КЫДЗ МЕ ВИНАКÖТ ДУГДI ТÖДЧЫНЫ 6 страница

Эта жö годдэзö гижисö газетаэзын, баитiсö горöн и гусьöн — öсилейтiс пö враг — шпионнэз, контраэз, антисоветчиккез.

Локтiс кад, адззисö сэтшöммесö и Вильгорт посадын. Кыдз врагöс пуксьöтiсö Рудов Егорöс, колхознöй пода пастухöс. Сылö юöртасö, иньыт пö оз вермы чужтiсьны. Пастух недыр кежö котöртас гортас. Эта пора мöссэзыс пырасö клевер вылö, сёясö, и сизим юр польдасö да куласö. Вот Егор и враг.

Сэтчö жö посадын шогмис ыджыт пожар. Сотчис вöввезöн конюшня. Районiсь прокуратура да милицияись следователлез кошшисö, кин сотiс вöв конюшня. Адззисö Öсип Öндрейöс. Дёма Петя висьталöм нылö, что Öсип Öндрей ойнас конюшня дын куритiс чигарка.

Следователь кык лун пö ыждалöм Öсип Öндрей вылын:

— Тэ конюшнясö сотiн, — чирзö следователь.

— Вот, ен... эг, — откажитчö Öндрей.

— Тэ вöв конюшняас пыралiн?

— Пыралi.

— Мыйлö?

— Ме эд висьталi ни, мыся, вöввезыс öддьöн гöрдлiсö, поди, кöиннэз пырисö конюшняас, — сё сiдз жö небытика баитiс Öндрей.

— Тэ ачыт кöин. Куритiн?

— Конюшняас эг. Гортö локтiкö ни чигарка куритi, — спокойнöя отвечайтiс мужик.

Эта допрос сьöртi Öсип Öндрейöс пуксьöтiсö тюрьмаö.

Кöр уна год ни чулалiс, Лёва сизимöт класс ни кончитiс, кывсис, кин сотiс конюшня. Эта вöлöма Дёма Петя, «вина гаг», сiдз нимкодялiс сiйö отир. Öтпыр Дёма Петя локтöм Öсип Öндрей дынö и корöм юны вина. Хозяин сылö горбас тапкöм и брынгöм посöдзсянь. Дёма Петя вирöдз лöгасьöм Öсип Öндрей вылö и кошшöм, кыдз сыкöт вештiсьны.

Эта морток и колхоззэз вотöдз эз уджав аслас пашня вылын, некöр сылöн эз тырмыв нянь, подалö сёян. Эз уджав и колхозын, öктiс посадын сур-брага да вина.

А кывсис сiдз. Дёма Петя ветлöм сур-брага юны Красников деревняö. Кодззöм и ошшасьöм: «Адзза, Öсип Öндрей петiс конюшняись и пондiс куритны. Сэк менам и пелитчис бöб дума (а ме вöлi код): вештiся Öндрейыскöт. Чиркнитi истöг [3] и чапки идзас вылö. Сiя пыкнитiс, кыдз порох, ачым повзи, пондi тальны-кусöтны, но би пондiс ньывны конюшня крыша ни. Мымда вын вöлi, котöртi гортö. Ыджыт грех ме кери, ен оз простит».

И быль, мужикыт гортö локтiкö кодувьяс усьöм и кынмöм. Эта вöлöм Крещеннё коста, а сэк öтöрын сулалiс бимороз.

Вильгорт посадын оланыс нач дзугсис. Сiя кымöртчис, пондiсö рудзавны синваэз. Отир етшажык пондiсö серавны, гусьöнжык пондiсö баитны, шочажык том отир пондiс сьывны. Посадын мыччисисö первöй гусясиссез. Этатшöм морттэз йылiсь посадiсь крестьяна эз тöдö сiя лунсянь, кöр татчö тшуписö первöй керку. Татöн не керкуэз, не амбаррез öнöдз эзö тöдö замок. Замок местö вöлi сюйыштöм ёсь, сы сьöртi вöлi вежöртана, что хозяиннэз абуöсь.

Лудоввез, кыдз и быдöс отир, сiдз жö тшыгьялiсö. Лёва бабыскöт соседньöй районiсь деревняэзын дöрапöлöс вежисö нянь вылö. Матрёна Степановна, кытшöм бы эз вöв кадлöн чужöм, крепыта видзис хозяйство. Сiя эз сет, кытшöм бы сьöкыт эз вöв, дзугсьыны семьялö, хозяйстволö.

