О пришествии в пустыню преподобнаго Нила.

И оттуду преиде в непроходимую пустыню, во Ржевскои уезд, на Ржевское устье. И вселися у Черемхи реки, и постави себе келийцу малу, начат жителствовати в келии тои. Пища же ему бяше от былиа пустыннаго и вершия дубнаго, труды же его, и подвигы, и со стратьми борения, и пустынное страшилище како исповем, яже творяше преподобному ненавидяи до//(л. 26 об.)бра враг диявол, не терпя себе от преподобнаго побеждаема? Вооружается на святаго всякими страшилищи, овогда зверие и гады, пресмыкающимися по земли, и всякими мечтанными привидении, во дни и в нощи страшаше. Иногда же немилостивии человецы находяще, и пакости деюще, и всякими образы немилосердие творяще вражиим научением. Что убо реку и что возглаголю? Како исповем по числу страдания преподобнаго, яже пострада в непрохо//(л. 27)димой той пустыни в трехнадесятих летех, яже поживе святыи у Черемхи реки, со страстьми боряся?! И святых со страстьми борение кто исповесть?! Но аще писати подробну страдания его, и со страстьми борения от бесов, и от звереи страхования, и от злых человек, наносящих ему лютыя скорби многи, но ныне едино от многих речется, о нашедших нань злых человецех, хотящих его смерти предати.

О разбойницех.//(л. 27 об.)

Некогда убо приидоша в пустыню ту, идеже преподобныи живяше, злии человецы, чающе у него многаго сокровища и хотяще его погубити. Преподобныи же, услышав приход их, и взем образ Пречистые Богородицы с Превечным Младенцем, и изыде противу их. Онема же показася, яко многия люди вооружены с преподобным изыдоша, они же от страха падоша пред преподобным и прошение испросиша о прегрешении своих. И яже помыслиша на святаго, вся подро//(л. 28)бну рассказаша. Преподобныи же глаголаше им: «Не ваше, господие, се есть дело, но общаго врага нашего диявола, ненавидящего добра роду человечю». И наказав их ктому таковая не творити, и отпусти их с миром.

Преподобныи же труды к трудом прилагаше, и подвиги к подвигом, и благодарные молитвы к Богу возсылаше во дни и нощи. Начаша же христолюбцы к нему приходити благословения ради. Преподобныи же тяшко си вменяше и рече к себе: «Что сотворю? Сам //(л. 28 об.) бо владыка Христос нам себе образ положи и писание. И сия повеления его, еже заповеди его хранити, яко же мощно. Сам бо пречистыми своими усты рече: “Иже кто хощет по мне ити, и возмет крест свои и возследует мне” (Лк 9:23). Лучше ми есть отити от места сего, да не честь приемлю и покои от подобных ми человек и вотще труд мои будет. Да некако, тело изнурив, а мзды лишен буду». И в нощных молитвах предстоя, и моляшеся Богу и Пречистеи//(л. 29) Его Богоматере, глаголя сице: «Пречистая Богородице, Мати Христа Бога Нашего, Ты веси, яко всю свою надежду по Бозе возложих на Тя. Ты убо яко сама веси, настави мя на путь, в нем же возмогу спастися». И тако ему молящуся многажды и, на молитве стоя, мало воздремав, и абие слышит глас глаголющь: «Ниле, изыди отсюду и иди на остров Столбное, в нем же возможеши спастися». Преподобныи же от гласа оного радости многи исполнися, яко не презре Господь моления его, и//(л. 29 об.) начат вопрошати христолюбцов о острове том. Они же поведаша ему, яко место есть пусто и никому же на нем жилища имеюще. Остров же той на езере Селигере седмь верст ото Осташкова. Слышав же преподобныи о острове том, и помолився намнозе, и тако поиде, и дошед на остров той.

Поживе же преподобныи Нил в непроходимой той пустыни у Черемхи реки тринадесять лет во мнозех скорбех, и трудех, и подвизех пустын//(л. 30)нных, отнюду же и преселися на остров Столбное. Мы же сия рекохом, яко же слышахом, но паки на предлежащее возвратимся. Настоящее же да речется.

И егда прииде преподобныи Нил на остров той, и обшед место острова того, и видев, яко угодно есть ко единению место то, и возрадовася духом, возлюби е зело. Бе бо на острове том гора и лес доволен. И пришед на гору ту, сотворив молитву и рече: «Се покой мой, се жилище мое, в век века зде//(л. 30 об.) вселюся, яко Господь изволи его (Пс 131:14). Благословен Господь отныне и до века, яко не презре молениа моего» (Пс 54:2). И тако блаженныи благодарныя о сем молитвы Богу воздав со многими слезами о обретении сицеваго места, и по мнозей молитве начат касатися делу.

Первие ископа себе пещеру малу в горе той, в ней же нечто мало покой приимаше от трудов. Остров той, идеже преподобныи вселися, место невелико зело, но бор бяше, и всяким лесом испол//(л. 31)нено велми, и красно бяше отвсюду, и никому же ту от человек преже живущу. Поживе же преподобныи в пещере той едину зиму, а потом созда себе келейцу часовню, идеже ныне лежит честное его тело. И ту начат преподобныи труды к трудом прилогати и подвиги к подвигом, радуяся духом, к вышним ум свой вперяя, тело и душу вдаваше на всенощное стояние и молитвы безпрестанныя, поучаяся присно во псалмех и пениих и песнех духо//(л. 31 об.)вных (Еф 5:19, Кол 3:16), поя Господеви присно в сердци своем. «На того бо, рече, упова душа моя (Пс 56:2), и помощник ми бысть». Землю убо копаше мотыкою, и от того питашеся, и в поте лица, по глаголющему, снедая хлеб свой (Быт 3:19). Бог бо питая его со обилием мнозем.

Ненавидя же добра враг диявол, не престает ратовати работающих Богови, паки вооружается на него, и очивесть является ему, и глаголет: «Калугере, изыди от места сего. Что ища, прииде на место се? Место есть пусто//(л. 32) и всячески непотребно и житилие около места сего суть. Како имаши терпети без пользы?» Преподобныи же, став на молитве, и начать глаголати сице: «Да воскреснет Бог и разыдутся врази его» и прочее псалма того (Пс 67:2). Диявол же, аки дым, исчезну и без вести бысть, но обаче никако остася прелукавыи враг пакости деяти. По неколицех днех, егда скончаваше блаженныи пение всенощное, прииде враг с привидением народа. И возвергоша,//(л. 32 об.) еже мнети, на келию его ужа и, влекуще, вопияху к себе: «Влецем ю и вверзем в езеро». Видев же их блаженныи, и рече: «Обыдоша мя, яко пчелы сот, и разгорешася, яко огнь в тернии. Именем Господним противляхся им» (Пс 117:12). Возопив сатана, и рече: «Не веде убо прочее, что сотворити. Се уже всячески победил мя еси и силу мою победил еси, не радя о мне. Но аз тебе не имам оставити, дондеже, одолев, смирю тя». Преподобныи же, отвещав к нему,//(л. 33) и рече: «Проклят ты буди и вся дела твоя, нечисте. Слава и покланяние Нашему Владыце единому Святому Богу, творящему тя попрану быти любящими его и поругану. Увеждь ныне, окоянне, безстудне, яко мы не боимся тебе, ни привидении твоих».