Ирмос: На недви́жимом, Христе́, ка́мени за́поведей Твои́х утверди́ мое́ помышле́ние.
Помилуй мя, Боже, помилуй мя.
Небе́сным о́гненным дожде́м не́когда зе́млю содо́мскую Госпо́дь попали́л. Быт.19:24.
Помилуй мя, Боже, помилуй мя.
В го́рной стране́ спаса́йся, душе́, я́ко пра́ведный Ло́т, и соверши́ сво́й восхо́д в духо́вный Сиго́р. Быт.19:22-23.
Помилуй мя, Боже, помилуй мя.
Беги́, душе́, от страсте́й, беги от содо́мского воспламене́ния, беги́, да не истреби́т тя́ боже́ственный о́гнь.
Помилуй мя, Боже, помилуй мя.
Тебе́, Спа́се, испове́даюся: согреши́л, согреши́л Тебе́. Но от грехо́в изба́ви мя́ и, я́ко милосе́рдый, прости́ мя́.
Помилуй мя, Боже, помилуй мя.
Согреши́л аз пре́д Тобою́, Христе́, согреши́л па́че все́х ины́х, но не оста́ви мя́.
Помилуй мя, Боже, помилуй мя.
О Христе́, па́стырю до́брый, отыщи́ мя́, а́гнца, и не оста́ви мя, заблу́дшаго. Ин.10:11-14.
Помилуй мя, Боже, помилуй мя.
К Тебе́ стремлю́ся, Иису́се, и́бо Ты́ — Созда́тель мо́й и в Тебе́, Спа́се, мое́ оправда́ние.
Пресвятая Троице, Боже наш, слава Тебе.
О Тро́ице, Боже́ственное Еди́нство! Спаси́ нас от ле́сти бесо́вския и от все́х их нападе́ний, и от все́х бе́д.
Пресвятая Богородице, спаси нас.
Ра́дуйся, благо́е Вмести́лище Бо́жие, ра́дуйся, Престо́ле Госпо́день, ра́дуйся, Ма́ти Жи́зни на́шея!
Ирмос: Утверди́, Го́споди, на ка́мени за́поведей Твои́х, подви́гшееся се́рдце мое́, я́ко Еди́н Свя́т еси́ и Госпо́дь.
Помилуй мя, Боже, помилуй мя.
Исто́чник жи́зни обре́л аз в Тебе́, Спа́се, и́бо Ты́ — сме́рти Низло́житель! Посему́, пре́жде кончи́ны моея́ взыва́ю от всего́ се́рдца: согреши́л, поми́луй и спаси́ мя́.
Помилуй мя, Боже, помилуй мя.
Лю́дям, во времена́ Но́я блу́дно жи́вшим, а́з подража́л и сего́ ра́ди унасле́довал их жре́бий — в грехо́вный пото́к погруже́ние. Быт.6:1-17.
Помилуй мя, Боже, помилуй мя.
Согреши́л а́з, Го́споди, согреши́л пре́д Тобо́ю, поми́луй мя́, и́бо не́сть ина́го челове́ка, па́че мене́ согреши́вшаго.
Помилуй мя, Боже, помилуй мя.
Ха́му — отцепосрами́телю ты подража́ла еси́, душе́ моя́, и́бо ты не прикры́ла, но, оберну́вшись, безсты́дно зре́ла наготу́ бли́жняго твоего́. Быт.9:22-23.
Помилуй мя, Боже, помилуй мя.
Благослове́ния Си́ма ты не насле́довала, душе́ моя́ несча́стная, и не обрела́, подо́бно Иафе́ту, достоя́ния вели́каго в земле́ обетова́ния.
Помилуй мя, Боже, помилуй мя.
Уйди́, душе́ моя́, от греха́, я́ко из земли́ Харра́н, и поспеши́ в зе́млю, Авраа́мом унасле́дованную, непреста́нно жи́знь ве́чную источа́ющую. Быт.12:1-6.
Помилуй мя, Боже, помилуй мя.
Ты слы́шала, душе́ моя́, об Авраа́ме, оста́вившем зе́млю оте́ческую и стра́нником соде́лавшимся? Так подража́й же и ты́ его́ реши́мости! Быт.12:1-7.
Помилуй мя, Боже, помилуй мя.
У ду́ба Мамври́йскаго угости́вше А́нгелов, патриа́рх в ста́рости, сло́вно ю́ный ло́вчий, сниска́л себе́ в добы́чу исполне́ние Бо́жиих обетова́ний. Быт.18:1.
Помилуй мя, Боже, помилуй мя.
Ве́дающе об Иса́аке, таи́нственно принесе́нном в но́вую же́ртву всесожже́ния, подража́й и ты, несча́стная душе́ моя́, смире́нному изволе́нию пра́отца. Быт.22:2.
Помилуй мя, Боже, помилуй мя.
Ты слы́шала, душе́ моя́, об изгна́нии Исмаи́ла, рожде́нного от рабы́ни. Зри́ же, душе́, дабы́ и тебе́, в ра́бстве по́хотей су́щей, не испыта́ти такова́го униже́ния. Быт.21:10-11.
Помилуй мя, Боже, помилуй мя.
Рабо́ю своево́лия су́щи, ты родила́, душе́ моя́, де́рзость, сло́вно но́ваго Исмаи́ла, и уподо́билася дре́вней еги́птянке Ага́ри. Быт.16:16.
Помилуй мя, Боже, помилуй мя.
Ты ве́даеши, душе́ моя́, о ле́стнице Иа́кова, от земли́ к небеса́м восходя́щей. Почто́ же не соверши́ла ты восхожде́ния по тве́рдым ступе́ням благоче́стия? Быт.28:12.
Помилуй мя, Боже, помилуй мя.
Подража́й, душе́ моя́, Мелхиседе́ку, свяще́ннику Бо́жию и Царю́ уедине́нному — подо́бию жи́зни Христо́вой посреде́ люде́й. Быт.14:18. Евр.7:1-3.
Помилуй мя, Боже, помилуй мя.
Пока́йся и воспла́чи, душе́ несча́стная, пре́жде конца́ пра́здника жи́зни твоея́, пре́жде не́жели Госпо́дь навсегда́ закро́ет две́ри Черто́га Небе́снаго.
Помилуй мя, Боже, помилуй мя.
Не озира́йся, душе́ моя́, вспя́ть, дабы́ не соде́латися соляны́м столпо́м, но да устраши́т тя коне́ц содо́млян, но спаса́йся, восходя́ще в Вы́шний Сиго́р. Быт.19:19-23, 19:26.
Помилуй мя, Боже, помилуй мя.
Беги́, душе́ моя́, от воспламене́ния грехо́внаго, я́ко Ло́т, беги́ из Содо́ма и и́з Гоммо́ры, беги́ из пла́мени безу́мных страсте́й. Быт.19:15-17.
Помилуй мя, Боже, помилуй мя.
Поми́луй, поми́луй мя́, Го́споди, — взыва́ю Тебе́, — егда́ прии́деши со а́нгелами Твои́ми, дабы́ возда́ти все́м по дела́м и́х.
Помилуй мя, Боже, помилуй мя.
Не отри́ни, Влады́ко, моле́ний воспева́ющих Тя́, но бу́ди ми́лостив, Человеколю́бче, и пода́й проще́ние, прося́щим с ве́рою.
Преподобная мати Марие, моли Бога о нас.
О ма́ти! Бу́рными и су́етными во́лнами прегреше́ний плене́н аз, но ты сама́ мне спасти́ся помоги́ и ко приста́нищу боже́ственнаго покая́ния мя́ приведи́.
Преподобная мати Марие, моли Бога о нас.
