КЫДЗ МЕ ВИНАКÖТ ДУГДI ТÖДЧЫНЫ 3 страница

Алёша касьтывлiс лöзсина Маринаöс, кöда быдöс вынсö сетö сы понда, медбы быд морт сьöлöмын öгралiс счастье. Зонкалöн сьöлöмыс кыскис гортас, пессьыны ордчöн Маринакöт, дед Кирьякöт, пöртны быльö нылiсь думаэз.

Мöдiк чувство пессис кытöнкö пыдын пельöсокын: «Не, не, не... Разь татöн тэ не колана. Разь эстöн уджавны и пессьыны оз позь... Тэнат дело тожö общество понда полезнöй». А сэтöн бöра юрö пырöны ни Кирья дедлöн кыввез: «Миян родiсь некин сьöкытсис эз повлы. Айыт колхоз организуйтiс, а тэ грешитiн сэтöн и пышшин. Бедакöт да грехкöт колö пессьыны сэтчин, кытöн сiя аркмис».

А кöр Алёшалö тöдвылас усяс Маринакöт пантасьöм, сылöн чорыт, но справедливöй кыввес, горшас кайö курыт комок. И öддьöнжык кутö öбида, мыля сiя нельки немöн эз казьмöт, что нiя кöркö дружитiсö.

«Некытчö ог мун!» — чорыта висьталiс медбöрын.

Сiдз вермасисö Алёша сьöлöмын чувствоэз.

Мартын медодзза луннэзö окружнöй центрын мунiсö сельскöй строителлезлöн спортивнöй соревнованнёэз. Шутёмов асывсянь лöсьöтчис ветлыны стадион вылö, кытöн рытъявлас пондöтчас конькобежеццезлöн вермасьöм. Но шогмис сiдз, что сiя сёрмис соревнованнёэс вылö.

Кöр Шутёмов пырис стадион вылö, репродукторись кылiс дикторлöн голос: «Öнi пондасö вермасьны фигурнöй ысласьöм сьöртi...» — и репродуктор виньдiс.

Чожа зеркало кодь волькыт каток вылö петыштiсö кык фигуристка. Нiя, дженытик чочком платьеэзöн, кыдз бабыввез лэбзисö каток кузя. Öзйисö иллюминационнöй прожекторрез. Нысянь быдкодь рöма югöррез увтын спортсменкаэз пондiсö керны быдкодь фигураэз. То нiя чожа ыскöвтiсö «ласточкаöн», то керисö круггез, то лэбзисö вывлань.

Кöр фигуристкаэз керисö медбöрья круг, Шутёмов сибöтчис матöжык ны дынö. Алёша казялiс Маринаöс и тöдтöм нывкаöс. Нiя, кыдз косаткаэз, лэбзисö павильонлань и саясисö пытшкас.

Шутёмов котöртiс ны сьöрö, но кыкнан кокыс нильдiсö и пуркнитчис-усис лым вылö. А кöр сiя локтiс павильон дынö, сэтöн отир вöлi уна ни. Мымда бы Шутёмов эз видзчись, кöр петас Марина, но сiя кыдз му пытшкö пырис.

Репродуктор висьталiс, что соревнованнёэз кончитчисö. Öбидасянь, мыля эз вермы адззыны Маринаöс, Шутёмов иньдöтчис гортас. Сiя жагöник шагнялiс и видзöтiс электрическöй фонаррез вылö, кöдна кисьтiсö югытсö дамба вылö. Вдруг сiя мышкас кылiс сильканнэз и мортлiсь горöтöм:

— Эй-эй! Шеф! Кöр миянö бöра локтан?!

Шутёмов кежис. Сы бокöт тöвчикöн лэбзис кокнитик кошовка. А кошовкаись öвтiсö киэзнаныс Алёшалö Марина и тöдтöм нывка. Кошовка быркнитiс кузь пос кузя и öшис пемытiнö...

Шутёмов сулалiс начальник пызан дынын. Мöдыс кышалiс очкиэз и дыр видзöтiс заявленнё вылö. Эта коста радио пыр мунiс важнöй сообщеннё. Начальник лэбтiс юрсö, видзöтiс перво радиорепродуктор вылö, сыбöрын Шутёмов вылö и горöтчис:

— М-да, аскадö, аскадö. Ог возражайт. Сельскöй хозяйство — дело быдлöн, партиялöн, народлöн.

