Чюдо преподобнаго отца нашего аввы Генадия

Житие Геннадия Костромского

Рукопись № 673 собрания Свято-Троицкой-Сергиевой Лавре. Ф. 304.

(л. 315) Житие и подвизи преподобнаго отца нашего аввы Геннадия Костромскаго и любимоградскаго, еже бе на Сурском езере, списано бысть житие святаго и отчасти чюдес его учеником его игуменом Алексеем тоя же обители.

В Троицы единосущнеи Отца, и Сына, и Святаго Духа истиньствую и исповедую: един Господь Бог Спас Наш Иисус Христос, прославляяй святых своих, тако же и мы их прославляем, росийстии людие, яко дивны чюдеса творит святыми своими угодники и дает дар//(л. 315 об.) Святаго Духа грубым человеком писание творити. Никто же возбраняет нам писати жития святых мужей, тако же и преподобных отець наших пустынелюбивых. Пустыннии же отцы со единым Богом беседуют и свет миру, яко же свет аггели Божии мнихом, тако же и мниси свет миру.

Сей бе юноша литовския земли страны блаженныи Григорие, млад сый и красен зело, единороден сын некоего великаго пана именем Иоанна, славна и богата, и матери Елены. Сии беста родителя его христиана суща, зело боящася Бога, никогда же церковнаго пения не отлучашася. Блаженныи же Григорие болши своих родителей подвизашеся: всегда в крыле церковьне живяше, день и нощь моляшеся Богу. О сем же подвизи родителя его негодоваше: «Что ты, чадо, тако твориши, или еси страж церковный? Срам нам есть от человек твои лишний подвиг. Ходиве вкупе с нами в церкви Божии, идеже ти поручихом, храмы, пребывай в них в день,//(л. 316) веселися с рабы своими, а в нощи опочивай на одре цветущем твоем». Отвеща им Григорие: «Родителие моя еста прелюбезная, не истязуйте ми сими глаголы. Аз не хощу детьская игры творити. Вся Бог творит, аки хощет, а человек творит, елико может, Дух Святый наставляет всякого человека на свой путь истинный».

Оттоле же блаженный же Григорие нача себе мыслити, како бы ему от родителей своих удалитися, и отити в росийския страны, и тамо вселитися в пречестныя их лавры, Господу Богу молитися. Изобра себе время благополучно, отиде от своих родителей на некоторую страну ко убогим человеком, совлече им светлыя своя одежы, повеле им устроити от своих родителей тайным обычаем и из`я у них в то место худыя ризы, облечеся в них и хожаше по странам Литовскиа земли, по пустыням, и по стремнинам, и по жилым селом, и по весем, и по градом литовьским. Такоже хожаше по диким лесом, многи беды прия от звереи и от гадов, паче же от злых//(л. 316 об.) человек Литовскиа земли.

Потом же паки дойде росийскиа страны и до царствующаго града Москвы, в нем же хожаше безпрестани к церквам Божиим и притекая в пречестныя обители, где бы ему пострищися и молитися Богу. И паки обрете себе дружину именем Феодора, млада суща и зело боящася Бога, хотящаго пострищися. Прочее же оба вкупе поидоста в Великий Нов град, тамо хожаста по святым церквам и по честным лаврам. И паки доидоста пустыни преподобнаго Александра, зовомаго на Свери. И внидоста в пустыню ко преподобному Александру, припадающе и глаголюще: «Преподобный отче, желаем Господу Богу молитися, постриги нас Христа ради, во мнишеское одеяние». Преподобный же Александр отвеща к Феодору, глаголаше: «Ты, чадо Феодоре, имаши водити зверя белоглавнаго». Григорию же рече преподобный: «А ты, чадо Григорие, – рече преподобный, – сам будеши пастырь словесным овцам//(л. 317) и наставник множеству иноком, иди, чадо, на Комельский лес ко преподобному Корнилию, той тебе имать научити, како ти Богу молитися и како ти пасти словесное стадо, множество чернец, а в нашей пустыне лепотным отрочатом невместимо пребывати. Опочивайте, чада моя, елико хощете».