Эна сьöкыт годдэз Лёваöс одз пöртiсö мужикö. Сiя быдмис, сирасис, кыдз бабыс ошкöмöн баитiс. Лёванидöс пö ен мусянь тальöмöн быдтö. Сылö тырис даснёль год, а спинаыс быдса мужиклöн ни вöлi.

Лёва старайтчис вежöртны этнö сьöкыт годдэсö, но вöлi эшö томöв.

Но кыдз природаын овлö, кöдзыт лун бöрын локтö шоныт лун, кымöра небо вежсьö мичаöн, тулысöн быдöс ловзьö, гожумöн — цветитö. Сiдз жö и олан обществоын овлö.

Война вотöдз, медбöрья годдэзö, посад невна ловзис, мичамис, шогмис виль постройкаэзöн виль улица. Эстöн олiсö том семьяэз. Отир вочмис, пельпоннэсö паськöтiс, пыдынжыка ловзисис и мымда вын вöлi, петiс тшыг шогöт петляись.

Керкуэзын бöра шöмалiс быгья брага, мукöдпырсяс виялiс сур. «Тi юит миян посадын сурсö? Эд юö? Дак тшöкта пешлыны. Сур миян посадын инькаэз керöны бурö и бурö — курыткодь, чöскыт, не сьöд, не веж, пемыт янтарь, кружка öмö пöрöтан и быдса лун гыркын шоныт. А бражноись квас, да эшö тагья? Сола рыжыккез нето ельдöггез бöрын юыштан, сiдз лунтыр кежö пöтан», — сiдз ошкывлiс сур-брагасö Егор Лудов. Эта ошкöм бöрын обязательно колö сур-брагасö юыштны.

Лудов Лёва кончитiс небыдса шöрöт школа и мунiс велöтчыны одзлань. Сiя сiдз эз и тöд, кытчö сылöн öшис айыс, колхозiсь первöй председатель, а сыбöрын сельсоветiсь председатель, кöр сiйö ойнас нуöтiсö милиционеррез. Год ни чулалiс — шы не тöв.

Чулалiс эшö куим урожайнöй год. Посадiсь отир куим тöв и гожум уджалiсö тревогатöг. Ипатов амбаррез одзын том отир бöра гажöна сьылiс и йöктiс. Губин Фроллöн гöрд сарафана тальянка мыдзтöг гажöтiс том отирöс. Но шоныт, мича оланыс кыссис недырик. Бöра пондiс кымрасьны. Отир сьöлöммезын поздiсис тревога. Ольпась вылын том гозъяэз шушкисö, полiсö, медбы нiйö кытшöмкö рок эз янсöт.

И быль, гожум шöрнас, кöр путриктiс-быдмис зелень, природа зорöтiс быд кайсö, гагоксö, одз асылö поткöтiс-чанöтiс русö нёштöм кыв: война.

Посадiсь том отир мунiс война вылö. Кольччисö вит-квать старик, инькаэз да челядь. Кыскисö война вылö колхозiсь тракторрез, вöввез, телегаэз да доддез.

Колхоз, кытчöдз воюйтiсö мужиккез, кыдз вермис, кыдз кужис, быдтiс нянь, видзис пода, вердiс фронт. Инькаэз велалiсö керны быдöс, кöдö одзжык керисö мужиккезныс: куснялiсö додь полоззэз, мегыррез, гындiсö пимиэз, керисö сийöссэз, вурисö шлеяэз и сермöттэз, велалiсö дорсьыны кузницаын. Быдöс ны киись петiс. Стариккез, инькаэз, челядь эз сетö колхозлö разьсьыны, кувны посадыслö.

«Инькаэз тi, дона инькаэз! Тiян вывтi эд быдöс: морт род нуöтны, семья видзны, челядьöс быдтыны... олансö берегитны. Мымда жö колö вын, терпеннё, медбы олан эз кус», — сiдз баитiс собраннё вылын колхозлöн председатель-фронтовик.

Лудовлöн мамыс öддьöн тöждiсис, быд лун видзчисис юöр Лёвасянь, кöда тожö воюйтiс. Вовлiс öтiк письмо, кытшöмкö Сухиничисянь, сэсся зоныс кыдз ваö вöйис.

