попекохся всячески писати, елико достигну, еже о нем, труды его и хожение, да никто же помыслить сие и глаголить, яко не ведущу ми истинное о святем, еже не правописати, и вам же не буди сие тако рещи: «Не//(л. 149) убо он толико лет помня, еже писати» (многа бо лета прешла суть по преставлении его). Сего ради сие написах, от них же слышах, и тако глаголю: «Не даи же Бог, еже лгати на святаго, не буди то».

Но токмо поведаю се: отець мои священьствуя бе в веси тои, идеже рожение имея святыи, и обретох же тамо земледелца некоего Исака имянем. Тои же Исак сродник бе преподобному (вящьшаго брата сын Амбросимов) и яко малыми леты мнее преподобнаго, иже от мала взраста живша с святым и вся же ведыи известно о нем. Сеи же часто прихожаше к отцу моему и многажды беседоваше о святем. Отець же мои вопрошаше. Исак же вся поведа ему по ряду. Аз же всю беседу их слышах и внимах, мне же тогда младу, токмо навыкающу Святому Писанию. Потом же отець мои преселися оттуду на Онегу на реку в село некое, зовомо Надпорожие, в нем же церковь Николае//(л. 149 об.) Чюдотворець. И ту отець мои священьствуя, и в то же время властель в селе том Григореи имянем. Сеи же велию веру имея к монастырю преподобнаго, и еще же поручено ему бе от архиепископа бречи монастырь. Сего ради часто прихожаше к нему священник Корнилеи имянем, посылаем от игумена на оспросе или на инем некоем орудием. Сеи же многажды беседоваше ко отцу моему о святем, и о житии, и о чюдесех его. Сеи же известно ведый, многажды бо поведахся, прочитах писаннаа, иная же писах повелением отца своего Леванида старца, иже преже о сем писаниа сказаша. Аз же по умертвии отца своего священьству сподобихся ту пребыти. По времяни же некоем прииде к нам диак некый Иван имянем, иже многа лета живый во обители, и прият бысть служити с нами у святаго храма. Тои же многым чюдесем святаго сказател ми бысть. Аз же вся сиа слышал, зело удивихся, тем же желанием//(л. 150) и любовию ко святому, яко же огнем распалаем и великым усердием, яко же некоим долгым южем влеком. В мирьском же пребывании многажды покушахся доити обители святаго и не сподобихся.

Егда же от подружиа остахся, и прииде в обитель святаго, и в чернаа одеяниа одеяхся, и потом паки, малу времяни минувше, от пресвященнаго архиепископа Пимина священьству сподобихся, и обретох же тамо древних инок и сродник святаго от рода его. И сии убо начаша ми много поведати о святем бывающаа чюдеса от богоноснаго отца, ова же явленна, ова не явлена. Аз же, елико слышах от известных сведителеи, и многа же ина пременух забвениа ради и многых ради лет прехожениа, кроме бо писаниа бяше. Писаниа бо нимало не обретох, быша бо писаниа изгыбнувша небрежением, иже бысть поведано, и вся же сиа слышах, велми чюдихся,//(л. 150 об.) како не написана быша явьственно в толико лет. Сие же помыслих и рече в себе Божию строению некоему быти, еже и бысть изволением Божиим.