Акафист святителю филофею, митрополиту тобольскому и сибирскому

Кондак 1

Избранный Богом на апостольское служение во стране Сибирстей, истинный ревнителю монашеского жития и длагочестия, духовнаго просвещения начальниче и всем верным помошниче, приими похвальныя песни сия от нас, со умилением тебе зовущих:

Радуйся, Святителю отче Филофее, земли Сибирския просветителю.

Икос 1

Ангелов Творец посла тя на просвещение языков земли Сибирстей, во стране и сени смертней седящих и мерзким идолам поклоняющихся. Ты же, ревностию о Господе Вседержителе поревновав, научил еси их почитати истиннаго Бога, в Троице Святей славимого, да тобою просвещении, принесут благодарения сицевая:
Радуйся, отче святый, апостолов сонаследниче;
Радуйся, святителю дивный, таин Божиих проповедниче;
Радуйся,верою просветивый край дивный и суровый;
Радуйся, отрасль многоплодная лозы Христовой;
Радуйся, любовию люди ко Творцу приведый;
Радуйся, яко наставил еси заблудшия на путь истинный;
Радуйся, Промыслом во страну Сибирскую пришедый;
Радуйся, Богом данный тебе талант умноживый;

Радуйся, Святителю отче Филофее, земли Сибирския просветителю.

Кондак 2

Видевше умныма очима сердца твоего беды человеков, от сетей диавольских уловляемых, восхотел еси послужити Царю Небесному в чине иерейстем, отче святый Филофее, да приведеши ко Христу заблудших чад Его. Темже постави тя Господь пастырем стаду словесному, да исправиши беззаконныя, обратиши отпадшия и научиши всех взывати Богу:

Аллилуия.

Икос 2

Разумом Божественным дивно просвещаем, духовныя премудрости научен был еси во граде Киеве. Пастырем же быв, прещедро духовное богатство свое людем расточил еси, в вере и добродетельнем житии утверждая и подвизая паству свою на брань с князем мира сего. Мы же, видящее таковое твое о людех попечение, с любоввию зовем ти:
Радуйся, наставниче благочестивого жития;
Радуйся, помошниче жаждущих спасения;
Радуйся, пастырю стада Христова;
Радуйся, делателю вертограда Христова;
Радуйся, милостивый утешителю скорбящих;
Радуйся, молитвенниче наш неусыпающий;
Радуйся, о людех твоих усердный ходатаю ;
Радуйся, паствы твоея перед Богом предстателю;

Радуйся, Святителю отче Филофее, земли Сибирския просветителю.

Кондак 3

Сила Вышняго укрепи тя, отче Филофее, егда возжелал еси поработити Господеви в чине ангельском, взем на рамо крест Его. Иго же благое восприим, невозвратно Христу последовал еси, поя Ему:

Аллилуия.

Икос 3

Имуще велию любовь ко Творцу своему, благодатиею Божиею укрепляем, монашеский постриг восприял еси в лавре Киево-Печерстей. По сем же, вся прелести мира презрев, на высоту добродетели от силы в силу восходя, ангельским житием твоим научаеши всех работати Единому Богу и тебе, угоднику Его, воспевати:
Радуйся, соблазны мира сего презревый;
Радуйся, искушения плотския победивый;
Радуйся, треволнения житейская оставивый;
Радуйся, Единому Богу работати восхотевый;
Радуйся, монашеского жития наставниче;
Радуйся, обителей иноческих устроителю;
Радуйся, верный Христов служителю;
Радуйся, любви к Богу носителю;

Радуйся, Святителю отче Филофее, земли Сибирския просветителю.

Кондак 4

Бурею помыслов не сокрушился еси, преподобне отче Филофее, егда избра тя братия лаврская на служение икономское, да о хлебе насущнем для иноков промышяя, непрестанное молитвенное славословие Богу возсылаеши, образ Его в себе носящее и воспевая ему со страхом и трепетом:

Аллилуия.

Икос 4

Слыша царь Петр о тебе слух похвален, яко мудрым строителем и крепкаго иноческаго жития устроителем показался еси, отче Филофее, во обители града Брянска мудро жительство по Бозе созидая, избра тя, мужа непорочнаго, во архиерея пастве Сибирстей. Тем же и мы, таковому всеблагому и мудрому Промыслу Божию радующееся, со умилением поем ти:
Радуйся, яко иго благое Христово восприял еси;
Радуйся, яко образ жития святого показал еси;
Радуйся, яко царем земным избран был еси;
Радуйся, яко воле Царя Небеснаго последовал еси;
Радуйся, во апостольском звании людем служителю;
Радуйся, ко Христу верный путеводителю;
Радуйся, бисера духовнаго добрый стяжателю;
Радуйся, Христова благовестия учителю;

Радуйся, Святителю отче Филофее, земли Сибирския просветителю.

Кондак 5

Яко звезда светлая показался еси, святителю Филофее, граду Тобольску. Добрым пастырем и предстоятелем явился еси, неустанно в трудех пребывая и о Церкви Сибирстей неусыпное попечение имея. Иереям мудрый наставник и учитель был еси, о пастве твоей денно и нощно молитвы вознося, да ни едино овча погибнет, но вси благодарственно воспоют Богу:

Аллилуия.

Икос 5

Видяще паству свою духовно неустроенну и непросвещенну, и в пороках многоразличных коснящу, создал еси школу для отроков Сибирских, сии словесем мудрости Божественныя научаемии и в христианских добродетелях тобою наставляемии, укрепляхуся в вере истинней. С ними же и мы благодарными песньми ублажаем тя:
Радуйся, духовнаго просвещения в Сибири начальниче;
Радуйся, младенцем и отроком духовный наставниче;
Радуйся, мудрый насадителю нивы Христовой;
Радуйся, неленостый проповедниче Божия Слова;
Радуйся, новокрещеных на путь истинный наставляяй;
Радуйся, в душах верных храм веры созидаяяй;
Радуйся, в воспитании чадам добрый помошниче;
Радуйся, учащим и учащимся скорый заступниче;