Молитва св. великомученице Параскеве Молитва первая
Святая невесто Христова, многострадальная мученице Параскево! Вемы, яко от юности твоея ты всею душею твоею и всем сердцем твоим возлюбила еси Царя славы, Христа Спасителя, и Ему единому уневестилася еси, раздавши имения твоя неимущим и бедным. Ты силою благочестия твоего, твоим целомудрием и праведностию, яко лучами солнечными, просияла еси, живши свято среди неверных и безбоязненно проповедавши им Христа Бога. Ты, от дней юности твоея, наученная твоими родителями, всегда благоговейно чествовала дни искупительных страстей Господа нашего Иисуса Христа, Егоже ради и сама добровольно пострадала еси. Ты, десницею Ангела Божия от неисцельных ран дивно исцеленная и восприявшая неизреченную светлость, изумила еси неверных мучителей. Ты именем Господа нашего Иисуса Христа и силою молитвы твоея в капище языческом всех идолов долу повергши, в прах сокрушила еси я. Ты, опаляемая свещами, единою молитвою твоею ко всесильному Господу угасила еси огнь естественный, и тем же пламенем, чудесне возженным чрез Ангела Божия, попаливши неистовых беззаконников, много народ привела еси к познанию истиннаго Бога. Ты, во славу Господа приявши мечное главы твоея усечение от мучителей, доблественно скончала еси страдальческий твой подвиг, восшедши душею твоею на небеса в чертог возделеннаго твоего жениха Христа, Царя славы, радостно сретшаго тя сим небесным гласом: «радуйтеся, праведнии, яко мученица Параскева увенчася!» Темже и мы, днесь сошедшеся в храм, посвященный имени твоему святому, приветствуем тя, многострадальная, и взирающе на святую твою икону, со умилением вопием ти, всечестная Параскево: вемы, яко велие имаши дерзновение ко Господу, умоли убо Его Человеколюбца и о нас предстоящих и молящихся ти, да подаст Он и нам, якоже тебе, терпение и благодушие в бедах и скорбных обстояниих. Возлюбленному же нашему отечеству да ниспошлет святое Свое благословение и мир, и всем православным христианом да подаст твоими святыми молитвами утверждение в вере, благочестии и святости, преспеяние же в христианской любви и всякой добродетели: да очистит нас грешных от всякия скверны и порока: да оградит нас святыми Своими Ангелами, да заступит, сохранит и помилует всех святою Своею благодатию и соделает наследниками и причастниками небеснаго Своего царствия. И тако улучивше спасение твоими святыми молитвами, предстательством и заступлением, всеславная невесто Христова Параскево, прославим вси пресвятое и великолепое имя дивнаго во святых Своих истиннаго Бога, Отца, Сына и Святаго Духа, всегда, ныне и присно и во веки веков. Аминь.
Вторая
О святая и преблаженная мученице Христова Параскево, красото девическая, мучеников похвало, чистоты образе, великодушных зерцало, премудрых удивление, веры христианския хранительнице идольския льсти обличительнице, евангелия Божественнаго поборнице, заповедей Господних ревнительнице, сподобльшаяся приити ко пристанищу вечнаго покоя и в чертозе Жениха твоего Христа Бога светло веселящаяся, сугубым венцем девства и мученичества украшенная! Молим тя, святая мученице: буди о нас печальница ко Христу Богу, Егоже преблаженнейшим зрением присно веселишися: моли Всемилостиваго, Иже словом очи слепым отверзе, да избавит нас от болезни очес наших, телесных вкупе и душевных, разжени твоими святыми молитвами мрак прибывший от грехов наших, испроси у Бога светов свет благодати душевным и телесным очесем нашим, просвети нас, омраченных грехми, светом Божия благодати, да твоих ради святых молитв дастся безочесным сладкое зрение. О великая угоднице Божия! О мужественнейшая дево! О крепкая мученице святая Параскево! Святыми твоими молитвами буди нам грешным помощница, ходатайствуй и молися о окаянных и зело нерадивых грешницех, ускори на помощь нам, ибо зело немощни есмы. Моли Господа, чистая девице, моли Милосердаго, святая мученице, моли Жениха твоего, непорочная Христова невесто, да твоими молитвами пособствовани, мрака же греховнаго избывше, во свете истинныя веры и деяний божественных внидем во свет вечный дне невечерняго, во град веселия приснаго, в немже ты ныне светло блиставши славою и веселием безконечным, славословящи и воспевающи со всеми небесными силами трисиятельное единое божество, Отца и Сына и Святаго Духа, ныне и присно и во веки веков.