О преподо́бная! Принеси́ усе́рдное моле́ние Богоро́дице и к Не́й моли́твами твои́ми, помоги́ найти́ мне в не́бо боже́ственные вхо́ды.
Преподобне отче Андрее, моли Бога о нас.
Твои́ми моли́твами испроси́ мне́, святи́телю Андре́е, оставле́ние грехо́в, и́бо ты вои́стину зна́еши та́йну покая́ния.
Слава: О Тро́ице несоста́вная и несотворе́нная, Естество́ безнача́льное, в Тро́ичности Ипоста́сей воспева́емая, спаси́ на́с, с ве́рою поклоня́ющихся держа́ве Твоея́.
И ныне: О ди́вное чу́до! Богоро́дица, от Отца́ предве́чно рожде́ннаго Сы́на, безму́жно родила́ еси́ и млеко́м, я́ко Ма́терь, пита́ла еси́, и де́вственное естество́ Свое́ сохрани́ла еси́.
Песнь 4
Ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слу́х Тво́й и убоя́хся; сла́ва си́ле Твое́й, Го́споди.
Помилуй мя, Боже, помилуй мя.
О Правосу́де! Творе́ние Твое́ не забу́ди и созда́ние Твое́ не оста́ви, хотя́ и согреши́л а́з, и бо́лее ины́х согреши́л. Ибо Ты́, все́х Госпо́дь, име́еши вла́сть проща́ти грехи́. Мф.9:6. Мк.2:10.
Помилуй мя, Боже, помилуй мя.
Бли́зится кончи́на, душе́, бли́зится, но ты не ду́маеши о се́м и не гото́вишися. Возста́ни, и́бо бли́з у двере́й Судия́ тво́й стои́т, и, я́ко со́н, вре́мя твое́ бежи́т и, я́ко цвет, житие́ оцвета́ет, почто́ же су́етно мяте́шися? Мф.24:33. Мк.13:29. Лк.21:31.
Помилуй мя, Боже, помилуй мя.
Пробуди́сь, душе́ моя́, и помы́сли о соде́янных тобо́ю дея́ниях, взгляни́ на ни́х и изле́й все́ ка́пли сле́з твои́х, и без боя́зни откро́й дела́ и помышле́ния Христу́, и пре́д Ни́м оправда́йся.
Помилуй мя, Боже, помилуй мя.
Не́сть в житии́ мое́м грехо́в и злы́х дея́ний, ко́ими аз, Спа́се, не согреши́л пре́д Тобо́ю, и́бо умо́м и сло́вом, и своево́лием, и наме́рениями, и мы́слями, и дела́ми аз бо́лее ины́х согреши́л.
Помилуй мя, Боже, помилуй мя.
Сего́ ра́ди и осужде́н, сего́ ра́ди и обвине́н а́з, окая́нный, обличи́тельницею неотсту́пною — со́вестию свое́ю. Но, о Судие́, Искупи́телю мо́й и Всеве́дче, пощади́, защити́ и спаси́ мя́, раба́ Твоего́.
Помилуй мя, Боже, помилуй мя.
Ле́стница, явле́нная в дре́вности вели́кому патриа́рху Иа́кову, указу́ет тебе́, душе́ моя́, на пу́ть восхожде́ния ступе́нями доброде́телей и богомы́слия. Посему́ достига́й доброде́телей и в му́дром созерца́нии обнови́сь. Быт.28:12.
Помилуй мя, Боже, помилуй мя.
Дневны́й зно́й и нощно́й хла́д терпе́л пра́отец Иа́ков, вседне́вно стада́ пася́ще и приумножа́юще, дабы́ и сво́й уде́л умно́жити, и сочета́тися дву́м жена́м. Быт.30:31, 30:40.
Помилуй мя, Боже, помилуй мя.
Сло́вно две́ жены́, предстоя́т тебе́, душе́ моя́, созида́ние — “Ли́я многоча́дная” и богопозна́ние — “Рахи́ль, трудо́м обрете́нная”. По́мни же, душе́: ни созида́ние, ни богопозна́ние без уси́лий и вели́ких трудо́в не приду́т к тебе́.
Помилуй мя, Боже, помилуй мя.
Бо́дрствуй, душе́ моя́, и крепи́ся, подо́бно дре́внему вели́кому патриа́рху, дабы́ стяжа́ти тебе́ и доброде́тели, и у́м созерца́ющий, дабы́ косну́тися и́м к недосту́пному Божестве́нному Мра́ку и обрести́ в Не́м вели́кое сокро́вище. Быт.32:28.
Помилуй мя, Боже, помилуй мя.
В двена́дцати нача́льниках коле́н, рожде́нных вели́ким патриа́рхом, да́н тебе́, душе́ моя́, о́браз ступе́ней духо́вныя ле́стницы доброде́телей, ко́и, подо́бно де́тям, прему́дро располо́жены для твоего́ по ни́м тве́рдаго возхожде́ния.
Помилуй мя, Боже, помилуй мя.
Иса́ву отве́рженному подража́юще, ты доброво́льно отдала́, душе́ моя́, обольсти́телю твою́ первозда́нную красоту́ и, оте́ческаго благословения лиши́вшися, впа́ла во грехо́вные дея́ния и по́мыслы. Посему́, сугу́бо несча́стная, ны́не пока́йся. Быт.25:32, 27:37. Мал.1:2-3.
Помилуй мя, Боже, помилуй мя.
Иса́в, непреста́нно разжига́емый неи́стовой женопохотли́востию и сладостра́стием оскверня́емый, не́когда про́зван был «Эдо́мом», что́ зна́чит «Душа́, сожже́нная грехолю́бием». Быт.25:33.
Помилуй мя, Боже, помилуй мя.
Об Иове, на гно́ище наво́зном сидя́щем и Бо́гом спасе́нном, ты слы́шала, душе́ моя́, но не после́довала его́ му́жеству и не стя́жала его́ тве́рдыя во́ли, и яви́ла свою́ кра́йнюю невозде́ржанность и малоду́шие, не противоста́вше искуше́ниям ра́зума, зре́ния и чу́вства. Иов.1:1-22.
Помилуй мя, Боже, помилуй мя.
Иов почте́нный, наги́м на гно́ище гни́л, детьми́ бога́тый и сла́вный, внеза́пно ста́л безде́тным и бездо́мным. Но гно́ище именова́л он ца́рским черто́гом и стру́пы те́ла своего́ — драгоце́нными каме́ниями. Иов.2:1-13.
Помилуй мя, Боже, помилуй мя.
Иов, почте́нный пра́ведник, вели́чественно в багряни́цу облача́емый, стада́ми и бога́тством преиспо́лненный, внеза́пно обнища́л, лиши́вшись и вели́чия, и бога́тства, и сла́вы.
Помилуй мя, Боже, помилуй мя.
Иов бо́лее ины́х бы́л пра́веден и непоро́чен, но и се́й не избежа́л кова́рных сете́й лука́ваго. Ты́ же, грехолюби́вая и бе́дная душе́, что́ сотвори́ши, егда́ на пути́ твое́м возста́нет внеза́пное бе́дствие?
Помилуй мя, Боже, помилуй мя.
Те́ло мое́ оскверни́л, ду́х омрачи́л и ве́сь аз стру́пьями грехо́в покры́л себе́, Христе́! Но Ты́, я́ко вра́ч, исцели́ мое́ те́ло и ду́х, покая́нием омы́й и очи́сти мя́, да ста́ну а́з, Спа́се мо́й, беле́е сне́га.
Помилуй мя, Боже, помилуй мя.