Шутёмов гажöн заполнитiс обходнöй лист, сетiс делоэз. Удж сьöртi сылöн ёрттэс одобряйтiсö сылiсь решеннёсö.

Ашынас Шутёмов шагнялiс роднöй колхозö.

УРÖСА СИННЭЗ

Челядь кадсянь менам биография пондöтчис онняюрöн. Айö прокод сувтöтлiс менö угöлö бöбалöм понда, а öтпыр ременьöн вольдiс, мыля сы шляпаö пуксьöтi кроликöс, и сiя шляпасö осьтаöдз йирис. А эшö Дёма Васька, миян сосед, лядьбейезöс петшöрöн вурис. И тожö дело понда: козаныс бöжö ем татшки. Но эта эшö челядь бöбалöм. А кöр нюжалi айö сувда, совсем умöль лоис. Шöрöт школа, веськыта шуны, кынöм вылам гужгöмöн кончитi. И, конечно, институт дынö и матö эз лэдзö.

Кытчö мунны? Заводö — гортöс жаль кольны; колхозö — мыла абу. Да и сэтчин назёмын, муын гарйисьны колö. Не менам мывкыд сьöртi уджыс.

Но сёжö аймамö адззисö местасö — сюйыштiсö менö колхозö счетоводöн.

Лыддисьны ме эг радейт. Числоэсö пыр соралi. Менö велöтiсö, видiсö, стыдитiсö, но ме сё öткодь вöлi. И сэк вежöртi, что нем меным табуреткасö пöжны — колö мунны эстiсь. И вот öтiк лунö менам душаын быдöс бергöтчис. Колхозö локтiс уджавны практикантка — зоотехник. Наташаöн сiйö шуисö. Нывка стрась бытшöм: кузь голя вылын пукалö басöк юрок, а юрбöрас шмакö каттьöм веж чикись. А синнэс? Кыдз и висьтав... Дзик арся ой: дзарнитан ныö — сiдз и öшан. И быль, ме öши. Дзикöдз мывкыдсим öши.

Сьöлöмам югыт биöн öзйис любитöм. Гажтöм правленнёын лоис мича, гажа.

Зоотехник пукалiс мышкам, мöдiк жырын, но ме и заборкаыс пыр кылi сылiсь быд вöрзьöтчöмсö и нельки сылiсь кокнит лолалöмсö.

Ме пондi кошшыны мог, медбы кытöнкö йöз син сайын сыкöт пантасьны, кöть недыр баитыштны нето паныт сулалыштны. Не öтiк рыт дежуритi сы керку дын, но сiя ме вылö и дзар эз кер.

Вот сiдз и маитчи джын тöв. Локтiс тулыс. Дзольгисö шоррез, косьмис му, петiс небытик турун. И вдруг казялi, что нывка пондiс гажтöмтчыны и ме вылö частожык видзöтлыны. Чуть да и локтас менам пызан дынö, лöсьöтлö öтi-мöдi басни. И ме сэк вежöртi... Сiдзкö, тулыс ассис делосö керис. Менам эшö öддьöнжык пондiс пессьыны сьöлöмö.

Ме, кыдз мужчина, конечно, сысся одзжык решитi осьтны ассим сьöлöмöс. Пыри сы жырö, а сiя пукалö шуштöм-гажтöм. Ме и вунöтi, мыйлö сы дынö пыри. А кöр усис тöдвылö, — коккезö пондiсö дрöжитны, öмö дзик кынмис, нем ог вермы горöтчыны. Наташа видзöтiс ме вылö и ласкова юалiс:

— Гриша, мый тэкöт? Не я шогавны пондiн? — и пуксьöтiс менö ордчöн. Долытжык меным лоис, сьöлöмö местаас пуксис. Пондi думайтны: вот, мыся, и сибалiс дыр видзчисьöм кадыс, öнi висьтала.

Но сiя одзалiс менö:

— Гриша! Дона! Тэ здоровöй, вына том морт. Нем тэныт эстöн пукавны. Ме важын ни вежöртi, что тэныт татöн дзескыт, тэныт колö простор. Вежöртан, дона: пастух колö. Öддьöн колö! Тэнат киын менам дипломлöн судьба! Мунан?

