Молитва перед святым Причащением

Иерей:

Тебе предлагаем живот наш весь и надежду, Владыко человеколюбче, и просим, и молим, и мили ся деем, сподоби нас причаститися Небесных Твоих и страшных Таин, сея Священныя и Духовныя Трапезы, с чистою совестию, во оставление грехов, в прощение согрешений, во общение Духа Святаго, в наследие Царствия Небеснаго, в дерзновение еже к Тебе, не в суд или во осуждение.

Иерей возглашает:

И сподоби нас, Владыко, со дерзновением, неосужденно смети призывати Тебе, Небеснаго Бога Отца, и глаголати.

Людие:

Отче наш, Иже еси на небесех, да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Иерей:

Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Лик:

Аминь.

Таже иерей:

Мир всем.

Лик:

И духови твоему.

Диакон:

Главы ваша Господеви приклоните.

Лик:

Тебе, Господи.

Молитва главопреклонения

Иерей:

Благодарим Тя, Царю невидимый, иже неисчетною Твоею силою вся содетельствовал еси, и множеством милости Твоея от небытия в бытие вся привел еси. Сам, Владыко, с небесе призри на подклоньшия Тебе главы своя, не бо подклониша плоти и крови, но Тебе страшному Богу. Ты убо Владыко, предлежащая всем нам во благое изравняй, по коегождо своей потребе: плавающим сплавай, путешествующим спутешествуй, недугующия исцели, Врачу душ и телес.

Возглашение:

Благодатию, и щедротами, и человеколюбием Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно, и во веки веков.

Лик:

Аминь.

Иерей же молится:

Вонми, Господи Иисусе Христе Боже наш, от святаго жилища Твоего, и от престола славы Царствия Твоего, и прииди во еже освятити нас, иже горе со Отцем седяй, и зде нам невидимо спребываяй. И сподоби державною Твоею рукою преподати нам Пречистое Тело Твое и Честную Кровь, и нам и всем людем.

Сей молитве глаголемей, диакон, стояй пред святыми дверьми, опоясуется орарем крестовидно. Таже покланяется иерей, подобне и диакон, на немже стоит месте, глаголюща тайно, трижды:

Боже, очисти мя, грешнаго, и помилуй мя.

Затворяются Царские врата завесою.

Диакон возглашает:

Вонмем.

Иерей же, вознося Святый Хлеб, возглашает:

Святая святым.

Лик:

Един свят, / един Господь, / Иисус Христос, / во славу Бога Отца. / Аминь.

И поют лицы киноник дне, или святаго.

Причастны

В воскресенье

Хвалите Господа с небес, хвалите Его в вышних. Аллилуиа, аллилуиа, аллилуиа.

В понедельник святым Бесплотным силам

Творяй Ангелы Своя духи, и слуги Своя пламень огненный. Аллилуиа, аллилуиа, аллилуиа.

Во вторник св. Иоанну Предтече

В память вечную будет праведник, от слуха зла не убоится. Аллилуиа, аллилуиа, аллилуиа.

В среду Пресвятой Богородице

Чашу спасения прииму и имя Господне призову. Аллилуиа, аллилуиа, аллилуиа.

В четверг св. Апостолам

Во всю землю изыде вещание их, и в концы вселенныя глаголы их. Аллилуиа, аллилуиа, аллилуиа.

В пятницу св. Кресту

Спасение соделал еси посреде земли, Боже. Аллилуиа, аллилуиа, аллилуиа.

В субботу всем святым

Радуйтеся, праведнии, о Господе, правым подобает похвала. Аллилуиа, аллилуиа, аллилуиа.

И за упокой

Блажени, яже избрал и приял еси, Господи, и память их в род и род. Аллилуиа, аллилуиа, аллилуиа.

Диакон глаголет:

Раздроби, владыко, Святый Хлеб.

Иерей же, раздробляя и на четыре части, глаголет:

Раздробляется и разделяется Агнец Божий, раздробляемый и неразделяемый, всегда ядомый и никогдаже иждиваемый, но причащающияся освящаяй.

Диакон глаголет:

Исполни, владыко, святый потир.

Иерей же:

Исполнение Духа Святаго.

Диакон:

Аминь.

И приемля теплоту, глаголет ко священнику:

Благослови, владыко, теплоту.

Иерей же благословляет, глаголя:

Благословенна теплота святых Твоих всегда, ныне и присно, и во веки веков. Аминь.

