На стиховне стихиры глас 4.
Подобен: Дал еси знамение:
Дал еси в знамение смотрения о рабех Твоих/ образ Твоея Матере, Господи,/ на немже и Сам благолепно изображен еси./ К нему бо чувственне взирающе,/ отвращаем ум наш от злых и суетных мечтаний,/ Твое Имя присно вопоминаем,/ Иисусе Всесильне, Спасе душ наших.
Стих: Прияхом Боже милость Твою посреде людей Твоих:
Храм одушевленный Небеснаго Царя Христа/ Тя, Пречистая, ведуще,/ во храм Твой прибегаем,/ и образ светоносный видяще,/ к Тебе припадаем, Владычице,/ и сердцем сокрушенным молим Тя/ о спасении всех молити Сына Твоего,/ Христа Человеколюбца,/ Спаса душ наших.
Стих: Избра нам достояние Свое, доброту Иаковлю, Юже возлби:
Икону зрака Твоего, Пречистая Богоблагодатная Владычице,/ даровала еси обители сей богатство неотъемлемо,/ покров же и славу и необоримую стену,/ исцелений сокровище,/ чудес источник приснотекущ,/ пристанище же спасения обуреванемым всегда,/ сего ради поем тя, Препетая Чистая[8].
Слава и ныне, глас 6:
Приложение скорбящих,/ Применение болящих еси, Богородице Всепетая,/ спаси град и люди,/ боримых Умиление,/ обуреваемых Тишина,/ Едина Предстательница верных.
Тропарь, глас 5.
Пречистая Владычице Богородице,/ Упование всех христиан,/ понеже инаго упование не имамы разве Тебе,/ Всенепорочная Владычице моя Госпоже Богородице,/ Мати Христа Бога моего,/ темже помилуй, и избави мя от всех зол моих, и умоли Милостиваго Сына Твоего и Бога моего,/ да помилует окаянную душу мою,/ и да избавит мя от вечныя муки, и сподобит мя Царствия Своего[9].
Ин тропарь, глас 5.
Похвалами венчаем, Владычице Богородице,/ венценосный Черниговский образ Твой,/ от негоже явлением чуда в Российстей Гефсимании/ благослови венец лета благости Своея Господь,/ и ныне молимтися прилежно, яко Всецарице,/ благословеньми венчай поющия Тя[10].
Ин тропарь глас 3
К Тебе Владычице ныне прибегаем,/ и во отшествии образа Твоего сокрушенныя слезы проливаем,/ не остави нас сирых лишенных зрети многоцелебный образ Твой,/ но предстательством Твоим нас защити,/ в молитвах бо Тя стяжахом неусыпную о нас Молитвеницу.
По 1_ом стихословии седален, глас 6:
Притецем к ти́хому приста́нищу и Засту́пнице ро́да на́шего, Де́ве Мари́и, / поклони́мся честно́му Ея́ о́бразу, уми́льно зову́ще: / при́зри, Благосе́рдая Ма́ти, на лю́тыя ско́рби, нас обдержа́щия,/ и исцели́ боле́зни душ на́ших.
Слава и ныне, иконе, глас 6:
Никтоже притекаяй к тебе посрамлен от тебе исходит, Пречистая Богородице Дево, но просит благодати приемлет дарование к полезному прошению[11].
По 2_ом стихословии седален, глас 3:
Притекающе к многцелебному образу Твоему, Дево Богородице, / вемы Тя христиан Предстательницу, / к Сыну бо Твоему и Богу нашему / присно молебне руце Твои о нас простираеши, Всенепорочная, / и спасаеши от бед верою и любовию Богородицу Тя почитающих.
Слава и ныне, глас той же:
От честныя Твоея иконы, Богородице, мнозими леты страждущей рабе Твоей здравие подаеши, сему вернии дивятся, и страждущие исцеления ищуще течение скорое во обитель твою совершают, приклони ухо Твое к молебным воздыханиям от всех Тебе пред образом Твоим прносимым, и спаси от смерти души наша.
По полиелеи седален, глас 5:
Ко Твоему пречистому обрезу притекши тяжким недугом страждущая жена,/ слезную молитву смиренно сотвори/ врачевство цельбонсное просящи подати,/ и во уповании своем не посрамленна отыде,/ верных славословити Источник исцеления источивший созывающи, вопияше:/ Приидите и видите, яже сотвори ми Господь,/ предстательством Пречистыя Своея Матери
Слава и ныне: Ин седален, глас 4:
Днесь благовернии людии сошедшеся похвалити, Скорую Заступницу рода нашего Пречистую Богородицу, покровом милости Ея от бед и напастей сохраняеми, и цельбы приходяще к Ней верою и любовию приемлюще, согласно вопиют: Радуйся, Обрадованная, Покровом милости Твоея нас ограждающая.
