Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь, славно бо прославися.
Припев: Иисусе Сладчайший, спаси мя
Иисусе Сладчайший Христе, Иисусе долготерпеливе, души моея язвы исцели, Иисусе, и услади сердце мое, Многомилостиве, молюся, Иисусе Спасе мой, да величаю Тя, спасаемый.
Иисусе Сладчайший, спаси мя
Иисусе Сладчайший Христе, Иисусе, отверзи покаяния ми дверь, человеколюбче Иисусе, и приими мя, Тебе припадающа и тепле просяща, Иисусе Спасе мой, согрешений прощения.
Иисусе Сладчайший, спаси мя
Иисусе Сладчайший Христе, Иисусе, исхити мя из руки льстиваго велиара, Иисусе, и сотворидеснаго предстоятеля славы Твоея, Иисусе Спасе мой, части шуия мя избавляяй.
Пресвятая Богородице, спаси мя
Иисуса рождшая Бога, Владычице, моли о непотребных рабех, Пречистая, яко да муки молитвами Твоими избавимся, Нескверная, оскверненнии, славы присносущныя наслаждающеся.
Пресвятая Богородице, спаси мя
Христову книгу одушевленную, запечатленную Тя Духом, великий архангел, Чистая, зря возглашаше Ти: радуйся, радости приятелище, Еюже праматерняя клятва разрешится.
Пресвятая Богородице, спаси мя
Адамово исправление, радуйся, Дево Богоневесто, адово умерщвление; радуйся, Всенепорочная, палато всех Царя; радуйся, престоле огненный Вседержителя.
Пресвятая Богородице, спаси мя
Цвете неувядаемый, радуйся, Едина прозябшая Яблоко Благовонное; радуйся, рождшая благоухание Единаго Царя; радуйся Неискусобрачная, мирови спасение.
Пресвятая Богородице, спаси мя
Чистоты сокровище, радуйся, Еюже от падения нашего востахом; радуйся, сладкоуханный крине, Владычице, верных благоухаяй, кадило благовонное и миро многоценное.
Господи Иисусе Христе Боже мой, помилуй мя.
Песнь воспети и восхвалити, Спасе, Твоего раба достойно сподоби, безплотному Aнгелу, наставнику и хранителю моему.
Святый Aнгеле Божий, хранителю мой, моли Бога о мне.
Един аз в неразумии и в лености ныне лежу, наставниче мой и хранителю, не остави мене, погибающа.
Слава Отцу и Сыну и Святому Духу.
Ум мой твоею молитвою направи, творити ми Божия повеления, да получу от Бога отдание грехов, и ненавидети ми злых настави мя, молюся ти.
И ныне и присно и во веки веков. Аминь.
Молися, Девице, о мне, рабе Твоем, ко Благодателю, со хранителем моим Aнгелом, и настави мя творити заповеди Сына Твоего и Творца моего.
Песнь 3
Ирмос: На камени мя веры утвердив, разширил еси уста моя на враги моя. Возвесели бо ся дух мой, внегдапети: несть свят, якоже Бог наш, и несть праведен паче Тебе, Господи
Иисусе Сладчайший, спаси мя
Услыши, человеколюбче Иисусе мой, раба Твоего, вопиюща во умилении, и избави мя, Иисусе, осуждения и муки, едине долготерпеливе, Иисусе Сладчайший многомилостиве.
Иисусе Сладчайший, спаси мя
Подъими раба Твоего, Иисусе мой, припадающа со слезами, Иисусе мой, и спаси, Иисусе мой, кающагося мя и геенны, Владыко, избави, Иисусе Сладчайший многомилостиве.
Иисусе Сладчайший, спаси мя
Время, Иисусе мой, еже дал ми еси, во страсти иждих, Иисусе мой. Темже, Иисусе мой, не отвержи мя, но воззови, молюся, Владыко Иисусе Сладчайший, и спаси.
Пресвятая Богородице, спаси мя
Дево, рождшая Иисуса моего, моли избавити мя геенны, едино предстательство оскорбляемых, Богоблагодатная, и сподоби мя жизни, Всенепорочная, нестареющияся.
Пресвятая Богородице, спаси мя
Клас прозябшая Божественный, яко нива неоранная яве, радуйся, одушевленная трапезо, Хлеб животный вмещшая; радуйся, животныя воды источниче неистощаемый, Владычице.
Пресвятая Богородице, спаси мя
Юнице Юнца рождшая непорочнаго, радуйся верным; радуйся. Агнице, рождшая Божияго Агнца, вземлющаго мира всего прегрешения; радуйся теплое очистилище.
Пресвятая Богородице, спаси мя
Утро светлейшее, радуйся, Едина Солнца носящая Христа Света жилище; радуйся, тьму разрушившая, и мрачныя бесы отнюд отгнавшая.
Пресвятая Богородице, спаси мя
Радуйся, двере Едина, Еюже Слово пройде едино, вереи и врата адова, Владычице, Рождеством Твоим сокрушившая; радуйся Божественный входе спасаемых, Богоневесто.
Святый Aнгеле Божий, хранителю мой, моли Бога о мне.
Все помышление мое и душу мою к тебе возложих, хранителю мой; ты от всякия мя напасти вражия избави.
Святый Aнгеле Божий, хранителю мой, моли Бога о мне.
Враг попирает мя, и озлобляет, и поучает всегда творити своя хотения; но ты, наставниче мой, не остави мене погибающа.