Служба священномученику Иоанну

Служба священномученику Иоанну

Царскосельскому и Чикагскому.

Великая вечерня:

Господи воззвах : глас 4

Подобен: Прехвальнии мученицы:

Радуйся, прехвальне священномучениче Иоанне, / Христу последовав, преславное Отечество свое оставил еси, / и яко Авраам пришлец в землех новых был , ветхаго человека совлеклся еси, / Америки просветитель явился еси, / со усердием стадо Христово спасая, /равный Апостолом ходатай о душах наших.

Радуйся, Иоанне всехвальне, / подвиги Апостол стяжав, / терпение и любовь к пастве своей показав, / Богу истинному во смирении и послушании послужив, / камень веры истинныя во Америце утверди, / молитвами твоими, Церковь сохрани в мире и спаси души наша.

Радуйся, священномучениче Иоанне, / возвращся во Отечество свое веру Христову поругаему обрел еси, / со властию от Бога тебе данною, ругатели безбожныя обличил , / о еже избавити люди от междоусобныя брани взывал еси,/ себе самаго яко жертву живую Богу принесл еси ./ Ныне Христу молися, святе// даровати народу нашему мир и велию милость.

Церкве Российския славо/ и Отечества нашего украшение,/ священномучениче Иоанне,/ властию от Бога тебе данною,/ ругатели безбожныя обличил еси/ и яко волки лютыя, от стада Христова отгнал еси,/ диавола посрамил еси,/ кровь же твоя, яко Авелева, от земли вопиет. / Сего ради ходатай на Небеси о нас верен буди,/ моли спастися душам нашим.

Слава, глас 6

Радуйся, Церковь Русская и Царское Село,/ ликуй земле Америко и граде Чикаго ,/ веселись и ты, Эстонская земле./ Благословение имущи священномученика Иоанна,/ Патриарха Тихона сподвижника,/ вернаго и праведнаго служителя Господня,/ ревностного учителя и защитника Правды Божия,/ просветителя пребывающих во тьме,/ утешителя плачущих, / наставника заблуждших,/ добраго пастыря стада Христова,/ моли о мире всего мира и спасении душ наших.

И ныне, Богородичен: Всемирную славу:

Вход.

Прокимен дне. И чтения три.

Притчей чтение:

Память праведнаго с похвалами, и благословение Господне на главе его. Блажен человек, иже обрете премудрость: и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней, и лета живота в деснице ея: в шуйце же ея богатство, и слава: от уст ея исходит правда, закон же и милость на языце носит. Послушайте убо мене, о чада! честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз премудрость устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо незлобивии коварство, ненаказаннии же прилагайте сердца. Послушайте мене и паки, честная бо реку, и отверзу от устен правая: яко истине поучится гортань мой, мерзки же предо мною устны лживыя. С правдою вси глаголы уст моих: ничтоже в них стропотно, ниже развращенно. Вся права суть разумевающим, и проста обретающим разум. Научу бо вас истине, да будет о Господе надежда ваша, и исполнитеся духа.

Притчей чтение:

Уста праведнаго каплютъ премудрость, язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивыхъ пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благоспешное. Во благих праведных исправится град, и в погибели нечестивых радование. Во благословении правых возвысится град, усты же нечестивых раскопается. Ругается гражданом лишенный разума, муж же мудрый безмолвие водит.

Премудрости Соломоновы чтение:

Праведник, аще постигнет скончатися, в покои будет. Старость бо честна не многолетна, ниже в числе лет исчитается: седина же есть мудрость человеком, и возраст старости житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга: угодна бо бе Господви душа его: сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных его, и посещение во избранныхъ его.

Глас :4

Священномучениче Иоанне, /вере Православной вся ны наставивый ,/ словом и делом защищая стадо свое,/ даже до пролития крови. / О сем же и мы, чада твоя сущи/ благодарно с тобой вопием , / Слава Христу Богу нашему, /даровавшему ти венец мученический/ нам же тобою наставляемым велию милость.

