Преподо́бная ма́ти Мари́е, моли́ Бо́га о нас. Марии: Просте́рла еси́ ру́це твои́ / к ще́дрому Бо́гу, Мари́е, / в бе́здне зол погружа́емая: / и я́коже
Марии: Просте́рла еси́ ру́це твои́ / к ще́дрому Бо́гу, Мари́е, / в бе́здне зол погружа́емая: / и я́коже Петру́ человеколю́бно, / ру́ку Боже́ственную простре́, / твое́ обраще́ние вся́чески иски́й.
Слава, Троичен: Безнача́льная, несозда́нная Тро́ице, / неразде́льная Еди́нице, / ка́ющася мя приими́, / согреши́вша спаси́, / Твое́ есмь созда́ние, не пре́зри, / но пощади́ и изба́ви / о́гненнаго мя осужде́ния.
Богородичен: Пречи́стая Влады́чице, Богороди́тельнице, / наде́ждо к Тебе́ притека́ющих, / и приста́нище су́щих в бу́ри, / Ми́лостиваго и Созда́теля и Сы́на Твоего́ / уми́лостиви и мне / моли́твами Твои́ми.
Песнь 3.
Ирмос: Утверди́, Го́споди, на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь.
Благослове́ния Си́мова не насле́довала еси́ душе́ окая́нная, / ни простра́нное одержа́ние, / я́коже Иа́фет име́ла еси́ на земли́ оставле́ния.
Ага́ре дре́вле душе́, еги́птяныне уподо́билася еси́, / порабо́тившися произволе́нием, и ро́ждши / но́ваго Исма́ила, презо́рство.
От земли́ Харра́н, / изы́ди от греха́ душе́ моя́, / гряди́ в зе́млю точа́щую присноживо́тное нетле́ние, / е́же Авраа́м насле́дствова.
Иа́ковлю ле́ствицу / разуме́ла еси́ душе́ моя́, / явля́емую от земли́ к небесе́м, / почто́ не име́ла еси́ / восхо́да тве́рда, благоче́стия?
Авраа́ма слы́шала еси́ душе́ моя́, / дре́вле оста́вльша зе́млю оте́чества, / и бы́вша прише́льца, / сего́ произволе́нию подража́й.
Свяще́нника Бо́жия, и царя́ уедине́на, / Христо́во подо́бие, / в ми́ре жития́, в челове́цех подража́й.
У ду́ба Мамври́йскаго / учреди́в патриа́рх а́нгелы, / насле́дствова по ста́рости / обетова́ния лови́тву.
Обрати́ся, постени́ душе́ окая́нная, / пре́жде да́же не прии́мет коне́ц жития́ торжество́: / пре́жде да́же дверь не заключи́т черто́га Госпо́дь.
Исаа́ка окая́нная душе́ моя́, / разуме́вши но́вую же́ртву, / та́йно всесожже́нную Го́сподеви, / подража́й его́ произволе́нию.
Не бу́ди столп сла́ный душе́, / возврати́вшися вспять: / о́браз да устраши́т тя Содо́мский, / горе́ в Сиго́р спаса́йся.
Исма́ила слы́шала еси́, трезви́ся душе́ моя́, / изгна́на я́ко рабы́нино отрожде́ние, / виждь, да не ка́ко подо́бно что / постра́ждеши ласкосе́рдствующи.
Моле́ния Влады́ко, / Тебе́ пою́щих не отве́ржи, / но уще́дри Человеколю́бче, / и пода́ждь ве́рою прося́щим оставле́ние.
Преподо́бная ма́ти Мари́е, моли́ Бо́га о нас.
Марии: Содержи́мь есмь бу́рею, и треволне́нием согреше́ний, / но сама́ мя ма́ти ны́не спаси́, / и к приста́нищу Боже́ственнаго покая́ния возведи́.
Преподо́бная ма́ти Мари́е, моли́ Бо́га о нас.
Марии: Ра́бское моле́ние и ны́не преподо́бная / прине́сши ко благоутро́бней моли́твами твои́ми Богоро́дице, / отве́рзи ми Боже́ственныя вхо́ды.
