О приходе блаженнаго ко игумену второе.
И по мале времяни пакы приходит блаженны к игумену, припадает к ногама его, просит благословениа и молитвы от него, да благословен и отпущен будет. Игумен же видев его смирение и умиление, и прозряше, яко благодать Божиа бе на нем, и моление его приемлет, и тако к нему глаголаше: «Бог да благословит тя, чадо, яко Господеви годе, тако и будет» (Иов 1:21). Аможе Богу изволшю, на то и ведяшеся.
Блаженныи же Александр, благословен быв от игумена, радости наполнися, и слезам многым от очию его изливатися. И помолився на мног час Всемилостивому Спасу и Пречистеи Его Богоматере, изыде от монастыря, ничто же взем, разве потребную ризу и мало хлеба немощи ради телесныя. Богу же поспешествующу ему, пути касается, и немногыми же денми плаваниа путь преплы, и достизает до Каргополя, и оттоле приходит//(л. 40) в весь, глаголемая Слобода, да видить и пребывание родитель своих. И пришед в дом отца своего. Никифор же, видев сына своего в такове скорби суща (бе бо лице его изменилося от многа труда и вздержаниа) и, охапився, ем и, плакався горко, едва мало утешився седе. Никифор же начат сыну своему поведати пребывание свое, како преселися в Карголь, и како место то обрете, и в Нов город ходил, и грамоту слободскую взял у боярина оного, и како вселися ту, и «ныне благодарим Бога о сих, яко самовластни есми, а насилия уже не творит нам никтоже, яко уже забых всех прежних скорбеи».
Начат же и Александр отцу своему поведати: «Аз же, отче, яко услышах ваю отшествие в далныя страны, вилми оскорбися о сих, яко и самого того хлеба без слез не могох вкусити, якоже псаломскаа книга глаголет: “яко забых снести хлеб мои, и от глас вздыханиа моего прилпе кость моя плоти моеи” (Пс101:5-6), “и кости моя // (л. 40 об.), яко сушило, сосхошася” (Пс 101:4). “И питие мое с плачем растворях” (Пс 101:10), “яко тысяща лет пред очима моима, яко день вчерашнии, иже мимоиде” (Пс 89:5). “Кто есть человек, иже поживет и не узрит смерти и избавит душю свою из рукы адовы?” (Пс 88:49). И ныне хвалю Бога о сих, яко смирил мя Господь». Пребыв же Александр мало время, пакы в обитель хощеть взвратитися. Никифор же начат увещати Христова слугу: «Чадо Александр, поиди на обону страну рекы нашея и створи себе ту селитву и еже жити на потребу, и спасение да твориши души своеи. И аще Господь всхощет, ты же вздвигнеши храм Божий и по том взградиши монастырь, а место же оно угодно к монастырьскому зданию, токмо да не отлучишися наю, родитель своих. И егда же умреве, ты погребеши тело наю, тогда пакы ввратишися в монастырь свои или, яко хощеши, и сотвориши: шед в монастырь един, //(л. 41) спасешися; зде же, аще Бог повелит, многы душа ко Христу приведеши и спасеши. Ты же, чадо, помысли о себе, кая мзда болши есть – сиа ли, или она, еже спасти себе единого или еже с собою множаишую братию». Александр же, услышав таковаа словеса от отца своего, и абие умилися о глаголех сих, помысли и рече: «Иду и аз, дозрю места оного, аще будет воля Господня, может Бог и дело створити».
Во един же от днии блаженны Александр, встав заутра и взем с собою брата своего стареишаго, и идоша на обону страну рекы, и обьхожаше многа места, и приидоша на некое место, яко Богом наставляеми. И усмотрь, яко угодно бе на лаврьское устроение. Округ же места того инуде блата и дебри, места непроходна. Сие взлюби место преподобныи и постави крест, яже ношаше с собою, и, преклонь колени, моляшеся.
Молитва: «Иисусе Христе, Сыне Бога Живаго, упо//(л. 41 об.)вание всем концем земли, надежа и прибежище мое Ты еси, призри с высоты небесныя, от святаго жилища твоего, и виждь место сие, и благослови е и мене, недостоинаго раба твоего, сотвори мя достоина быти в настоящем месте сем, и прославитися имени Твоему Святому, и в имя угодника Твоего Николы Чюдотворца храм вздвигнути, и обьщии монастырь сздати. Но не яко аз хощу, но яко тебе, Христе, изволшу, и ты, Господи, настави мя. От Тебе бо вся возможна суть, и прославится Твое Пресвятое имя в векы. Аминь».
И по молитве седоста, и абие блаженый вздремася, и легце усну сном, и слишит с манием глас глаголющь, именем того зваше «Александре, угодниче мои, се ти уготовах место, идеже ныне самозван пришел еси. Сотвори себе селение, и пребуди зде, и спаси душю свою. Се будет ти покои в векы веком. И тобо//(л. 42)ю мнози спасение улучат». И абие в тои час, взбнув от сна, и никого же виде, от гласа же оного радости многы наполнися, и почюдися Божию посещению и оному неизреченному званию, и рече в себе: «Се отныне, Господи, обет мои полагаю, еже пребыти ми зде в вся дни живота моего, и иду в монастырь свои, и взем от игумена благословение, и прииду на место сие. “Се ми будеть покои в векы веком. Зде вселюся, яко же Господь Бог изволи” (Пс 131:14). И иде в дом отца своего радуяся, яко искомое обретох, и в себе дивяся бывшему, и приидоша в дом отца своего, и поставиша им трапезу. Они же, напитавшеся, отец же виде его весела и любовно глаголавша, и начат его впрошати, аще угодно есть к монастыскому зданию место оно. Александр же рече: «Велми, отче, угодно. Но аще воля Господня будет, аз же обещахся, еже быти ми на месте том». Никифор же виде усердие усердие сына своего и любовь к Господу, и прилежнее начат его увещати: «И се ти//(л. 42 об.), чадо, поведаю. Аз не мню быти просто место оно, еже ты виде, но благодати Божии некое и восиати нам светом. Се же не аз един, но и мнози поселяне, живущи близ места того. Многажды слышах иногда звони, иногда же гласи поющих, а иногда лучю некую видех, озаряющу места то. Ты же, чадо, прииди на место сие, на не же Богом позван еси, да церковь вздвигешь, и монастырь споставиш, и братию сбереши Божиею помощью. Аз же радуяся буду работати Богу, на устроение Богом сзданои обители, елико сила наша может помогати. Ты же, чадо, не забуди обета своего». Александр же с клятвами закляся отцу своему, еже не преступити обета, аще Бог произволит. И свещает со отцем своим послати послание грамоту к отцу по времени наяти делателеи, еже приготовити лес на создание церкви,//(л. 43) на поставление келиам, на устроение монастырьское. И пребысть же блаженны у родителеи у своих мало время, и взвратися в монастырь свои. И се убо о семь тако.