Наказание и поучение преподобнаго отца нашего аввы Генадия к братии и к людем

Великиа лавры Живоначалныя Троицы и Пречистыя Богородицы Ипацкия обители о Христе брату и присному сыну словесных овець пастырю игумену Васиану тако же Спасовы обители нашея паствы строителю Иосифу и всему еже о Христе братству нашему глаголю вам, духовная моя братия и спостницы. Уже ми есть день при вечери и секира при корени (Мф 3:10). Уже бо отхожу к судищу Христову святыя его ради заповеди, не забудите мене, егда молитеся, но видеве ми гроб, поминайте мою любовь и молитеся, да ученит дух мой с праведными. Вы же, чада моя, бойтеся Бога и “повинуйтеся наставником вашим” (Евр 13:17) всем по апостолу, царя православнаго (Ср. 1 Петра 2:17) и чада его почитайте с величанием царским, яко//(л. 323) Бог земныи, святая ублажайте, ему же повинуются игумени духовною совестию.

Вы же, чада моя, живущеи во обители Спасове, и коемуждо игумену поручится паства наша, и вы ему во всем покаряйтеся в послушании, да не исходите от места сего без благословения настоящаго. И прекословия не творите брат со братом, ублажайте, братия, во всем, тму же оставляйте, да будет житие ваше по преданию, како нам написал отец наш Корнилие по преданию святых отец. Прочее и зде во обители нашего смирения обретается, како жити черньцем, тебе же молю, игумена Васиана, не остави обители сеа верою своею, аще где будеши и в далных странах власти.

Вы же, братия моя и чада, не разаряйте от общаго нашего предания ни в чем, собора церковнаго не отлучайтеся. Первая мерзость в черньцах яже к церкви не ходити и, пришед, пред церковию стояти и глубитися или суды судити, тако же и келейною молитвою не пренемогаите, да не разслабився плоть с душею погибнет, яко же лукавыи сатана хощет//(л. 323 об.) черньца жива во ад свести. Вы же, братия моя и спостницы, будите нелиниви в монастырьских службах, не скорбите и не унывайте в трудех, имате своих труды ясти и пити. И ему же поручится паства наша, прочее на него не ропщите. Ропщай чернец исчезновение себе творит, тако же словес учительских слушайте со усердным вниманием, благая делайте с послушанием. Тако же и ленивыя подвизайте на службу и на молитву, святыни не отлучайтеся. Аще ли чернец шесть недель святыни не причащается, да несть чернец. На трапезе не глаголите ничтоже, тело питайте хлебом, а душю питайте молитвою Исус Христовою. Никако же, братия моя, не крадите монастырьскаго орудиа, ниже хлеба или оградныя овощи и ничего за монастырь не износите по своим похотем. Платие и обущу вси имейте равну, по келиям же пища всякия не имейте, хлеба ис трапезы вон не носите, разве нужи и немощи, да будет учрежение ваше во общеи трапезе. Всем равно ясти и пити в подобно время//(л. 324) Бог не бранит – брани же от Бога и от человек мерзско обиядатися и упиватися и плоти отягченои болезнено. Тако же неподобно промежу собою которатися, писана бо есть: “Враждотворцы царствия небеснаго не наследят” (Ср. Гал 5:21). Тако же и не одноя овцы лукавии, прелагающе братиею своею сюду и вноуду, а сами ни перстом касаются (Ср. Мф 23:4; Лк 11:46), пучина горкаго ада полнится горкими нерадивыми мниси. Праведницы же, мало терпевше и Божию заповедь сохранше, возрадуются во веки: Христос “вселяет единомысленныя в дом” (Пс 67:7) свой. Тако же и вы, чада моя, тщитеся проити сквозе тесная врата и прискорбный путь (Мф 7:14), да жизнь вечную обрящете.

Слугам же и работником, тако же повелеваю не гневатися, ни которатися промежа собою, настоятелю во всем повиноватися и слушати, ни котораго же старца оскорбети туне словом. Чадца моя, не спешите словом продрзати или делом дерзость учинити неподобну, тако же благоугодным быти ко всем человеком, орудиа домашняя брежно имети и гостинная вещи отнюд бре//(л. 324 об.)щи, да не погибнет от них ничтоже. И некоторыя, чающе себе помощы чюжим восхищением… Уже, чада, тем себе погубляеши зле – хощеши скопити неправедным собранием, потом же и своему прямому собранию пакость твориши, а душу свою предаеши огню вечному. И вы, чада, от сего безумия велми брезитеся и прочим человеком сия наша глаголы поминайте. Тако же достоит монастырьская дела тружатися нероптиво и нелениво по силе без мятежа, да не будете, чада, человекоугодницы пред очию работающе (Еф 6:6), но вожделейте быти богоугодницы – за очи работати верою и правдою, христиан насильством не обидети, брашном у них и питием не волновати и гостьми не враждовати, приимати последняя места, тако же и ложных словес на христиан игумену и старцем не износити.

Вы же, братиа моя, будите поспешливы на благое, и поучайтеся Божию слову во святом Евангелии и во Апостоле, и имейте у себе в дому Спасове нашего стяжания книжек от части.//(л. 325) Подобно, братия, вам в них вницати и ум прелагати к веданию разума. “Зде есть терпение святых” (Откр 13:10). Аще кто соблюдет заповедь Божию и веру Иисус Христову и соблюдше и возрадуются во веки».

Потом же паки помалу нача старец изнемогати и предаде дух свой преподобный в руце Божии великий Авва Генадие лет 7073-го (1565) месяца генваря в 23 день.

Возвещу вам, братиа моя, великое чюдо великаго старца Генадия, отца своего и учителя. Случи ми ся некогда от старец и от братии великое оскорбление со жестостию, и аз, многогрешный игумен, не восхоте жестости терпети от братии и многоостраго их ответа слышати – отиде от них во град Кострому и тамо вселихся во обитель чюднаго Богоявления сожительство имети духовному пастырю игумену Селивестру и о Христе братства его.

Прочее же, братиа моя, в мимошедших моих летех в церквах Божиих не стоял с посохом, у Богоявления же не возмогох бес посоха стояти, прииде ми помысл пременитися от обители тоя здравиа ради. И пришедшу ми во//(л. 325 об.) обитель Пречистыя Богородицы Андреяновы пустыни в Пошехоние, и тамо же по Божии воли не возмогох в церкви без посоха стояти: в келии здрав, а в церкви болен. По сем же в год паки возвратихся во обитель Спасову и скорее прибегох к целбоносному гробу, преподобному отцу Генадию, прося у него прощение своей дерзости. Молитвою преподобнаго здрава мя сотворил Бог по древнему моему житию, прославих Бога и его угодника святаго старца Генадия.