Чюдо о исцлевшем детищи молитвами святаго.

В том же селе бе владычень приказный человек имянем Максим Феодоров, сын же у него бе от рождения двою лет имянем Тимофей, и Божиим изволением вельми изнеможе и уже при дверех смертных//(л. 63 об.) бысть. Всещедрый бо Бог восхоте раба своего прославити детищем сим и укрепити паче на болший подвиг. Блаженному же отроку пребывающу в церкви Божии, предиреченному же мужу Максиму в то время в дому своем не бывшу, но точию супружница его именем Иулианиа жена благочестива, нищелюбива сущи и странныя в дом свой приемлюще и упокоеваше. По смотрению же//(л. 64) Божию блаженный отрок прииде в дом Максимов, жена же оная Иулианиа виде раба Божия пришедша в дом их, зело возрадовася и припадает к ногам блаженнаго, дабы молитву сотворил о детищи ея. Блаженный же, видев ю печалну сущу, и рече: «Не скорби, о жено, но возверзи на Господа печаль свою (Пс 54:23), и Той даст утеху души твоей. Сам бо Спаситель наш рече: “Чесо просите//(л. 64 об.) во имя мое, по вере вашей и будет вам” (Мк 11:24). Ты же несуменною верою уповай на Бога, сотворшаго ны, и ревнуй, яко же и сарефтяныни, иже пророком Илиею воскреси Бога сына ея, Той же и ныне силен есть возставити от одра сына твоего и сотворити его здрава». Ноще же наставшей, отходит блаженный во уготованную ему горницу и всю нощь без сна пребываше и//(л. 65) моляся Господу Богу, сице глаголя: «Господи Иисусе Христе Боже Наш, царю всея твари, услыши мя, грешнаго раба твоего, молящагося к тебе, яко услышал еси молитву раба Твоего Илии, и воскресивый сына вдовича, такожде и Елесеа пророка услышавый, и возстави отрока. Последи же Сам Ты еси, Господи, сшедый с небеси и на земли с человеки поживе, велия и преславная чюдеса сотвори.//(л. 65 об.) И что много паки аз, грешный, дерзну рещи, точию глаголю по возлюбленному твоему ученику Иоанну, яже “аще по единому писано бывают чюдес твоих, ни самому мню всему миру вместити пишемых книг” (Ин 21:25). Ты бо, Господи Боже Наш, давый власть учеником своим и апостолом на дусех нечистых, яко да изгонят их, и исцелити всяк недух и всяку болезнь (Мф 10:1),// (л. 66.) такожде и всем подаваеши иже во истине призывающим имя Твое святое, и о сем и аз грешный раб Твой уповаю на милость Твою, дерзаю и прошу: даждь, Творче, созданию Твоему, детищу сему здравие и востави его от недуга люта и утеши, Господи, рабу Твою, рождьшую детища сего. Послушай мене, Господи, послушай и не отрини, и не отврати лица Твоего от мене, яко да// (л. 66 об.) милость свою на детищи сем. И прославят имя Твое святое, яко Ты еси Бог Наш и на Тебе единого уповаем». Утро же зело рано вземлет благовонный фимиан и, покадив святыя иконы, посем же и детище. И абие в той час молитвами святаго детище оно бысть здраво и веселуяся, играя, яко нимало болезни в себе чуяше. Видевши же Иулианиа сына своего здрава молитв//(л. 67) ради блаженнаго, и припаде к ногам его, с плачем вопияше: «О человече Божий (3 Ц. 17:18), что ти воздам о всех, яже сотворил ми еси (Пс 115:3)? Или кия ти похвалы и дары принесу? Дивна бо день и преславна милость Божия явися в дому нашем. И не изыде, святче Божий, из дому нашего, да не ктому умрет сын наю. И аще волиши, возми имения нашего, елико хощеши. Блаженный же отрок рече: «Ей жено, не мене//(л. 67 об.) ради сие дело бысть, но Бог веры Твоея ради спасе сына Твоего. И не дей мене ктому, не требую бо вашего имения, есть бо у мене безценный бисер Христос, сим бо обретаю богатство негиблемо. И егда чесо требую, вся ми исполняет неоскудно. Ты же ми о сыну своем не стужай. Не точию сей ваш детищ возрастей, но да веси, яко по сем и иныи чада родиши и воспитаеши,//(л. 68) точию добронравия своего держися, милостыню твори, страннолюбия не забывай, чистоту же телесную и душевную сохраняй, паче же всего в молитвах Бога призывай». По проречении же блаженнаго отрока збышася има вся глаголы, иже родиша чада многа, и воспиташа я, радуяся и славяще Бога и блаженнаго проречение воспоминающе, и хваляще богоугодное его житие и мно//(л. 68 об.)гим слышащим на пользу бысть. Сицево бо деяние и хождение добляго сего отрока бысть. Аще бо и в мирском устроении тогда живущу ему, но обаче Бог свыше призираше, посещая его, и соблюдаше его своею благодатию на всяком месте и в путех сохраняя его, аможе когда где хождаше. Бог бо сердцеведец сый и един сведый безвестная и тайная, прозре бо яже//(л. 69) о нем хотящая быти, и яко имать быти сосуд избран (Деян (9:15) и множайшему стаду богоизбранный пастырь. Бе бо блаженный зело желаше облищися во иноческий образ и любляше безмолвное и постное житие, понеже бо яко некий орел легкима крилома опрятався, и к воздуху на высоту возлетев, свободным парением воздух пресецаше, тако и сей блаженный, вся узы мирскаго//(л. 69 об.) жития растерзав и всех житейских вещей отбежа, отсавль род свой и вся ужики, дом же и отечество по тревнему патриарху Арааму.