Посадö сьöрсьöн-бöрсьöн локтiсö похоронкаэз. Инькаэз-вдоваэз герьялiсö голосöн, но надеясö, что мужикыс эшö бертас, эз öштö. Локтiсö калекаэз: китöмöсь, коктöмöсь — и сэк жö кутчисисö удж бердö. Бертiс гортö и Губин Фрол. Трудармияын служитöм. Кöть и гажтöм вöлi посадын, но амбаррез увтын гармонист рыттэзнас орсiс виль нора песняэз.

Лудовлöн мамыс босьтiс юöр зоныссянь, кытöн сiя гижис, валяйтча пö госпитальын. «Слава енлö, богородицалö, ловья», — гусьöник аслыс баитiс Лёвалöн мам.

Победа. Кончитчис война.

Мужиккез бертiсö етша, посад да колхоз уджалiсь киэзтöг пондiс кувны.

Война бöрын колхоз некыдз эз вермы босьтны вын, да эшö сорисö быдкодь организационнöй вежсьöммез. Перво колхоз "Югыт туй» öтлаöтiсö «Комсомолец» колхозкöт. Сыбöрын колхозiсь керисö совхоз, а Вильгорт посадын лоис отделеннё. Совхоз пырис долггез кабалаö. Сэтчö жö беднöй удобреннёэзöн муыс умöля чужтiс нянь, подалö эз тырмы сёян.

Посад, кыдз морт, пондiс шогавны. Нывкаэз мунiсö уджавны городö. Ны сьöрö вöтчисö зонкаэз. Сё унажык и унажык лоисö керкуэз, кöднаись петiс лов.

Керкуэз, эшö ёнöсь, сулалiсö вартöм öшыннэзöн. Кöркö небыдса шöрöт школа вöлi дзескыт, öнi пöртчис начальнöйö. Посад пондiс кувны.

Эпилог

Кыдзкö ме областнöй городын адззылi Лёва Лудовöс, и вот мый сiя висьтасис: — Ме неважын вовлi горт посадö. Эстöн менам олöны сой да зять челядьнаныс — нёль зон да кык ныв. Ме сулалi посад шöрын, быгалöм, нитшсялöм вичку дынын, видзöтi кузнеч Мартынов Гаврил керку-сирота вылö, Кучевчи, Батуевчи, Рудовчи поззэз вылö, и менам синнэзiсь рудзалiсö синваэз. Этна поззэзын важын ни некин оз ов. Кин кулiс, кинöс тюрьмаö пуксьöтiсö, кыдз врагöс, раскулачитiсö, кинöс война вылын вийисö, а кин бур олан кошшыны мунiс городö.

Мамö ни кулiс. Сы могила вылö пуктi ыб вылiсь нетшкöм цветтэз. Сойöлöн зоннэзыс быдöнныс механизаторрез, грамотнöйöсь, кончитiсö шöрöт школа, öтiк нылыс учительница, мöдыс — акушерка. И некин ны коласiсь оз думайт мунны посадiсь. Ме юалi зятьöлiсь, мыся, кыдз жö тэнат зоннэз лякасисö посад бердö? Зятьö да сойö серöмтчисö: «Кытчö нiя пельдасö природа бердiсь. Вöр, ва, ыб — нылöн мöдiк керку, олан». Ме верита, поди, менам племянниккез, племянницаэз, нылöн челядь да кин эшö кольччис, вились чужтöтасö миянлiсь дона посад, может, öнi, виль кадö, Вильгорт посад вились зорамас, вочмас да гажа синнэзöн нёджжöвтас гöгöр. Может, ыджыт туй вывсянь посадiсь главнöй Ипатовскöй улица кузя бертасö городдэзiсь отир.

Верит, Лудов, верит. Мед тэнат кыввезыт пöрöны быльö.

ВОЙНАЛÖН ЧУЖÖМ

Лудов Лёва рытсянь тэчис аскерöм чемодан. А одзлань — мечтаэз, планнэз, — да мый только эз пелитчы том юрö. Лöсьöтчис мунны гортö. Думайтiс, что гожумнас шоччисяс, отсалас мамыслö, а арнас направленнё сьöртi мунас уджавны заводö.

Асывнас чеччис одз. Шондi югöррезöн малалiс тöв бöрын ловзьöм му. Быдлаын путриктiс — быдмис, читкылясис няр зелень. Руын павьялiс чöскыт, коддзöтан дук. Лун талун лоас мича, шоныт, зонкалöн сьöлöм вылын вöлi долыт. Сiя пуксис трамвай вылö и мунiс кöрттуй вокзалö.

