О приходе в слободский монастырь преподобнаго отца Трифона.

Егда же Никита Строганов прият от преподобнаго благословение,//(л. 220 об.) тогда одари его милостынею доволно. Преподобный же Трифон прохождаше страны оны, достиже с чюдотворными иконами в Богоявленской монастырь. Братия же сретоша его с честию, яко же присная чада ко отцу своему любовь должную показующе, и изыдоша со множеством народа, и прияша его любезно с честию в монастырь. Преподобный же отец Трифон в начале Успенского и Богоявлен//(л. 221)ского монастырей и не во едино время хождаше в Соли Вычегоцкой со святыми иконами. И по сем преподобному отцу Трифону пребывающу в Богоявленском монастыре в трудех и подвизех, яко же и прежде обычай имяше, во дни убо труждаяся, в нощи же на молитве стояше. И во едину от нощей, бывшу святому в хлебопекалне, с ним же точию ученик его//(л. 221 об.) Досифей. И по вечернем правиле нача святый с воздыханием и со слезами творити молитву Иисусову, и нача сам себе охуждати, глаголя сице: «Окаянне и грешне и худе Трифоне, земля еси ты и пепел, кал еси и сор и всякаго праха хуждьши. Почто высокая мыслиши и чесо еще желаеши? Неси ли ты был поп и потом строитель, ты же был еси и архи//(л. 222)мандрит. Неси ли чести изыскал? Неси ли сладких и красных мира сего насладился? И что ти еще не достало? Точию гроб и погребалная. И уже ожидает тя час смертный, и не веси, с которыми делы Богу явишися, но отселе убо грешный Трифон, плачися горко пред Господем Богом и кайся грех своих и не мысли ктому высокая,//(л. 222 об.) но смиренная стяжи, да не яко гордым фарисеем осуждении восприимеши, но держися мытарева покаяния, да видя тебе Господь во смирении может поставити с праведными». Тако бо преподобному отцу Трифону размышляющу о себе и глаголющу сицевая и не во едину нощь, но и по многая времена, тако смиряя себе, глаголаше.

По сем же и ученика своего Досифея ко//(л. 223) спасенному пути и к подвигом иноческаго терпения наказуя и запрещая ему, да не исходит из обители Богоявленского монастыря, и «аще некако изыдеши, – рече, – паки в том же монастыре будеши и многи скорби и напасти от бесов и от злых человек приимеши, точию внимай себе, яко по смерти своей в Богоявленском монастыре почиеши и в память//(л. 223 об.) мою многим на пользу будеши, яко мой еси ученик». И ина многа изрек, яко же по пророчеству святаго вся сиа збышася на ученице его Досифее. Сей же ученик святаго Досифей по преставлении преподобнаго отца Трифона во иночестве живый пятдесят лет, и бысть в велицей старости, и успе, и погребен бысть в Богоявленском монастыре.

О хождении//(л. 224) преподобнаго отца Трифона в Соловецкий монастырь.

Преподобному же отцу Трифону пребывающу в Богоявленском монастыре, яко же и прежде в трудех и подвизех, и возревнова древним святым отцем, иже бо в Палестине сущим. Яко же бо тии прихождаху от града во град и от обителей своих во ины пользы ради духовныя и даже//(л. 224 об.) и до святаго града Иеросалима прехождаху, покланяхуся святым местом и польсовахуся друг от друга, тако же и сий преподобный отец наш Трифон, яко пчела многотрудная прохождаше многи грады, веси и монастыри, ово собрания ради на создание монастырей, ово же духовнаго ради ползования, да яко же иночества да навыкнет, может и иных братию во обителех своих наставляти//(л. 225) по апостолу: «Сам искушен быв, может и напаствованным помощи» (Евр 2:18).

Дойде же преподобный Трифон и до самаго моря окияна, даже и до пречестныя обители Соловецкия. И молебная Господу Богу совершив, и быв у честных рак преподобных отец Зосимы и Савватия Соловецких чюдотворцов. Видевше же тоя обители игумен и братия преподобнаго отца Трифона в глубоцей//(л. 225 об.) старости в велицем смирении, и почтоша его велиею честию, яко же довлеет духовне и телесне. И ту преподобный от честных и многолетных старец многу духовну пользу прият. Игумен же и братия зело его возлюбиша и не восхотеша его от себе из обители отпустити за премногое его добродетелное житие, понеже бо и прежде его ведаху его богоугодное житие,//(л. 226) но и сами они пророческому дару сподоблени бяху. Прорекоша бо преподобному отцу Трифону, яко «вмале времени от жития сего привременнаго преставитися имаши в вечную жизнь и едва возможеши желанное свое обещание получити». Преподобный же отец Трифон, воздохнув из глубины сердца, прослезився и рече: «Простите мя, отцы святии, по благодати по Христа Бога Нашего и аз//(л. 226 об.) вем, яко близ настоит время исхода души моея, и молю вы, отцы и братия, Господа ради молите Бога за мя, грешнаго, дабы ваших ради святых молитв сподобил мя Господь видети на Вятке дом Успения Пресвятыя Богородицы и тамо обещание свое исполнити, желаю бо телу моему в той обители положену быти, много бо о сем Бога молих, но да и ваших ради молитв получу от Бога милость//(л. 227) в день судный». Игумен же и братия, видевше святаго тако умилена суща и о обители своей зело скорбяща, и прославиша Бога, мир, и благословение, и целование о Господе друг другу давше, и отпустиша его. И егда отпущаху его, прирекше ему: «Воля Господня да будет (Ср. Деян 21:14), и яко же восхотел еси, тако и буди ти, да и нас поминай всегда святых своих к Богу//(л. 227 об.) молитвах». И тако преподобный отец наш Трифон возвратися и Соловецкия обители к Вятке.