Слава, Троичен: Тро́ице про́стая, несозда́нная, / безнача́льное Естество́, / в Тро́ице пева́емая Ипоста́сей, / спаси́ ны ве́рою покланя́ющияся / держа́ве Твое́й.
Богородичен: От Отца́ безле́тна Сы́на, / в ле́то Богороди́тельнице / неискусому́жно родила́ еси́, / стра́нное чу́до, / пребы́вши Де́ва доя́щи.
Песнь 4.
Ирмос: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, / сла́ва си́ле Твое́й, Го́споди.
Те́ло оскверни́ся, дух окаля́ся, / весь острупи́хся, / но я́ко врач Христе́, / обоя́ покая́нием мои́м уврачу́й, / омы́й, очи́сти, / покажи́ Спа́се мой, / па́че сне́га чисте́йша.
Вре́мя живота́ моего́ ма́ло, / и испо́лнено боле́зней и лука́вства, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.
Те́ло Твое́ и кровь распина́емый о всех / положи́л еси́ Сло́ве: / те́ло у́бо, да мя обнови́ши: / кровь, да омы́еши мя: / дух же пре́дал еси́, / да мя приведе́ши Христе́, / Твоему́ Роди́телю.
Ца́рским досто́инством, венце́м и багряни́цею оде́ян, / многоиме́нный челове́к и пра́ведный / бога́тством кипя́ и ста́ды, / внеза́пу бога́тства, сла́вы ца́рства / обнища́в лиши́ся.
Соде́лал еси́ спасе́ние / посреде́ земли́ Ще́дре, / да спасе́мся. / Во́лею на Дре́ве распя́лся еси́. / Еде́м затворе́нный отве́рзеся, / го́рняя и до́льняя тварь, / язы́цы вси спасе́ни / покланя́ются Тебе́.
Аще пра́веден бя́ше он, и непоро́чен па́че всех, / и не убеже́ ловле́ния льсти́ваго и се́ти: / ты же грехолюби́ва су́щи окая́нная душе́, что сотвори́ши, / а́ще чесо́му о недове́домых / случи́тся наити́ тебе́?
Да бу́дет ми купе́ль, / кровь из ребр Твои́х, / вку́пе и питие́, / источи́вшее во́ду оставле́ния, / да обою́ду очища́юся, / помазу́яся и пия́: / я́ко пома́зание и питие́ Сло́ве, / живото́чная Твоя́ словеса́.
Высокоглаго́лив ны́не есмь, / жесто́к же и се́рдцем, / вотще́ и всу́е, / да не с фарисе́ем осу́диши мя, / па́че же мытаре́во смире́ние пода́ждь ми / еди́не Ще́дре, Правосу́де, / и сему́ мя сочисли́.
Ча́шу Це́рковь стяжа́, / ре́бра Твоя́ живоно́сная, / из ни́хже сугу́быя нам источи́ то́ки, / оставле́ния и ра́зума, / во о́браз дре́вняго и но́ваго / двои́х вку́пе заве́тов, Спа́се наш.
Согреши́х, досади́в сосу́ду пло́ти моея́, / вем Ще́дре, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.
Наг есмь черто́га, / наг есмь и бра́ка, ку́пно и ве́чери: / свети́льник угасе́, я́ко безъеле́йный, / черто́г заключи́ся мне спя́щу, / ве́черя снеде́ся: / аз же по руку́ и но́гу свя́зан, / вон низве́ржен есмь.
Самоистука́н бых страстьми́, / ду́шу мою́ вредя́ Ще́дре, / но в покая́нии мя приими́, / и в ра́зум призови, / да не бу́ду стяжа́ние, ни бра́шно чужде́му, / Спа́се, Сам мя уще́дри.
Не послу́шах гла́са Твоего́, / преслу́шах писа́ние Твое́ законополо́жника, / но в покая́нии мя приими́, / и в ра́зум призови́, / да не бу́ду стяжа́ние, ни бра́шно чужде́му, / Спа́се, Сам мя уще́дри.