Они же пребываша все седмицы в пустыни у преподобнаго Александра, и взя у него благословение, и поидоста ко граду Вологде и от Вологды на Комельский лес, тако же приидоста в пустыню ко преподобному Корнилию. Толкущу им у врат преподобнаго Корнилия молитвою Иисусовою, преподобный же Корнилие, отверзая двери своя, глаголаше к ним: «Что бо бе, чада моя, како проидосте пустыни непроходныя, и что внидосте во убогую сию пустыню? Чесо хощета?» Юноши же рекоста Корнилию: «Господи наш, преподобный отче, желание нас великое одержит во иноческое одеяние, Христа ради причти нас к своему стаду избранному». Преподобный же Корнилий рече Григорию: «Прииди, чадо, во убогую сию келию//(л. 317 об.) нашю, а ты, чадо Феодоре, имаши мирьских человек житие содержати и чада ражати».

На Григориа же помавает Корнилие искус чернеческий по преданию святых отец. И поживе Григорие во искусе доволно время, и паки Корнилий постригает Григория во мнишеский образ, и рече ему слово святаго Евангелия: «Аще оставит человек отца или матерь, жену и дети, села и имения, сторицею приимет и живот вечный наследит. Мнози будут первии последни, а последнии первии» (Мф 19:29-30). И еще глаголет к нему по отческим вопросом и по ответом, и вдает ему по обещанию имя Геннадие: «Приими, чадо, древних святых отец разум и терпение, смирение и любовь, паче же молитву соборную и келейную и в подвизех нелицемерных». Содружебник же Геннадиев Феодор, вся пожив по пророчеству преподобных отец Александра и Корнилия, в глубоцей старости к Господу отиде в царствующем граде Москве.

Преподобный же Геннадие по благословению Корнилиеву велми подвизашеся//(л. 318) в молитвах и трудех внешних, паче же во утрених службах в поварне, и в пеколне, и в прочих. Братия же велми негодоваше и ропщуще на Геннадия о мнозех подвизех. Слыша же Корнилие роптание от братия, укрепляя Геннадия, глаголаше: «Не скорби, чадо, о сем на братию. Возмущением демоньским они творят».

Потом же паки во многа лета не престанут роптати на Корнилия и на Геннадия. Преподобный же Корнилие “предает место гневу” (Рим 12:19), приемлет своего ученика Геннадия, отходит от своего начинания и от обители шестьдесят поприщь в Костромския пределы, на дикий лес, на Сурьское езеро. Оттоле мало поприщь до царских христиан оброчных бортных. Христианя же зело возрадовашася о пришествии Корнилиеве, сотвориша ему келию на четыре пределы и приношаху ему хлеб, и мед, и всякую потребу. Преподобный же Корнилие со учеником своим Генадием подвизася к Богу молитвою и молением и пакы труды полагая, лес сечаше и пашню сотворяя, еще ископая четыре пруды, иже бе и доныне.

В лете же//(л. 318 об.) 7037-го (1529) бысть подвиг православному великому князю Василию Ивановичю с великою княгинею Еленою к Белу езеру в Кирилову лавру молитися о благородном чадородии. Егда же прииде государь в Корнилиеву пустыню и не обретоша Корнилия, зело оскорбляяся на черньцев. И глаголаше им: «Вашея ради ропоты и непослушания не живет отец Корнилие во своей пустыне». Скоро посылает государь по Корнилия своих слуг. Прииде же Корнилие пред государя великаго князя Василия Ивановича, припадает к ногама государевыма, прошает у него прощения своей дерзости, что в пустыню шел. Благоверный же князь великий Василей Иванович воздвизает от земля Корнилия и глаголет к нему: «Любимиче мой Корнилие, моли за ны милостиваго Бога, да же бы нам дарова плод благочадия в наследие роду нашему и державу царству Росийскому, и построение честным вашим обителем, и во утвержение веры христианския». Тако же глаголет государь Корнилию: «Пребывай во своем первом начинании и во//(л. 319) трудех. Ты же по нашему повелению отходною своею пустынею благослови своего ученика, его же хощеши».

По отхожению государя благовернаго и великаго князя Василия Ивановича преподобный игумен Корнилие пустынею благословляет ученика своего Генадия. Тако же повелевает ему церковь воздвигнути во имя Преображения Господа и Спаса Нашего Иисуса Христа. Преподобный же старец Генадие по государеву жалованию и по благословению отца своего игумена Корнилия вся сотворил в пустыне, и церковь Божию поставил, и украсил ея святыми иконами, и книгами, и всякою лепотою церковною. Братиам же у него в пустыне множащимся, паки преподобный устраяет вторую церковь теплую во имя преподобнаго Сергиа Чюдотворца Радонежескаго и украшает ея, яко же и первую церковь. Сам же преподобный прилагает труды ко трудом и преходит от силы в силу и от славы в славу во всяких трудех и подвизех, собою образ показуя братиям.

