Месяца Иулиа в 12 день житие и подвизи, рождение и воспитание и прочее пребывание и сказание от части чюдес его преподобнаго отца нашего Антониа Леохновского новаго новгородскаго чюдотворца.

Житие Антония Леохновского

Повесть монаха Нифонта о преподобнем отце Антонии Леохновском новгородском чудотворце.

Поведа нам монах Нифонт, идущу му путем и прииде в великий Нов град и вопросих у некоего от купец и пустыни преподобнаго отца Антониа. Он же рече ми: «Воистинну, отче, яко пятьдесят поприщ или мало множае от Великаго Нова града. Аз же приидох на Перекому реку и доидоша обители чудотворца Николая и Преподобнаго отца Ефрема, иже ныне зовется Перекомский чюдотворец. И во вторый день приидоша в пустыню на реку, глаголемую Переходу, идеже живяше преподобный Антоний. И приближися к нему к келии// его и сотворив молитву и изыде святый ко дверям келии своея. Аз же видях плоть его яко зверя и ужасохся и пристрашен бых и вострепетав и глагола ми святый: «Чадо, не бойся от взора телесе моего». И возва мя именем, глаголя: «Чадо Нифонте, что семо пришел еси?» И благослови мя и целовав, рече: «Не размысли в сердцы своем». И се рекшу святому взятся внезапу гора и ввержется долу и восклонився видх ю ходящу. Святый рече: «Что ти бысть? Не тебе рех восторгнутися, стани на месте твоем». И ста внезапу гора. Аз же сия видех и падох от страха ниц на землю. И ем мя за руку святый и сотвори молитву, по скончании же молитвы возвращся в келию, гласом велиим воззва: «Предлежи,// чадо, трапезу». Вшедшим же нам в келию, видех трапезу и два стола стояще и хлеб и овощие и две рыбы испечены. И ядшим нам паки святый рече: «Возми, чадо, сия отсюду». И абие о себе взятся прапеза. В той же день вечера по приятии нам пищи глагола святый: «Днесь бо разлучается душа моя от страстеи плотских». И абие молитву сотворив и благослови мя. Бе же час яко шестый нощи. И пребыв всю нощь моляся и ктому ничто же видех. Во утрии же взем благословение и отидоша, славя Бога, прославляя угодники своя, дающаго благая рабом своим.

Чудо святаго отца Антониа о отрочати, его же змия уязви, и молитвами преподобного исцели отроча сие.//

Отроча же некое, иже пасяше стадо овец, лежаше на кончине он, змиею уяден. И тогда прииде к нему старец и виде отроча уядена от змия. И глагола старец ко отрочати: «Иди ко источнику, еже есть близ реченнаго монастыря сего». И рече ми старец: «Почерпи ми воды и принеси семо». И разверзох уста его и влияхом воды, и рече старец: «Во имя Святыя Троицы силою Христовою исцеляет тя раб Христов, старец Антоний». И восклонився отрок и начаша блевати таково зло, яко и тому великому старцу дивитися, яко блеваша велик час и воста, хотя гнати овцы, и рече ми старец: «Повеждь ми, како клялся еси вчера, яко убозеи// вдовице, яко продаде овцу ея на трех сребреницех юже она даде тебе пасти, тогда глаголал еси ея волк изел». И глагола отрок: «Ей, отче, тако есть. И ты како уведал еси, отче, о сем?» И рече старец к нему: «Мне седящу в келии моеи, приехав ко мне муж на беле коне борзо и рече ми: ”Антоние, востани, иди скоро ко источнику, сущему одесную тебе наю, виждь человека, от змия уяденна и рцы ему: “По сем не кленися именем Божиим, ни святым его не сотвори неправды. И отдасть убо сей жене вдовице овцу, да не горее тебе что будет””. И яко слыша от старца, паде на ногу его, глагола, яко тако есть, «продах бо овцу жены тоя// на трех сребреницех и вчера ей солгах, рек, яко волк изъел. И рече ми жена: “Не весели мя убогу сущу вдовицу, яко хощеши, тако твориши”. Молю твое благолюбие, помолися, отче, о мне Господу Богу, да ми отпустит грех мой, отдай жене и до живота моего давати на праздник святаго Боголепнаго Преображения в церковь убогим от того, еже упасу, десятое». И помолися старец, рек ему: «Чадо, блюдися и отступи от злых дел твоих, да не горшее впадеши. И даждь убо сей убозей вдовице, еже обещался». И опусти его. «Аз же, яко слышав от старца того, рекуще имя свое Антонии, и тако здрав бысть посем, велми прослави Бога, творящаго его дивная чудесса угодника своего,// Ему же слава ныне и присно и во веки веков. Аминь.