Вокзалын сiя казялiс: öтмöдöрö котрасисö отир, кин горöтлiс, кин горзiс и быдлаын кылiс сьöд юöр «война».

Отир чукöртчöм станция площадь вылö, а вылiсянь, вокзал крыша вывсянь, дребезжитiс репродуктор, юöртiс война пондöтчöм йылiсь.

Эта юöрсянь Лудовлö син одзын бытьтö шондiыс кусiс, сылö некодя [4] лоис и думаэз дзугсисö: «Мый керны? Кольччыны городö. Гортö мунны?». Сiя татöн, городын, оз ни сулав военкоматас учёт вылын, гортын сувтас, а сэсся — фронт вылö. Сэтшöм команда сетiс аслыс зонка.

Но не сiдз шогмö, кыдз думайтан. Неделя мымда шоччисис, отсалiс мамыслö вочны карчйöр да мунiс уджавны заводö направленнё сьöртi.

Мунiкас мамыс кольлалiс ипатовскöй амбаррез дынöдз, чышкис чышьян пельöссэзнас синваэзсö и велöтiс зонсö: «Эн вунöт, Лёва, — тэ менам юрвердiсь. Тэ бöрсянь эшö куим няньсёйись, нiйö лэбтыны колö. Асьтö берегит. Быд местаö-осьтаö юртö эн сюйышт». Мамыс эшö эз вежöрт, что чожа кад сибалас, и зоныс мунас война вылö.

Перыта шагнялiс зонка тöдса Кульюрамыс вылöт, юдинскöй туй кузя, кöда Краснöй Яр деревня бердын петiс ыджыт тракт вылö. Эта туйыс Лёвалö учöтсянь тöдса. Кöркö бабыскöт эта туй кузя ветлiсö деревняэзö дöраэз вежны нянь вылö, а сыбöрын, кöр велöтчис городын, унаись этö туйсö талис-меряйтiс.

Луныс вöлi гажа, шондi ёрис синнэз, но сы сьöлöм вылын пукалiс сьöкыт из. Кыдз думайтыштас мамыс йылiсь, кöда медбöрья кадö кельдöтiс, рушмис, зонка синнэзiсь сiдз и быгыльтчасö кортöм синваэз. Касьтывлiс и Марья Гавриловнаöс. Кытöн ни пö тэ, Горадзулюшко? Мый керан, кыдз олан, мича ныв? Кулитiс, видiс асьсö, что эз куж кольлавны ассис сьöлöмшöрсö. Этна думаэзöн петiс ыджыт тракт вылö, пуксис шоччисьны, и сэтöн вöтiс городскöй машина.

Лёваöс радöн панталiсö заводын. Сувтöтiсö стажируйтчыны бур мастер дынö. Завод тыртiс обороннöй заказ. Рабöчöйез, унажык инькаэз да подростоккез, уджалiсö усьтöдз лун и ой. Кыдз вермисö, кыдз кужисö, отсалiсö фронтлö.

Мöдiк годö Лудовöс босьтiсö армияö. Квать месяц велöтчис пулемётно-миномётнöй училищеын. Велöтiсö миномётнöй расчётлöн командирö. Но училище эз кончит. Виль год бöрын, бимороз лунö, училищеись курсанттэз духовöй оркестр музыкаöн пуксисö теплушкаэзö и мунiсö воюйтны.

Неделя бöртi, вильöсь эшö, адззывтöм, мый сэтшöм война, курсанттэз, öнi боеццез ни, Москва увтын неыджыт станцияын гыж киссисö вагоннэзiсь. Эстöн том боеццез шатласисö кык сутки, кывзiсö, кыдз кытöнкö повзьöтлiс артиллерия, ойнас кымöрсö ньылiсö прожекторрез, вылын небоын бизгис «фокке-вульф», или, кыдз боеццез шуисö немецлiсь самолёт-разведчик, рама.

Куимöт лунö станцияö сувтiс пустöй эшелон теплушкаэзöн да платформаэзöн. Сетiсö команда пуксьыны поезд вылö. Пöрисьжык боеццез, кöдна мунiсö öтлаын курсанттэзкöт, баитiсö — эшелон пö мунö Юго-Западнöй фронт вылö. И быдса месяц эшелон кыссис конечнöй станцияöдз. Эстöн, эшелонын, Лёва пондöтчис вöлись тöдсасьны война чужöмкöт да сы философиякöт.

