О изгнании из манастыря преподобнаго отца священноархимандрита Трифона.

Ненавидяй же добра рода человеческаго злый убийца душ человеческих враг диавол, не могий бо терпети добродетели преподобнаго, и яко же первее//(л. 182 об.) в Пыскорском манастыре и в пустынях, брань подвизаше нань и нимало покоя даяше, такожде и зде той же лукавый враг своим злоконством поучая и вооружая злыя человеки на преподобнаго, да его от обители изженут.

Нецыи же от братии невегласи, забывше свое иноческое обещание, и не восхотеша своего учителя учение слышати, еже бы подвизатися при//(л. 183) скорбным путем будущаго ради воздаяния и вечных благ наслаждения, но возлюбиша века сего широкое и пространное житие, и некако смесишася обычаи с миряны, и начаша ко преподобному приходити и безмернаго и чрезуставнаго покоя просити, о таковых бо апостол глаголет: «Ходящии по плоти плотская мудрствуют, мудрость бо плотская вражда есть на Бога» (Рим 8:5, Иак 4:4)//(л. 183 об.), тако и сии восхотеша жити пространно и угождати плоти, а не Богу. И сего ради начасте ко святому прихождаху и безчинием и укоризнами поношаху ему, и всякия досады творяху, и пакости деяху, глаголюще суетная: или покой телесный по их хотению даст, или от настоятельства да отстанет. Преподобный же, яко твердый адамант пребывая и безчинному//(л. 184) их совету нимало внимая, но паче глаголаше с тихостию: «Достоит нам, рече, братия, по преданию святых отец всем вкупе за трапезую доволитися, что Бог и Пресвятая Богородица подаст, и то во время. А пития жа пианственнаго отнуд не повелено нам имети». И тако преподобный умоляя братию, дабы в любви, и терпении, и в кротости, и в смирении пребывали.//(л. 184 об.) Они же паче злобою нань толма яряхуся, яко яко (!) и биением хотяху его оскорбити, но и ключи церковныя, и иных служеб у него взяша, и из манастыря его изгоняху. Еще и ученика его инока Иону Мамина отлучают от него, и ко своему совету привлачают, и в место преподобнаго отца Трифона во архимандриты выбирают, и выбор//(л. 185) составной Ионе Мамину отай преподобнаго написаша, и к святейшему патриарху к Москве на поставление архимандричества посылают, преподобнаго отца охуждают, дабы его из обители изгнати, самем же, овладевше его строением и труды, жити по своей воле невозбранно. И по их составному выбору и челобитью ученик преподобнаго Иона Мамин в место//(л. 185 об.) учителя своего в той обители архимандрит бывает и не токмо учителя своего благословение прияти желает, но и конечно тщится из обители его вон изгнати.

Глаголем же и Ионе Мамине.

Егда убо преподобный от святейшаго Иова патриарха Московскаго и Всеа России архимандрическаго сана сподоблен бысть, тогда же преподобный//(л. 186) быв во глубоцей старости, в та же времена Иона Мамин юн бяше леты, егда прият от преподобнаго иноческий образ. Изначала же быв послушлив к преподобному, и сего ради святый любляше его духовне, и уча его, и наказуя совершенному иноческому житию. И не токмо се, но и при животе своем преподобный в телесной своей немощи, написав духовную свою//(л. 186 об.) грамоту, и нарек его Иону вместо себе быти наставником и вожду братии. Иона же, не дождав времени, и самохотением своим похитив начальство отай преподобнаго, понеже бо святому тогда не бывшу во обители своей, но бысть в северных странах собрания ради манастырских потреб.