Нывка эз на ешты досповна висьтавны, кыдз ме горöтчи:

— Конечно, муна! Ме...

— Кытшöм тэ, Гриша, умнöй. Джын кывсянь вежöртан, — ласковöя горöтчис зоотехник. А менам юрö коддзис, бергалiс, шумитiс, ме нето уялi ваын, нето лэбалi кымöрöт.

Кöр ме пукси аслам пызан сайö, бухгалтерскöй книгаись цифраэз вачкисисö нотаэз вылö. Ме сералi, пуксöн йöктi местаам и сьылi: «Конечно, муна! Конечно, муна!» И вдруг кысянь мый и лоис — юр кузям кыдз нöшöн жвангисö — юрись код петiс. И ме ассим юалi: «Кытчö муна? Пастухöн?!» Эта кылыс менö чарöтiс. Керкуыс онняюрасис, пызаннэз берездасисö, джодж лэбтiсис вывланьö.

Ме чепöсси зоотехник дынö. А сiя сэтöн и эм ни: добрöй, ласковöй,. синнэс — кыдз арся ой.

— Неужто, Гриша, думаэтö вежин? И ме бöра мывкыдсим öши:

— Кытшöм басни, конечно, муна!

Сэксянь ме лои пастухöн. Ветлöтi куканнез бöрсянь, öвтчи кузь шатьöн да подалiсь бöжжез лыдди.

А гортын мый вöлi! Содом! Айö видiс, мамö причитайтiс, только öтнас бабö ошкис.

Вот менам и радейтöм! Сы кузя пастухö пöртчи. А сiя, менам любöйö, диплом гижö. И ме гижа — сылö письмоэз. Гижа, кыдз сьöлöмö сотчö. А сiя инструкцияэз гижö, кыдз наука сьöртi подаöс вердны. Сэсся ар сибалiс, Наташа городö бертiс, институтö, гижис куим кыв: «Гриша, спасибо. Адззисьлытöдз!»

Менам сьöлöмö чорзис: тырмас, мыся, меным ва бонöн лоны. Мыччала, что ме не челядёк, муна уджавны заводö.

И кыдз нарочно эта коста ме йылiсь пондiсö гижны газетаэз, пондiсö вовлыны ме дынö корреспонденттэз, экскурсияöн вовлiсö не öтiк колхозiсь пастуххез. И быдöнныс юасьöны, мыля менам куканнезö сэтшöм чожа зорамöны.

Но ме сёжö гижи заявленнё, медбы менö пастухсис вежисö. И кыдз только заявленнёсö пуктi, председатель ме сьöрö ыстiс легковöй машина. Менö вайöтiсö правленнёö. Председатель киам сюйыштiс кытшöмкö гижöт. Видзöта — телеграмма: «Гриша пантав тчк тэнат вопрос вылö да тчк Наташа».

Вот сiдз öнöдз и ендi пастухöн. И ог норась. Уджала и велöтча институтын. А тi, может, юалат: а кыдз Наташакöт? Висьтала: неважын ми сыкöт вöлiмö загсын.

КЫДЗ МЕ ВИНАКÖТ ДУГДI ТÖДЧЫНЫ

Веськыта висьтала, нем тiянсянь ог суськы. Вöлi кад, стрась вина юи. Кыдз только шедас киам деньга — сразу жö закусочнöйö котöрта. Деньга карманын бытьтö горзö, а киэз важын ни лудöны, карманö бы пырöны, медбы деньгасö винаö пöртны. Ежели син вылö усяс «мерзавец» или «жулик» (сiдз миян шуöны четушкаэз да поллитровкаэз), синнэз лоöны гöгрöсаöсь, вирöн боссьöны, горшын пондö кильöтны, а сыбöрын öтiк конец: постелля — канаваын.

Дыр меным иньö тотис: «Босьт жö нылытлö платье, арнас школаö мунас». Пыра магазинö — бергöтла, бергöтла платьеэз — деньга жаль сетны, дона — 40 руб! Öтпыр кыски ни кармансим деньгасö, — вдруг син вылам усис плакат, кытчö басöка и рисуйтöмась бутылка да увдöрас гижöмась: «Юö только шампанскöй вина». Менам киэзö асьныс сюйыштiсö деньгасö бöр карманам. А продавецсö бöбöтi: платьеыс, мыся, ыджытöв — и петi магазинiсь.