Эшелонын мунiсö уна боеццез, кöдна не öтiк бойын вöлöмась, и мукöдыслöн мороссэз выланыс югьялiсö не öтiк наградаöн ни. Нiя висьтасисö, кыдз чулöтiсö бойез, кыдз охотниккез, мукöдпырся содтiсö, мый эз вöв, ошшасисö, а бойезын вöвтöм боеццез осьта öммезöн кывзiсö нылiсь гарддьöм. Лудов эстöн тöдсасис боецкöт, кöда сылöн лоис бур фронтовöй ёртöн.

Лев Толстой нима станцияын, кытöн сулалiс кык сутки эшелон, ойнас отчаяннöй боеццез ештöмась ветлыны селеннёэзö и вайöмась сьöраныс бурак, кыдз татöн шусьö свёклаыс, турнепс, огуреццез, нельки судзöтöмась самогон.

Лудов пукалiс вагон угöлын, эстöн эз вöв печкасянь жар и уголь дук, кывзiс боеццезлiсь тарзьöм, ошшасьöм, кыдз тöдсасисö селоэзын местнöй нывкаэзкöт. Лёва дынö сибöтчис боец, нюжöтiс кисö солдатскöй кружкаöн и гажöна горöтчис:

— Ю, кунак. Эн тöждiсь: или юр кусттэз увтын, или морос — орденнэза иконостас.

Лёва видзöтiс сералiсь чужöма боец вылö, кружка вылö и юалiс: - Кöч йöв?

— Кытшöм кöч йöв? Не кöч йöв... бурак йöв. Кöр гöститöтöны, озö юасьö.

— Тэнат, сержант, доброыт кружка омöн [5] киссьö...

— Ми, казаххез, быдöнным добрöйöсь. Добро керö виль добро — этö быд казах вежöртö, — сылöн баитiкас дугаöн лэбисö, лэдзчисисö сьöд, тшöк гöна синкыммез.

Лёва сы киись босьтiс кружка, вайöтiс öм одзас, нырсö патшкыртiс нёштöм дук. Эта вотöдз зонка эшö эз тöд вина кöр и бöр кружкасö тойыштiс казах киö.

— Эн артась, ю. Фашистыс юр кузят кожгас, и этö он ешты пешлыны, — горöтчис ваксьöмöн казак.

Лёва, кыдз бытьтö настоящöй винагаг, перыта босьтiс кружка зонка киись, пöрöтiс гыркас самогон, курччöвтiс огурец и дыр кашляйтiс да несйис. Чожа гыркыс пондiс сотчыны, юрыс пондiс потны-висьны, и горшас кайис курыт комок. Котöртiс ыбöс дынö, и мый пöрöтiс гыркас, ковкнитiс-лэдзис бöр.

— Веж öмугöв... торкин добросö. Тэись оз пет бур солдат, — изгиляйтчис солдат.

Сiдз Лёва тöдсасис Нурсултан Разамбаевкöт. Казах, мыгöрнас неыджыт, но топыт, синнэзыс и юрсиыс чим сьöдöсь, коккез вылас боёк, отчаяннöй зонка. Сы морос вылын югьялiсö кык медаль — «За отвагу» да «За боевые заслуги».

Ашынас майор званнёын эшелонлöн начальник ветлöтiс доль эшелон кузя и мымда вын ряксiс, тшöктiс петны строевöй подготовка вылö. Том боеццез, сьöкыт похмельесянь гудыра синаöсь, гыжьясьöмöн лэдзчисö наррез вылiсь. А пöрись, бывалöй боеццез, кыдз кужисö — видiсö начальниксö: «Тыловöй тэ крыса, кынöмсö польдöтöм солдат карччез вылын, мöдöтчöм, кыдз свадьба вылö: виль ременнеза, свиттялан дзуртан сапога. Шедлан öтпыр передовöй вылö, кушмöм курöг кодь лоан. Да сэтшöм офицеррезыс передовöй вылö оз и мунö. Тшöктö ать-два керны, а сутки ни няньöн оз верд. Чавканнэзöн да дудiэзöн тшöктö вердсьыны». И быль, быд теплушка öшынiсь лэбзис чавкан да дудi гöн, кайесö боеццез лэдзисö автоматтэзiсь лыйöмöн кыдззез да тополлез вылiсь.

