Чюдо о болевшем детищи и исцелевещим молитв ради преподобнаго.

Муж некий имянем Исидор, живый близ монастыря того в монастырской слободе, имяше же у себе детище двою лету суща имянем Поликарпа. Божиим//(л. 84) изволением зело изнеможе, и продолжися болезнь его на много время. И уже бывшу близь смерти, муж же оный Исидор, видя детище свое зело изнемогшее, и взем его, и иде в монастырь Всемилостиваго Спаса, и прииде к настоятелю тоя обители, и благословение от него приемлет, во еже видети преподобнаго отца Трифона. Настоятель же благословляет его итти к преподобному. Он же,//(л. 84 об.) шед, прииде к преподобному, нося сына своего, и нача молити преподобнаго, припадая со слезами к ногама его, дабы сотворил молитву ко Господу Богу о здравии сына его. Преподобный же виде сына его конечно изнемогша, глаголаше же, смиряя себе: «Человече, что ти ся мнит о мне грешнем? Аз бо есмь хуждши свех человек. И от мене ли ищеши о сем молитвы к Богу и помощи детищу// (л. 85) твоему и нудиши мя на сие? Дело еже выше меры моея, но повелено нам от Бога друг за друга молитися, да исцелеем (Ср. Иак 5:16). И аще хощеши сына своего здрава видети, то помолимася Господу Богу оба вкупе. Господь бо есть щедр и милостив, обладаяй живыми и мертвым. Той может и сына твоего здрава сотворити. Точию имей веру несуменну и любовь, яже о Бозе, и надежду совершенну// (л. 85 об.) прошения. Той бо есть рекий: “Просите, и дастся вам” (Мф 7:7)». И бывшу молению к Богу, по молитве преподобный вземлет святый воды и, покропив детище, и знамена у образа Пречистыя Богоматери, и в той час прия от Господа милость, и детище оно получи исцеление, и бысть здрава (так!) молитвами преподобнаго отца Трифона. Той же муж Исидор, видя таковое чюдо, прослави Бога и отиде в дом свой, радуяся.

И оттоле прохождаше//(л. 86) слава о преподобнем отце Трифоне, о добродетелном житии его, и мнози человецы начаша приходити к нему пользы ради духовныя. Нецыи жи от ту живущих в монастыре оном завестию диаволею негодоваху на преподобнаго и некия хулы глаголаху. Обычай бо лукавым человеком не токмо самим творити добро (так!), но и другим в добродетелех злохитрством запинати. Преподобный же, от юности ненавидя// (л. 86 об.) славы человеческия, паче же и дая место гневу (Ср. Рим 12:19), яко да пользы место молву души своей нанесет. Но паче обычай бо бе ему от места на место преходити, понеже бо добродетелное житие свое от всех таяше, яко да не славы ради человеческия Божия славы лишен будет. И того ради любя о Господе странство. И восхоте преподобный оттуду отити, и желаше обрести в пустыни место безмолвно и в молчании пре//(л. 87)бывати, вселитися тамо, идеже Господь повелит.

И тако помолися преподобный Богу со слезами, и изыде из обители, и обрете на брезе реки Камы судно мало, и седе ту, пловяше вниз реки, Богу поспешествующу ему, преподобному же молящуся Господу Богу и Пречистей Его Богоматери, дабы открыл Бог ему место душеспасительно. И отплы от монастыря 150 поприщ, и достиже реки, яже глаголется Мулы Нижние.//(л. 87 об.) И ту бысть пустыни прекрасна зело, и бысть яко час третий дни, и в то время на воде бысть тихо зело. И се бысть внезапу глас свыше, глаголющ сице: «О преподобне угодниче мой Трифоне, подобает ти в месте сем пребывати». Преподобный же пристрашен быв, не умеяше, что хощет быти се. И помышляше в себе, сице глаголя: «Кто есмь аз, грешный? И како могу достоин//(л. 88) быти слышания гласа Божия?» И паки вторицею возгласившу, яко же и первие. Преподобный же моляся Господу Богу и нарицаше себе недостойна и грешна быти. И в той час некоторая сила божественная свыше посети его и устреми его на брег на устье Мулы реки. Преподобный же о сем зело удивися, и возвеселися душею, и прослави Бога, иде по той реце в гору, яко 5 попришь. И дошед места, //(л. 88 об.) идеже обе реки, глаголемыя Мулы, из единаго места разидошася на двое каяждо своима источники, и ту преподобный в пустыни обрете поле чисто пусто и лесом окружено. И виде, яко прекрасно зело и всякими цветы украшено, и возлюби е зело, и вселися ту месяца июля, и сотвори себе хижу малу, в ней же мало покоя приимаше труда ради телеснаго. Ме//(л. 89)сто же, идеже вселися преподобный, беяше кладбище остяцкое или паки рещи жертвище идольское. Бяше же ту древа велики и многоветвены.

Преподобный же живяше ту, нача непрестанно молитися Господеви со слезами и с сокрушением сердца во умилении мнозе, и един единому Богу внимая и божественнаго света зарею всегда просвещаем бываше, желаше быти горняго гражданин//(л. 89 об.) и вышняго Иеросалима житель, по пророку, глаголющему: «Се удалихся бегая и водворихся в пустыни, чаях Бога спасающаго мя от малодушия и от бури» (Пс 54:8). «“И сего ради услыша мя Бог и внят гласу молитвы моея, благословен Бог, иже не остави молитву мою и милость свою от мене” (Пс 65:19). И ныне о сем благодарю Бога, сподобившаго по моему желанию, еже единому жительствовати и безмолствовати// (л. 90) в пустыни сей». Ядь же бе преподобному трава, глаголемая сарана, питие же вода. И нача труждатися, копая землю своима рукама, восхоте бо преподобный от своих трудов питатися. Помыслившу же преподобному, како бы уразумети книжное писание, и ста на молитву, преклонив колени. И моляшеся Господу Богу с воздыханием из глубины сердца и слезы испущаше от очию струи на мног час,//(л. 90 об.) глаголя сице: «“Владыко Боже, Отче Господа Нашего Иисуса Христа, сотворивый небо и землю со всею лепотою их” (Ср. Парал 36:1), и вся видимая и невидимая от небытия в бытие привед, и создавый человека по образу своему и подобию, и слово, и разум дал еси ему, во еже знати тебе и славити Творца, и Зиждителя, и Бога Нашего, тако и ныне призри свыше и на мене, грешнаго и недостойнаго раба Твоего// (л. 91) и осени благодатию Пресвятаго Твоего Духа, и отверзи ми очи сердечнии, во еже разумети книжное писание и тебе славити, истиннаго Бога во вся дни живота моего, понеже бо есмь груб и книжнаго писания неискусен, но точию всем упованием к Тебе прибегох и Тебе милости прошу. Не остави мене, Господи, не остави, но услыши мя. Аще бо аз грешный груб и невежа есмь, но милости твоея бездна многа и пребывая//(л. 91 об.) на боящихся Тебе. Ты бо еси, Господи, обещавыйся призирати на кроткия и смиренныя, и молчаливыя, и трепещущия словес Твоих (Ис 66:2). Несть бо ми инаго наставника ко спасению, токмо Ты един Всемилостивый Господь Бог, и Тебе славу возсылаю Отцу, и Сыну, и Святому Духу ныне, и присно, и во веки веков». И от того времяни нача//(л. 92) преподобный книжное писание разумевати и сим паче к любви Божии простирашеся, всепетую славу Тому возсылающе.