Еще же и жилища их добре устраивает, в день дрова сечаше, а в нощи//(л. 319 об.) по братским жилищам рознашивая, такоже и труды ко трудом прилагаше во своей ему пустыне. Еще же удручая плоть свою в поварне и в пекольне и власяницы на братию мыяше, паче же подвизаяся о церковных службах, приспевая свещи и кутию, и просвиры печаше, паки же име пост, и непрестанную молитву, и келейное правило, и коленное покланяние. Еще же ношаше вериги, кресты железныя и тяжкия чепи, таковое убо великое бремя ношаше преподобный ражьжения от плоти на дух, яко же воздержание бывает коню от узды, тако и преподобный на грехопадныя недуги, воздержание имея от вериг и от прежереченных подвизех. Того ради на нем почи Святая Троица – Отец, и Сын, и Святый Дух. Тако же яко паки тщашеся на внешния подвиги и делая пашню, и лес сечаше, во всех обычаех и нравех образ подавая своим учеником, учаше их, не первее словом, но делом показуя прежереченным.

Ныне, братиа моа,//(л. 320) кто может изрещи таковое житие всепреподобнаго и многотерпеливаго страдание, или кто может исчести болезни и труды его, и желение о братии в покоех?! Престанем же ныне от сего хваления преподобнаго старца. И паки инде учителное слово его известим и прехвално поведаем истинныя его повести.

Житие Геннадия Костромского

Рукопись № 673 собрания Свято-Троицкой-Сергиевой Лавре. Ф. 304.

(л. 315) Житие и подвизи преподобнаго отца нашего аввы Геннадия Костромскаго и любимоградскаго, еже бе на Сурском езере, списано бысть житие святаго и отчасти чюдес его учеником его игуменом Алексеем тоя же обители.

В Троицы единосущнеи Отца, и Сына, и Святаго Духа истиньствую и исповедую: един Господь Бог Спас Наш Иисус Христос, прославляяй святых своих, тако же и мы их прославляем, росийстии людие, яко дивны чюдеса творит святыми своими угодники и дает дар//(л. 315 об.) Святаго Духа грубым человеком писание творити. Никто же возбраняет нам писати жития святых мужей, тако же и преподобных отець наших пустынелюбивых. Пустыннии же отцы со единым Богом беседуют и свет миру, яко же свет аггели Божии мнихом, тако же и мниси свет миру.

Сей бе юноша литовския земли страны блаженныи Григорие, млад сый и красен зело, единороден сын некоего великаго пана именем Иоанна, славна и богата, и матери Елены. Сии беста родителя его христиана суща, зело боящася Бога, никогда же церковнаго пения не отлучашася. Блаженныи же Григорие болши своих родителей подвизашеся: всегда в крыле церковьне живяше, день и нощь моляшеся Богу. О сем же подвизи родителя его негодоваше: «Что ты, чадо, тако твориши, или еси страж церковный? Срам нам есть от человек твои лишний подвиг. Ходиве вкупе с нами в церкви Божии, идеже ти поручихом, храмы, пребывай в них в день,//(л. 316) веселися с рабы своими, а в нощи опочивай на одре цветущем твоем». Отвеща им Григорие: «Родителие моя еста прелюбезная, не истязуйте ми сими глаголы. Аз не хощу детьская игры творити. Вся Бог творит, аки хощет, а человек творит, елико может, Дух Святый наставляет всякого человека на свой путь истинный».

Оттоле же блаженный же Григорие нача себе мыслити, како бы ему от родителей своих удалитися, и отити в росийския страны, и тамо вселитися в пречестныя их лавры, Господу Богу молитися. Изобра себе время благополучно, отиде от своих родителей на некоторую страну ко убогим человеком, совлече им светлыя своя одежы, повеле им устроити от своих родителей тайным обычаем и из`я у них в то место худыя ризы, облечеся в них и хожаше по странам Литовскиа земли, по пустыням, и по стремнинам, и по жилым селом, и по весем, и по градом литовьским. Такоже хожаше по диким лесом, многи беды прия от звереи и от гадов, паче же от злых//(л. 316 об.) человек Литовскиа земли.