Том боеццез, кöдна эшö эз нюкайтö порох тшын, дасвит мымдаöн öксисö перрон вылö. Начальник нёштöма видзöтiс ны кельдöтöм чужöммез вылö, нестроевöй мыгöррез вылö и сьöкыта горöтчис: «Геройез... Мать твою, — чульс сьöвзис боеццезлань и эшö горöнжыка рякöстiс, — марш вагоннэзö, воякаэз! Позорниккез!»

Эшелон локтiс Валуйки станцияö. Эстöн боеццез босьтiсö нянь, консерваэз, сахар да табак. Ны сьöлöм вылын лоис гажажык.

Лудов дынö Сибöтчис Нурсултан, кыскис кармансис трофейнöй сигаретаэз и нюжöтiс зонкалö. Лудов откажитчис, ог пö курит. Пуксис Лёва бокö, вожмöтiс коккесö, пуктiс кисö сы пельпон вылö и горöтчис:

— Кунак, давай баитчам. Кытöн чужин-быдмин, величайтöны кыдз?

Лудов эз ешты сетны казах вопроссэз вылö ответ, кинкö лёк горшöн горöтiс: «Воздух!», ― и эта коста жö кымöрсö поткöтiс бомбаэзлöн усялöм шы, взрывнöй волнасянь пондiсö качайтчыны вагоннэз. Боеццез гыж киссисö вагоннэзiсь. Кин котöртiс, кин сапкисис гöпö, канаваö, дзебисö юррезнысö. А бомбаэз сё усялiсö, резiсö-паздiсö станцияись строеннёэз, жугдiсö кöрттуй. Кыдз казявтöг пондöтчис бомбёжка, сiдз жö чожа немецкöй бомбардировщикез бертiсö асланыс аэродроммез вылö.

Эшелон вылö бомбаэз эзö усьö, сiя кольччис дзонь, а вот кöрттуйсö жугдiсö.

Боеццез бертiсö вагоннэзö. Эшелонiсь начальник проверяйтiс вагоннэз и юасис öтiкö — раненöйез, вийöмöсь эмöсь?

Да, эшелонын вöлiсö вийöмöсь и раненöйез. Вот сiдз, солдаттэз эшö эзö локтö фронт вылö, а юррезнысö пуктiсö ни. Локтас гортö бумажка, кытчö гижасö геройскöя пö пуктöм юрсö Родина понда.

Куим лун бöртi Валуйкисянь эшелон пырис Купянскö. Вот и Украина. Украиналöн городок панталiс гажа шондiа лунöн. Февральскöй лым шондi вылын орсiс бриллианттэзöн. Городок кажитчис совсем не фронтовöйöн: мича, рам и чочком. Лёва понда Украина вöлi тöдтöмöн, но сiя тöдiс: эстöн аслас стиххезын сьылöтiс Украинасö сылöн великöй зон Тарас Шевченко, Николай Гоголь дивуйтiс отирсö «Диканька нима хутор дын рыттэзöн», кытöнкö татöн, Украина пельöсокын, быдмис Ларко Малиновский, спецпереселенец, Лёвалöн челядься ёрт. Лудов вöлi гордöй, что сiя пондас мездöтны фашисттэзсянь славнöй Украина.

Купянскын формируйтчис виль воинскöй часть — гвардейскöй дивизия, кöда сыбöрын лоас эшö и Краснознамённöйöн Суворов нима ордена дивизияöн.

Лудовöс сувтöтiсö миномётнöй расчётö наводчикöн, заряжающöйöн — не öтiк бой ни чулöтлöм Денисовöс, и минаэз ваялiсьöн - Коля Дунаевöс.

Миномётнöй взводöн, кытöн вöлi и расчёт Лудовлöн, командуйтны сувтöтiсö Нагибинöс. Нурсултан Разамбаев лоис взводнöй командирлöн помощникöн. Командирыс чужанiннас Алтайскöй крайись, война вотöдз уджалöм курöг фабрикаын директорöн.

