Службу собору архистратига михаила и прочих бесплотных сил

Стихиры на Господи, воззвах, глас 4:

Трисолнечнаго Божества предстатель светлейший, / Михаиле, являяся, Архистратиже,/ с Горними силами зовеши, радуяся:/ Свят еси, Отче,/ Свят еси, собезначальное Слово,/ Свят еси, и Святый Душе, / едина слава, едино царство и естество, // едино Божество и сила.

И вид твой огнен, и доброта чудна, / Михаиле первоангеле, / невещественным бо естеством преходиши концы, / исполняя повеления всех Творца, / силен, в крепости твоей познаваемь / и, источник исцелений храм твой соделовая, // званием твоим святым почитаемый.

Творяй Ангелы Твоя, якоже писася, духи / и служащия Тебе пламень огненный, / посреде чинов первенствующа показал еси, Господи, Твоих Архангельских / Михаила Архистратига, / Твоим мановением повинующася, Слове, / и песнь трисвятую // со страхом возглашающа славе Твоей.

Сокруши свирепства Агарянская, / на стадо твое часто находящая, / устави раздоры Церквей, / укроти бурю безмерных искушений, / избави бед и обстояний любовию чтущия тя / и под кров твой прибегающая, / Гаврииле Архистратиже, // молитвенниче о душах наших.

Слава, глас 6:

Срадуйтеся нам, вся Ангельская чиноначалия, / первостоятель бо ваш и наш предстатель, / великий Архистратиг, / в днешний день в честнем его храме/ преславно являлся, освящает./ Темже, по долгу воспевающе, тому возопиим: / покрый нас кровом крил твоих, // величайший Михаиле Архангеле.

И ныне, Богородичен:

Срадуйтеся нам, вся девственных ликостояния, / Предстательница бо наша, и Ходатаица, / и Покров, и великое Прибежище/ в днешний день в честнем Ея и Божественней храме / скорбящия утешает. / Темже, по долгу воспевающе Сию, возопиим: / покрый ны Божественным предстательством Твоим, // Пречистая Богородице Владычице.

Стихиры на стиховне стихиры, глас 1. Подобен: Небесных чинов:

Ангельски в мире торжествующе, / сущему на Престоле славы Богу седящему возопиим песнь: / Свят еси, Отче Небесный,/ Свят еси, соприсносущное Слово, // Свят еси, и Душе всесвятый.

Тропарь, глас 4:

Небесных воинств Архистратизи, / молим вас присно мы, недостойнии, / да вашими молитвами оградите нас / кровом крил невещественныя вашея славы, / сохраняюще ны, припадающия прилежно и вопиющия: / от бед избавите ны, // яко чиноначальницы Вышних сил.

Слава, и ныне:

Еже от века утаенное / и Ангелом несведомое таинство, / Тобою, Богородице, сущим на земли явися Бог, / в неслитном соединении воплощаем, / и, Крест волею нас ради восприим, / имже воскресив первозданнаго, / спасе от смерти души наша.

Величание:Величаем вас, / Архангели, и Ангели, и вся Воинства, / Херувими и Серафими, / славящии Господа.

Прокимен: Творяй Ангелы Своя духи / и слуги Своя пламень огненный.

Всякое дыхание / да хвалит Господа.

После Евангелия:

Слава: Молитвами Архангелов, / Милостиве, очисти / множества согрешений наших.

И ныне: Молитвами Богородицы,/ Милостиве, очисти / множества согрешений наших.

Помилуй мя, Боже, / по велицей милости Твоей / и по множеству щедрот Твоих // очисти беззаконие мое.

Стихира, глас 6:

Ангели Твои, Христе, / Престолу величества во страсе предстояще / и Твоим светолитием присно осияваеми, / в вышних песнопевцы Твои / и совета Твоего служителие, / от Тебе низпосылаеми, // дают просвещения душам нашим.

Стихиры На хвалитех, глас 1. Подобен: Небесных чинов:

Небесных чинов яко предначальника / и сущих на земли человеков крепкаго тя предстателя, / хранителя же и избавителя/ воспеваем верно, Михаиле Архистратиже, // молящеся всякия тлетворныя болезни нас избавите.

Чиноначальник сый горних Божественных сил/ днесь созывает человеческия лики / един со Ангелы светлый праздник составити / собора их Божественнаго // и купно песнь Богу воспети трисвятую.

Слава, глас 5:

Идеже осеняет благодать твоя, Архангеле, / оттуду диаволя прогонится сила, / не терпит бо света твоего видети спадый денница. / Тем молим тя, / огненосныя его стрелы, яже на ны движимый, / угаси ходатайством твоим, / избавляя нас от соблазнов его, // достохвальный Михаиле Архистратиже.

И ныне, Богородичен:

Блажим Тя, Богородице Дево, / и славим Тя, вернии, по долгу, / град непоколебимый, / стену необоримую, / твердую предстательницу // и прибежище душ наших.

_________________

Кондак, глас 2:

Архистратизи Божии, / служителие Божественныя славы, / Ангелов начальницы и человеков наставницы, / полезное нам просите и велию милость, // яко Безплотных Архистратизи.