О преставлении преподобнаго отца нашего Паисия архимандрита Галицкого чюдотворца.

По сихъ летомъ некиимъ мимошедшимъ откры Богъ угоднику своему преподобному архимандриту Паисию, яко святая его душа от тела разлучитися и от трудовъ земныхъ, в них же на земли пребывая, упокоение прияти, и со всеми святыми в царствии небесномъ, во дворехъ его, витати имать.// Преподобный же архимандритъ Паисий, егда о семъ от Бога известися, тогда начатъ наипаче в молитвахъ и трудехъ, во бдениихъ и пощениихъ пребывати день и нощь. Братию же выну поучая, глаголя: «Ведите убо, о братия моя возлюбленная, яко близъ есть день Господень великий и просвещенный. И день жития нашего преклонился есть к вечеру. И сего ради дондеже не варитъ вечеръ и не зайдетъ солнце, и не затворятся двери Царствия Христова, потщитеся, о братия моя, постигнути вне, а донележе в житии семъ имате пребывати, выну в молитвахъ и трудехъ, во бьдениихъ и пощениихъ себе упражняйте. Между же себе любовь имейте. Превозношение и гордыню далече от себе отжените, в место же того смирение Христова восприимите и всегда себе мертвы быти вменяйте мирови и ничтоже от мирскихъ помышляйте, но выну желание свое имейте, како угодити Богови. Смерть же пред очима своима сердечныма выну имейте, помышляюще день той скорбный, вонь же душа от тела разлучитися имать. И како убежати князей оныхъ воздушныхъ? Вси греси человечестии написаны в рукахъ имущихъ. Како же предъстати и явитися пред лицемъ неумытнаго судии. Страшенъ бо есть, и кто// стерпитъ день входа Его? Тогда бо ангели в труды вострубятъ и мертвыя от гробъ возбудятъ, тогда земля потрясется и камение разпадется, тогда престоли поставятся и судия сядетъ. Пред Нимъ же ангеломъ предстоящимъ и человекомъ въводимымъ, книгамъ разгибаемымъ, деломъ испытуемым, помысломъ истязуемым. Кий тогда страхъ будетъ пожившимъ во гресехъ? Тогда страшный и неумытный судия во услышание всемъ единъ гласъ возгласитъ, обаче двояко слышатися будетъ. По писанному: «Едино глагола Богъ, двоя сия слышахъ». И гласъ той от устъ страшнаго судии исходящий паче меча обоюдоостра// имать разсекати грешныхъ от праведныхъ. Праведнымъ убо стоящим одесную престола Господня слышано будетъ сие: «Приидите, благословеннии Отца Моего, наследуйте уготованное вамъ царствие от сложения мира». Сущим же ошуюю гласъ той слышанъ будетъ сице: «Отидите от мене, проклятии, во огнь вечный, уготованный диаволу и ангеломъ его». Сия вся егда услышатъ грешницы ошуюю стоящии, что сотворити имутъ? Не веде. Или кое оправдание приносити восхотятъ? Воистинну несть тогда имъ избавляющаго, ни помогающаго. Тогда убо река огненная клокочющи потечетъ и вся грешники в себе// пожретъ. И сего ради дне грознаго и страшнаго должно есть намъ, братие моя возлюбленная, выну пещися, да избудемъ шуяго, причастни же будемъ дестнаго стояния». И тако часто ихъ поучая о смерти своей сими словесы являя имъ тайне, а не яве. Братиямъ же не разумеющимъ о семъ, чесого ради о смерти и о страшномъ суде часто к нимъ беседуетъ. Егда же приближися день скончания его, тогда Богу благоизволившу ощути в себе преподобный малу некую болезнь и позна, яко время преставления его приспе, всю нощь пребысть бдя, приуготовляя себе, во еже бы ему во утр!!