Преподобный же отец архимандрит Трифон виде братское насилие, паче же//(л. 187) сих и ученика своего ненависть и сего ради моляшеся Господеви, слезы от очию испущаше и пояше псалмы пророка Давила, глаголя: «Боже, хвалу мою не премолчи, яко уста грешнича и уста лстиваго на мя отверзошася, и вместо любве оболгаху мя, и положиша злая воз благая и ненависть за возлюбление мое, да будут пред Господем выну и да потребится от земли память,//(л. 187 об.) занеже не помяну сотворити милость и погна человека нища и убога, и возлюби клятву, и приидет ему, и не восхоте благословения, и удалится от него. И Ты, Господи, Господи, сотвори со мною имене ради Твоего, яко блага милость Твоя, и яко нищ и убог есмь аз, и сердце мое смятеся во мне» (Пс 108:1, 2, 4, 5, 15, 16, 17, 21, 22). И прочия псалмы пояше, и благодаряше Бога, и паки преподобный, подражая смире//(л. 188)ние Христово и, яко истинный учитель, ко ученику своему Ионе Мамину любовь показует и, яко отец чадолюбив, сына своего наказуя, глаголя сице: «Чадо, аще приступил еси работати Господеви, уготови душу свою во искушении, и управи сердце свое, и прилепися Ему, и отступи, дендеже посетит тя вышний, яко же бо во огни искушается злато, тако и вернии человецы, искусившиися во огни терпения,//(л. 188 об.) приятни Богу суть, иже в злостраданиих благодарне и целомудренне пожиша, боящиися бо Господа не противятся божественней воле Его, но соблюдают во всяком смирении глаголы Его и любящии его сохраняют пути его. Но послушай мене, чадо, отца твоего, и сице твори, да спасешися». И тако многажды преподобный от святых книг учение простираше, еже бы от манастырских//(л. 189) суемудренных вещий уклонятися и Христову бы смирению подражати, яко же и апостол глаголет: «Не любите мира, ни яже в мире. Аще бо кто любит мир сей, несть любве Божия в нем, но все, яже в мире суть, похоть плотская, и похоть очию, и гордость житейская. Сия бо несть от Бога, но от мира сего суть. И мир сей преходит и похоть его, а творяй волю Божию пребывает вовеки» (1 Ин 2:15-17).//(л. 189 об.) И паки глаголаше: «Не оскорбим духа святаго скверными деяньми, о нем же знаменахомся в день избавления» (Еф 4:30). И паки: «Мняйся стояти еже не пасти» (1 Кор 10:12). И паки: «Не дивитеся, братие, аще мир вас возненавидит, мы вемы, яко преидохом от смерти в живот» (1 Ин 3:14). И паки: «Должни есмы, братие, друг друга любити. Всяк бо не любяй брата своего человекоубийца есть и пребывает в смерти. И весте,//(л. 190) яко всяк человекоубийца не имать живота вечнаго в себе пребывающа» (Ин 3:14-15). И тако святый всегда ученика своего Иону архимандрита и братию поучая, даже и до исхода души своея, яко отец чад своих с любовию наказуя.

И не повелеваше в дому Пресвятыя Богородицы во обители своей хмелнаго пития держати, ни в келлиах стола творити, тако бо преподобный заповеда и не токмо в житие сем,//(л. 190 об.) но и по преставлении своем явлением наказуя. Архимандрит же Иона презираше отческое благословение и не восхоте наказания его восприяти и учителю и отцу своему повинутися, но паче возлюби мир сей суетный и яже в нем прелестная мудрования, и восхоте жити по своему самопроизволному обычаю, и начат в манастыре вино и пиво держати, и воевод, и градских старейшин, и//(л. 191) прочих мирян всякаго чина к себе в келлию звати, и сам к ним в домы их входити, и пиры частыя творити, и безмерно упиватися.

Еще же той Иона имеяше у себе слугу зело злонравна имянем Феодора, и той немилостив бяше и жесток, лукав, и к человеком непримирителен, и годен бяше во всем архимндриту Ионе. Архимандрит же Иона, не могий терпети//(л. 191 об.) обличения о своем безчинии от преподобнаго отца Трифона, и повеле преждереченному слузе своему, яко да творит пакости преподобному, яко же рече апостол: «Даст ми ся ангел сатанин, да ми пакости деет» (2 Кор 12:7). Злообразный слуга оный много преподобному досаждения творяше. Посмеянием же и укоризнами поношаху ему, и всегда яко пес лаяше, сквернословием охуждаше его, и не точию//(л. 192) злоязычныя деяше, но и руками на святопомазанную главу дерз бываше, и в темницу преподобнаго вверже.