Дженыт курссэз кончитöм бöрын сетöмась мортлö званнё «младшöй лейтенант», а вöлöм сылö сэк сорок годся унажык ни! Медодзза бойез примитöм Москва увтын, ранитöм, сiдзкö, сылöн боевöй опыт вöлi ни. Но боевöй офицер вылö сiя некыдз эз вачкись: шинель сы вылын пукалiс, кыдз мöс вылын седло, ременьсö новйис личыта, коскас туйö сюйыштны не öтiк чер, лядьбейыс кузя вартö пистолет, а юр вылас шапка пыр пуктöм бокöн. Но сiя кужис баитны боеццезкöт, ны понда тöждiсис, заботитчис, бойез коста нiйö берегитiс. Кöр колiс, вöлi и строгöйöн, боеццезлiсь весь юрресö эз малав. Мукöдпырся видiс нiйö, кöр весь, пользатöг, мыччалiсö геройство. Кыдзкö и Лудовлö шедiс: «Боец, тэ мый сулалан, кыдз парад вылын? Вежöрт, дубина, тэныт виль юр некин оз сет, нельки Иисус Христос. Осьта öма герой».

Солдат Денисов вöлi Курган увтiсь. Дед-прадеддэзсянь нянь быдтiсь. Морт неыджыт, топыт, му бердсянь тэчöм, не уна баитiсь, но, кыдз шусьö, быд кыв сылöн ― золото, вес вылын öшлöм. Удж пора оз суетитчы, весись кинас оз вöрзьöт, не оз оськöвт, быдöс дзик сылöн лыддьöм. Шоччисик коста писис кыскас конверт, сэтчинiсь иньыслiсь да зоныслiсь фото, видзöтас-видзöтас ны вылö, мыйкö шушкыштас ныр увтас, гладьöтас карточкасö и бöр сюйыштас пиас. Лудовлö гленитчис вына, вежöра Денисов. И желайтiс сылö, медбы гортö бертiс ловья и дзонь. Лёва кыдзкö юалiс сылiсь: «Денисов, тэ войнаись он пов? Тэ пуляэсö, кыдз гуттэз, вашöтан...» Денисов дыр шы эз сет, сыбöрын серöмтчис и тэрмасьтöг видзис ответ: «Пола. Меным гортын уна удж эшö колö керны. Зонöс быдтыны, виль керку сувтöтны...».

А Дунаев вöлi нач мöдкодь. Кизерик, кöсперк, нервнöй морток. Шинель сы вылын öшалiс, кыдз майöг вылын. Война вотöдз сiя велöтчöм музыкантö. Кöр велöтчисö училищеын, пыр норасис: то сылöн кынöмыс висьö, то юрыс бергалö, то синнэс пемдöны, но санчастьын некытшöм шогöт сылiсь эз адззö. Дунаев öддьöн полiс войнаись, кошшис, кыдз бы не шедны фронт вылö. Училищеись курсанттэз сы вылын сералiсö, изгаляйтчисö:

— Эй, Дунаев, талун кынöмыт оз вись? И санчастьö он мун? Посылка пö карчöн тэныт эм.

Дунаев курсанттэзлiсь чушкан кыввез лэдзис пеллез бокöттяс, бытьтö не сыкöт баитöны.

Купянскын чулалiс не öтiк лун ни. Эшелоннэз боевöй техникаöн и личнöй составöн локтiсö и локтiсö. Сё эшö мунiс часттезлöн формированнё. Эта кадö солдаттэз тöдсасисö öтамöдныскöт.

Кыдзкö Лудов, Дунаев да Денисов пукалiсö керку посöдз поступеннез вылын, кытöн квартируйтiс нылöн расчёт, ны дынö сибöтчис казах Нурсултан.

— Здорово, кунаккез!

— Здорово, ёрт! — горöтчисö солдаттэз.

— Кытiсь чужанiннат, кунак? — казах бöра пондiс юасьны Лудовлiсь.

— Ме Уралiсь. Коми округись.

— Дак тэ комик?

— Не комик, а коми-пермяк, Пермскöй коми.

— Пермь йылiсь кывлi. Кама вылын город.

— Дак вот, ме сэтчинiсь.

— Сэк ме тэнö пермякöн понда шуны.

— Кöть кашникöн шу, лишь бы горö эн сюйышт.

— А кыдз тэнат фамиллёыт, нимыт?

— Тэ мый, сержант, следователь? Керан допрос? — лэбисö синкыммес Лудовлöн вывланьö, лöгöн свиркнитiсö синнэс.

