О некоем боярине Иване Михайловиче Юриеве

При державе силного царя и грознаго государя нашего великого князя Ивана Васильевича, скыпетр держащаго Росийского царства и обладающаго многыми языкы иноплемянными, иже многы победы показа на поганых, и царства их поплени, и ко своему царствию присовокопи, и цареи их и велмож полони, и во свое царство приведе, и под свою десницу подведе, яко же пророк рече святым духом: «Вязати царя их путы, славныя их ручными оковы железными» (Пс 149:8). И много неверных во православную веру обрати, уподобися благоверному и самодержавному равну апостолом великому князю Владимеру, прадеду свое, иже крести всю рускую землю. Тако же и сеи благоверныи царь и великыи князь Иван Василиевичь своею грозою и милостию многых варвар, и измалтян, и агарян, немець и варяг, и латыны, и иных иновере//(л. 110)ць во святое крещение введе и со крестианы соедини. Мнози же цари, иноверных язык племянници, совокупляхуся, и восташа нань, и ничтоже успеша, понеже рука Господня бе на нем (Лк 1:66) и десница Божиа крыяше его, яко же рече праведны Давыд: «Сами спяти быша и падоша, и ружиа их внидоша во сердца их, и луци их сокрушишася» (Пс 19:9). И никтоже может стати противу царства его, яко же в псалме пишет: «Ты страшен еси. Кто противу станет ти?» (Пс 75:8). И пакы пишеть: «Десница Господня вознесе его» (Пс 117:16), и рече: «Положих помощь на силнаго и вознесох избраннаго от людии моих» (Пс 88:20) и «первенца положу и паче царей земных» (Пс 88:28). Престол славы наследие отчества дарова ему Бог, и скипетр в десницу его утвердил есть Господь, и благословил есть лета его, и силна сотвори, и храбра показа. И мнози цари, обла//(л. 110 об.)дающи своими царствы, с великыми дары послы своя посылающе, покаряющеся ему, ини же мнози цари служаще ему. Князеи же силных и бояр великих, и велможь державных, и воевод крепкых, и воинов храбрых, и слуг верных, им же не бе числа. И бысть же в лета царства его, яко же есть обычаи царьскиа державы жаловати ему цареи и своих служащих ему, и князеи, и бояр, и велмож. Царем убо царьства во одержание, князем же и бояром грады великыя, инем же веси, инем села, комуждо по достоянию.

И бысть же тогда от великых велможь и силных бояр некый боярин Иван имянем Михаиловичь Юриева. Сеи убо богатством и славою превзыде многы велмож, еще же и сродник бяше благовернои и милостивои царици великой княгыни Анастасии. Того ради напаче превознесеся гордостию. И сего царь государь пожало//(л. 111)вал. Дан бысть ему град Каргополь во обьдержание. Он же, наехав на град в велицеи гордости и в мнозе величании: якоже преже того силни князи быша на граде том и многа зла и насилия сотвориша крестианом, тако же и сеи тщашеся горша сих сотворити. Господь же, иже гордым противляяся (1 Петра 5:5), не попусти тому Бог тако быти, но зверину злобу на овчую кротость преложи. Сим образом тако бысть.

Игумен же Касиан, слышав властеля величава и гордостна, и совещався з братиею, и помоляся Спасу, и Пречистои Его Богоматери, и чюдотворцу Николе, и преподобному отцу Александру началнику, и взем потребная, иже на почесть велможи оному боярину Ивану, и ехав во град. И приходит игумен к боярину, и благослови его, поклонися ему до земли, яко же есть лепо властелю, и почестный дар предложи пред ним. Боярин же с любовию приат от него благословение и дар и повеле ему сести. Игумен же//(л. 111 об.) показа ему царево государево жалование – грамоту свою несудимую. В грамоте писано наместничим тиуном игумена з братиею не судити, ни их крестиан и доводчиком их не вьежжати к ним ни по что. Боярин же, добре похвалив грамоту, и отдасть игумену, и рече о некоеи пошлине. Та, де, ими пошлина на вас и на ваших крестианех имати велети. Старець же некый со игуменом Евсевий имянем впрекы рече к боярину: «Не имат деи тебе, господине, на нас, а нам тебе не давати». Боярин же с иаростию вторицею рече: «Как ми велети имати на вас, так велети». Старець же отвеща: «Когда будеть, тогда возмешь». Боярин же, аки зверь рыкнув, и рече: «О горе черньца сего! Царь государь мене пожаловал градом Каргополем и всею Онегою рекою и с поморием, елико к тои области прилежит, сеи же чернець не хощет мне повиноватися и еще впрекы глаголеть». Игумен же, видев свое негодование//(л. 112), велможи оного ярость, и проче отиде. И в монастырь возвратися с великою скорбию, и много поношаше игумен старцу оному, рече: «Како ты глаголаше вопрекы таковому великому человеку, славному боярину?» И приехав в монастырь, и поведа игумен всеи братии, и вси же печални быша.