По 50 псалме стихира, глас 6: Не имамы иныя помощи:
Канон, глас 2
Песнь 1
Ирмос: Грядите людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Яже всем удобь послушная в скорби и в печали помогающая, Богородице Благая, благодать подаждь пети Тя дерзающим, Владычице, скорбящих радосте[12].
Многобогатную благодать стяжавши, Владычице, дерзновенною Твоею молитвою, преславно изми от напастей рабы Твоя, скорбящих радосте[13].
От враг видимых и невидимых избави, молимся, к Тебе прибегающих Богородице, и разори всяк совет борющих нас[14].
Тя утверждение и предстательницу, обогащшеся, имамы, иже Богородицу, Пречистая, исповедающии Тя, от треволнения жития, Всенепорочная Дево, спасаемся[15].
Яже верным прибежище, Приснодево, державная помощь притекающим Ти, от всякия нужды и вреда сопротивнаго нас спаси[16].
Прибежище и спасения граде, вси верно молим Тя, Марие Мати Божия, и мили деемся тепле: приими мольбы наша, Твоих верных раб, и разреши вся ны от прегрешений осуждения[17].
Песнь 3
Ирмос: Утверди нас в Тебе, Господи, древом умерщвей грех, и страх Твой всади в сердца нас поющих Тя.
Врагов наветы разори суетныя, Всепетая Богородице: не оскудей молитвами Твоими, снабдящи нас, восхваляющих Тя[18].
Злое нападение врагов, яко огнь палящее, ищущих всегда погубити нас, Дево, росою молитв Твоих угаси[19].
Помилуй нас, Чистая, помилуй: ибо от дел спасения отнюд несть нам. Темже верою теплою к Тебе вопием: помилуй рабы Твоя[20].
Всю в Тебе благодатей бездну лежащу уведехом: темже прибегающе, Богородице, усердно к покрову Твоему Божественному, спасаемся[21].
О нас, Тя поющих, Пречистая, моли Воплощеннаго от пречистых Твоих и честных кровей, избавитися от прегрешений и болезней горьких[22].
Тя похвалу, вернии, вси стяжахом, прибежище и утверждение и радование, и душам спасение, надежду же и стену, Богоблагодатная[23].
Седален, глас 4.
Твоего милосердия дарования воспоминающе, Владычице, и Твой чудотворный образ благоговейно лобызающе, упованием же Твоея помощи сердца наша веселяще, аки среди нас пребывающую Тя помышляем и верою Тебе вопием: Твоего моли Сына и Господа, да научит нас заповеди Его всегда творити и злыя искушения побеждати, и Тебе Предстательницу нашу, достойно пети и славити во веки[24].
Слава и ныне:
Упование и Прибежище христианом,/ Богородице Приснодева Марие,/ не презри уповающих на Тя рабов Твоих,/ требуем бо всегда Твоея помощи и заступления,/ яко Мати Зиждителя всех Христа Бога нашего:/ тем величаем Рождество Твое, Пречистая и вопием:/ Радуйся, Дево Препрославленная;/ Радуйся, Богорадованная Владычице,/ Радуйся, спасение душам нашим и велия милость.
Песнь 4
Ирмос: Услышах, Господи, глас Твой, егоже рекл еси, глас вопиющаго в пустыни, яко возгремел еси над водами многими, Твоему свидетельствуяй Сыну, весь быв сошедшаго Духа, возопи: Ты еси Христос, Божия мудрость и сила.
Чудо бяше зрети, како жено зело разслаблена, сподобися лобызати цельбоносную икону Твою, Мати Божия, скоро крепость ощутив телесную и совершенное здравие, благодарно воззопиша: Благословенна Ты еси, Пречистая[25].
Владычице Пречистая, елика просим днесь от Тебе прияти сия от чудотворныя Твоея иконы нам подаждь, и немощное наше произволение утверди, и Небесных благ желание в сердца наша всели.
Спасения Тя мост, молитву неусыпну, заступление твердо молим: умилосердися и виждь нашу нестерпимую печаль, болезни, скорби, страсти, и благопременно посети, Мати Божия, радость скорую подающи[26].
Не непричастни есмы, Владычице, Твоего заступления в скорбех: темже и ныне нам помози вскоре, люте обуреваемым руку простирающи, Чистая: буди милостива болезнем нашим, Мати Божия, радость скорую подающи[27].
Смири, Владычице, врагов вознесенную выю велеречующих, советы и злонравия, и сердца поучающаяся злым на мя по вся дни: крепость же и победу подаждь призывающим Тя, Мати Божия, радость скорую подающи[28].