О Сло́ве! Распина́ющеся, Ты́ те́ло и кро́вь Твои́ отда́л за все́х! Те́ло, дабы́ мя́ возроди́ти, Кро́вь, дабы́ омы́ти мя, и Ду́х Тво́й отда́л Ты́, Христе́, дабы́ привести́ мя́ ко Отцу́ Твоему́.
Помилуй мя, Боже, помилуй мя.
О ми́лостивый Спа́се! Ты посреде́ мно́жества люде́й, во́ Иерусали́ме, распя́тие во́льное претерпе́л еси́ на дре́ве, спасе́ние на́м соверша́ющи. Посему́ ны́не Эде́м затворе́нный откры́ся и поклоня́ются Тебе́ го́рняя и до́льняя тва́рь, и все́ спасе́нные Тобо́ю наро́ды. Пс.73:12.
Помилуй мя, Боже, помилуй мя.
О Спа́се! Да́ бу́дет мне́ Кро́вь из ре́бр Твои́х исто́чником проще́ния грехо́в и водо́ю в купе́ли обновле́ния. О Сло́ве, да убелю́ся, сло́вно ма́зию, и да утолю́ а́з жа́жду, сло́вно питие́м, глаго́лами Твои́ми, жи́знь ве́чную источа́ющими. Ин.19:34.
Помилуй мя, Боже, помилуй мя.
Изгна́н а́з из бра́чнаго черто́га, лише́н весе́лия и вече́ри! Свети́льник мо́й уга́с бе́з еле́я, бра́чный черто́г затвори́лся, сне́дь истощи́лася, и мне́, изве́рженному и усну́вшему, связа́ли ру́ки и но́ги гре́хи мои́. Мф.25:1-13. Лк.12:35-37, 24-27, 14:8-24.
Помилуй мя, Боже, помилуй мя.
Живоно́сные ре́бра Твои́, Спа́се на́ш, ста́ли ча́шею для Це́ркви, из ко́ей излива́ется на́м двуеди́ный пото́к Ве́тхаго и Но́ваго Заве́тов, — пото́к проо́бразов оставле́ния грехо́в и прему́дрости.
Помилуй мя, Боже, помилуй мя.
Высокоме́рным в се́рдце бы́л а́з и понапра́сну де́рзким. Ты же, Единоми́лостивый и Правосу́дный, не осуди́ мя́, яко лицеме́рнаго фарисе́я, но да́руй мне смире́ние мытаре́во и к нему́ мя причти́.
Помилуй мя, Боже, помилуй мя.
Кра́тко есть испо́лненное боле́знями и лука́выми ухищре́ниями вре́мя жития́ моего́. Но, о Спа́се, ка́ющагося мя приими́ и к позна́нию и́стины приведи́, и, дабы́ не ста́ти мне добы́чею в пи́щу врагу́, Ты Са́м поми́луй мя́. Быт.49:9. 1 Пет.5:8.
Помилуй мя, Боже, помилуй мя.
О Ми́лостиве! Ве́даю, я́ко согреше́ньми мои́ми сокруши́л аз сосу́д пло́ти моея́. Но, о Спа́се, ка́ющагося мя приими́ и к позна́нию и́стины приведи́, и, дабы́ не ста́ти мне добы́чею в пи́щу врагу́, Ты Сам помилуй мя.
Помилуй мя, Боже, помилуй мя.
О Ми́лостиве! Поклони́лся аз и́долу страсте́й мои́х, ду́шу оскверня́юще. Но, о Спа́се, ка́ющагося мя приими́ и к позна́нию и́стины приведи́, и, дабы́ не ста́ти мне́ добы́чею в пи́щу врагу́, Ты Са́м поми́луй мя́.
Помилуй мя, Боже, помилуй мя.
Не послу́шал а́з гла́са Твоего́, Законополо́жниче, преступи́вше Писа́ние Твое́. Но, о Спа́се, ка́ющагося мя́ приими́ и к позна́нию и́стины приведи́, и, дабы́ не ста́ти мне́ добы́чею в пи́щу врагу́, Ты Са́м, поми́луй мя́.
Преподобная мати Марие, моли Бога о нас.
В те́ле живу́ще, я́ко беспло́тная, ты, преподо́бная, вели́кий и вои́стину благода́тный да́р предста́тельства пре́д Бо́гом прия́ла еси́ об и́скренне чту́щих тя́. Сего́ ра́ди мо́лим тя́: от все́х собла́знов изба́ви на́с, моли́твами твои́ми.
Преподобная мати Марие, моли Бога о нас.
В пучи́ну посты́дных поро́ков погружена́ была́ ты, Мари́е, но не поглоти́ла тя бе́здна грехо́вная, и́бо помышле́ниями о любви́ и по́двигом сла́вным, ты вознесла́ся к Любви́ Превы́сшей, пои́стине изуми́вше си́м а́нгельское естество́.
Преподобне отче Андрее, моли Бога о нас.
О всеблаже́нный Андре́е, похвала́ отце́в! Ны́не, предстоя́ще боже́ственней Тро́ице, непреста́нными моли́твами твои́ми помога́й изба́витися от все́х скорбе́й, призыва́ющим тя с любо́вию, и́бо ты еси́ всехва́льный святи́тель Бо́жий и Кри́та сла́вное достоя́ние.
Слава: О Еди́ное, Существо́м неразде́льное и неслия́нное в Лице́х Божество́ — Свята́я Тро́ица соца́рственная и сопресто́льная! Тебя́ прославля́ю и Тебе́ воспева́ю пе́снь вели́чественную, в Ми́ре Го́рнем трикра́тно а́нгелами воспева́емую. Ис.6:1-3.
И ныне: О Богоро́дице, Ты непоро́чно родила́ еси́ и в де́вственности непреста́нно пребыла́ еси́! Рожде́нный Тобо́ю творе́ния обновля́ет естество́ и посему́ рожда́ет де́вственное чре́во. Ибо, что́ пожела́ет Бо́г, та́м покоря́ются зако́ны естества́, и си́лен Он твори́ти то́, что́ соизво́лит.
Песнь 5
Ирмос: От но́щи у́тренююща, Человеколю́бче, просвети́, молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́. Пс.62:2, 118:45.
Помилуй мя, Боже, помилуй мя.
Посреде́ но́щи прошло́ мое́ житие́, и́бо мра́к греха́ оку́тал мя́ тьмо́ю непроходи́мою. Но, о Спа́се мо́й, сы́ном ве́чнаго дня́ соде́лай мя́. Еф.5:8.
Помилуй мя, Боже, помилуй мя.
Руви́му сле́дующе, сотвори́л а́з, окая́нный, преступле́ние пре́д Вы́шним Бо́гом, и́бо оскверни́л ло́же мое́, я́ко и Руви́м, ло́же отца́ своего́. Быт.35:22, 49:3-4.
Помилуй мя, Боже, помилуй мя.
Испове́дуюся Тебе́, Христе́ Царю́: согреши́л, согреши́л а́з, подо́бно бра́тьям Ио́сифа, и́бо про́дал греху́ сво́й пло́д чистоты́ и целому́дрия. Быт.37:28.
Помилуй мя, Боже, помилуй мя.
В проо́браз Госпо́день свя́зан бы́л сро́дниками прекра́сный Ио́сиф и о́н, Бо́гом возлю́бленный, про́дан бы́л в нево́лю. Ты́ же, душе́, сама́ себе́ продала́ в грехо́вное ра́бство.
Помилуй мя, Боже, помилуй мя.
О несча́стная, неразу́мная душе́! Подража́й му́дрости пра́веднаго и целому́дреннаго Ио́сифа и не оскверня́йся безу́мными жела́ниями, непреста́нно беззако́нствующе.
Помилуй мя, Боже, помилуй мя.
