Вход. Свете тихий. Прокимен дне. Чтения Богородице.

Месяц сентябрь.

День 1.

Иконы Божией Матери

Именуемой Черниговско – Гефсиманской.

На Господи воззвах поем стихиры Богородице, глас 8[1]:

Твоим благодеянием и чудесем, Владычице,/ оскудения несть и не будет; веко́м бо многим приходящим и христианскому языку во вся станы мира разселяющуся,/ повсюду нова знамения от Твоих святых икон умножаются,/ и человеческая сердца умиления исполняются./ Убо и днесь на Твое славословие собранныя люди благослови,/ и тех приими смиренныя молитвы,/ и прощение согрешений наших у Сына Твоего испроси, Милосердая Мати.

Зрак лица Твоего, о Владычице,/ сице вопиет людем:/ Приидите, христолюбцы и праведнии/ духовную жажду сердец ваших славословием Бога утолите,/ приидите, грешнии и маловернии,/ своих очес к Нему возвести не смеющии,/ и Моего Ппредстательства пред ним просите дерзновенно/несть бо греха, Мою милость от кающихся отгоняющаго,/ приидите и надежду спасения вам возвращу,/ и дарую душам вашим велию милость.

Твоего милосердия неизсекомую бездну ведуще, Владычице,/ аще и язвы грехов многих но́сим/ пред Твоим чудотворным оброзом умиленно себе повергаем,/ и в покаянии Тебе вопием:/ аще и ни единаго глагола ко оправданию дел наших имамы,/ но Твоих чудотворений памятию сердца наша слезами покаяния согреваем,/ еяже ради подаждаждь нам согрешений прощение,/ и душам нашим велию милость.

Ины стихиры глас 2, подобен: Егда от древа:

Всех скорбящих Радосте,/ и обидимых Предстательнице,/ и убогих Питательнице,/ странных же Утешение, и Жезле слепых,/ немощных Посещение,/ труждающихся Покрове и Заступнице,/ и сирых Помощнице,/ Мати Бога Вышняго, Ты еси Пречистая:/ потщися молимся спастися рабом Твоим[2].

Всем Предстательницу Тя человеком,/ всем Прибежище великое,/ всем Заступницу Тя показа, Владычице, христианом,/ Иже из Тебе в наше смешение оболкся от Тебе рожденный Бог,/ Иже нас ради быв Человек,/ Того убо моли непрестанно,/ всем очищение низпослати прегрешений, Богоневестная[3].

Иного прибежища Чистая, ко Творцу и Владыце мы не имамы,/ разве Тебе, Богоневесто,/ да не отриниши нас теплым Твоим предстательством,/ ниже посрамиши любовию притекающия честному образу Твоему поклонитися,/ от негоже источники милости твоя нам источи,/ потребное нам во вся дни жития нашего подающи[4].

Слава и ныне глас 8: От перваго Христова чудесе,/ еже на браце в Кане Галилейстей,/ Богородичну предстательство о людех начало положися,/ до втораго и страшнаго не престанет пришествия./ О, милости неизреченныя!/ О снисхождения благоутробнаго!/ Како Чистая Голубица смрадных грешников не возгнушается?/ Како тех воздыхание матерски приемлет?/ Дерзайте убо братие и моление ваше к Ней паче сотворите,/ есть бо наше защищение Пресвятая Дева,/ Юже врази наша одалети не могут,/ яко Тоя послушает Христос Бог и Спас душ наших[5].

Вход. Свете тихий. Прокимен дне. Чтения Богородице.