Молим Тя, яже прежде век избранная в Матерь Господа, исцели разслабленныя грехом души наша, оживи росою покаяния сердечнаго и молитвы слезной, укрепи в сердцах рабов Твоих веру истинную и любовь нелицемерную, да сподобимся подвигом добрым подвизатися, веру непорочну соблюсти, житие мирно скончати, хваля Господа: слава долготерпению Твоему, Спасе наш[29].
Песнь 5
Ирмос: Ходатай Богу и человеком был еси, Христе Боже: Тобою бо Владыко, к Светоначальнику Отцу Твоему от нощи неведения, приведение имамы.
Вемы, Владычице, вемы, яко веры исполненная молитва Тобою не отщетится; но сицевыя веры лености ради нашея не стяжахом, аще и стяжати возжелехом. Темже и вопием: веруем, Пречистая, помози нашему маловерию[30]!
Приступим, вернии, с любовию к чудотворному образу Приснодевы и благоговейнее Ему поклонимся, се бо в нем чудес силу проявляет Всеблагая Владычица и вся спасает, с верою несомненною почитающих Пречистаго Лика Ея подобие[31].
Безмерное милосердие Твое познаем, Владычице, в чудесех преславных, от иконы Твоея бываемых. Сего ради чествуем ю с любовию и благоговением, и рабски пред нею Тебе вопием: радуйся, радости нашея Виновнице и спасения нашего Ходатаице, Марие Благоданная[32].
Тобою мнози леты тяжким недугом связанная жена здравие улучивши, возставши созывает верныя чудныя дела Твоя похвалити, Богородице: радуйся, Источниче дарований, - зовуще, -Богоблагодатная Дево.
Преклонися к мольбам рабов Твоих, Владычице, и не закосни избавити нас от всех скорбей и бед, яже обдержат нас, видимых и невидимых врагов отжени от нас, да не зле погибнем, окаяннии[33].
Милостивым и кротким оком, Богородительнице, и милосердием Твоим призри на нас, недостойных, и от обстоящия напасти нас свободи, призывающих Тя на помощь, Всепречистая[34].
Песнь 6
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Твоея милости сподобися расслабленная уды жена, во обитель Твою, Богородице, привезенная и пред святою иконою Твоею усердную вознесшая молитву, иже абие исцеление от недуга своего прият и пешая в дом свой радостно возвратися.
Избави нас от напастей и бед, Богоневесто, Тя бо устрои Бог на спасение и заступление наше Ходатаицу, сего ради и нам, недостойным, исходатайствуй от печали избавление[35].
Поем Тя и покланяемся Ти, Богомати Дево, с верою и любовию проповедающе многая и преславная Твоя чудеса, от иконы Твоея чудотворныя явленныя. Ты же, яко Милостива сущи, якоже древле отцем нашим, сице и нам, смиренным, щедроты Твоя даруй, заступающи и спасающи нас от всяких бед[36].
Да избавимся от всяких злоключений Твоим предстательством, Богомати Владычице, чтущия верно Твоея иконы праздник, в немже чудес Твоих множество воспеваем, и, Твоими милостями красящеся, Тя едину скоро Предстательствующую Помощницу именуем[37].
О благоутробия Твоего, Дево Чистая! решиши бо безмерныя печали и напасти призывающим в нужде и обстоянии: темже и ныне помози, Благословенная, Тя восхваляющим[38].
Ведущи немощи наша, Богородительница, восполняй духовную и вещественную скудость нашу, да подающаго нам Тобою вся благая Бога славим[39].
Кондак, глас 8-й
Притецем, вернии, к многоцелебному образу Заступницы нашея, Богородицы Марии, и, припадающе к нему с любовию, сице рцем: о Всепетая Мати, о Царице Всемилостивая, призри свыше благосердием Твоим на ны, недостойныя, и яви нам Твоя милости и щедроты: в болезнех исцеление, в скорбех утешение, в бедах скорую помощь нам даруй, и вся ны спаси, на Тя уповающия, да зовем Ти: радуйся, Дево, христиан заступление[40].
Икос
Святителя Иннокентия благодарственное пение Тебе Прославльшей образ сей, зрак лица Твоего печетлеющий, принесшаго Послушавшую Владычицу сошедшися вернии приносимое от них хваление не презрити молят, во умилении глубоцем зовущих Ти: радуйся, Бога Отца Невесто Непорочная; радуйся, Бога Сына Родительнице Неискусобрачная. Радуйся, Бога Духа Святаго селение избранное; радуйся, Пресвятыя Троицы Таиннице Пречестная. Радуйся, ангельских воинств удивление; радуйся, человеческаго рода возвышение. Радуйся, надеждо ненадежных; радуйся, врачевство болящих. Радуйся, Утолительнице печалей; радуйся, радосте скорбящих. Радуйся, Дево, христиан заступление[41].