А магазинкöт ордчöн сулалö закусочнöй. Кыдз сэтчин пыри, эшö тöда, а кыдз помойнöй ямаын лои, кöть юр орöт, нем ог тöд. Менам счастье, что помойыс етша вöлöма, а то бы пöдi.

Карманам пыри, а сэтчин двестиись только öтiк руб кольччöм, да сэтчö жö эшö помойкаас кепкаöс вöти. Ох, и жаль деньгаыс, да и кепкаыс бур вöлi. Медбы горе вашöтны, деньга одзöстi. И сiдз вит лун юрö эз сайкавлы, А кöр синнэз одзам дугдiсö предметтэс кыкпöвсöн кажитчыны, сэк вöлись казялi: удж вылiсь менö вöтлöмась. Иньö гортiсь пышшöма.

Ме эд вежöрта, тiянлö интересно, кыдз ме юны дугдi. Кин этöн тiян коласiсь шогалö, буржыка кывзö менчим висьтасьöмсö.

Кыдзкö ми ёртöкöт пыртiм столовöйö гусьöн карманнэзаным вина. Столовöйись заведующöй мымда бы эз следит миян сьöрын, медбы мийö вина эг юö, сёровно нем эз пет. Ме прабабушкаöлiсь нимлун порйöтi, а ёртö юис — зон понда, кöда эшö эз чуж. Кöр столовöйись петiм, ме гортö пондi мунны. Этадз муна öтнам, меряйта тротуаррез и аслым ныр увтам сьыла. Вдруг паныт морт шедiс и корис öзтыны папироска. Ме шуа: «Пожалуйста». Морт öзтiс папироскасö и мунiс.

Ме и думайта, а не жулик ли эта мортыс? Карманöс малыштi — часыö абу, и давай сы сьöрö вöтчыны. Сiя только мöдiс сайöвтчыны ворота сайö, ме сiйö моросöттяс — цап. И вот этадз сiйö киэзнам лэбтi. Сылöн только коскаэс кроп да кроп. Но, мыся, и жулик меным шедiс. Кулакöс вайöтi ныр одзас и шуа: «Сет часыöс». Сылöн только киэс дрöжитöны, кыв оз вермы горöтчыны. Ме часысö босьтi и мунi. Гортö локтi, видзöта: пызан вылын, куйлö менам часыö. Карманiсь кыски — часыыс не менам. Вот сэтчö ме вöлись повзи, и юрись кодыс петiс. «Ме, значит, вор-грабитель» — и пондi юрбöр гыжьявны.

Асывнас одз мунi милицияö и висьталi, мый шогмис тöн. А сэтöн жö пукалö Григорий Максимович — пöрись-пöрись учитель. Сiя менö велöтiс кватьöт классын. Менам вöлись сэтöн юрсиö пондiс сувтны, кепкаö пондiс вывланьö лэбны: «Дак вот ме кинлiсь тöн часысö кули».

Эта делоыс мекöт весь эз чулав, чуть решётка сайö эз йöртö, да Григорий Максимович жö менö мездiс, а штрафсö сёжö вежтi. Григорий Максимович ме вылö видзöтiс да чурс только одзам сьöвзис. Эта бöрын кык месяц постуйтi.

А сыбöрын эшö бöбасьлi. Виль тöлiсь чужöм понда юим, а сыбöрын тожö нем ог тöд. Только вöтöнмоз тöда, менам ёрт кижган голосöн рытывбыт базанитiс öтiк кыввез: «Полюбил я очи чёрные за твои голубые глаза-а-а»!

Ашынас гортö локтi, юр потласьö-висьö. Колö похмелье веськöтны, да «тити-мити» абу. Осьтi шкаф, видзöта: шкалик сулалö. Вот, мыся, «мерзавчик». Хе-хе, кысянь сiя чужис, да сiя ме сьöрын вöтлiсьö. Босьтi сiйö, öтöрмöдöрсянь видзöтi, нюкайтi — вина дук. Настоящöй «мерзавец». Кытчöдз некин эз адззыв, голюк понiсь öмö — сымда и вöлi.