В ро́ве не́когда пребыва́л Ио́сиф в подо́бие Твоего́ погребе́ния и воскресе́ния, Влады́ко Го́споди! Аз же принесу́ ли Тебе́ в да́р мое́ боже́ственное подо́бие?
Помилуй мя, Боже, помилуй мя.
Ты слы́шала, душе́, о ба́бках повива́льных, ко́их не смогли́ пону́дити истреби́ти неви́нныя плоды́ — младе́нцев му́жеского ро́да. Ты же, о душе́, тво́й пло́д неви́нности и чистоты́ сама́ сгуби́ла. Исх.1:15-17.
Помилуй мя, Боже, помилуй мя.
Ты слы́шала, душе́, и о ковче́ге, волна́ми во́д реки́ носи́мом, в ко́ем, я́ко в черто́ге ца́рском пребыва́юще, во дре́вности бегле́ц бежа́л от зла́го умышле́ния фарао́на. Ты́ же, душе́, дабы́ спасти́ся, подо́бно вели́кому Моисе́ю, ны́не напита́йся млеко́м Прему́дрости. Исх.1:15-22, 1:22, 2:3.
Помилуй мя, Боже, помилуй мя.
Ты́, о несча́стная душе́, после́довавше вели́кому Моисе́ю, срази́вшему еги́петского стра́жа в главу́, могла́ бы на́смерть порази́ть Тво́й похотли́вый ра́зум, но ты ли́шь слегка́ встрево́жила его́. Тогда́ пове́дай, возмо́жно ли тебе́ без покая́ния дости́чь безстра́стия, да́же живу́щи в пусты́не? Исх.2:11-12.
Помилуй мя, Боже, помилуй мя.
В пусты́ню удали́лся вели́кий Моисе́й. Иди́ и ты́ туда́, душе́, подража́юще жи́зни его́, дабы́ во пла́мени купины́ и тебе́ уви́дети Богоя́вление. Исх.3:2-3.
Помилуй мя, Боже, помилуй мя.
Про же́зл Моисе́ев воспомяни́, душе́, ко́им он мо́ре раздели́л откры́л его́ глубину́ начерта́нием о́браза Креста́ боже́ственнаго, по́мощию ко́его и ты, душе́, возмо́жеши соверши́ти вели́кия духо́вныя по́двиги. Исх.14:21-22.
Помилуй мя, Боже, помилуй мя.
Ааро́н прине́с Бо́гу чи́стый и непоро́чный о́гнь алта́рный, Офни́ же и Финее́с, подо́бно тебе́, душе́, принесли́ чу́ждое Бо́гу скве́рное житие́. 1 Цар.2:12-13.
Помилуй мя, Боже, помилуй мя.
Нра́вом свои́м и погря́зшим умо́м а́з уподо́бился жесто́кому и зло́бному фарао́ну, душе́ю же и те́лом — чароде́ям Иа́ннию и Иа́мврию. Но Ты́, Влады́ко, помоги́ мне́. Исх.7:11. 2 Тим.3:8.
Помилуй мя, Боже, помилуй мя.
Скве́рной изгрязни́л а́з, окая́нный, у́м мо́й, но молю́ Тя́, Влады́ко, омы́й мя́ в купе́ли сле́з мои́х и соде́лай бе́лою, я́ко сне́г, оде́жду пло́ти моея́.
Помилуй мя, Боже, помилуй мя.
Егда́ ста́ну размышля́ти о дела́х мои́х, Спа́се, тогда́ ви́жу себе́ вели́ким гре́шником, и́бо согреши́л по ве́дению, но не по неве́дению.
Помилуй мя, Боже, помилуй мя.
Пощади́, Го́споди, пощади́ творе́ние Твое́, согреши́л, но изба́ви мя от грехо́в мои́х, и́бо то́лько Ты еди́н свя́т по естеству́ и, кро́ме Тебе́, все́ не чу́жды греха́.
Помилуй мя, Боже, помилуй мя.
Ты, Спа́се, и́стинный Бо́г, но мене́ ра́ди восприя́л о́браз мо́й, чудеса́ соверши́л, прокаже́нных исцели́л, рассла́бленных возста́вил и жену́, косну́вшуюся ри́з Твои́х, кровотече́ния изба́вил. Мф.9:20. Мк.5:25-27. Лк.8:43-44.
Помилуй мя, Боже, помилуй мя.
Кровоточи́вой жене́ подража́й, несча́стная душе́, прибеги́ и удержи́ кра́й ри́зы Христо́вой, дабы́ избавитися Тебе́ от ра́н и услы́шати от Него́: «Ве́ра твоя́ спасла́ тя́».
Помилуй мя, Боже, помилуй мя.
Согбе́нной жене́-кале́ке подража́й, душе́ моя́, прииди́ и припади́ к нога́м Иису́совым, да возста́вит тя́, дабы́ ходи́ти тебе́ пря́мо стезя́ми Госпо́дними. Лк.13:11-13.
Помилуй мя, Боже, помилуй мя.
Ты, Влады́ко, глубо́кий Кла́дязь еси́, из Ко́его струи́ жи́зни ве́чныя источа́ются! Изле́й же мне́ воды́ из пречи́стых ре́бр Твои́х, да и а́з, я́ко самаря́нка, испи́вше, не возжа́жду вно́вь. Ин.4:11-15.
Помилуй мя, Боже, помилуй мя.
Влады́ко, Го́споди, да́ бу́дут сле́зы мои́ подо́бны во́дам Силоа́ма, в ко́их умы́ю аз о́чи се́рдца моего́, дабы́ зре́ти Тя́, Све́те Незаходи́мый. Ин.9:7.
Преподобная мати Марие, моли Бога о нас.
О всеблаже́нная Мари́е! Ты́, любо́вию влеко́мая неодоли́мою к поклоне́нию Дре́ву Жи́зни, сподо́билась узре́ти жела́емое. Помоги́ же и мне́ уви́дети Превы́сшую Сла́ву — Христа́!
Преподобная мати Марие, моли Бога о нас.
О преподо́бная, ты́ за пото́ком Иорда́нским обрела́ поко́й безпеча́льный, от су́етных жела́ний удали́вшеся, ко́их и на́с изба́ви моли́твами твои́ми.
Преподобне отче Андрее, моли Бога о нас!
О Андре́е прему́дрый и па́стырю преди́вный! Тебя́, избра́ннаго Бо́гом, в любви́ вели́кой и со стра́хом молю́, дабы́ моли́твами твои́ми спасе́ние насле́довать и жи́знь ве́чную.
Слава: Тебя́, Еди́наго Бо́га сла́вим: Свя́т, Свя́т, Свя́т Оте́ц и Сы́н, и Ду́х, несоста́вная проста́я еди́ная Су́щность, Тро́ица, Ко́ей все́ поклоня́ются!
И ныне: О целому́дренная и непозна́вшая му́жа Ма́терь-Де́во! Из Тебе́ Бо́г, времена́ сотвори́вший, обле́кся в мою́ пло́ть, соедини́вше с Собо́ю челове́ческое естество́.
Песнь 6
Ирмос: Возопи́х все́м се́рдцем мои́м к ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.
Помилуй мя, Боже, помилуй мя.
О Спа́се! Тебе́ приношу́ сле́зы оче́й мои́х и воздыха́ние из глубины́ души́, все́м се́рдцем взыва́юще: Бо́же, согреши́л пре́д Тобо́ю, очи́сти мя́.
Помилуй мя, Боже, помилуй мя.
Яко Дафа́н и Авиро́н уклони́лася еси́ ты, душе́ моя́, от Го́спода твоего́. Но, дабы́ не поглоти́ла тя про́пасть земна́я, воззови́ к Нему́, я́ко из а́да преиспо́дняго, поми́луй мя́. Чис.16:32.
