Како подобает духовным отцем строити, исповедающихся им.

Правило дванадесятое, иже в Никеи перваго собора, и Агкирскаго второе, но и пятое. еще же и шестое. епископом оставляет власть, или умножити или умалити запрещения теплее яве, нежели леностне покаяние указующим. да сматряетжеся сих прежде житие, и еже потом, или целомудренно, или разслабленно живут, и леностно. и тако человеколюбие да мерится.

Греха отшельствие совершенное исцеление.

Великии же Василии в третием своем правиле, отнюд быти глаголет истиннейшее целение, греха отшельствие, и еще воздержанием. и злостраданием плоть поработити, и покорити духови. так обо совершенное нам каяися подаст исцеления своего указание.

Достоит же строителем душ обое ведети, и яже испытания, и яже обычая. и иже убо приемлют испытание исповедающихся, потому и строити их. аще ли ожесточеваются, последовати обычаю схождения.

В седмьдесят же четвертом своем правиле сице глаголет.

Вязати и решати власть приемыи, и противу исповеданию и сокрушению взираяи коегождо.

Аще умалит запрещения лето, не будет зазору достоин. учит бо, рече, нас писание божественное глаголющее. яко со множайшим трудом исповедающимся скоро человеколюбие постизати. еже на Манасии быти сказует, и на Езекии, и на иных многих.

Такожде и святыи Григории Нисскии, в третием своем правиле пишет, и подобная сему уставляет. кая убо от времени цельба будет рече, но на произволение обращающагося взирати. аще с желанием и усердием есть, то скоро убо дати ему причастие.

Паки же Великии Василии во осмьдесять четвертом своем правиле, сице глаголет. вся убо сия пишем, яко еже плодом покаяния искуситися. не бо всячески летом судим сицевая, но нраву покаяния внимаем.

Аще же неотступно держатся своих обычаев, и сластем плотским паче работати восхощут, нежели Господеви, и евангельскаго жития не приемлют, ни едино нам обще к ним слово. мы убо в людех непокоривых, и прекословных научихомся слышати, спасаи спаси свою душу. зри и в Патерике еже преподобныи Памва о последнем роде рече ко ученику си. и в Прологе ноемврия в 16. и генв., в 20, день.

Над всеми же, яже завеща Великии Василии наводит, яко и лета уставихом покаянию о гресех. но не летом судим покаяние, яко еже учиненному времени мимошедшу, о коемждо согрешающих, и всякаго приимати их. но плоды покаяния да искушаем, или нраву внимаем, или устроению кающагося. во еже и зде разумети, яко же седмьдесят четвертое его правило сказует. сиречь, тщателем умаляти лета. а иже в нерадении пребывающим, протязати.

Аще ли нецыи рече, неотступно держатся своих обычаев, и не престают согрешати, к таковым ни едино нам общение. слышим бо от писания, спасаяи спаси свою душу. и блюди, да не погубиши себе, не исправленным приобщаяся.

От Матфея, 40, состава. глава, 7.

Во днех святейшаго Луки, воину некоему убийство вольное соделавшу, епископ некии на кратко вельми время, написано даде ему разрешение. и потязаем сыи от собора, правило предлагаше, еже епископом попущати власть, или ослабевати или растити запрещения кающимся. но услыша, яко архиереом дадеся убо сие, но не безистязательно и преизлишно творити схождение, и яко паучинами не подобает вязати, яже убо трема кодолами сиречь ужи связовати должни суть. тем же воина убо правильному запрещению собор предаде, архиерея же обвини, еже во уреченное время литургии пожданием.

Поучение.

От сих убо, и сицевых есть навыкнути, яко добро и прилично разсуждение святейшаго Иоанна Постника, правилом составися, по Матфею. и виждь реченное Постника, еже от Матфея.

Николы патриарха Константиня града.

Вопрос. Подобает ли правилы Иоанна Постника, правити некия.

Ответ. Таковая правила, многое схождение приемшяя, многих погубиша. но иже в разуме добра суть, и да правят ими.

От книги Матфеевы.

А еже сице скращати нам, рече покаяния лето, не убо вознепщуется не бытии слово спасаемо.

Се же да будет разумно, яко святыи Василии, и прочии отцы древнии, не точию грешников кающихся от святаго причащения отлучаху, но и труды и подвиги покаяния предаваху. паче же соборныя и обдержныя посты, бдения и молитвы церковныя на всяк день и нощь повелеша хранити и исполняти. к сему же и каноны покаяния налагаху, яко же есть видети в Василиевых правилех. 56, главе. и 58. и 59. и 75. и 77.

Собора Ангкирскаго в правилех, в 16, главе.

Григория Чюдотворца, 10. и Григория Нисскаго, 11. в них же паче, в 56-й. законополагается. яко да кающиися грешник лета 4 плачется. сиречь, вне церкве стоя, и входящих прося, да молятся о нем, грех свой исповедая. лет 5, в послушающих пребывая, сиречь в притворе церковнем послушая божественных писании. лет 7, в припадающих, сиречь, стоя в церкви за амбоном, и со оглашенными исходя. лета 4, с верными, сиречь, стоя и моляся, обаче кроме причащения пребывая. таже совершившее лета сия покаяния, Таин святых причастится. внемли зде, ни ли се есть покаяние и трудове плотьстии; и зело убо есть.

Вместо поместных на едине довлеют сия кающемуся, пребывати во вся дни в церкви чрез все правило. начен от полунощница даже и до вечерня. к сему среду и пяток поститися от рыб, и пития упивающаго не касатися. такожде и вся великия соборныя посты цело хранити, и трезвено всегда. не праздно же пребывати, и милостыню даяти, нищих призывати. в домех же молитвою и чтением упражнятися. к грехом же вспять никакоже возвращатися. от отец же святых.

Святыи Иоанн патриарх глаголемый Постник, сухоядения и метания с молитвою предает грешником.

Подобает истинно кающимся, и плоть жестоким пребыванием изнуряти хотящим, и житие благоразумное проходити первыя злобы сопротивосильное, и по мере воздержания возмеряти им, и времени покаяния умаление. яко се.

Аще кто вина питии во уреченныя дни не изволит, годище и мы судихом отъяти едино, уставленаго его падению, от отец запрещению. такожде.

Аще от мяса воздержатися обещавается на время, другое и мы лето отсещи искусихом.

Аще от сыра, и яиц. рыбы и масла воздержатися обещает, тогда на всякое воздержание, единаго сицевых вида, едино лето отъяти.

Но аще и частыми колено преклонении, Бога умилостивити изволит, подобнее творити.

Наипаче же обильное к милостыни, и силы не лишаемое произволение показует.

Аще ли же по силе прегрешения в боголюбезное, иноческое житие приступит. и еще скращенее облегчити ему оставление, добре быти искусихом, житие хотящему злостраданием проходити, и пребывати сицевому покаянию приличное.

Пристяжение.

До зде о исправлении кающихся. в нем же о духовниче да не погрешиши при глубоцем разсуждении, сия три памятьствуй.

Первое. количество. много кто согреши, да многая постраждет.

Второе. качество. да противная противными врачюются. чревонеистовство воздержанием. и прочее.

Третие, время. долго кто согрешаше, да долго и казнится. паче же всех, желание и произволение в кающемся, зрительно есть.