Вит минута эз чулав: давай öсöтны, кишкаэз öмам петöны. А сэтчö эшö кынöм висьö. Сiдз менö куим лун бергöтлiс да сэсся эшö кык неделя валяйтчи. Сыбöрын только вежöртi, что ме не вина юи.

Миянын олiс öтiк парикмахер, сылöн плешь юр пыдöсас пондiс шогмыны. Сiя, медбы юрсиыс эз киссьы, лекарство керöма — касторка да эшö мыйкö, и сiйö спиртöн сорлалöма. Спасибо эта добрöй мортлö — кидтiс менö винаись. Мед сылöн юр вылас кудриэз гардчöны.

ПÖРИСЬ ДРУГГЕЗ

(Рассказ)

Кык соседньöй колхоз коласын границаöн вöлi паськыт, но непыдын ю. Веськыт берег кузя асывлань нюжалöма «Искра» сельхозартельлöн хозяйство, шульга берег дорöт рытлань — «Заря» сельхозартельлöн. Колхозiсь колхозö ветлылiсö ю кузя пыжжезöн нето учöтик паром вылын. Ны коласын туйыс вöлi кык километр ылына.

Эна ю дорись кык колхозын олiсö кык почтеннöй старик: Степан Матвеевич да Егор Прохорович. Нiя öтамöднысö шуисö важ привычка сьöртi куммезöн. Степан Матвеевич «Искра» сельхозартельлöн член; Егор Прохорович — «Заря» артельлöн член. Нiя öтамöдныс вылö вачкисисö сымда жö, мымда вурун вачкисьö нитш вылö.

Степан Матвеевичлöн уссэс вывланьö, пеллезлань видзöтöны, а Егор Прохоровичлöн ныр увтсянь брага туислань öшöтчöмась. Öтыс вылын природа кешитчöма, ныр йылас бородавка пуксьöтöма, а мöдыслö кöркö кымöс кузяс плеть ороп павкöма, дак сiдз креста вурöс и кольччöма.

Степан Матвеевич мыгöрнас ыджыт и уна годдэзсянь ёна кызöма. Синнэз сылöн учöтикöсь и пашмöм кузь гöна синкыммез öшöтчöмась ны вылö. Ежели первуись сыкöт пантасян, то полöм петö, а пондас кö баитны, быдöс полöмыт öшас: голосыс вöснитик, пашмöм синкыммез увтын öгралöны ласковöй синнэз. Сiя и подакöт, кыдз отиркöт, баитö. Каждöй порсьлöн, балялöн ласковöй ним: Чушечка, Борюшка, Петюшка...

Егор Прохорович учöтик, нуженик, кыдз кöсперк. Сылöн синнэс, кыдз дзирыт шоммез, сотчöны. Голя не ас сьöртi кыз, пондас кö горöтлыны — нырыс гöрдöтö, а лöгасяс — чужöм вылас пятноэз шогмасö. Кöр мый не сы сьöртi, дак дзик том петух чеччалö, киэзнас öвтö, сiдз и морт вылö кайö. Сылöн кыввез, кыдз пуляэз, сiдз висьталас — паныт некытшöм ответ он вермы видзны. Уджын перыт, быдöс шумöн керö. Басниын сылöн любимöй поговоркаэз: «винтöн зэлöтны», «чёртлiсь бöж шемавны», «сiдз колö уджавны, медбы ойнас квать час кежö кулавны». Походка сылöн веськыт, не весь кöркö двенадцать год сьöрна фельдфебельын сапоггез бырöтöм.

А öддьöн ни стариккез славнöйöсь. Сэтшöм прокаöсь — кианыс кöрт калитчö. Степан Матвеевич порсь фермаöн заведуйтö, Егор Прохорович — строительнöй бригадалöн бригадир. Кык старик öддьöн тöдчöны, öтамöдныстöг овны оз вермö.

Степан Матвеевич локтас гортас удж бöрын и шуö: «Клашаня — сiдз старушкасö величайтö — мунам Егор Прохорович ордö. А то сiя менам советтöг стропилаэз арттöг вартас».