Помилуй мя, Боже, помилуй мя.
Свирепе́юще от страсте́й, я́ко бу́йная тели́ца, ты, душе́ моя́, уподо́билася непоко́рному коле́ну Ефре́мову. Но, возвыша́юще у́м моли́твою и Бо́га созерца́нием, ты спасе́ши жи́знь твою́ от грехо́в, я́ко се́рна от та́йных сете́й. Иер.31:18. Ос.10:11.
Помилуй мя, Боже, помилуй мя.
Рука́ Моисе́я, от прока́зы исцеле́нная, да уве́рит тя́, душе́, я́ко Бо́гу возмо́жно и твое́ прокаже́нное житие́ убели́ти и очи́стити. Посему́, не преда́йся отча́янию, да́же и бу́дучи больна́ прока́зою греха́. Исх.4:6-7.
Помилуй мя, Боже, помилуй мя.
Во́лны прегреше́ний мои́х, Спа́се, возврати́вшися, внеза́пно покры́ли мя́, я́ко в мо́ре Чермне́м потопи́ли они́ еги́птян со вса́дниками колесни́ц и́х. Исх.14:26-28, 15:4-5.
Помилуй мя, Боже, помилуй мя.
Неразу́мное жела́ние овладе́ло тобо́ю, душе́, я́ко и дре́вним Изра́илем, и́бо Боже́ственней Ма́нне ты́ предпочла́ безу́мное пресыще́ние сластьми́ грехо́вных страсте́й. Чис.21:5.
Помилуй мя, Боже, помилуй мя.
Му́тные кла́дязи с ханаа́нскими развра́тными мы́слями ты предпочла́, душе́ моя́, чи́стому исто́чнику из Ка́мня, излива́ющему, сло́вно из ча́ши, пото́ки богосло́вия. Быт.21:25. Исх.17:6.
Помилуй мя, Боже, помилуй мя.
Свино́е мя́со и котлы́ с изы́сканной пи́щей ты, душе́ моя́, предпочла́ Пи́ще Небе́сной, подо́бно неразу́мным лю́дем в пусты́не. Исх.16:3.
Помилуй мя, Боже, помилуй мя.
О Спа́се, от уда́ра же́зла раба́ Твоего́ Моисе́я из ка́мня истекла́ вода́ во о́браз животворя́щих ре́бр Твои́х, из ко́их мы питие́ жи́зни почерпа́ем.
Помилуй мя, Боже, помилуй мя.
Яко Иису́с Нави́н, обозри́ и изсле́дуй, душе́ моя́, обе́щанную тебе́ но́вую зе́млю и, по за́поведи благо́й, та́м посели́сь.
Помилуй мя, Боже, помилуй мя.
Возста́ни, душе́ моя́, и низложи́ плотски́е стра́сти и по́мыслы лука́вые, подо́бно Иису́су Нави́ну, порази́вшему Амали́ка и гаваонитя́н. Исх.17:8. Нав.8:21.
Помилуй мя, Боже, помилуй мя.
Яко не́когда ковче́г скво́зь Иорда́н, та́ко и ты́, душе́ моя́, прейди́ волни́тельный пото́к вре́менныя жи́зни, дабы́ и тебе́ насле́довати но́вую зе́млю, Бо́гом обе́щанную. Нав.3:17.
Помилуй мя, Боже, помилуй мя.
О Спа́се, Петра́ утопа́ющаго и возопи́вшего «спаси́» изба́вивший! Ты́ и мене́ спаси́ от страсте́й, я́ко из па́сти свире́паго зве́ря и, подаю́ще ру́ку Твою́, из глубины́ грехо́в возведи́ мя́. Мф.14:31.
Помилуй мя, Боже, помилуй мя.
О Спа́се мой, Го́споди! Ты — При́стань ти́хая! Поспеши́ же, Влады́ко Христе́, из мра́чных глуби́н греха́ и отча́яния возвести́ мя́ и сокры́ти в Себе́.
Помилуй мя, Боже, помилуй мя.
О Спа́се! Аз е́смь Твоя́ давно́ пропа́вшая во тьме́ моне́та со сте́ршимся Твои́м ца́рственным Ли́ком. О Сло́ве! Преднеся́ свети́льник, Ты Са́м отыщи́ мя, я́ко Предте́чу в пусты́не, и Себе́ возьми́.
Преподобная мати Марие, моли Бога о нас.
Ты, Мари́е, в душе́ любо́вию к Бо́гу пыла́ла еси́ и непреста́нно пото́ки сле́з пролива́ла еси́, пла́мень страсте́й угаша́юще. Сей пла́ча да́р пода́й и мне́, рабу́ твоему́.
Преподобная мати Марие, моли Бога о нас.
О мати! Небе́сное безстра́стие ты стяжа́ла небоподо́бным житие́м твои́м. О Мари́е! И мы́, тебя́ воспева́ющие, да убежи́м от страсте́й, моли́твами твои́ми.
Преподобне отче Андрее, моли Бога о нас.
О Андре́е, па́стырю и святи́телю Кри́тский и, ве́рую, вселе́нский моли́твенник! К тебе́ взыва́ю: изба́ви мя, о́тче, из глубины́ грехо́в.
Слава: Та́ко возгла́шает на́м Оте́ц, Сы́н и Боже́ственный Ду́х: Аз е́смь Тро́ица несоста́вная — проста́я, неразде́льная, в Ли́цах неслия́нная, Аз е́смь Еди́нство, естество́м соедине́нное.
И ныне: О Богоро́дице, из не́др Твои́х Ты Бо́га родила́, восприя́вшаго на́ш о́браз. Его́ же моли́, я́ко все́х Творца́, да моли́твами Твои́ми оправда́емся.
Го́споди, поми́луй (трижды).
Сла́ва Отцу́ и Сы́ну и Свято́му Ду́ху.
И ны́не, и при́сно, и во ве́ки веко́в. Ами́нь.
Кондак, глас 6
Душе́, душе́ моя́! Возста́ни, что спи́ши? Коне́ц приближа́ется и тебе́ ли не встрево́житься? Воспряни́ ны́не, да пощади́т тя Христо́с Бо́г, Ко́ий повсю́ду есть и ми́р Собо́ю наполня́ет.
Икос, глас 6
Ви́дяще явле́нное Христо́м врачева́ние и Ада́му возвраще́нное здра́вие, уязви́ся си́м диа́вол. Страда́юще же и бе́дствующе, рыда́л и к друзья́м свои́м взыва́л: «Безси́лен а́з уже́ напа́костить Марии́ Сы́ну: побежда́ет бо меня́ Вифлее́млянин, — Бо́г, Ко́ий повсю́ду есть и ми́р Собо́ю наполня́ет».
Песнь 7
Ирмос: Согреши́хом, беззако́нновахом, непра́вдовахом пред Тобо́ю, ниже́ соблюдо́хом, ниже́ сотвори́хом, я́коже запове́дал еси́ на́м; но не преда́ждь нас до конца́, отце́в Бо́же. Дан.9:5-6.
Помилуй мя, Боже, помилуй мя.
С рожде́ния перворо́дный гре́х унасле́довавше и за́поведь Твою́ отве́ргнувше, согреша́л аз и безчи́нствовал, прибавля́юще но́вые я́звы ко ста́рым ра́нам мои́м. Но Ты, милосе́рдный Бо́же на́ших отцо́в, Са́м поми́луй мя́.
Помилуй мя, Боже, помилуй мя.