Житие Антония Леохновского

Месяца Иулиа в 12 день житие и подвизи, рождение и воспитание и прочее пребывание и сказание от части чюдес его преподобнаго отца нашего Антониа Леохновского новаго новгородскаго чюдотворца.

Понеже убо красное мира сего тленно сущо и предходимо любящия та// привлачити, ко иже желающим сия малыя ради сладости чувство колебати и ум страстем паряти[1] творяще, яко призирати не точию обещанных благ, но и того самого Творца истинней жизни – увы! – отвращатися и сия убо настоящыя преди избирати, нежели оная будущая благая, лютую и безконечную смерть волею приемлюще.

Такожде и Создателем вечных благ[2] и еже о сих упование имеющим безмерно суща[3], тамошнего блаженства воспоминающа трудом воздаяние, еже тамо красных настрижнение[4], не точию обычея[5] есть временное пустынное презирати, яко подобно, и душу мою погубити Христа ради, яко же во Святом Евангелии речено есть и паки всех сладких и краиних[6] оного ради любити смерть. Аще// не обретаем сия вскоре, на всяко время и сих терпяще пощением, и бдением, и многоразличными подвиги, сия с ненавидящими бесы борющеся и естество присно побеждающе, безплотным противяся[7], во плоти суще. А сицевых убо добрых и божественных мужей не о коем поведати хощу[8].

Не сам изволих, начати дерзнух, но аще кто и любомудрен ум имел, и к словесем силнейшим, ни тои дерзосте к такову делу касатися. Колми убо имеюще ум страстей, и нечист, и пуст и мыслей премудрых, словом грубо всяческия, яко же бы рещи всяческии коварства боязнию содержимся к начинанию сего дела, но обаче святаго сего призвавше на молитву еже к Богу и человеком благонравным любезно// начну поведити яже о святем от начала рождения и воспитания и прочая пребывания.

Сей преподобный отец наш Антоний родися от благочестиву и благородну христианину родителю, детей боярских, зовомых Вениаминовых от града и отечества преименитаго града Твери. Прииде некогда в страх Божии и помыслиша в себе, како бо ему бежати от суетнаго мира сего к попечению житейских, видяще бо блаженный колицех напояется зол и болезней и человеческим душам прилепляется суеты мира сего и колицех благ лишается многажды бо отпадая и от создателя своего Бога, прогневающа его на всяк день многими неправдами и повинна вечней муце бывает. Многим человеком, во благочестии живущим, многу// печаль по сих имети и часто поучатися. И в размышлении бывает своего жителства, разсмотряя, како пребывает душа его, яко же и сего сотвори блаженный Антоном. Сие бо бяше имя его от родителей его во святем крещении, сим именем звашеся и в научении благих дел возраста своего приспеваше. Любим же бывает от сродник своих и от сосед ближних, яко же и многажд обычаи бывает мирских сожителства их. Он же паче о сем велику печаль имеяше, моля всегда Всемилостиваго Бога и на помощь призывая Пречистую Богородицу, дабы ему како избежати от мирския красоты века сего и сподобитися иноческаго образа. На то бяше ему хотение и желание велико. Паче же «по Бозе, – яко же и Писание глаголет Святое, – печаль мужу// покаяние и раскаяние наводит и обращение еже к Богу, яко же и на сем избысть вся вскоре.