И Степан Матвеевич Клавдия Петровнакöт ордчöн, кыдз том гозъя, мунöны Егор Прохорович ордö. А мöдiк рытö Егор Прохорович локтö Степан Матвеевич ордö. Колö, шуö, видзöтны, кыдз сылöн дзутуоккез быдмöны. Егор Прохорович сюйыштас конувтас чертёжжез, проекттэз и мунö кум ордö.

Степан Матвеевич рытнас пукалö качайтчан креслоын, кöдö сылö керис приятельыс, и видзчисьö Егор Прохоровичöс. Пызан вылын сулалö тагья брага и куйлö кынымкö сорт аскерöм колбаса.

Степан Матвеевич тöдö ни кумыслiсь кокшысö. Егор Прохорович, керкуö пырикö, обязательно кыкись горöн кашельтас и порог дынсянь горöтчас вöснитик, гора голосöн:

— Здорово, кум, колбаснöй король! Кыдз креслоыт, тöран эшö? — и горöн пондö ваксьыны, ачыс веськыт синнас мигайтыштлö Клашанялö...

Кумыс бергöтчö и паныт ответ видзö:

— Пуксьы, пуксьы, Егор Прохорович.

— Дак мый, Степан Матвеевич, шоччисян?

— Чёрт усьöма кöз вылiсь и то пуксьöм шоччисьны. А ме уджалi.

— Кыдз миян соцсоревнованнё?

— Мунö. Оз сувт.

Сiдз пыр нылöн пондöтчö басни. А сыбöрын бура и критикуйтасö öтамöднысö.

Степан Матвеевич кутчас висьтавны недостатоккез строительнöй бригадалiсь, только видзсьы. Öтпыр сiдз споритiсö, что кык кум ойнас мунiсö фонарьöн вит километр ылынаö строительство вылö и линейкаöн меряйтiсö фундаментлiсь вылынасö.

— Тэ, Егор Прохорович, стройбригадаын медглавнöй, а уджын лэдзан брак. Проект сьöртi фундаментыс лажмытжык. Вытяжнöй трубаэз порсь фермаын öтпöвсаöсь, этасянь порсь фермаын пыр лоас ва. Тэ тöд, что порссез нять и ва оз любитö. Ой, ой, Егор Прохорович, некытшöм тэнат инженернöй культура абу.

Егор Прохорович пондылас ассис правоэз докажитны, да кытчö тэ. Степан Матвеевич кöть ласков, а адззас недостаток — веськыта синнэзö висьталö.

А кыдз Степан Матвеевич пондас потшшуйтны колбасаöн кумсö, ох и кешитчö Егор Прохорович сы вылын.

— Мый нö, кум, колбасаыт тэнат умöльжык лоö?

— Кыдз этö умöльжык?

— А вот сiдз. Öмыт, тыдалö, умöля ни тöдö кöрсö. — Егор Прохорович öмтырöн аклялö колбаса и ачыс хитрöя öм пельöснас шыннялö.

— Ме неважын, Степан Матвеевич, дружок, тэнат фермаын вöлi... Абу порядок... Свинарка Настялöн халат сьöд, сапогыс пирöг корö. Етша тэ ны йылiсь заботитчан. А турун ваялiсьлö быдса кык сотка трудоденьсö абу гижöмыт.

— Этö ме вунöтi, — пондылiс дорйисьны Степан Матвеевич.

— Вунöтiн, шуан. Эн бöбöтчы. Кык соткаöн мортöс öбидитiн. — И Егор Прохорович чуньсö лэбтiс потолокö. — А дополнительнöй оплата, бöра жö не порядок. Мöдiк месяц он вежты. Эх, Степан Матвеевич, партиялiсь политика он тöд. Лыддьöтны колö да этчö тэчны! — Егор Прохорович чуньнас тюкöтö кымöс кузяс.

А то овлö сiдз: критикуйтасö, споритасö и юасö стопкаöн вина. Сыбöрын Степан Матвеевич пондö кешитчыны Егор Прохорович вылын.

— Висьтав жö, дона кум, кысянь чужис умнöй кымöс вылат эта пятноыс, — ачыс бöра сералö.

Егор Прохорович охотнöя висьтасьö. Унаись ни висьтасьлiс и сё не öтмоз.