Та́йны се́рдца моего́ откры́л аз Тебе́, Судии́ моему́. Воззри́ на смире́ние мое́, воззри́ на ско́рбь мою́, внемли́ ны́не покая́нию моему́ и Ты́, милосе́рдный Бо́же на́ших отцо́в, Са́м поми́луй мя́. Пс.37:19, 24:18, 34:23.
Помилуй мя, Боже, помилуй мя.
Са́ул усе́рдно иска́л уте́рянных осли́ц отца́ своего́, но то́тчас бро́сил их, егда́ пришла́ ве́сть о вступле́нии ему́ на ца́рство. Внемли́ же ты сему́, душе́, и преста́ни иска́ть стада́ страсте́й, ра́ди Ца́рствия Христо́ва. 1 Цар.9:1-27, 10:1.
Помилуй мя, Боже, помилуй мя.
Дави́д пра́отцем бы́л, но и он не́когда тя́жко согреши́л, и́бо ра́нен бы́л стрело́ю прелюбодея́ния и сраже́н копие́м у́мысла та́йного уби́йства. Но ты́, душе́, поражена́ бо́льшими неду́гами и ра́нами от мно́жества стре́л та́йных твои́х дел и жела́ний. 2 Цар.11:14-15.
Помилуй мя, Боже, помилуй мя.
Дави́д пои́стине соверши́л два́ беззако́ния, и́бо к уби́йству присоедини́л прелюбодея́ние, одна́ко, не ме́для прине́с и и́скреннее покая́ние. Ты́ же, душе́, соверши́вше ужа́снейшие грехи́, не ка́ешися пре́д Бо́гом.
Помилуй мя, Боже, помилуй мя.
Дави́д, сло́вно живопи́сец, начерта́л не́когда пе́снь, во обличе́ние соверше́нных и́м злодея́ний, взыва́юще: «Поми́луй мя́, и́бо пре́д Тобо́ю, Еди́ным Бо́гом все́х, согреши́л и Ты́ Са́м мя́ очи́сти». Пс.50.
Помилуй мя, Боже, помилуй мя.
Ковче́г Госпо́день везо́м бы́л не́когда на колесни́це и, егда́ теле́ц сверну́л с пути́ прямо́го, то Оза не́кий, посме́л то́кмо поддержа́ти святы́ню и за сие́ внеза́пно испыта́л гне́в Бо́жий. Ты́ же, душе́, де́рзости Озы избега́юще, всегда́ почита́й святы́ни Бо́жии благогове́йно. 2 Цар.6:6-7.
Помилуй мя, Боже, помилуй мя.
Ты слы́шала, душе́ моя́, о злодея́ниях Авессало́ма, ко́ими он своего́ отца́ уни́зил, обесче́стивше ло́же его́. Но ты́, душе́, предпочла́ сле́довати его́ злы́м дея́ниям и стра́стной сластолюби́вой по́хоти. 2 Цар.15:1-37, 16:21.
Помилуй мя, Боже, помилуй мя.
Свобо́ду твою́ ты отдала́, душе́, в ра́бство стра́стному те́лу, и, внима́юще его сове́там, соде́лалася самоуби́йцею, подо́бно Ахитофе́лу. Но, о душе́! Христу́ возмо́жно разсе́яти в пра́х все́ кова́рные сове́ты пло́ти для твоего́ спасе́ния. 2 Цар.16:20-21.
Помилуй мя, Боже, помилуй мя.
Ди́вный Соломо́н испо́лнен бы́л прему́дрости, но сотвори́л не́когда гре́х пре́д Бо́гом, отступи́вше от Него́. И ты́, о душе́, в се́м уподо́билася ему́, веду́ще жи́знь, досто́йную отверже́ния. 3 Цар.3:12, 11:4-6.
Помилуй мя, Боже, помилуй мя.
Ди́вный Соломо́н да́ром му́дрости испо́лнен бы́л, но́ Бо́га забы́вше, страстьми́ влеко́мый оскверни́лся распу́тством с жена́ми. Но́ и ты́, душе́, во уме́ твое́м та́кже твори́ла дея́ния посты́днаго сладостра́стия. 3 Цар.11:6-8.
Помилуй мя, Боже, помилуй мя.
Ровоа́му, презре́вшему сове́тников отца́ своего́, и Иеровоа́му, зло́му рабу́ и мяте́жнику дре́внему, ты подража́ла, душе́ моя́. Но и́х отве́ргнув, ты к Бо́гу воззови́: согреши́ла, поми́луй мя́. 3 Цар.12:13-14, 12:20.
Помилуй мя, Боже, помилуй мя.
Увы́, мне́, душе́ моя́, ты подража́ла Аха́ву в язы́ческих ме́рзостех, соде́лавшися вмести́лищем плотски́х скве́рн и сосу́дом посты́дных страсте́й. Но о душе́, воздохну́в из се́рдца твоего́, испове́дай Бо́гу грехи́ твои́. 3 Цар.16:30.
Помилуй мя, Боже, помилуй мя.
Огне́м с небе́с сто́ во́инов попали́л не́когда Илия́, и Иезаве́ли нечести́вой лжепроро́ков истреби́л, Аха́ва вразумля́юще. Ты́ же, о душе́, дабы́ спасти́ся, беги́ от идолове́рия и крепи́ся во и́стине. 4 Цар.1:10-15.
Помилуй мя, Боже, помилуй мя.
Не́бо закры́лось тебе́, о душе́, и гла́д духо́вный насти́г тя, сло́вно Аха́ва, презре́вшего сло́во Илии́ Фесфитя́нина. Но, я́ко саре́птская вдова́, ду́шу проро́ческую и ты возра́дуй твои́м Бо́гу послуша́нием. 3 Цар.17:8-9.
Помилуй мя, Боже, помилуй мя.
Ты́, душе́ моя́, я́ко Манасси́я, доброво́льно собрала́ стра́сти и сотвори́ла из ни́х ме́рзких и́долов, умножа́юще гне́в Бо́жий. Но, тогда́ после́дуй, душе́, и смире́нному покая́нию Манасси́и, и источи́ его́ сле́зы умиле́ния. 4 Цар.21:1-2.
Помилуй мя, Боже, помилуй мя.
Припа́дающе, несу́ Тебе́, Влады́ко, глаго́лы сия́ со слеза́ми: а́з бо́лее блудни́цы согреши́л и беззако́нствовал, я́ко никто́ ины́й на земле́. Но поми́луй творе́ние Твое́, Влады́ко, и вно́вь возста́ви мя́.
Помилуй мя, Боже, помилуй мя.
Поме́рк во мне о́браз Тво́й и увя́ла его́ красота́, и от бу́ри страсте́й мои́х уга́сла жи́зни мое́я свеща́, и́бо пренебре́г аз за́поведи Твои́. Но́, о Спа́се мо́й, по ми́лости Твое́й, пода́й мне́ ра́дость, о ко́ей пое́т Дави́д. Пс.50:14.
Помилуй мя, Боже, помилуй мя.
Обрати́ся, пока́йся, душе́ моя́, откро́й сокрове́нное всеве́дующему Бо́гу и возгласи́: о мо́й Спа́се еди́ный! Ты зна́ешь все́ та́йны мои́, Ты́ Са́м поми́луй мя́ по Твое́й ми́лости, о ко́ей пое́т Дави́д. Пс.50:3.
Помилуй мя, Боже, помилуй мя.
Исче́зли дни́ жи́зни моея́, я́ко у́тренний со́н возстаю́щаго, посему́, я́ко Езеки́я, пла́чу на ло́же мое́м, да продля́тся ле́та жития́ моего́. Но, о душе́, исцели́т ли тя́ како́й «Иса́ия», а́ще сего́ не восхо́щет на́д все́ми Бо́г? 4 Цар.20:3. Ис.38:2-6.