Потом же паки дойде росийскиа страны и до царствующаго града Москвы, в нем же хожаше безпрестани к церквам Божиим и притекая в пречестныя обители, где бы ему пострищися и молитися Богу. И паки обрете себе дружину именем Феодора, млада суща и зело боящася Бога, хотящаго пострищися. Прочее же оба вкупе поидоста в Великий Нов град, тамо хожаста по святым церквам и по честным лаврам. И паки доидоста пустыни преподобнаго Александра, зовомаго на Свери. И внидоста в пустыню ко преподобному Александру, припадающе и глаголюще: «Преподобный отче, желаем Господу Богу молитися, постриги нас Христа ради, во мнишеское одеяние». Преподобный же Александр отвеща к Феодору, глаголаше: «Ты, чадо Феодоре, имаши водити зверя белоглавнаго». Григорию же рече преподобный: «А ты, чадо Григорие, – рече преподобный, – сам будеши пастырь словесным овцам//(л. 317) и наставник множеству иноком, иди, чадо, на Комельский лес ко преподобному Корнилию, той тебе имать научити, како ти Богу молитися и како ти пасти словесное стадо, множество чернец, а в нашей пустыне лепотным отрочатом невместимо пребывати. Опочивайте, чада моя, елико хощете».

Они же пребываша все седмицы в пустыни у преподобнаго Александра, и взя у него благословение, и поидоста ко граду Вологде и от Вологды на Комельский лес, тако же приидоста в пустыню ко преподобному Корнилию. Толкущу им у врат преподобнаго Корнилия молитвою Иисусовою, преподобный же Корнилие, отверзая двери своя, глаголаше к ним: «Что бо бе, чада моя, како проидосте пустыни непроходныя, и что внидосте во убогую сию пустыню? Чесо хощета?» Юноши же рекоста Корнилию: «Господи наш, преподобный отче, желание нас великое одержит во иноческое одеяние, Христа ради причти нас к своему стаду избранному». Преподобный же Корнилий рече Григорию: «Прииди, чадо, во убогую сию келию//(л. 317 об.) нашю, а ты, чадо Феодоре, имаши мирьских человек житие содержати и чада ражати».

На Григориа же помавает Корнилие искус чернеческий по преданию святых отец. И поживе Григорие во искусе доволно время, и паки Корнилий постригает Григория во мнишеский образ, и рече ему слово святаго Евангелия: «Аще оставит человек отца или матерь, жену и дети, села и имения, сторицею приимет и живот вечный наследит. Мнози будут первии последни, а последнии первии» (Мф 19:29-30). И еще глаголет к нему по отческим вопросом и по ответом, и вдает ему по обещанию имя Геннадие: «Приими, чадо, древних святых отец разум и терпение, смирение и любовь, паче же молитву соборную и келейную и в подвизех нелицемерных». Содружебник же Геннадиев Феодор, вся пожив по пророчеству преподобных отец Александра и Корнилия, в глубоцей старости к Господу отиде в царствующем граде Москве.

Преподобный же Геннадие по благословению Корнилиеву велми подвизашеся//(л. 318) в молитвах и трудех внешних, паче же во утрених службах в поварне, и в пеколне, и в прочих. Братия же велми негодоваше и ропщуще на Геннадия о мнозех подвизех. Слыша же Корнилие роптание от братия, укрепляя Геннадия, глаголаше: «Не скорби, чадо, о сем на братию. Возмущением демоньским они творят».

Потом же паки во многа лета не престанут роптати на Корнилия и на Геннадия. Преподобный же Корнилие “предает место гневу” (Рим 12:19), приемлет своего ученика Геннадия, отходит от своего начинания и от обители шестьдесят поприщь в Костромския пределы, на дикий лес, на Сурьское езеро. Оттоле мало поприщь до царских христиан оброчных бортных. Христианя же зело возрадовашася о пришествии Корнилиеве, сотвориша ему келию на четыре пределы и приношаху ему хлеб, и мед, и всякую потребу. Преподобный же Корнилие со учеником своим Генадием подвизася к Богу молитвою и молением и пакы труды полагая, лес сечаше и пашню сотворяя, еще ископая четыре пруды, иже бе и доныне.

