Великомученику Артемию Антиохийскому

глас 4:

И́стинною бо Христо́вою ве́рою / утве́рждься, страстоте́рпче, / мучи́теля злочести́ва царя́ / победи́л еси́ со и́дольским того́ возноше́нием. / Тем от Царя́ Вели́каго, ве́чно ца́рствующаго, / пресве́тлым венце́м побе́дным одаре́н бысть, / вся исцеля́яй боля́щия и призыва́ющия тя, Арте́мие вели́кий, / моли́ Христа́ Бо́га // спасти́ ду́ши на́ша.

Праведному ИовуМногострадальному

глас 2

Память праведнаго Твоего Иова, Господи, празднующе,/ тем Тя молим:/ избави нас от наветов и сетей лукаваго диавола/ и спаси души наша, яко Человеколюбец.

Мученикам Адриану и Наталии

глас 4:

Му́ченицы Твои́, Го́споди, / во страда́ниих свои́х венцы́ прия́ша нетле́нныя от Тебе́, Бо́га на́шего: / иму́ще бо кре́пость Твою́, / мучи́телей низложи́ша, / сокруши́ша и де́монов немощны́я де́рзости. / Тех моли́твами // спаси́ ду́ши на́ша.

Ин тропарь мученику Адриану

глас 3:

Бога́тство неиждиву́щее вмени́л еси́ / ве́ру спасе́нную, треблаже́нне, / оста́вль оте́ческое нече́стие / и Влады́ки стопа́ми ше́ствуя, / Боже́ственными дарова́нии обогати́лся еси́, / Адриа́не сла́вне; / Христа́ Бо́га моли́ // спасти́ся душа́м на́шим.

Преподобномученицам Елисавете, великой княгине и инокине Варваре

глас 1:

Смире́нием досто́инство кня́жеское сокры́вши, / богому́драя Елисаве́то, / сугу́бым служе́нием Ма́рфы и Мари́и / Христа́ почти́ла еси́. / Милосе́рдием, терпе́нием и любо́вию себе́ предочи́стивши, / я́ко же́ртва пра́ведная Бо́гу принесла́ся еси́. / Мы же, чту́ще доброде́тельное житие́ и страда́ния твоя́, / я́ко и́стинную наста́вницу усе́рдно про́сим тя: / свята́я му́ченице вели́кая княги́не Елисаве́то, // моли́ Христа́ Бо́га спасти́ и просвети́ти ду́ши на́ша.

Преподобной Вассе Псково-Печерской

глас 4

Днесь, вернии, преславно ликовствуем,/ память преподобныя Вассы совершающе,/ и раце мощей ея умильно покланяющеся,/ со слезами и любовию вопием ей:/ буди ходатаица наша пред Богом,/ огради молитвами твоими обитель и град наш,/ в скорбех и печалех нам буди утешительница,/ ты бо еси крепость верным,/ и обители Псково-Печерския украшение.

Священномученику Фаддею

глас 1:

Хвала Богу и жертва живая / житие твое, священномучениче Фаддее, явися. / Постом, бдением и молитвою Небесная дарования приим, / многим добрый помощник и утешитель бысть. / Пастырскою мудростию и тихостию нрава украшен, / лукавства врагов Христовых препобедил еси. / Слава Давшему тебе во страданиях крепость, / слава, яко мученика, Венчавшему тя, // слава Действующему тобою всем исцеления.

_________________________________________

Преподобному Симеону Столпнику

глас 1

Терпения столп был еси,/ ревновавый праотцем, преподобне,/ Иову во страстех, Иосифу во искушениих,/ и безплотных жительству, сый в телеси,/ Симеоне отче наш,/ моли Христа Бога спастися душам нашим.

_________________________________________

Праведным Богоотцам Иоакиму и Анне

глас 2

Праведных Твоих, Господи, память празднующе,/ теми молим Тя:// спаси души наша.

Тропарь праведной Анне

глас 4

Жизнь рождшую во чреве носила еси, Чистую Богоматерь,/ богомудрая Анно./ Темже к приятию Небесному, идеже веселящихся жилище,/ в славе радующися, ныне преставилася еси,/ чтущим тя любовию/ прегрешений просящи очищение,// присноблаженная.

Преподобному единому

глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне (имярек), дух твой.

Рождеству Пресвятой Богородицы

глас 4:

Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце пра́вды Христо́с Бог наш,/ и, разруши́в кля́тву, даде́ благослове́ние,// и, упраздни́в сме́рть, дарова́ нам живо́т ве́чный.

Преподобному Серафиму Саровскому

глас 4:

От ю́ности Христа́ возлюби́л еси́, блаже́нне,/ и Тому́ Еди́ному рабо́тати пла́менне вожделе́в,/ непреста́нною моли́твою и трудо́м в пусты́ни подвиза́лся еси́,/ умиле́нным же се́рдцем любо́вь Христо́ву стяжа́в,/ избра́нник возлю́блен Бо́жия Ма́тере яви́лся еси́./ Сего́ ра́ди вопие́м ти:// спаса́й нас моли́твами твои́ми, Серафи́ме, преподо́бне о́тче наш.

Черниговская - Гефсиманская

Глас 5

Пречи́стая Влады́чице Богоро́дице, / упова́ние всех христиа́н, / поне́же ина́го упова́ния не и́мамы, ра́зве Тебе́, / Всенепоро́чная Влады́чице моя́, Госпоже́ Богоро́дице, / Ма́ти Христа́ Бо́га моего́, / те́мже поми́луй, и изба́ви мя от всех зол мои́х, / и умоли́ ми́лостиваго Сы́на Твоего́ и Бо́га моего́, / да поми́лует окая́нную ду́шу мою́ / и да изба́вит мя от ве́чныя му́ки // и сподо́бит мя Ца́рствия Своего́.

Мученику Вонифатию

глас 4

К сосло́вию по́слан му́чеников,/ му́ченик был еси́ и́стинен,/ постpада́в за Хpиста́ кpепча́йше, всехва́льне,/ мощми́ же возвpати́лся еси́ ве́pою посла́вшей тя,/ Вонифа́тие блаже́нне,/ моли́ Хpиста́ Бо́га// пpия́ти нам гpехо́в пpоще́ние.

Преподобномученице Евгении

глас 4

А́гница Твоя́, Иису́се, Евге́ния / зове́т ве́лиим гла́сом: / Тебе́, Женише́ мой, люблю́, / и, Тебе́ и́щущи, страда́льчествую, / и сраспина́юся, и спогреба́юся креще́нию Твоему́, / и стражду́ Тебе́ ра́ди, / я́ко да ца́рствую в Тебе́, / и умира́ю за Тя, да и живу́ с Тобо́ю, / но, я́ко же́ртву непоро́чную, приими́ мя с любо́вию поже́ршуюся Тебе́. // Тоя́ моли́твами, я́ко ми́лостив, спаси́ ду́ши на́ша.

Пророчице Анне

глас 2

Пророчицы Твоея Анны память, Господи, празднующе,/ той Тя молим:// спаси души наша.

Пророку

глас 2:

Проро́ка Твоего́ (имярек) па́мять, Го́споди, пра́зднующе,/ тем Тя мо́лим:// спаси́ ду́ши на́ша.