И диакон вливает, глаголя:

Теплота веры исполнь Духа Святаго. Аминь.

Причащение в алтаре

Иерей же глаголет:

Диаконе, приступи.

Диакон:

Се прихожду к безсмертному Царю и Богу нашему.

Иерей же, держа Святый Хлеб, дает диакону. Диакон, приемлет Святый Хлеб, глаголя:

Преподаждь ми, владыко, Честное и Святое Тело Господа и Бога и Спаса нашего Иисуса Христа.

Иерей же глаголет:

Имярек,священнодиакону, преподается честное и святое и пречистое Тело Господа и Бога и Спаса нашего Иисуса Христа, во оставление грехов его и в жизнь вечную.

И отходит (диакон), и молится, яко и иерей, глаголя:

Верую, Господи, и исповедую:

Подобне взем и иерей едину частицу Святаго Хлеба, глаголет:

Се прихожду к безсмертному Царю и Богу нашему.

Честное и пресвятое Тело Господа и Бога и Спаса нашего Иисуса Христа преподается мне, имярек, священнику, во оставление грехов моих и в жизнь вечную.

И приклонив главу молится, глаголя:

Верую, Господи, и исповедую:

И тако причащаются в руках держимаго со страхом и всяцем утверждением. Таже иерей глаголет:

Се паки прихожду к безсмертному Царю и Богу нашему.

Таже иерей восклонься приемлет обема рукама с покровцем святый потир и причащается трижды из него, глаголя:

Честныя и святыя Крове Господа и Бога и Спаса нашего Иисуса Христа, причащаюся аз, раб Божий, священник имярек, во оставление грехов моих и в жизнь вечную. Аминь.

И тако свои устне и край священнаго потира в руку держимым платом отер, глаголет:

Се прикоснуся устнам моим, и отымет беззакония моя, и грехи моя очистит.

Таже призывает диакона, глаголя:

Диаконе, приступи.

И диакон приходит и покланяется единою, глаголя:

Се паки прихожду к безсмертному Царю и Богу нашему.

И: Преподаждь ми, владыко, честную и святую Кровь Господа и Бога и Спаса нашего Иисуса Христа.

И иерей глаголет:

Причащается раб Божий, диакон имярек, честныя и святыя Крове Господа и Бога и Спаса нашего Иисуса Христа, во оставление грехов своих и в жизнь вечную.

Причастившуся же диакону, глаголет иерей:

Се прикоснуся устнам твоим, и отымет беззакония твоя, и грехи твоя очистит.

Зри. Подобает ведати, яко аще суть хотящии причащатися святых таин, раздробляет иерей две части Святаго Агнца оставшия, еже НИ, и еже КА, на малыя частицы, яко быти всем причастником довольно, и тако влагает их во святую чашу.

И покрывает святый потир покровцем, подобне и на святый дискос возлагает звездицу и покровцы. Таже глаголет молитву:

Благодарим Тя, Владыко человеколюбче:

Причащение народа в храме

И тако отверзаются двери святаго олтаря. И диакон, поклонився единою, приемлет потир с благоговением, и приходит во двери, и вознося святый потир, показует и людем, глаголя:

Со страхом Божиим и верою приступите.

Лик:

Благословен Грядый во имя Господне, / Бог Господь и явися нам.

Иерей же молится:

Верую, Господи, и исповедую, яко Ты еси воистинну Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сие есть самое пречистое Тело Твое, и сия есть самая честная Кровь Твоя. Молюся убо Тебе: помилуй мя и прости ми прегрешения моя, вольная и невольная, яже словом, яже делом, яже ведением и неведением, и сподоби мя неосужденно причаститися пречистых Твоих Таинств, во оставление грехов и в жизнь вечную. Аминь.

Таже:

Вечери Твоея тайныя днесь, Сыне Божий, причастника мя приими; не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем.

Да не в суд или во осуждение будет мне причащение Святых Твоих Таин, Господи, но во исцеление души и тела.

Таже приступают хотящии причащатися. И идут един по единому, и покланяются со всяцем умилением и страхом, согбенне руце к персем имуще, таже приемлет кийждо Божественныя Тайны. Иерей же, причащая его, глаголет:

Причащается раб Божий, имярек, честнаго и святаго Тела и Крове Господа и Бога и Спаса нашего Иисуса Христа, во оставление грехов своих и в жизнь вечную.