— Эн лöгась, кунак, — ми, казаххез, сiдз тöдсасям. Эта басни бöрын, кöда кöркö эз шогмы бомбёжка кузя, Нурсултан часто вовлiс Лудов расчётö. Чужис да пондiс крепамны дружба. Локтiс кад юасьны и Лёвалö:

— Сержант, кунак, кывзы жö, ме сё думайта тэнчит юавны, мый понда тэныт öшöтiсö медаллез?

— Не нывкаэз любитöм понда жö.

— А тэ висьтась.

— Тэ кин? Профессор? Следователь? — сiдз жö сералiс Нурсултан, кыдз кöркö Лудов. Разамбаев дыр шы эз сет. Сыбöрын кисö сюйыштiс пиас, мымдакö сэтчин гуддисис и кыскис нöитöм, самöм армейскöй газета. Сiя сюйыштiс Лёва киэзö газета. Чуньнас тюкнитiс «Смелöй поступок» заголовок вылö, лыддьöт пö этö.

Газетаын гижöма: «Москва увтын чулöтöм ответственнöй операция понда Н-скöй полклöн командованнё сетiс куим лун шоччисьны. Мыдзöм, мисьтöм, тшыг боеццез усисö коккез вылiсь, öсилейтiс нiйö он, сэтчö бы и кунисö синнэзнысö. Окоппезын да лым вылын куйлöм бöрын чöскыта пывсисö деревенскöй баняын кыдзовöй короссезöн. Бритiсö тошшезнысö. Эта бöрын кыдз бытьтö чужисö вились, паськöтiсö пельпоннэз, лэбтiсö мороссэз, синнэз югмисö. Но... эстöн шоччисикö шогмис курьёз.

Ашынас соседньöй населённöй пунктсянь, кöда сулалiс даскык километра ылынаын ны дынсянь, эз лок продукттэзöн обоз. Полк кольччис тшыг.

Полкись командир кошшис боеццезöс, кин добровольнöя мунас разведкаö, медбы тöдны, мый лоис обозкöт. Доброволеццезöн корсисö мунны куим боец. Ны коласын старшöйöн лоис сержант Разамбаев.»

Одзлань Лудов лыддьöтiс, кыдз отсалöмась деревняись отир куим боецлö асланыс висьтасьöмöн. Отир адззылöмась, кыдз немеццез мырддьöмась обозсö и кöдöрö сiйö кыскöмась.

Деревняын чожа адззисисö додь да вöв, и боеццез гöнитiсö продукттэзöн подводаэз сьöрö. Эз ештö гöнитны час мымда, синнэз одзын мыччисис обоз. Подводаэз сулалiсö, сэтöн жö вöлi немеццезлöн автомашина. Ны гöгöр бергалiсö и чеччалiсö, öвтiсö киэзнаныс и горöн чирзiсö немеццез. Нiя казялiсö ни миянлiсь боеццесö и мыйкö горöтлiсö нылань. «Мый керны?» — думайтiсö солдаттэз. Мигöн сувтöтiсö план. Враггез сизима, но кодöсь. Нiя — куимöн, вооруженнё — öтiк автомат и кык карабин. Только внезапность. Сöтiсö кузь шатьöн вöв кадж кузя, мымда вын лёкгоршöн рякöстiсö, лэдзисö автоматiсь кузь очередь и тöвчикöн сибöтчисö обоз дынö.

Подводаэзiсь вöввез повзисö и чепöссисö бокö, доддез пöрисö, немеццез усялiсö доддез бокö. Нурсултан горöтiс: «Хöндö хох, тойöсь завоевателлез!» Гитлеровеццез барöтöм синнэзöн видзöтiсö миян боеццез вылö и некыдз эз вежöртö, киннэз нiя и мыля тшöктöны лэбтыны киэз. Кöть ляс кодöсь, но пондiсö садясьны и вежöртны. Кутчисö винтовкаэз бердö. Но öтiк солдат, пессьöм сьöртi спортсмен, öтiк секундаöн пöрöтiс фашисттэсö коккез вывсиныс. Кольчöммесö блокируйтiсö казах да роч. Немеццезлiсь мырддисö оружие, обоз бергöтiсö. Машина вылö пуксис Нурсултан, сiя война вотöдз уджалöм шофёрöн, и иньдöтчисö полк дынö. Вайисö продуктаэз, неприятель машина вылын пизь, кöс йöв, консерваэз, вина, одеялоэз, эшö öтiкö-мöдiкö и пленнöйезöс.