О Мисаиле иноце чюдо святаго.

Бяше же убо некый инок Мисаило именем, постриженик того же монастыря блаженаго Александра, младу же ему сущу и житие имея растленно, к сему же еще желание имеа велие, много пиа пианьственаго питиа, иже бо сие на многых бываеть. И того ради ни душевных, ни телесных орудий исправы несть, и от Бога отлучаеть. Еще же не доволен бяше сим злым обычаем, но и еще маловерием одержим ко святому отцу Александру. Мы же, не судя, глаголемь о немь, но тако реку: «Не даи же Бог, но он сам о собе тако исповеда ми». Господь же Бог не восхоте его в неверии оставити и сим образом показа над ним чюдо не в коеи веси, зовомои Верхьнеи Борок, от обители же верьст десять отстоит на Онеге реце.

Случися ему тамо на пиршестве быти у неко//(л. 128 об.)его христолюбива человека именем Никита, Власиев сын. Тои же христолюбивый человек, достоиную часть воздавая ему, яко же обычаи ему есть гостеи чтити и учрежати. Инок же тои много хотячи пити, леюще, яко во утел сосуд, и от безмернаго питиа яко обьюродев и зло беседоваше, по пирному неподобная дея, и нелепая глаголаше. Не полезно бо писанию предати, срамна бо и скаредна таковая. Нощи же приспевши, и возлеже почити. И абие, возбнув от сна, и воспомянув свое неистовьство, и срамом обиат быв, и смыслив сие: «Отиду прочее, да срама избегну». И изыде ис храма во единои своеи свитке, иная же своя одеяниа во бремяни своем ношаше и не веде, како преиде к другому брегу рекы тоя страшныя и быстрыя. И обвалися в реку и руце его удержашеся мало на леду. Он же//(л. 129) еще не истрезвися от своеа от питиа, мняше сон зрети и, зреся назад, и видит быстрины, лиющеся чрез руце его. И начат вопити великым гласом, но никто же бе то слышаше, всем бо человеком спящим. Он же виде рок живота своего и горкый час смертный, и начат молитися Господу Богу и Пречистои Его Богоматери, и многых святых призываше на помощь. И не бысть ему помощи и, воспомяв же он преподобнаго Александра, и рече: «Преподобный отче Александр, избави мя от горкаго сего часа смертнаго, не сотвори по моему неверию, но соделаи по чюдесем твоим, да аз буду проповедитель великым твоим чюдесем». О велицеи силе Божии, о неизреченнному чюдеси святаго! И в том часе слышит аки подпор некый под ногама своима, изинуся из воды на лед до перси. И не тверду бывшу леду, и обломися. Он же возопи велиим гласом: «Великый чюдотворець Александр, избави мя от напрасныя сеа смерти». //(л. 129 об.) И второе ринуся из воды, и извержеся до пояс на лед, и начат рукама своима иматися и хвататися за снег и за лед, и тело свое отби с руку и с ногу до крови, и ко брегу привалися, и воста на ногах своих бос. Обувениа же падоша с ногу его, не веде како, и доиде пути, и преиде на ту же страну рекы к некоему человеку именем Иван, Яковлев сын. И приат бысть, и показа им руце и нозе свои кровавы, и сказа им всю беду своего потоплениа, и преподобнаго Александра превеликое и страшное чюдо, и помощь, и скорое избавление от горкыя смерти. Они, же слышавше и дивишася несказанному Божию милосердию и великому чюдеси преподобнаго. И на утрии же день светом озарися, и идоша на реку, и обретоша одеяниа его в реце в воде. Единем же рукавом примерзе к леду, того ради не потопе. И измеривше воды глубину и обретоша четыре сажени и вси прославиша Бога и преподобнаго Александра чюдо. Старець же тои иде во обитель, проповедая чюдо святаго Александра.//(л. 130)

О старце Вавиле, како исцеление получи.

Иже и се да не покрыется молчанию чюдо святаго, иже сотворися пред очима нашима. Ин старець некый Вавила именем дохияр бяше обители тоя. И случи же ся ему таковаа: некоим времянем не смыслити и забыватися ему ума своего. Игумен же и братиа видевше и отставиша его от таковыя службы. Старьць же в чювьство прииде, и помысли свое согрешение, и рече: «Грех ради моих се ми тако бысть». И помяну чюдеса преподобнаго Александра, и, шед ко игумену, и повелит молебнаа пети. Сам же припадает к раце святаго Александра, и облобызаеть раку его, и молит тепле преподобнаго, и просит здравиа. И Бог прослави своего угодника: поклоняющихся верою мощем его милостивное прошение исполняеть. И в том часе здрав бысть и смыслен, якоже и преже.

Неции же, завистию одержими, глаголаху: «Что се есть, яко единем часом//(л. 130 об.) сеи здравие получи? Како чюдо сотвори преподобны Александр?» Старець же тои благодать Богу исповедая, и Пресвятеи Богородице, и угоднику их блаженному Александру.

Чюдо о попе Игнатие.

Поп некый Игнатеи имянем, Фомин сын, жилище имея недалече от обители святаго – поприщь десять в веси некоеи, зовомои Нижнеи Борок. Случиже ся ему болезнь некаа, ослабла бо бе рука его шуяя. Он же, шед в церковь Живоначалныя Троица, идеже служаше, и, молебнаа певше и многых святых призываа на помощь, и не бысть ему помощи. Он же, вспомянув блаженнаго старца Александра, и рече: «О колика исцелениа творит Бог его ради!» И обет свои полагает, еже идти в монастырь святаго, и у раки его приложитися, и благодарение воздати Богу и святому. О великое Божие благодеяние! О дивное чюдо преподобнаго Александра!//(л. 131) О теплыя веры ерея к Господу Богу и к святому обет и моление! Яко в том часе бысть здрава рука его, яко и другаа. И потом приходить в монастырь и, шед во притвор, и приложися у раки святаго, и повеле молебнаа пети. Сам же начат облобызати раку святаго и со слезами молитися о согрешении своем. И молебнаа свершивше, и вся исповедает игумену и братии бывшее на нем чюдо святаго, и обещается милостыню послати, еже и сотвори. Игумен же и братиа вси, слышав, славяще Бога, и хвалениа, чюдесы удивляеми, благодарение Богу воздающе и глаголюще: «Слава единому творящему дивнаа и преславнаа, яже видеста очи наши». Священник же отиде в дом свои, благодаря Бога и прославляя чюдеса угодника Божиа – преподобнаго отца Александра, яко молитвами его исцеление получи и бысть здрав, яко ничтоже пострадав.// (л. 131 об.)