О принесении честных мощей преподобнаго отца нашего Антониа Леохновскаго Новгородскаго чудотворца.

Егда пленяша безбожнии еллинии в Великий Нов град,//(л. 38 об.) тогда преподобный отец наш Антоний взят бысть в Великий Нов град преосвященным Киприаном митрополитом. В то же время безбожнии еллини и обител Боголепнаго Преображения Господня пожгоша, братию посекоша.

Един же брат тоя обители, ученик святаго отца Антониа утаися, и отиде из монастыря, и живяше по пустыням, крыяшеся от безбожных тех еллин. Егда же волею Божиею безбожнии еллини изгнани быша, тогда православнии нача являтися во свое отечество. Прииде же и ученик святаго отца Антониа на преждереченное место именем Григорий и видеша обитель, создание//(л. 39) отца своего, от тех безбожных еллин огнем позжена и братия посечена. И прослезися, и постави келеицу малу, и начаша молити Всемилостивао Спаса, дабы на запустело место сие, и поставиша храм молитвеный Боголепнаго Преображения Господня. По четвертем же лете, егда плениша безбожнии еллини, явися ему во сне преподобный отец Антоний, рече ему: «Отче Григории, поиди в Великий Нов град и повеждь преосвященному Киприяну митрополиту и велможам града, да положен буду в созданнем монастыре Преображения Господня». Старец же Григорий ни во что же вменяя, и явися же ему и во второе время, такожде не внят//(л. 39 об.) ю. Явися же ему и в третие страшным образом, яко же и лучи огненнии испущающи грозно зело, яко мнитися ему от пресветлых тех луч сияющю сожженному быти, и глас бысть: «Аше не поведаеши глагол моих, то велику беду приимеши. Аз убо имам инде явитися, ты же зле погибнеши». От страшного сего видения зело ужасеся, паде на землю, яко мертв, и лежаща на земле на мног час.

И воста, иде в Велики Нов град, поведа Киприану митрополиту и велможам града того. Митрополит же иде со кресты на указанное то место со всем освященным собором, и с началники же града, и со множеством народа.//(л. 40) И откопаша землю, и открыша раку, и обрете тело преподобнаго отца Антония цело и нетленно, яко вчера облечен бысть. Никако же земному праху коснутися, тогда виде весь народ Великаго Нова града, стекшеся, на предивное сие чудо со слезами и радостною душею, воздаяху хвалу Богу и Пресвятыя Богородицы – обретение многобогатого и безценнаго сокровища, возсылаху. И повеле митрополит святыя его мощи нест со святыми иконы и кресты. И тако молебное совершивше. Митрополит же со всем освященным собором, и началники града, и со множеством народа з женами и з детми//(л. 40 об.) вкупе вслед святаго идяше. И к новоявленным чудотворным мощам реяхуся мнози людие, друг друга попираху, инии же по главам их ходяща и к чудотворным мощам прикасахуся. И в то время показа преподобный отец Антоний чудо, исцеля человека убога именем Иосифа, нимало очима своима видяща три лета.

И тако проводиша святыя его мощи за два поприща от града глаголемаго Аркажского монастыря, и певше молебное пение, святый же второе чудо показа: некоего человека именем Стефана, очима же боляща, исцели его. Святитель же Киприан послаша//(л. 41) честныя его мощи проводити Юрьева монастыря архимандриту Дионисию и с прочими игумены. И приидоша с честными его мощми в созданный его монастырь Боголепнаго Преображения Господа Нашего Иисуса Христа, еже зовома есть Леохново. И тако честныя его чудотворныя мощи погребоша его честно всем народом, яже доныне с верою приходящим много исцеление подавает и до сего дни. И тако уставиша память его праздновати месяца иулиа в 12 день на память святых мученик Прокла и Илариа. Поживе же преподобный отец наш Антоний в монашестве 56 лет,//(л. 41 об.) и всех лет живота его от рожества его и до преставления его 86 лет. Богу Нашему слава ныне, и присно, и во веки веков. Аминь.

[1] Т парити

[2] Т Такожде и возжделителным вечных благ

[3] Т сущо

[4] Т натрижнение

[5] обычаем

[6] красных

[7] противимся

[8] От таковых же сей преподобный отец наш Антоний

[9] От первых строк до этого фрагмента житие почти дословно воспроизводит текст Жития Ферапонта Белозерского.

[10] В Тит 4230 этого фрагмента (со слов «Се покой мой» до «сияюще») нет.

[11] В Тит 4230 весь этот абзац полностью отсутствует.

[12] В Тит 4230 «(л. 10) Егда же плениша безбожнии елмени Велий Нов град, тогда преподобный отец наша Антоний взят бысть в Великий Нов град преосвещеным Киприяном митрополитом. Егда же приспе праздник Четснаго и Животворящаго Креста Господня месяца сентебрия в 14 день преподобный Антоний... презва к себе понамаря церкве Луки еуангелиста Корнылия именем и глагола ему://(л. 10 об.) “Брате Корнылие, аще и зде аз умираю и погребено будет зде тело мое, но аще обретох благодать у Господа Бога, то будет тело мое в созданом мною монастыре благолепнаго Преображения Господа Нашего Иисуса Христа”».