Песнь 7
Ирмос: Да преславное Рождество Твое, Христе, еже от Девы, прообразиши яве, неопалимы в пещи отроки сохранил еси, песньми поющия Тебе: отцев Боже, благословен еси.
От благоутробия Твоего, Дево Чистая! решиши бо безмерныя печали и напасти призывающим в нужде и обстоянии: темже и ныне помози, Благословенная, Тя восхваляющим[42].
Покажи скорое Твое заступление, покажи, яко можеши, яко Мати Богу, призываем Тя от сердца, со слезами припадающе, скорбь укроти и болезнь рабов Твоих вскоре[43].
Не престай, Чистая, молящи от Тебе рождшагося Бога о иже верою притекающих к Тебе и просящих избавления, Едина заступнице миру, отчаянным надежда и заступление, обуреваемым в лютых присно помощь[44].
Надежда благая, заступница же верных еси, Владычице: и ныне молимся Тебе даровати милости пучину всем на Тя надеющимся и зовущим Ти: благословенная, Яже Бога плотию рождшая[45].
Пристанище твердо, предстательница страшна и стена необорима в нуждах бедствующим и обуреваемым в печали, и яже к Сыну Твоему молитвами, Богородице, от многообразных искушений спаси рабы Твоя[46].
Яже Едино упование и помощь верных, Богородительнице, потщися помощи рабом Твоим, погружаемым скорбьми, отвсюду недоумеемым, и в болезнех сущим, и прибегающим к Тебе любовию души[47].
Песнь 8
Ирмос: Впещь огненную ко отроком еврейским снизшедшаго и пламень в росу преложшаго Бога, пойте дела яко Господа, и превозносите во вся веки.
Струи исцелений нам всегда верным, Чистая, источаеши, Егоже независтную благодать вземлюще, воспеваем Рождество Твое, Чистая, и превозносим во вся веки[48].
Столп крепости тверд, и степень, и хранительницу, и заступницу стяжавше Тя верою, спасаемся ныне, поюще Рождество Твое, Пречистая, и превозносяще его во вся веки[49].
Безсмертия зарю, и источник вемы Тя, Богородице, яко рождшую Слово безсмертнаго Отца, вся от смерти избавляющее превозносящия Его во вся веки[50].
Прибежище наше и миру радование, Богородительнице, умилосердитися потщися, и спешно благодать Твою подаждь нам оскорбленным, и заступи, Благая, Твоя рабы[51].
Призывающих Тя, Богородице, от души неложно, во всякой скорби и в болезнех различных, и бедах лютых, спешно услыши, Владычице, сих избавляющи присно молитвами Твоими[52].
Да имя Твое, Богородице, на земли славословится, Иже из Тебе возсияв, грешником державную надежду и стену Тя дарова: Тобою бо всякое дыхание к Богу притекает[53].
Песнь 9
Ирмос: Недоумеет всяк язык благохвалити по достоянию, изумевает же ум и премирный пети Тя, Богородице: обаче Благая сущи, веру приими, яко любовь веси божественную нашу, Ты бо христиан еси предстательница, Тя величаем.
Иже в молитвах бодрую, Чистую Богородицу призываем вси болезнию и скорбию одержими, взывающе: Владычице Чистая, скоро избави от одержащих болезней рабы Твоя присно, яко по Бозе заступницы иныя не имамы[54].
Отчаявшихся велие прибежище, обуреваемых тихое пристанище Ты еси, Богородице. Темже и мы притекаем, взывающе: да не постыдимся, Мати истиннаго Живота, но да благодаряще усердно Тя величаем[55].
Приими, Отроковице Пречистая, божественную песнь, воздавающи благодать на Тя надеющимся, и мир испроси Церквам присно послати, да христианский всяк язык Тя величает[56].
Дар от Бога прияла еси яко Мати Божия, всех христиан недуги исцеляти, и от бед избавляти, и грехи отпущати, и от пленения спасати, и всякия нужды. Но и нас не презри, Госпоже: веси бо ихже требуем, здравия телесем, и душам спасения[57].
НеусыпаетонасвмолитвахПречистаяМатерьСпасоваиявляетчудноеСвоемилосердиековсем,вероючтущимЕяобразсвятый[58].
Священная икона Твоя другая показася Силоамская купель, Дево, очищающая и целящая болезни души и телесе[59].
Светилен.
Вернии сошедшеся днесь, достойное поклонение Твоему Пречистому образу приносят, покрова и заступления у Тебе просяще и Сыну Твоему и Богу нашему зовуще: Прими о нас Матери Твоея теплое моление.