Преподобная мати Марие, моли Бога о нас.
Воззва́вше ко Пречи́стой Богома́тери, ты́, преподо́бная, пре́жде всего́, обузда́ла бу́рю страсте́й, свире́по тя терза́ющих и си́м посрами́ла врага́ льсти́ваго. Пода́й мне́ ны́не, рабу́ твоему́, по́мощь в скорбя́х. Пс.59:13.
Преподобная мати Марие, моли Бога о нас.
О преподо́бная! Христа́, Ко́его ты возлюби́ла и усе́рдно жела́ла, Ко́его ра́ди пло́ть изнуря́ла, — Того́ моли́ о раба́х твои́х, да поми́лует на́с, и ми́р пода́ст, тебя́ почита́ющим.
Преподобие отче Андрее, моли Бога о нас.
На Ка́мени ве́ры утверди́ меня́, о́тче, страх Бо́жий внуша́юще, и твои́ми моли́твами в покая́нии мя́ наставля́юще, да изба́влюся аз, Андре́е, от вра́жьих сете́й, мне угото́ванных.
Слава: Воспева́емая на́ми Тро́ица е́сть несоста́вная — проста́я, неразде́льная, Единосу́щная, естество́м Еди́ная. Она́ е́сть Три́ Све́та и Еди́ный Све́т, Трисвята́я и Единосвята́я. Сего́ ра́ди воспо́й, душе́ моя́, Тро́ицу — Бо́га все́х, яко Еди́ную Жи́знь и, вме́сте, Троежи́зненную.
И ныне: Воспева́ем Тя́, благословля́ем и поклоня́емся Тебе́, Богороди́тельнице, и́бо Еди́наго от Неразде́льныя Тро́ицы родила́ еси́ — Христа́ Бо́га на́шего, и живу́щим на земле́ яви́ла Небе́сное.
Песнь 8
Ирмос: Его́же во́инства небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те и превозноси́те во вся́ ве́ки.
Помилуй мя, Боже, помилуй мя.
Поми́луй мя́, гре́шнаго, Спа́се, и у́м напра́ви ко исправле́нию, и приими́, мя, ка́ющагося, и ми́лостиво гла́су моему́ вонми́: согреши́л пред Тобо́ю, беззако́ние сотвори́л, но спаси́ и поми́луй мя́.
Помилуй мя, Боже, помилуй мя.
Не́когда Илия́-возни́ца за доброде́тельное житие́ на колесни́це возне́сся от земли́ превы́ше небе́с. Но, о душе́, и ты помышля́й о таково́м восхожде́нии. 4 Цар.2:11.
Помилуй мя, Боже, помилуй мя.
Не́когда Елисе́й прия́л ма́нтию Илии́ и с не́ю вели́кую благода́ть от Го́спода. Но ты́, душе́, не сподо́билась да́ра се́го за твою́ неуме́ренность. 4 Цар.2:9, 2:12-13.
Помилуй мя, Боже, помилуй мя.
Не́когда Елисе́й ма́нтиею Илии́ раздели́л попола́м тече́ние Иорда́на. Но ты́, душе́ моя́, не обрела́ да́ра отсече́ния грехо́в за твою́ неуме́ренность. 4 Цар.2:14.
Помилуй мя, Боже, помилуй мя.
Не́когда до́брая сонамитя́нка угости́ла пра́веднаго Елисе́я. Но ты́, душе́, не ввела́ в до́м тво́й ни стра́нника, ни прише́льца, посему́ сама́ возрыда́ешь, егда́ изве́ргнута бу́деши из Бра́чнаго Черто́га. 4 Цар.4:8.
Помилуй мя, Боже, помилуй мя.
О нераска́янная душе́! Ты непреста́нно подража́ла скупо́му нра́ву Гиези́еву. Но, а́ще и в ста́рости, сребролю́бие его́ отве́ргни и оста́вь все́ его́ злодея́ния, и та́ко избеги́ огня́ гее́нскаго. 4 Цар.5:20-27.
Помилуй мя, Боже, помилуй мя.
Ты Ози́и в святота́тстве уподо́билась, душе́ моя́, и два́жды навлекла́ на себя́ его́ сугу́бую прока́зу: и́бо помышля́еши о недо́лжном и беззако́нное твори́ши. Но оста́ви сие́ и поспеши́ к покая́нию.
Помилуй мя, Боже, помилуй мя.
Ты слы́шала, душе́, о ниневи́тянах, пока́явшихся Бо́гу в ру́бище и в пе́пле. Но ты́ не подража́ла им и согреши́ла бо́лее все́х жи́вших до́ и по́сле дарова́ния Зако́на.
Помилуй мя, Боже, помилуй мя.
Ты слы́шала, душе́, о пла́чущем Иереми́и, в ро́ве нечи́стом сле́зы о Сио́не пролива́ющем. Подража́й его́ пла́чу и спасе́шися.
Помилуй мя, Боже, помилуй мя.
Проро́к Ио́на предви́дел раска́яние ниневи́тян и ми́лость к ни́м Госпо́дню, но бежа́л в Фарси́с, жела́юще си́м уве́рити их в неотврати́мости Бо́жьего наказа́ния.
Помилуй мя, Боже, помилуй мя.
О Дании́ле в ро́ве сидя́щем и уста́ звере́й загради́вшем ты слы́шала, душе́ моя́; ве́даеши ты́ и об Аза́рии со о́троками, ко́и угаси́ли пла́мень пещи́ о́гненной. Беги́ и ты́, душе́, из пла́мени лю́тых страсте́й, подража́юще их ве́ре и му́жеству.
Помилуй мя, Боже, помилуй мя.
До́брые о́бразы из Ве́тхого Заве́та, душе́ моя́, яви́л а́з оча́м твои́м для сле́дования благи́м дея́ниям пра́ведников, злы́е же дея́ния яви́л тебе́, дабы́ бежа́ть от ни́х.
Помилуй мя, Боже, помилуй мя.
О правосу́дный Спа́се, поми́луй и изба́ви мя от огня́ и наказа́ния, ко́им на суде́ пра́ведно пре́дан бу́ду и, пре́жде кончи́ны моея́, зря́ще мое́ смире́ние и покая́ние, прости́ мя́.
Помилуй мя, Боже, помилуй мя.
Яко разбо́йник взыва́ю Тебе́: помяни́ мя́; и, я́ко Пе́тр, пла́чу го́рько: прости́ мя́, Спа́се; и, я́ко мыта́рь, молю́ся Тебе́ и сле́зы пролива́ю, я́ко блудни́ца. Приими́ же рыда́ния мои́, я́ко не́когда прия́л от жены́-ханане́янки. Лк.7:37-38, 18:13, 23:42, 22:62. Мф.15:22.
Помилуй мя, Боже, помилуй мя.
О Спа́се, мой и́стинный Вра́ч! Гние́ние несча́стной души́ моея́ исцели́ и, сло́вно повя́зками с еле́ем и вино́м, уврачу́й меня́ дела́ми покая́ния и слеза́ми умиле́ния.
Помилуй мя, Боже, помилуй мя.
Ханане́янке подража́юще взыва́ю: «поми́луй мя́, Сы́не Дави́дов»; я́ко кровоточи́вая, каса́юся аз кра́я ри́зы Твоея́ и пла́чу над собо́ю, я́ко Ма́рфа и Мари́я, над Ла́зарем. Мф.9:20, 15:22. Ин.11:33.
Помилуй мя, Боже, помилуй мя.