Усмотрив убо себе блаженный время благополучно и утаився прииде в предградие[9] Великаго Нова града Шелонский конец зовется близ Илмера езера дванадесять поприщ на реку Переходу прежде поживе в пустыни Пустош именуется Рублево и моля всегда всемилостиваго Бога, дабы сподобитися ангельскаго образа. Бог же не презря раба своего, даде ему путь спасения. Яви ся же ему ангел Господень, глаголя: «Антоние, иди на место, глаголемое Леохнов, яко от сего места три поприща». Прииде же блаженный на предреченное Богом указанное место и пострижеся ту от некоего священноинока Тарасиа, создав же и храм молитвенный во имя святаго боголепнаго Преображения// Господа Нашего Иисуса Христа и наречение бысть тому монастырь Леохнов, а ныне зовется Новая Антониева пустыня. Послав же и в Великий Нов град ко архиепископу Генадию о благословении церкве во имя боголепнаго Преображения Господа Нашего Иисуса Христа о антимисе. Архиепископ же яко услыша имя блаженнаго Антониа, вскоре посланника отпущает, мир и благословение отцу Антонию подает и антимис на освящение церкви по 6987 году на праздник боголепнаго Преображения Господня августа в 6 день. И украсив ю иконами и книгами и всякими потребами, елико сила можаше.