В лете же//(л. 318 об.) 7037-го (1529) бысть подвиг православному великому князю Василию Ивановичю с великою княгинею Еленою к Белу езеру в Кирилову лавру молитися о благородном чадородии. Егда же прииде государь в Корнилиеву пустыню и не обретоша Корнилия, зело оскорбляяся на черньцев. И глаголаше им: «Вашея ради ропоты и непослушания не живет отец Корнилие во своей пустыне». Скоро посылает государь по Корнилия своих слуг. Прииде же Корнилие пред государя великаго князя Василия Ивановича, припадает к ногама государевыма, прошает у него прощения своей дерзости, что в пустыню шел. Благоверный же князь великий Василей Иванович воздвизает от земля Корнилия и глаголет к нему: «Любимиче мой Корнилие, моли за ны милостиваго Бога, да же бы нам дарова плод благочадия в наследие роду нашему и державу царству Росийскому, и построение честным вашим обителем, и во утвержение веры христианския». Тако же глаголет государь Корнилию: «Пребывай во своем первом начинании и во//(л. 319) трудех. Ты же по нашему повелению отходною своею пустынею благослови своего ученика, его же хощеши».

По отхожению государя благовернаго и великаго князя Василия Ивановича преподобный игумен Корнилие пустынею благословляет ученика своего Генадия. Тако же повелевает ему церковь воздвигнути во имя Преображения Господа и Спаса Нашего Иисуса Христа. Преподобный же старец Генадие по государеву жалованию и по благословению отца своего игумена Корнилия вся сотворил в пустыне, и церковь Божию поставил, и украсил ея святыми иконами, и книгами, и всякою лепотою церковною. Братиам же у него в пустыне множащимся, паки преподобный устраяет вторую церковь теплую во имя преподобнаго Сергиа Чюдотворца Радонежескаго и украшает ея, яко же и первую церковь. Сам же преподобный прилагает труды ко трудом и преходит от силы в силу и от славы в славу во всяких трудех и подвизех, собою образ показуя братиям.

Еще же и жилища их добре устраивает, в день дрова сечаше, а в нощи//(л. 319 об.) по братским жилищам рознашивая, такоже и труды ко трудом прилагаше во своей ему пустыне. Еще же удручая плоть свою в поварне и в пекольне и власяницы на братию мыяше, паче же подвизаяся о церковных службах, приспевая свещи и кутию, и просвиры печаше, паки же име пост, и непрестанную молитву, и келейное правило, и коленное покланяние. Еще же ношаше вериги, кресты железныя и тяжкия чепи, таковое убо великое бремя ношаше преподобный ражьжения от плоти на дух, яко же воздержание бывает коню от узды, тако и преподобный на грехопадныя недуги, воздержание имея от вериг и от прежереченных подвизех. Того ради на нем почи Святая Троица – Отец, и Сын, и Святый Дух. Тако же яко паки тщашеся на внешния подвиги и делая пашню, и лес сечаше, во всех обычаех и нравех образ подавая своим учеником, учаше их, не первее словом, но делом показуя прежереченным.

Ныне, братиа моа,//(л. 320) кто может изрещи таковое житие всепреподобнаго и многотерпеливаго страдание, или кто может исчести болезни и труды его, и желение о братии в покоех?! Престанем же ныне от сего хваления преподобнаго старца. И паки инде учителное слово его известим и прехвално поведаем истинныя его повести.

Чюдо преподобнаго отца нашего аввы Генадия

Путь шествие некогда творя блаженныи со ученики своими с Серапионом и со Уаром во царствующий град Москву, молится преподобныи образом Божиим и великим чюдотворцем, по времени же некоем шествует преподобныи ко благоутробной болярыне именем Улияна Феодоровна зовомая, жена Романа Юрьевича. Честь старцу воздаваше Улияна со обема сынома своима Данилом и Никитою, и приводит его в другия храмы, идеже бе дщи ея Анастасия. Преподобныи же старец сотворих молитву и по молитве благословляет девицу Анастасию Романовну и касахся рукою своею на главе//(л. 320 об.) девици. Обычай бе преподобнаго у благородных чад родительския ради любве по главе гладя, глаголя: «Благаго корени благая и отрасль, благия отрасли ветвь плодовитая и розга прекрасная сие чадо». Потом глагола к девици во услышанеи всем: «Будеши государыня царица благоверная, всему миру радость». Улияна же, слыша сия глаголы, удивися с чады своими и со всеми людми о недоуменном словеси, яже суть сия, что старец рече. Откуду бо есть ему глаголы явишася? Потом же Ульянея удоволих старца со своими чады благодатными потребами не во един год. Потом же паки сия вся збышася по пророчеству старчю. Оттоле царица Анастасия нача велию веру держати в дом Спасов и преподобному старцу Генадию подоваше образы, и ризы, и ширинки.