Volapükaklub valemik Nedänik: Kobikam 24id

Fa J. G. M. Reynders, Sr.

Ün poszedel zädela: d. 28id yulula yela: 1934 Vpaklub valemik Nedänik ejenükon kobikami valemik 24id oka in bal lecemas löpik ela ‚Café-Restaurant „De Kroon“‛, ‚Spui‛ 10 in ‚Den Haag‛.

Presidan: ‚Dr. Arie De Jong‛ ämaifükom tü düp: 2 minuts 30 ko vöds benokömik anik kobikami‚ ed änunom me plän brefik kodi, sekü kel kobikam at päjenükon ün yulul.

Demü klubayel, kel baibinon kaledayel‚ lecifef sevabo steifon ad lonülön äs nom kobikami valemik ün prim yela. Ad rivön zeili at nu kobikam valemik pajenükon ün yel fovik alik tü timül mö muls tel gölikum ka tü ut kobikama büik.

Protok kobikama valemik büik päloreidon, e pädispenon blöfü baibin.

Pos atos sekretan äblinom nunodi dö yel epasetiköl. Nunod at äninädon brefiko sökölosi. Lecifef ai esteifon mögiküno ad kälälön demädis Vpa. Kobikam valemik büik päjenükon tü 1933, setul, 25 in el ‚Café „De Groothertogin“‛, in ‚Den Haag‛. Pö pöt at i Vpa-literat e Vpa-spodotem pidajonädons.

El „Vpagased pro Nedänapükans“: jäfidot calöfik kluba, kel eprimon tü d. 1id yanula ayela yelodi kilid oka‚ dageton piano nitedäli mödikum. In nüms lätik yegeds veütik fa cifal obsik: ‚Prof. Dr. Alb. Sleumer‛ pelasumons. Diseinü propagid Vpa gased at pasedon ladetes mödik in lomän e foginän.

Sis kobikam büik i Vpavödem statudas e nomema konömik nulikas epubon in bukafom. Al vödemas Nedänapükik e Vpika binon sivovik de sekretan kluba tä suäm flonazimas 25 a samäd.

Vpamäks, kels binons sivoviks de guvan Vpafunda: Dr. ‚Arie de Jong‛ tä suäm flona lafik a samäds 100‚ juitons nitedäli mödikanas. De propagidamed süperik at samäds 2400 peselons ün 1933. Ad stigädön slopükami liman alik Vpakluba ogeton glato samädis 100 mäkas at pro keliman alik, keli ulüblinon.

I ün yel et, efe ed ün göloyel ed ün latayel Vpatidodems pänotedons in el „Nieuwe Voorburgsche Courant“.

In Deutän pato söl: ‚Johann Schmidt‛: musigal in ‚Weiszkirchen im Taunus‛, lezilom gönü demäds Vpa. Etradutom ya lautotis ömik ini Vp., e spelom ad pübön atis ünü fütür nülik. Volapükane zilik at ün yel epasetiköl diplom tidana Vpa pegevon fa cifal.

Pos loreid nunoda kal e gidükam dö 1933 päxamons fa komitetanef binü pösods, tel‚ e pädispenons fa on blöfü baibin. Kal päjöton me jötasuam gönetik mö fl. Ned. 47‚48.

Pos atos presidan änunom‚ das söl: ‚A. A. Moll van Santbergen‛ enotodom demü per logamafäga oka vipi ad säcalikön as vipresidan lecifefa. Kobanef älelilon ko lied gretik atosi. Kodedü säcalikam at presidan äskätom veitöfiko meritabis söla: ‚Moll van Santbergen‛ demü val‚ keli eduinom valemo pro Vp. e patiko pro klub obsik‚ ed ämobom kobanefe ad cälön omi stimalimani kluba obas. Mob at päzepon me vögods valodik.

Pla söl: ‚Moll van Santbergen‛ söl: ‚H. Bakker‛ in ‚Voorburg‛ pädavälom lelobülo fa kobanef ad vipresidan.

Pos atos päloreidon penäd söla: ‚Johann Schmidt‛, kel äninädon vipis gudikün pro kobikam. (Pened at polasumon ini Vpa-gazed. Redak.)

Zuo päloreidons penäds anik de el ‚The philological Society‛, kels presidan ilüsedom lebukis tel dö Vp.

Dü kobikam pidajonädons lebuks Vpik, kels epubons ünü yels lätik.

Ze tü düp: fol minuts 30 presidan äfärmükom kobikami me vöds anik dana demü nitedäl pijonülöl.

Lecifef nu binädon me: ‚Dr. Arie De Jong‛: presidan; ‚H. Bakker‛: vipresidan; ‚J. G. M. Reynders, Sr.‛: sekretan-kädan.