Чюдо преподобнаго отца Трифона, како пророчествова о рождении князя Алексиа Воротынского.

Егда же бывшу преподобному отцу Трифону в царствующем граде Москве, благоверному царю и святейшему патриарху его, преподобнаго, жалующим,//(л. 174) тогда и мнози от вельмож почитаху преподобнаго, паче же и всенародное множество веру велию к нему имеяху, видяху бо его яко воистинну раба Божия. И некогда от великих боляр муж некто благочестив имянем князь Иоанн Михайлович Воротынской, той же князь име по закону жену благочестиву ж, чад же има не имущема, и желающим зело, и скорбящим о сем//(л. 174 об.) всегда, и непрестанно Бога молящим, и милостыню доволну подающим, и странныя в дом свой приемляху, паче же и иноческий чин зело любляху, и в дом свой приводяху, и упокоеваху.

Во един же от дний уведано бысть ему о сем преподобнем отце Трифоне, яко бе муж свят и богоугодно живый, и сего ради восхоте его видети, и по сем призва преподобнаго в дом свой, да сподобится//(л. 175) от него благословения и пришествием его да освятит дом свой. Бывшу же преподобному в дому князя Иоанна, и яко же подобает по достоинству, той князь и с супружницею своею почтиша преподобнаго. Святый же отец Трифон виде веру их к Богу несуменну, и исполнися Божия благодати, воззрев на них веселым образом, и похвали их доброту духовную,//(л. 175 об.) паче же и благочестие разума, и духовной любви добродетель. Сам же преподобный во уме своем Бога в помощь призываше и моляшеся, глаголя сице: «Господи Боже спасения моего, во дни воззвах и в нощи пред Тобою, да внидет пред Тя молитва моя, приклони ухо Твое к молению моему (Пс 87:2-3) и услыши мя, яко нищ и убог есмь аз (Пс 85:1), призри, Господи, на рабы своя, и даждь им чадородие//(л. 176) мужеска полу, и спаси раб твоих, и “сотвори со мною знамение во благо, и да уведят, яко Ты, Господи, помогл ми, утешил мя еси” (Пс 85:17)». И по сем тихо изрек им сице: «О князе Иоанне, ты мя, худаго старца, Бога ради почитаеши, и не мене грешнаго почитаеши, но самого Господа Бога, и исполнил еси заповедь Божию, а яко же ты угодная пред Богом твориши и пред человеки благая//(л. 176 об.) исправляеши, и аз вам глаголю, сего ради да будет вам разумно, яко зачнет от тебе супружница твоя и родит сына именем Алексиа». Слышав же князь Иоанн и с супружницею своею от преподобнаго, и усумневся вмале, поник главою и паки воззрев на преподобнаго, и о сем вельми удивися, и припаде к нему, молитвы и благословения прося, и рече ему: «Отче святый,//(л. 177) буди тако по словеси твоему, и моли за ны Бога, и да не тощ будет глагол твоих святых пророческих словес». И учредив и одарив святаго доволно, дав милостыню во обитель, и отпусти его с миром. И по сем времяни минувшу лето едино, и по пророчеству святаго родися има сын, и нареченно бысть имя ему Алексий. И от того времяни князь нача ко преподобному//(л. 177 об.) и вящше веру держати, и милостыню во обитель доволну посылаше, и не точию от своих имений, но и благочестиваго царя сердце в милость умоляше, и в всем преподобному везде помогаше.

И в то время благочестивый царь пожаловал преподобнаго отца Трифона по его князя Иоанна заступлению село в Казанском уезде, называемое Полянки, с рыбными ловлями и//(л. 178) с сенными покосы, и со всякими угодьи в дом Пресвятей Богородице на церковное строение, и братии на препитание. Некогда же прислано от сего князя Иоанна с Москвы на Вятку в манастырь ко преподобному отцу Трифону шуба соболья да пять рублев денег. Преподобный же, приим и благодарив Бога, и сотворив молитву за творящих милостыню, сребро же и шубу отдаде в казну Пресвятей Богородице на строение//(л. 178 об.) манастырю и на потребу братии. Сам же преподобный не любляше сребролюбия, но паче любя нищету и нестяжание, поминая себе, яко дар Божий не ценою дается, но духом и истиною (Ин 4:23-24). И не точию той князь Иоанн при животе преподобнаго Трифона обители помогал, но и по смерти его ученику его архимандриту Ионе Мамину о манастырских селех много помогал.//(л. 179)

Некогда же бывшу преподобному отцу Трифону во граде Казани, и собеседник бывает митрополиту Ермогену, пророчествова же о нем, яко быти ему в царствующем граде Москве патриархом, и о скончании живота его прорекл, яко же и збысть ему во свое время. По сих же преподобный отец наш Трифон во своем манастыри в дому Пресвятыя Богородицы пребывая, яко воистинну//(л. 179 об.) добрый пастырь, а не яко наемник (Ин 10:11), и зело о братии печашеся, поминая в сердцы своем реченное: «Ему же много дано есть, много и взыщется» (Лк 12:48). И поучая духовными словесы ко благочестию, како бы обещание свое во иночестве совершити по апостолу, глаголющему: «Ходяй по плоти, потская мудрствуют, а ходяй по духу, духовная мудрствуют» (Рим 8:5). «Вы же, братия моя и чада,//(л. 180) и паче реку словесныя овца Христова стада, подвизайтеся неленостно о своем спасении. Тецыте скорбный и тесный путь, да получите будущее пространство. Никто же бо, в лености пребываяй, получит будущих благ, но иже законно о Христе страждущии, тамо законо Богом данными венцы венчаются, мирских же вещей и плотских сластей и всяких душевредных страстей//(л. 180 об.) отвращайтеся и пред Богом творите угодное».

Сам же святый собою показоваше путь ко спасению. Вина, и пива, и всякого пиянственнаго пития отнюдь не вкушаше, тако же и братию от сего возбраняше и наказуя воздержаватися, да некако слабостию и невоздержанием от пиянственнаго пития пред Богом возсмердят и на Божию службу непотребни будут. Сам же пре//(л. 181)подобный отец риз мягких, ни пищей сладких не требуя. На теле же своем имяше вериги железныя, верху же ношаше ризы власяны и многошвенны, мягких же и цветных риз не токмо носити хотяше, но и гнушашеся ими, но имея в себе Христово смирение, и всею душею работаше, и всегда пребывая в посте и молитвах, и во всяцех воздержаниих. И егда взалкаше, тогда//(л. 181 об.) вкушая от постных снедей, а еже к преподобному что от приносящих во обитель денги и пищи или ино что, то все преподобный веляше полагати в манастырьскую казну и ничто же свое нарицаше, но все Божие и дому Пресвятыя Богородицы. В келлии же у себе ничто же имяше, точию святыя иконы и книги душевныя ради потребы, а еже приходящих к нему покои//(л. 182) творяше пищею и питием з братиею на трапезе, и тако преподобный отец наш Трифон во своем манастыре жизнь свою препровождаше