Блаженный же и преподобный отец нащ Антоний нача подвизатися непрестанно, труды к трудом прилагати, овогда в поварне, иногда же в пекарне труждаяся и работая// з братиею день и нощь, иногда же без сна многажды пребываше, приходяще к нему благороднаго чину оставляюща славу маловременную и суету мира сего, хотяще с ним жити, призирающе любовь родителей своих отца и матерь, сродники и други, ревнующе добродетелному житию его, смирению и терпению телеснаго покоя и сладких брашен и пития уклоняшеся, простыми брашны и суровым зелием питашеся. Преподобный же отец наш Антонии, видя сия добродетель в братстве, радовашеся душею и сердцем веселяся, яко плоды трудов его возрастаху его по совету его по благословению и по обещанию вся исправляется и своею волею спасаются// и молитвами его собрася уже немало число братии, яко же рещи до пятидесяти. И бе видети чудно и слышати. И позна Божия любовь в них и заповеди Христовы исполняем по апостолу: «Любовь, радость, мир, долготерпение, благостыня, вера, кротость, воздержание». Что рече потом апостол? На таковых несть закона, иже плоть свою распяша со страстми и похотми, иже живуща духом и прилагахуся друг другу тягот носяща и тако скончеваху закон Христов. Аще бе святый нехитр книжному учению, но душевному. Доброту и ум здрав стяжа, яко же отец наш великий Антоний рече: «Не требует книг душа человеча, аще имать ум здрав». Сей покой мой во век и во век века, зде вселюся, яко изволих его всемилостивый Бог благословен // Господь Бог отныне и до века. Та же паки облиста свет неизреченный, яко и солнечныи лучи покрыти воздух же тогда чисто сияюще. Прииде же к нему некогда христианин от ближния веси, моля его пострищися и жити с ним. Блаженный же умолен быв братиею, повеле и святыи священнику пострищи и во иноческий чин одеяти, и нареченно имя его Григорий. И доволно наказав его святый иноческим подвигом, он же от отца вся добре приемле, искусен же бяше на рыбное ловление и послушлив всегда со благословением исходя и много рыбы принося ловлением сетми. Повсегда же святый исходя от келлии своея, взем сечиво и мотыгу, труждашеся по вся дни.// Видяще же его братия, добре прилежаше ко трудом такожде с ним купно труждашеся день и нощь. Церковное же пение со уставом укрепляюще и благочинием и благостроением всегда прихождаху к церкви Божией со вниманием мнозем и молчанием, себе дающе друг со другом, а не о полезных всегда страх Божий пред очима имуще и поучающеся день и нощь в заповедех Господних. Святый же с прилежанием наказоваше по вся дни и келейному жителству и монастырскому служению, каково пребывание имеюще святии отцы, прежнии иноцы, спасающе Бога ради, живуще в пустынях и во общих житиях. Они же вся от него заповеданное с радостию приемлюще. Видев же// его братия словом наказующе и во всем образ собою показуя, тщахуся и тии единоравни ему быти, яко же нецыи отцы от древних мужей поведают о нем, яко много потрудился в животе своем подобно есть, братие, со испытанием всяку правду творити и праздники угодников Божиих в чести держати. От тех бо приемлем оставление грехов и болезней всяких применение и исцелением получаем, аще с верою чистою и добрыми делы к ним приходим. Тем бо рече Господь Наш Иисус Христос: «Мертвыя воскрешайте, прокаженныя очищайте, бесы изгоняйте». Леность отгоняюще, чистоту и милость возлюбим, бо Господь Бог блажит// благая: «Блажени милостивии, яко тии помиловани будут». И непрестанно призывает ны святым Евангелием в вечную жизнь, повелевая нам присно всяку скверну и житие нечистое отврещи от себе и чистым сердцем приступити к нему, прияти оно царство, из него же испадохом, преступивше заповедь, яже бе прежде дана бысть прадеду нашему Адаму в раи древнии воздержания ради. Аще бы ю сохранил во веки, бы жив был без печали и без смерти, старости не приемлюще нетленно тело. Егда же завистию диаволею прелстися и славы Божия отлучися невоздержания ради, оттоле изенаша и нападоша на человеческий род печали и старости и смерть// приемлюще живот человечь и того места желающа святии мученицы и праведницы крепко препоясався чресла своя и брань приемша на противнаго диавола, и победиша его паки, внидоша в первую породу. Не лстимся, братия, яко безсмертни, иже бо житию сему поработится, то враг Божий бывает и пагубник души своей. Но воспрянем отныне, да не лишимся славы Божия и радости вечныя, воздвигнемся от прелести мира сего. И яко же обещахомся Господеви в порождении святаго крещени пред многими послухи, сице глаголюще: «Отрицаюся сатаны и всех дел его». Сия суть сотонина дела идолослужения, братоненавидения, клеветания и невоздержание, лжа,// зависть, ярость, ненависть, разбои, татба, пьянство, обядение, обида, песни бесовския, плесание, хуление, срамословие, волхвование, детогубление, гордость, преступление клятвы, еже клятися именем Божиим. Аще сих дел останемся, то взыщем всякия добродетели, яко же пишется: «Уклонися от зла и сотвори добре». Да аще останемся от злых дел, то паки убо внидем в ту де породу, но да совершим обетование наше еже ко Господу нашему, и возлюбим Его всем сердцем и всею мыслию своею, и ближняго своего яко да сами себе, да внидем радующеся в вечную жизнь и безсмертный живот и неизреченную// красоту, ея же желая блаженныи отец наш Антоний подвигнуся жития сладости попрати, богатство роздая нищым. И тои Христова гласа услышав, яко же рече: «Взываю к тебе, не убойтеся от убивающих тело, а душы не могущих погубити, воврещии в геену огненну». Тем же убо, братия, кая полза есть, аще и весь мир приобрящет, а душу свою отщетит. То чим искупим ю от муки вечныя? Точию аще останемся зла и покаемся в церкви и нищыя дадим, но потщимся отселе тесным и прискорным путем выити в вечную жизнь, сиречь воздержанием, пощением, не токмо от брашен и от похотей воздержащеся,// но и от всякаго зла бегаи греха губящаго душу и тело и томи плоть свою Христа ради, яко же отец наш Антоний претерпе от бесов скорби и от человек лукавых наветы Христа ради Сына Божия прият. Тем же сияет ныне во славе Божии паче солнечнаго сияния и память его дивна и преславна его чудеса и исцеление сотворяет Господь Бог Наш иже бо верою чтит память святаго отца Антониа, тои молитвами его от всех избавится бед и от грехов и от всякия напасти избудет. Тому, братие, поревнуем и такожде добрая дела сотворим. И той человек же бе, яко же и мы, но всяку злобу возненавиде и Божию волю сотвори, еже потщимся и мы сотворити, да будем сынове// света и причастницы царствия небеснаго. Бе же преподобный Антоний возрастом умирен и лицем благообразен, браду имея продолгу должиною мерну густу, сединами сияющу, паче же рещи – милостию и добродетелию украшен, в стретение весел и благоуветлив и мил\остив ко всем. И начат же о нем слава велия происходити повсюду, и начаша христолюбивии людие благочестное житие его и смирение многое, милосердие славяще Отца, и Сына, и Святаго Духа ныне, и присно, и во веки веков. Аминь.//