Святому равноап. николаю японскому

глас 4

Апостолов единонравне и сопрестольне, /служителю Христов верный и Богомудрый,/ цевнице избранная Божественнаго Духа, /сосуде преизливающийся любве Христовы, /Японския земли просветителю, /святый Николае, иерарше равноапостольне, /молися Живоначальней Троице о всем твоем стаде и о всем мире.

святителю Николаю Сербскому.

Глас 8

Златоустый проповедниче Воскресшаго Христа,/ путеводителю рода Сербскаго крестоноснаго в веках/, благогласная лиро Духа Святаго,/ слово и любы монахов,/ радованье и похвало священников,/ учителю покаяния,/ всенародный Владыко, предводителю богомольна воинства Христова,/ святый Николае Сербский и всеправославный,/ со всеми святыми Небесныя Сербии/ моли Единаго Человеколюбца// даровати мир и единение роду нашему.

Мученице Татиане

Глас 4

А́гнцу Пречи́стому и Па́стырю после́дуя, / а́гнице слове́сная Татиа́но / мы́сленных звере́й не убоя́лася еси́, / но зна́мением кре́стным вооружи́вшися, / до конца́ тех низложи́ла еси́, / и вошла́ еси́ в Небе́сную огра́ду, // иде́же помяни́ и нас, му́ченице Христо́ва многому́драя.

_______________________________________________

Блаженной Матроне Анемнясевской

глас 8

Яко зарница небеснаго огня,/ возсия в рязанстей стране блаженная старица,/ святая Матрона,/ еяже память днесь творяще,/ воспоим Христа Бога,/ моляще Его даровати нам тояпредстательством в болезнех,/ бедах и скорбех терпение,// и душам нашим велию милость.

Преподобному Пахомию Нерехтскому

Глас 4

Жите́йския молвы, преподо́бне, отве́ргся / и, я́ко птица, обре́те себе́ в пусты́ни безмо́лвие, / и в ней водвори́вся, соста́ви оби́тель во и́мя Пресвяты́я Тро́ицы,/ в моли́твах и бде́нии прилежа́ Бо́гови, / процве́л еси́, яко фи́никс, и бысть о́браз утеше́ния духо́внаго. / преподо́бне о́тче Пахо́мие,// моли́ Пресвяту́ю Тро́ицу спасти́ся душа́м на́шим.

_____________________________________________

Прп. Амфилохию Почаевскому,

гл. 4

Земли Волынския преславна подвижника / и обители Почаевския достойна насельника/людей православных изрядна целителя /яви тя Церкви Своей Христос Бог наш, /преподобие отче Амфилохие, /Ему же усердно молися/ от навет вражиих свободитися // и спастися душам нашим.

__________________________________________

Прп. Паисию Святогорцу

Глас 5

Подо́бен: Собезнача́льное Сло́во:

Боже́ственныя любве́ о́гнь прие́мый, / превосходя­́щим по́двигом вда́лся еси́ весь Бо́гови, / и уте­ше́­ние мно́гим лю́дем был еси́, / словесы́ боже́­ственными наказу́яй, / моли́твами чудотворя́й, / Паи́сие Богоно́се, / и ны́не мо́лишися непреста́нно // о всем ми́ре, преподо́бне.

Собору Псково-Печерских святых

Глас 6

Собор святых Псково-Печерских днесь почтим, / в дебрех лесных обитель чудную основавших, / и, яко крины, добродетельми процветших, / и людем правый путь богоподобия указавших, / молят бо Господа // миру мир даровати и велию милость.

___________________________________________

Преп. Агапиту Киево-Печерскому

Глас 2

Велия веры исправления,/ в пещернем затворе, яко на воде упокоения,/ преподобне отче Агапите,/ радовался еси, огнем бо любве Божественныя распаляем,/ бдением и молитвою безстрастия достигл еси/ и явился еси равноангельный на земли.// Того молитвами, Христе Боже, спаси души наша. Аминь.

_________________________________________

«Выдропусская»

глас 3

Твоя Богородице Дево святыня,/ яко омофором нас от бед покрывающая,/ явися в облаце с шумом летящая/ к радосте веси Выдропусской/ егда из нея исхищена бысть/ ныне даруеши нам благодать многомощную/ с неюже и чудеса Твоя,// и подаеши нам велию милость.

_____________________________________

Свят. Нектарию эгинскому

Глас 1

Силиврии отрасль и эгины хранителя, в последняя лета явльшагося, добродетели друга искренняго, Нектария почтим вернии, яко божественнаго служителя Христова: точит бо цельбы многоразличныя благочестно вопиющим: слава Прославльшему тя Христу, слава Давшему ти чудес благодать, слава Действующему тобою всем исцеления.

Великомученице Марине-Маргарите

Глас 3

Девства добротами преиспещренна, дево,/ нетленными венцы венчалася еси, Марино,/ кровьми же мученичества обагрена,/ чудесы просветившися исцелений,/ благочестно, мученице, прияла еси почесть победы твоего страдания.

____________________________________________

Преп. Антипе Святогорцу Валаамскому

Глас 5:

Яко радугой вселенную опоясавший/ от горы Афонской даже до горы Севернаго Афона горы Валаамской достигший/ преподобне отче наш Антипе примерный,/ дивным отцам Молдавским уподобился еси/ и ныне во славе Горняго Валаама пребываеши,//моли Христа Бога Спаса нашего,// деланию иноческому нас наставити.

Св. Живоначальной Троице

глас 8

Благословен еси, Христе Боже наш, / Иже премудры ловцы явлей, / низпослав им Духа Святаго, / и теми уловлей вселенную, / Человеколюбче, слава Тебе