Слава, глас тойже:

Дивному во святых Своих,/ Богу и Владыце живота/ , пение и исповедание приносиши непрестанно Иоанне, / в триех Лицех познаваемому, / в Существе же Едином проповеданному,/ храм Божий в души твоей воздвигшему, / и светом Своим присносущным осиявшему тя, / тобою же и нас Просвещающему.

ина Слава:

Радуйся, преславне отче Иоанне, / града Нарвы изрядный учителю, /Села Царского пресвитере/ и Церкви Российския первомучениче,/ благодать бо сугубая дадеся ти/ первым пострадати за Христа от безбожных./ Сего ради ныне дерзновение имаши усердно молитися за ны,/ не остави попечением своим паствы своея.

И ныне, Богородичен, глас тойже:

Радуйся, Пречистая Дево, / радуйся Богоневесто, радуйся, верных прибежище, / радуйся, мучеников непрестанное пение, / радуйся, храмы Твоя воздвигнути даровавшая угоднику Твоему, / священномученику Иоанну, /егоже моления приемши, спаси благочестно поющия Тя.

Стихиры на стиховне: глас 8:

Приидите людие /, прославим священномученика Иоанна/просветителя и строителя Церкви Божия, / учителя и хранителя веры Христовы, / служителя Жертвы бескровныя,/ вернаго пастыря и наставника, / жизнь свою за Христа положившаго.

Стих: Священницы Твоя облекутся в правду/ и преподобнии Твои возрадуются.

Приидите, восхвалим священномученика Иоанна, /приведшего в земле нашей от многобожия и ересей /к Православной вере люди и паству свою, /словом и делом исповедал еси Христа. / Темже утверди веру нашу , да молитвами твоими Спасет души наша.

УТРЕНЯ

По 1-м стихословии седален

Глас

Воплощение добродетели, ревностный учитель и защитник Веры христианския, верный пастырь стада своего, в Граде Небесном ныне пребываеши, священномучениче Иоанне, не престай молитися за ны.

Слава , и ныне .

О Всепетая Дево,/ Тя вемы Покров земли Русския/ Тебе бо, грешнии, имамы предстательство,/ Тебе стяжахом в напастех спасение,/ Едину Всенепорочную.

По 2-м стихословии седален

Глас

Ныне священномучениче Иоанне, венцем мученическим от Царя Славы, глава твоя украшается, и полки демонов в бессилии своем устрашаются. Негасимый бо свет славы твоея освящает славящия Тя.

Слава , и ныне.

Молитвеннице теплая, Заступнице рода христианскаго,/ приими моления раб Твоих/ и осени Русь Православную покровом Твоея благости.

Величание

По полиелею седален

Воскликнем Богу гласом радования, и прославим пресвитера Иоанна , священномученика Царскосельского и Чикагского, первомученика Церкви Российския, отца нашего достохвального, наставльшаго нас на путь спасения, достигшего Царя славы Христа. Ныне Церковь Русская и Американская прославляет тя, молитвенника о душах наших.

Слава , и ныне:

О Пречистая Дево, рождшая Бога Вечного Царя, с верою и любовию притекаем к Тебе и священномученику Иоанну. Молитеся Христу Богу о спасении душ наших.

Прокимен Глас 4:

Канон, глас 4.

Песнь 1

Слава , ныне .

Приими песнь хвалебную от недостойных уст приносимую, препрославленная Мати Божия.

Песнь 3:

Песнь 5

Песнь 6

Кондак , глас 8

Ревностно пастырское служение свое исполняяй, / ты яко жертву благоприятную / душу свою Богу принесл еси, / моли Христа Бога, отче Иоанне, / мир миру даровати // и душам нашим велию милость.

Икос: глас тойже.