— Вот, дона кум, овлö жö беда. Шогмис сэтшöм история. Революция вотöдз миян хозяйствоын прутю не кутю эз вöв. Сэтшöм беднöя олiм, что нем он сет, не он босьт. Айö и шуö меным: «Мун жö, Егорко, батрачитны». И вот медалiс менö богатöй лесничöй кучерöн уджавны. Сылöн ныввес, барышняэс, городын олiсö, кытшöмкö пансионын велöтчисö. Каждöй масленича коста гöститны вовлiсö. Масленича конецас ни ме пöрисьжык барышнясö кыски купец приказчик ордö. Сылöн весь олiсь лызлоэз тожö городын олiсö. Мыйкö кывсис: картiэзöн пö быдöс проиграйтöмась да и чуть айнысö абу проиграйтöмась. А барышняыслöн пö сьöлöмыс висьöма лызлоыс понда. Вот ме сiйö и кыски, да туй вылас беда лоис. Оглобляыс кыссис завёрткасис. Менчим барышняыс и юалö рочöн, мый пö лоис. Ме шуа паныт, мыся, ничего, ничего, барышня, сюйыштам да бöра поедём. А барышняыс лöгасис да кымöс кузям кыдз плеть оропнас поткöтiс, сiдз кымöсö и чездiс. Вöввес повзисö и навесьмак котöртны. Кошоваыс чывкнитiс и барышняыс берездасис лым пытшкас, только, грешнöй дело, коккес чер-чер керисö. Сы понда кымöс кузям эшö барышняыс вольдыштiс. И эта понда лесничöй менö вашöтiс кучерсис. Вот сысянь менö и пондiсö шуны «пятнайтöмöн»... Тэ вот лучше, кум, висьтав, кыдз ошöс вийин.

— Вöлi сэтшöм дело, — горöтчис Степан Матвеевич. — Кулак Опоньлiсь медбур воронöй жеребечсö ош туйö лыйи. Сiдз эз и тöд, кин вийис.

А кöр баитсяс быдöс, и петуххез мöдпырся ни китсасясö, кум кумöс джын туйсö кольлалö гортас.

Революционнöй праздник коста кыкнанныс мöдöтчасö, а Егор Прохорович эшö георгиевскöй кресттэз öшöтас морос вылас и важнöя мунöны улица кузя. А кöр Степан Матвеевич пондас юавны Егор Прохоровичлiсь, мыйлö пö тэ энö царскöй кресттэсö öшöтiн, Егор Прохорович гордöя паныт висьталö: «Ме нiйö босьтi отечество дорйöм понда, Россия-матушка дорйöм понда, сiйöн и новья».

Кык друг, кöть и пöрисьöсь ни, но бура уджалiсö, том отирöс бур туй кузя иньдöтiсö.

Степан Матвеевич одзся-одз локтас фермаö, быдсöн проверитас дворрез и видзчисьö, кöр локтасö фермаö скотницаэз. Сыбöрын, удж пондöтчöм вотöдз, юасьö быд свинаркалiсь:

— Ноко, Настя, висьтав, уна я тэныт колö быдтыны порссез?

— А ноко тэ, Наташа, висьтав, кытшöм социалистическöй обязательство районын порсь вöдитöм сьöртi?.. А мыля халат тэнат нятьöсь?

— А тэ, Маша, лыддьöтiн партиялiсь постановленнё животноводство йылiсь? Ноко висьтав.

Сiдз быд асылö беседуйтö каждöй морткöт и бур кылöн иньдöтö уджавны.

А висьтасьöны, ох и видö пö бригадиррезöс, кöдна керасö мый не сiдз, кыдз колö. Öтпыр бригадир абу сетöма наряд сьöртi öтiк вöв, дак заставитöм асьсö кыскавны фураж. А сыбöрын неöтпыр стыдитöма собраннёэз вылын.

А пондыв пырны свинофермаö халаттöг либо разрешеннётöг. Нем оз пет. А пыран, дак аслыт лоан нерад. Степан Матвеевич кутчас вежöртöтны: инфекция пö фермаас ваян, нето порссезлiсь нерввез тшыкöтан, госсявны дугдасö.