По отшествии игуменове от боярина, вышед боярин на предсение горници своеа, и с великым проповеданием зваше и глаголаше: «Кто есть таков человек, иже бы ми стал суперником на Ошевнев монастырь, наипаче же на черньца на Евсевиа?» В вторыи же день то же сотвори. Сице же и в третие тако же зваше и глаголаше, но никто же обретеся по воли его сотворити таковое дело, еже бы дерзнути на святое то место или вопричитися на игумена, или на братию, или некако зло навести, никако же смеяше, боящеся Божиа гнева. Вестьници же мнози, поведающе в монастыре игумену и братии толикою злобу//(л. 112 об.) оного велможи, бывшую на них, игумен же и вся братия в велице скорби быша о бывшем гневе оного боярина, слышаще его неутолимою ярость и неукротимою лютость. И вздвигоша братиа велик клопот и роптание на оного старца, и рекоша сице: «Велие зло сотворил еси, аще не Господь Бог избавит нас и Никола Чюдотворець, и молитва отца нашего Александра поможет нам, то мы ныне вси хощем погыбнути тебе ради. И ты, аще ехав не утолиши гнева боярина того, то аще семо послеть по тебе, то с великым бесчестием возмут тя. Мы же сами предадим тя, аки злодея некоего. И аще ти от него нечто зло случится пострадати, то мы никако же нерадим и ни коеа помощи не можем ти сотворити».

Старець же тои, яко услышав таковыя глаголы от братиа, и велми огорчися и, вшед в келию свою, и с великым рыданием начат плака//(л. 113)ти и со слезами молитися Спасу, и Пречистой Его Богоматере, и Николе Чюдотворцу, и преподобному Александру, како бы мощно гнев оного боярина умирити. Всю нощь моляся со слезами, мало сна приимаше, и наутрии же, встав рано, и приходить к игумену, и тепле молит его и всю братию, яко да помолятся о нем ко Господу Богу, и о сем пакы молит, аще некое насилие случится ему от боярина, еже бы помогали ему от беды тоя – поручение некако или скуп некый. И взем благословение от игумена, ехати в град к боярину, и, едущу ему путем, весь слезами обливаяся, и пакы, едущу во граде по улице, уже дни светающу, стрете его священник оного боярина, идущу ему негде на свое орудие, и удержа старца, и рече ему: «Радуися, брате Евсевии». Старець же ужаснуся, надеяся, яко ругаяся ему рече. Священник же рече пакы: «Радуися, яко Бог помилова вас, и великый чюдо//(л. 113 об.)творець Николае, и вашь началник избавил вас от гнева бояринова, нашего господина, и от великых бед». И Евсевии же рече к священнику: «Скаже ми, отче, истинну». Священник же начат подробну поведати ему, «како по отшествии игуменове от боярина, вышед боярин на предсение горници своеа, зваше и глаголаше, испытуя суперник на ошевеньскых черньцовь, “наипаче же на тебе, на Евсевиа”. Сиа же творяше на вторый и третий день. И не получи желаниа своего. Он же наипаче разярися, и созывает слуг своих ближних и, учредив их питием доволно во вчерашнии вечер, иже есть к сеи нощи, и совещает с ними зол совет на святое ваше место. Избра от слуг своих яра некоего и зело сверипа на утрии ехати ему в ваш монастырь и с великым бесчестием взяти ему было тебя, Евсевиа, и оковы//(л. 114) наложити и, привед, всадити в темницу, и твордо блюсти, “донелиже помыслю о нем, что сотворити”. И тако сбысться Исаино пророчество: “И аще совет совещаете, и разорит Господь, и слово, еже аще взглаголете, не имать пребывати в вас” (Ис 8:10). Сеи же нощи не вем, что прилучися ему, некое Божие явление бысть, яко же ми поведа по совете же оном, упившуся ему от многа питиа, и возлеже почити, усну твердо и потом, возбнов от сна, и почюти себе, яко утрезвившуся ему от питиа, и тако почивающу на постели своеи, легце спящу ему.