// литургисати и конечнее жертву безькровну Богови принести и в напутие живота вечнаго причастнику быти телу и крови Христа Бога Нашего и тако всю нощь пребысть моляся и давидьский глаголя гласъ: «Не дахъ сонъ очима моима, ни веждома моима дремания, ни покой скраниямъ моимъ, дондеже вниду во святило Божие». Приспевшу же часу утреннему пению, иде преподобный в церковь и пребысть стоя на месте своемъ даже до отпуста утренняго пения. По отпусте же, пришедъ в келию свою, мало восклонися на одъ не яко бы сну причаститися ему, но малого ради за немощь плоти упокоения. И потомъ// правило къ божественному причащению совершивъ. И времени приспевшу, безкровную жертву Богови принесъ и божественную литургию совершивъ, причастися святыхъ таинъ и просветися лице его, яко солнце. Служащии же с нимъ иереи и диакони, видевше лица его пременение, недоумевахуся, помышляюще в себе, что будетъ сие, обаче никтоже можаше познати, чесо ради вся сия быша. По отпусте же божественныя литургии преподобный архимандритъ Паисий благодарьственныя молитвы ко Господу Богу принесе, яко в напутие живота вечнаго сподобися причастникъ быти пречистаго Его тела// и честныя крове и по сконьчании благодарственныхъ молитвъ иде в келию и восконися на одъ свой. Видевъ же себе изнемогающа и хъ концу приближаюшася, повеле призвати иереа, ему же совести своя открывая и сказавъ ему, яко приспе часъ преставления его. По сихъ заповедая ему, глаголя: «Отче святый, егда Господу Богу благоизволившу, убогая моя душа от телесе имать разлучитися, тогда по чину тело мое земли предайте и о вселении ея во дворы небесныя Господа молите. Азъ же аще обрелъ буду благодать пред Богомъ и узрю пресвятое божественное Его лице, непрестанно имамъ молити о васъ// и о всехъ во обители сей терпящихъ братии, таже повеле призвати к себе в келию всю братию. И егда снидошася братия и видеша его на рогозине лежаща, недоумевахуся, тогда преподобный начатъ к нимъ глаголати: «О добрая моя, возлюбленная братия, помните ли словеса моя, яже выну к вамъ глаголахъ? Яко день Господень великий и просвещенный близъ есть и день жития нашего преклонилъся есть вечеру. Се ныне день той Господень постиже мя и день жития моего вечернюю годину варяетъ, нощь приближися, и светъ очию моею хощетъ померкнути, языкъ связуется, нозе престаютъ от течения// и вси уди тела моего покой хотятъ прияти и на ложи смертномъ спати, дондеже возсияетъ солнце, си есть дондеже приидетъ истинное солнце Христосъ Богъ Нашъ, праведный судия, судити живымъ и мертвымъ и здати комуждо по деломъ его. И ныне молю васъ, братия моя, да по отшествии моемъ пребудете зде во обители Божия Матере, терпяще Бога ради, якоже обещастеся, и не единъ от васъ да не отлучится дружины своея, но вси вкупе единодущьно подвигомъ добрымъ подвизающеся, течение скончевайте, главы невидимыхъ змиевъ потщитеся сокрушити, да победители// сихъ явившеся сподобитеся неосужденно в горний Иерусалимъ достигнути и поклонитися Христу, тридревно воскресшему, тело же мое земли предайте, да возвратится, от нея же взято бысть. Братия же сия словеса от устъ преподобнаго слышавше многия слезы от очию своею изливаху и плачюще глаголаху: «Отче, не остави насъ, сирыхъ, и аще святая твоя душа от тела и разлучается ныне, Богу тако благоизволившу, обаче и в вышнихъ водворяяся назирай насъ, долу сущихъ, и преподобнии свои руце къ Богу молебно простерши, спасай насъ, чадъ своихъ, и обитель свою, в ней же многи труды и подвиги показа». Богу Нашему слава и ныне, и присно, и во веки вековъ. Аминь.