Неустанно в трудех своих веру православную в Америце утверждая, священномучениче Иоанне, во Отечество свое возвратився, деяния добрыя совершал еси. Молитву Богу приносил еси о мире всего мира, за сие от безбожных мучение приял еси. Мы же, овцы паствы твоея, просвещенныя словом и делом твоим, благодарственно взываем сице: Радуйся, священномучениче Иоанне, пастырю добрый стада Христова!

Ин кондак, глас 8

Яко первомученика Церкве Российския/ ублажаем тя, священномучениче Иоанне,/ пастыря Села Царскаго,/ кровию своею известившаго поднебесную / о начале гонений лютых и жестоких,/ в нихже просия велий сонм новомученик,/ имиже дивно прославися Дом Господень,/ Емуже святыня подобает в долготу дний.

Песнь 7

Песнь 8

Песнь 9

На хвалитех стихиры, глас

Ныне Чикаго град Нарва и Царское село,/ радуются, яко священномученик Иоанн ,/ венцем мученическим венчается/ от Царя славы Христа Бога нашего./ Ему же даже до крови и смерти послужив,/ моли Христа Бога, земли нашей и Отечеству твоему спастися.

Верный делатель винограда Христова был еси,/ священномучениче Иоанне,/ кровию своею, яко водою напоил еси землю сию./ Ныне же, напояеши виноградник сей, молитвами твоими.

О священномучениче Иоанне ,/ кому уподобился еси?/ Авелю, яко незлобив был еси;/ Аврааму, яко Господу последовав Отечество свое оставил еси;/ Соломону, яко воздвигл еси храм Господень;/ Моисею, яко провел еси паству свою сквозе пустыню страстей;/ Ною, яко сохранил народ свой от потопа греха;/ Мироносицам, яко не отреклся от Христа;/ первомученику Стефану, яко немолчно славил еси Христа Бога!/ Священномучениче Иоанне, молися о всех, празднующих святую память твою.

О, священномучениче Иоанне!/ свещниче Христов, просветивый всех; /река, напоившая нас верой и доброделанием;/ Агнче Божий, безвинно на заколение ведомый;/ каменю краеугольне, веры Христовой;/ проповедниче и учителю истины Божией;/ пастырю добрый, за паству даже до смерти пострадавый!/ Моли Христа спастися душам нашим.

Пеньми и песньми духовными прославляем тя, священномучениче Иоанне,/ столпе крепкий и учителю веры христовой/ в странах Америки явился еси,/ жизнь свою за люди во Отечестве твоем положивый, и венец мученический приемый,/ молися о нас, духовных чадах своих.

Слава:

Ликуй ныне мученическое воинство, блаженнаго проповедника и священномученика Иоанна Царскосельского и Чикагского восхвалим, предстоит бо ныне пред Престолом славы Божия. Молися за ны, Христу Бессмертному Царю, о оставлении прегрешений наших, испроси у Него нам велию милость.

И ныне и присно….

О, Мати Божия, Господа нашего Иисуса Христа, Мучеников похвало и преподобных радование. Молимся Тебе, со священномучеником Иоанном, о спасении душ наших.

НА ЛИТУРГИИ

Блаженны от канона, песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми. Апостол к Римляном, зачало 99 (гл. 8:28-39). Аллилуйя, глас 6: Священницы Твои облекутся в правду, и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106 (гл. 21:12-19). Причастен: В память вечную будет праведник:

МОЛИТВА

О, избранниче и угодниче Христов, священномучениче Иоанне Царскосельский, Нарвский и Чикагский! Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо, призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в Вере Святой, научи нас всегда творити волю Божию и хранити заповеди Божия и предания церковныя. Буди пастырем нашим - правило веры, воином - вождь духовный, болящим - врач изрядный, печальным - утешитель, гонимым - заступник, юным - наставник, всем же - благосердый отец и теплый молитвенник, яко да молитвами твоими соблюдется в Православии Святая Русь и непрестанно славится в ней Имя Пресвятыя Троицы, Отца, и Сына, и Святаго Духа во веки веков. Аминь.

Служба священномученику Иоанну