И по сем конечно преподобный от обители Богоматери изгоним бывает, и в последней нищете быв, не имяше где главы подклонити (Мф 8:20; Лк 9:58), о таковых бо сам Господь, утешая, рече: «Блажени бо, рече, изгнани правды ради, яко тех есть царство небесное» (Мф 5:10). И паки рече: «Аще гонят вас из града, бежите в другий//(л. 192 об.) град. Аминь бо глаголю вам, не имате скончати грады израилевы в хождении вашем» (Мф 10:23). Сими христовыми словесы и апостольскими учении преподобный отец утешаше душу свою, и крепля ю на болший подвиг, и благодаряше о сем Бога, яко сподобился таковое изгнание терпети Господа ради, и паки возложих всю надежду свою на Господа Бога и на Пречистую Его Богоматерь.

О приходе преподобнаго отца Трифона во град слободский. //(л. 193)

Преподобный же отец архимандрит Трифон возжеле итти во град слободский, понеже бо судбами всех праведнаго Бога некоторая сила божественная, яко ужем, влечаше его тамо на создание манастыря христоименитым людем, еже и место под манастырь Богом бе устроено и яко преподобнаго ждаше иноческому водворению и его житием, да и тамо обитель составится,//(л. 193 об.) добродетелным и учением просветится. Народи же града слободскаго, уведавше приход преподобнаго, и о сем зело возрадовашася, прославиша Бога, яко святый и их не презре, и зело возлюбиша его, и воздаша ему честь велию.

Преподобный же рече им о создании манастыря, понеже бо прежде того времени в том граде не бысть манастыря. И о сем в народе совет благ бысть,//(л. 194) и преподобнаго отца прошение испониша, и место под манастырь даша, и о манастырском строении и церковном здании всячески ему помогающе, со всяким усердием и с трудолюбным тщанием Богови работающе. И Божиею помощию и молитвами преподобнаго отца Трифона не во мнозе времяни церковь состроиша и освятиша во имя Господа Бога и Спаса Нашего Иисуса Христа Честнаго и Славнаго Его Богоявления.//(л. 194 об.) И мнози того града и уездов, преподобнаго житию поревноваше, и к нему прихождаху, и во иноческий чин постригахуся, и братству множашуся. Преподобный же всех с любовию приемляше, и иноческому житию наставляше их, и поучеваше всегда о спасении душевнем, и сам преподобный наипаче сам собою образ показоваше. И оттоле начат преподобный отец Трифон труды ко трудом//(л. 195) прилагати, келлии братиам поставляти, и ограду и святыя врата сострои, и над теми враты церковь созда во имя собор архистратига Михаила и прочих безплотных небесных сил, и всем украси и освяти ю. И вси с ним о Бозе радовахуся, яко Господь Бог благоизволи и тому месту освятитися. И не по мнозех временех Божиею помощию и молитвами преподобнаго отца Трифона все исправися//(л. 195 об.), яже и до днесь тая Богоявленская обитель всеми видима есть.

По создании же тоя обители, поим преподобный отец Трифон с собою ученика своего инока Досифея, и поидоша в поморскую страну для собрания на церковное строение и на манастырския потребы. Прииде же святый во град Соли Вычегоцкой и ста на манастырском подворье Николая Коряжемского. Имя//(л. 196)ше же с собою чюдотворныя иконы образ Спасов, и Пресвятыя Богородицы, и чюдотворца Николая, и святыню просфоры, и святую воду, юже привезе святыи из своих обителей. И взем преподобный крест Господень, и три просфоры, и святую воду, и пойде в дом Никиты Строганова, да благословит дом его. И егда приидоша к нему в дом, Никита же возярися на преподобнаго безстрашне, и глаголы нелепы изрек, и хулу//(л. 196 об.) на преподобнаго возлагая, и не восхоте от преподобнаго благословения прияти. Преподобный же отец Трифон, видя Никиту смущенна, изыде из дому его и иде ко прочим братиям и сродникам его. Они же, приемше преподобнаго в домы своя с радостию, он же домы их благослови и молитвою освяти. Они же воздаша ему честь, яко же подобаше, и отпустиша их с миром.//(л. 197)