А Егор Прохорович — старик крутöй. Бокньöвтасмоз юрсö, чикыртас синнэсö и горöтчас: — Иван, тэ мый осьтöн öмтö видзан? Мый, чёрт бöжтö шемалiс? Тэнат бöра фронтоныс петiс не проект сьöртi. Ах тэ, ылöстöм юр. Ноко, лок татчö, видзöт проектас.

Уджöтас, винтöн зэлöтас, а öбед коста, кöр чукöртчасö быдöнныс, пондас партия да правительство политика йылiсь баитны. Неöтпыр ни баитiс нылö, что öнi колхознöй дворрез долженöсь лоны басöкöсь, стандартнöйöсь, медбы син радуйтчис.

— Быдöс колö керны сьöлöмсянь, бытшöма да топыта, а то позор лоас быдöннымлö и медперво менам дзор юрлö! — баитiс Егор Прохорович.

Кинкö пырснитас-серöмтчас да бытшкас:

— Деду, да тэнат юрыт куш.

— Цыц, кульбук! Кывзы, мый баита.

А ежели кин умöля вежöртö строительнöй дело, сiйö вайöтас гортас и рытывбыт велöтö. Сэтшöм ни сылöн характер — быдкодь дело вайöтны конецöдз.

Кад чулалö, дело керсьö. Небоöт пондiсö ветлыны зэран кымöррез, кöсйыны небур юöррез.

Локтiс видзчисьтöм беда, стариккез лöгасисö и, тыдалö, не шуткаись. Степан Матвеевич след оз кер Егор Прохорович ордö. Егор Прохорович öмись кыв оз лэдз кумыс йылiсь. Берег дорын косьмисö пыжжез, эз пондö ны вылын куммез юсö вуджавлыны. Совсем вунöтiсö друггез öтамöднысö.

Мый бы сэтшöмыс лоис, кытшöм сьöд кань ны коласöт котöртiс? А быдöс делоыс то мыйын. Степан Матвеевич — дед и Егор Прохорович — дед. Степан Матвеевичлöн — внучек Петя, инженерö велöтчö, Егор Прохоровичлöн — внучка Настя — зоотехникö. Кыкнанныс велöтчöны öтiк городын.

Одзжык сё баитлiсö кык старик: «Керам родня. Мыйöн не пара". Гордитчисö внучеккезнаныс.

Но мый бы сэтöн умöльыс? Радуйтчыны колö. Петя локтас инженерöн аслас колхозö, Настя — зоотехникöн, тожö аслас колхозö. Но эна том сьöлöммес и дружба стариккеслiсь дзугисö. Петя и Настя любитны пондöмась öтамöднысö. Бöра жö сэтöн колö радуйтчыны. Степан Матвеевич и Егор Прохорович лоасö родняэз.

Вот эстöн быдöс и секретыс дзебöма.

Степан Матвеевич босьтö письмо и Егор Прохорович — письмо. И öтiк киöн гижöмöсь. Письмо конецас подписсез: «Петя и Настя". Кыкнан письмоыс пондöтчöны öтмоз.

«Дона дедушко, бур тэныт здоровье желайтам, быдкодь успех видзчисям». А сыбöрын гижöны: «Дедушко, ми öтамöднымöс öддьöн любитам, пыр кежö миян сьöлöммез орöттöг йитöмöсь, гаж-веселлё öтiк позö поздiсьöмась. Дона деду, роднöй, корам тэнчит совет да разрешеннё век кежö кык биа сьöлöм кöртавны».

Кöр Степан Матвеевич лыддьöтiс письмосö, радувьяс синваыс петiс, а Егор Прохорович лыддьöтiс и кумыс ордö иньдöтчис.

Стариккез неöтпыр эшö письмоэсö лыддьöтiсö. Судитiсö, редитiсö и решитiсö: öтiк письмо гижны, благословеннё сетны, но... и эта дженытик, мед сiя неладнöй, поперечнöй «но»-ыс быдöс делосö дзугис.

А кытöн нiя овны пондасö?

Егор Прохорович шуö:

— Но кыдз, Степан Матвеевич, бурö ме керкусö строитi? — И ачыс жö содтiс: — Кыдз дворец. Вот том гозъяыслö козин.

— Бурö, бурö, — шуö Степан Матвеевич, — только том гозъяыс ме ордын пондасö овны.