Бытия чтение. [Глава 28]

Изыде Иаков от студенца клятвеннаго, и иде в Харрань. И обрете место, и спа тамо. Зайде бо солнце: и взят от камения места того, и положи возглавие себе, и спа на месте оном, и сон виде: И се лествица утверждена на земли, еяже глава досязаше до небес, и ангели Божии восхождаху и низхождаху по ней. Господь же утверждашеся на ней, и рече: Аз Бог Авраамов отца твоего, и Бог Исааков, не бойся: земля, идеже ты спиши на ней, тебе дам ю и семени твоему. И будет семя твое яко песок земный, и распространится на море, и ливу, и север, и на востоки: и возблагословятся о тебе вся колена земная, и о семени твоем. И се Аз с тобою Сохраняяй тя на всяком пути, аможе аще пойдеши: и возвращу тя в землю сию, яко не имам тебе оставити, дондеже сотворити Ми вся, елика глаголах тебе. И воста Иаков от сна своего, и рече: яко есть Господь на месте сем, аз же не ведех. И убояся, и рече: яко страшно место сие, несть сие, но дом Божий и сия врата Небесная.

Пророчества Иезекиилева чтение. [Главы 43 и 44]

Тако глаголет Господь: будет от дне осмаго и прочее, сотворят иереи на олтари всесожжения вашего, и яже спасения вашего, и прииму вы, глаголет Адонаи Господь. И обрати мя на путь врат святых внешних, зрящих на востоки, и сия бяху затворена. И рече Господь ко мне: врата сия затворена будут, и не отверзутся, и никтоже пройдет сквозе их, яко Господь Бог Израилев пройдет ими, и будут затворена. Яко Игумен сядет в них снести хлеб, по пути еламских врат внидет, и по пути его изыдет. И введе мя по пути врат святых сущих к северу, прямо храму: и видех, и се исполнь славы храм Господень.

Притчей чтение. [Глава 9]

Премудрость созда себе дом, и утверди столпов седмь. Закла своя жертвенная, и раствори в чаши своей вино, и уготова свою трапезу. Посла своя рабы, созывающи с высоким проповеданием на чашу глаголющи: Иже есть безумен, да уклонится ко мне. и требующым ума рече: Приидите, ядите мой хлеб, и пийте вино, еже растворих вам. Оставите безумие, и живи будете, и взыщите разума, да поживете, и исправите разум в ведении. Наказуяй злыя, приимет себе безчестие: обличаяй же нечестиваго, опорочит себе, обличения бо нечестивому раны ему. Не обличай злых, да не возненавидят тебе: обличай премудра, и возлюбит тя. Даждь премудрому вину, и премудрший будет: сказуй праведному, и приложит приимати. Начало премудрости, страх Господень, и совет святых, разум. Разумети бо закон, помысла есть благаго: сим бо образом многое поживеши время, и приложатся тебе лета живота.

На литии стихиры, глас 5, подобен: Радуйся:

Руце простираю к Тебе,/ и сквернеи устне отверзаю к молению,/ и преклоняю сердечное колено,/ и умно ногам Твоим пречистым ныне прикосаюся, Чистая:/ и припадаю к Тебе:/ болезни моя исцели,/ летныя моя многия и неисцельныя благостию Твоею исцели струпы,/ избави от видимых врагов и невидимых:/ облегчи, Отроковице, тяготу лености моея,/ яко да Тя пою и славлю,/ Еюже обрете велию милость[6].

Глас 6: Первее написавшейся иконе Твоей Божественным евангелистом Лукою,/ и к Тебе принесенней, Богородице Владычице,/ благовалила еси о иконе сей яко милостива сущи,/ и благословивши ю, рекла еси со властию:/ с сим образом благодать моя и сила./ И воспела еси радуйщеся,/ якоже и Бога внегда насила еси во чреве песнь пророческую:/ се отныне ублажат Мя вси роди./ Темже видяще с гласом действо чудес множество от иконы Твоея явленное и присноявляемое во обители сей,/ немолчными славословле́нии Тя ублажаем и молимтися прилежно:/ умири мир и спаси души наша благоприятным ходатайством Твоим к Рождшемуся от Тебе, Едина Благословенная[7].

Слава и ныне, глас 3: Владычице, Предстательнице всех молящихся Тебе,/ Тобою дерзаем и Тобою хвалимся,/ и к Тебе все упование наше есть:/ моли Рождшагося из Тебе,/ за непотребныя рабы Твоея.