И уже день к вечеру преклонися. Преподобный же нача Господеви вечерняя молитвы возсылати и по отпущении вечерняго правила беседова ко ученику своему Досифею многия душеполезныя повести от божественнаго писания, яже о смирении, и о терпении, и о любви и яко добро есть любити ненавидящих нас, “понеже бо любовь покрывает множество грехов” (1 Петра 4:8). И по сем рече ему сице: «Брате Досифее, утро, востав по церковному //(л. 197 об.) благовестию, и иди в соборну церковь благовещения Пресвятыя Богородицы. И егда внидеши в храм, и первее воздаждь Божие Богови, яко же подобает входящему творити, и потом воздаждь честь Никите Строганову и братии его, яко же довлеет. И о чем начнет Никита тебе вопрошати, ты же отвещай ему о всем, елико возможно, и не устыдися лица его, и проси у него милостыни//(л. 198) в дом Богоявления Господня на церковное здание и на манастырское строение и братии на потребу. И аще что ти Никита речет, прииди и поведай ми». Ученик же его Досифей, слышав от святаго таковое наказание и рече: «Божия воля да будет и твое, отче, благословение, яко же заповедал ми еси, тако и сотворю». И почи мало преподобный, и воста от сна своего, и нача пети полунощныя и утренния//(л. 198 об.) молитвы, яко же ему обычай бе должная отдавати Богови. Во время же утренняго звону, возбудив ученика своего Досифея, и благослови его, и отпусти с миром, да тамо повеленное им сотворит.

Прииде же ученик он инок Досифей во храм, и по пророчеству святаго обрете Никиту у церковнаго столпа з братиею стояща, и по приходной молитве прииде к Никите и к братиям его,//(л. 199) и сотвори им поклонение по обычаю. Видев же Никита ученика Досифея, и вскоре отлучися от братии своей, и взем его за руку, и удержа, и нача вопрошати со умилением: «Ты ли еси ученик преподобнаго отца Трифона? Яко же бо и вчера видех тя с ним. И где ныне великий отец Трифон пребывает? Во истинну бо он раб Божий есть и благодати духа святаго исполнен».//(л. 199 об.) И прослезися Никита, и рече: «Вчера бо аз внезапным своим малодушством оскорбих преподобнаго, и того ради аз грешный в сию нощь много пострадах его ради (Мф 27:19) и без сна пребых, стеня и трясыйся (Быт 4:12; 4:14). Тако бо противу моего неразумия за преподобнаго отца месть мне бысть, и ныне душа моя желает видети его святость. И аще волит исправити душевредство мое, всяко чаю от Бога обрести//(л. 200) милость и грехов своих отпущение, яже сотворих ко преподобному отцу. Ты же, отче, послушай мене Бога ради. Что ти повем о преподобнем отце Трифоне и коея ради вины враг воздвиже гнев в сердце моем, еже гневатися и яритися нань тако безсловесно? И о сем буди ти известно: егда преподобный Трифон бысть на Вятке архимандритом, и потом никто на его место воста ин//(л. 200 об.) архимандрит Иона, нарицаемый Мамин (бяше бо родом честных московских дворян), и мнози ему о архимандричестве помогаху, яко же им обычай бе честь воздавати друг другу по мзде, а не Бога ради. Преподобный же Трифон, видя его неправду и безчинное насилие, и изыде из своего манастыря, и прииде к Москве некия ради манастырския потребы, и хождаше, странствуя,//(л. 201) яко един от убогих. Мне же о нем уведано бысть. Аз же зжалився зело, ведая о нем, яко во обителех своих труды и подвизи полагая великия, яко же никто ин тако, и праведен бе зело, и любовь имея ко всякому человеку нелицемерну. По диаволи же зависти в наследие его покоя себе не обрете. И сего аз, Никита, быв на Москве, шед в соборную церковь и государю царю//(л. 201 об.) и святейшему патриарху бил челом о нем преподобнем Трифоне и просих его к себе, дабы ему сотворил место покойно. И государь царь и святейший патриах, ведая преподобнаго добродетелное его житие, пожаловали меня, велели взяти его и покоить. И аз умолих его с честию, и привез его до сего града Соли Вычегоцкой в Веденской манастырь Пречистыя//(л. 202) Богородицы, и устроил ему келлию особную, и для келейнаго правила дал ему священноинока, да ту в келлии Бога молит. Пищу же и питие ово манастырское повеле ему даяти доволно, ово же из дому своего посылах ему в келлию всякия потребы такожде доволно. Он же по мале времяни не изволи ту пребывати, и восхоте ити во обитель Соловецкую помо//(л. 202 об.)литися, и испросих у мене судна, людей и запасу. Аз же имех у себя струг, и зело угоден ми бысть. И сей дах ему, и людей такожде, и запасу всякого доволно и лишше потребы. И отпустих его с любовию, он же ехав по Двине, и умысли некако, и отпустив работников, а запас мой, даной ему, весь и судно продал, сам же по своему обычаю нищим образом достиже//(л. 203) Соловецкия обители и, мало пребыв тамо, и паки оттуду, и прииде к Вятке. Яко же младенец, плачася, ищет матерь свою, тако и сей преподобный Трифон, плачася, ищет Вятскую страну и рыдает духовне о разлучении созданныя им Вятския обители Успения Пресвятыя Богородицы, понеже бо в ней и телом свои почивати хощет. И тако он своею хитростию иное//(л. 203 об.) имение на создание Вятским монастырем, аз же о том ему о всем претерпех и не оскорбих на спасение душам нашим и воздаяния ради будущих благ. И се ныне паки прииде семо и уже стар сый многолетен, вем бо его мужа свята и зело о монастырском строении печется. И того ради тако творит, вся//(л. 204) полезная строя. Аз же ныне с яростию его оскорбих и в том к Богу согреших. Ныне же желаю святых его молитв и прощение от него получити о своем согрешении. Ты же, отче Досифее, шед скоро и рцы ему, дабы в сий день своим пришествием и святыми своими молитвами благословил дом мой». И рече Досифей к Никите: «Преподобный отец Трифон Бога за тя//(л. 204 об.) молит и тебе посла мир и благословение, да просит у тебя милостыни в дом Богоявления Господня на строение новаго манастыря, и книг, и риз, соли, железа, и прочих потреб, что ти Бог по сердцу известит». Никита же слыша слово сие, зело возрадовася и рече Досифею: «Паки глаголю ти, отче, шед скоро и рцы преподобному, яко по прошению его все желанное им//(л. 205) будет им исправлено, яже аще что хощет, точию да приидет и обедует в дому моем».