О Спа́се, сле́з пото́ки источа́ю пре́д Тобо́ю и, я́ко ми́ро из сосу́да, возлива́ю на главу́ Твою́. И, я́ко блудни́ца, взыва́ю к Тебе́ с мольбо́ю, ми́лости прося́ще и проще́ния грехо́в. Мф.26:6-7. Мк.14:13. Лк.7:37-38.
Помилуй мя, Боже, помилуй мя.
Хотя́ и никто́ бо́лее мене́ согреши́л пре́д Тобо́ю, но приими́ мя, со стра́хом ка́ющагося и с любо́вию зову́щаго: о Ми́лостиве! Тебе́ еди́ному согреши́л, поми́луй мя́.
Помилуй мя, Боже, помилуй мя.
Пощади́, о Спа́се, творе́ние Твое́, и, я́ко па́стырь отыщи́ мя́, заблу́дшаго, спаси́ от во́лка лю́таго и приведи́ мя́ на па́стбище ове́ц Твои́х. Пс.118:176.
Помилуй мя, Боже, помилуй мя.
Егда́ Ты́, ми́лостивый Спа́се, я́ко Судия́ возся́деши на Престо́ле и явле́на бу́дет непристу́пная Сла́ва Твоя́, о каково́й бу́дет у́жас у ви́дящих пе́щь горя́щую, и́бо вострепе́щут все́ на Стра́шном Суде́ Твое́м. Мф.25:31, 41:47.
Преподобная мати Марие, моли Бога о нас.
Тебя́, преподо́бная, Сама́ Ма́терь Све́та Незаходи́мого просвети́ла и от страсте́й освободи́ла! Сего́ ра́ди, яко восприя́вшую сию́ ми́лость, просвети́, мо́лимся, с ве́рою восхваля́ющих тя́.
Преподобная мати Марие, моли Бога о нас.
Боже́ственный Зоси́ма, о ма́ти, уви́дел в тебе́ и́стинное подо́бие а́нгела во пло́ти и, зря́ще сие́ но́вое чу́до Бо́жие, со тре́петом Христа́ воспе́л во ве́ки.
Преподобне отче Андрее, моли Бога о нас.
Ты́, Андре́е, — Кри́та досто́йная похвало́, учи́тель покая́ния и сла́ва преподо́бных, тебе́ дана́ благода́ть осо́бого предста́тельства пре́д Го́сподом! Сего́ ра́ди молю́ тя, да моли́твами твои́ми обрету́ аз разреше́ние от у́з беззако́ния.
Слава: Безнача́льный Отче, Сы́не собезнача́льный, Уте́шителю благи́й — Ду́ше пра́вый! О Роди́телю Сло́ва Бо́жия! О Сло́во Отца́ безнача́льнаго! И Ты́, о Душе́ живы́й и созида́ющий! Тро́ице еди́ная, поми́луй мя́!
И ныне: Сло́вно пурпу́рная тка́нь вы́ткана во чре́ве Твое́м, Пречи́стая, духо́вная багряни́ца — Пло́ть Емману́ила. Посему́ и́стинною Богоро́дицею Тебя́ имену́ем.
Песнь 9
Ирмос: Безсе́меннаго зача́тия рождество́ несказа́нное, Ма́тере безму́жныя нетле́нен Пло́д; Бо́жие бо рожде́ние обновля́ет естества́; те́мже Тя́ вси́ ро́ди, я́ко Богоневе́стную Ма́терь правосла́вно велича́ем.
Помилуй мя, Боже, помилуй мя.
Ум мо́й стру́пьями покры́лся, те́ло облени́лось и ду́х неду́гует, Сло́во Бо́жие во мне́ уга́сло, житие́ мое́ омертве́ло и кончи́на моя́ уже́ при́ дверя́х. Что же ты сде́лаеши, нераска́янная душе́, егда́ прии́дет Судия́ иссле́довати дела́ твоя́?
Помилуй мя, Боже, помилуй мя.
Сказа́ния Моисе́я о первобытии́ ми́ра и ины́е указа́ния Писа́ния приве́л аз тебе́, душе́ моя́, повеству́юще о пра́ведных и о непра́ведных. Но ты́, увы́, согреши́ла пре́д Бо́гом, и́бо подража́ла не пе́рвым, но после́дним.
Помилуй мя, Боже, помилуй мя.
Ты все́м Писа́нием пренебрегла́, душе́ моя́, уга́с в тебе́, я́ко свеща́, Зако́н Бо́жий, преста́ла ты жи́ти по Ева́нгелию, безси́льно в тебе́ ста́ло и проро́чество, и сло́во пра́ведника, и я́звы твои́ умно́жились бе́з Врача́ исцеля́ющаго.
Помилуй мя, Боже, помилуй мя.
Ины́е о́бразы Писа́ния приведу́ тебе́, душе́, да наста́вят они́ тебя́ смире́нию. Ты пра́ведным подража́й и от гре́шников беги́, моли́твами и посто́м, и по́мыслами чи́стыми Христа́ уми́лостиви.
Помилуй мя, Боже, помилуй мя.
Христо́с вочелове́чился и призва́л к покая́нию блудни́ц и разбо́йников. Пока́йся же и ты́, душе́ моя́, и́бо откры́та и тебе́ две́рь в Ца́рствие и, ра́нее тебя́, спеша́т туда́ пока́явшиеся фарисе́и, мы́тари и прелюбоде́и. Мф.11:12, 21:31. Лк.16:16.
Помилуй мя, Боже, помилуй мя.
Христо́с вочелове́чением пло́тию мне́ приобщи́лся и естество́м челове́ческим доброво́льно вся испыта́л, кро́ме греха́, пока́зывающе мне́ о́браз смире́ния.
Помилуй мя, Боже, помилуй мя.
Христо́с волхво́в спа́с и пасту́хов созва́л, мно́жество младе́нцев венцо́в му́ченичества удосто́ил, старе́йшин и ста́рых вдови́ц почти́л, но ты́, душе́, увы́, не после́довала ни дела́м их, ни жи́зни. Го́ре же тебе́, егда́ предста́неши на Су́д. Мф.2:1, 2:16. Лк.2:4-8, 2:25-26.
Помилуй мя, Боже, помилуй мя.
Пости́лся Госпо́дь в пусты́не со́рок дне́й и гла́д челове́ческий испыта́л. Не убо́йся, душе́, искуше́ний врага́, но отрази́ их от ног твои́х моли́твою и посто́м. Исх.34:28. Мф.4:2. Лк.4:2. Мк.1:13.
Помилуй мя, Боже, помилуй мя.
Христо́с от диа́вола искуша́ем бы́л, егда́ то́й ка́мение показу́юще, предложи́л, дабы́ обрати́лись в хле́б. И, на го́ру возве́дше, искуша́л Его́, красоту́ все́х ца́рствий ми́ра показу́юще. Убо́йся же, душе́, сете́й собла́знов и, бо́дрствующе, моли́ся Бо́гу непреста́нно.
Помилуй мя, Боже, помилуй мя.
Предте́ча Иоа́нн, се́й свети́льник Христо́в и «гла́с, вопию́щий в пусты́не», я́ко го́рлица однолюби́вая, взыва́л о покая́нии, но Ирод восхоте́л и да́лее бесчи́нствовать со Иродиа́дою. Ты́ же, о душе́, дабы́ избежа́ть сете́й беззако́ния, возлюби́ покая́ние.
Помилуй мя, Боже, помилуй мя.
В пусты́ню всели́лся Иоа́нн, — предве́стник прише́ствия благода́ти, и вся́ Иуде́я с Самари́ею слу́шала его́, и крести́лися, и́скренне испове́дующе грехи́ свои́. Но ты́, душе́, и́м не после́довала.
Помилуй мя, Боже, помилуй мя.