По утреннем же отпусте Никита отиде в дом свой, Досифей же иде к учителю своему и яже виде и слыша от Никиты, вся преподобному поведа. Преподобный же, слыша таковая, о сем прослави Бога, дающаго ему таковую благодать, и по//(л. 205 об.)спешествующу во всяко дело благо, и отпев часы келейныя, и иде с учеником своим Досифеем в соборную церковь помолитися во благополучное время в год божественныя литургии. По совершении же пения молит Никита преподобнаго Трифона, дабы посетил дом его. Преподобный же некако ослушався, но радостною душею прииде в дом его и, со//(л. 206)творше молитву приходную, яко же обычно. И рек: «Мир дому сему». И по сем благослови Никиту и весь дом его, и по сем вечери бывши доволне, и по вечери Никита даде преподобному милостыню в дом Богоявления Господня на церковное здание и на манастырское строение икон, и риз, и книг, и соли, и железа, и братии на потребу, елико преподобному доволно бысть. И испросив//(л. 206 об.) от преподобнаго прощение о своем согрешении, и получивше, приим от преподобнаго благословение. И тако отпусти его из дому своего с честию.

Посем же преподобному Трифону бывшу со святыми иконами в манастыре Николы Коряжемскаго, их же преподобный Трифон имяше с собою, и мнози от православных прихождаху, и молящеся Всемилостивому Спасу, и Пресвятей//(л. 207) Богородице, и Николаю Чюдотворцу, и повелеваху преподобному молебная пети. Преподобный же по данней ему от Бога благодати в молебнем пении нимало без слез пребываше, но яко воды от благотекущаго источника непрестанно исходят, тако бо от очию преподобнаго слезы точатся. Видев же преблагий Бог раба своего тако творяща, но и паче слез его ради прочих добродетелей бысть//(л. 207 об.) от образа Николая Чюдотворца Можайскаго знамения и чюдеса велия на приходящех людех и молящихся верою, просящих от него помощи и заступления о получении милости Божия. И того ради народи наипаче начаша велию веру дерьжати ко преподобному отцу Трифону, да молится о них Богови и чюдотворцу Николаю, яко да его ради молитв обрящут от Бога милость.//(л. 208)