Чюдо страха и удивления исполнено.

Лета от рождества Господа Нашего Иисуса Христа 1718-го месяца апреля в 4 день Заболотской волости Николаевского приходу деревни Телилова Василий Корнилов мучим бе недугом страшным, еже все тело его трясло повсечастно годищное время. И слышав Божия Матери и преподобнаго Иосифа, приведоша его сердоболи в пустыню Богоматери, и пев молебная Богоматери и панахиду над гробом преподобнаго Иосифа, и оный немощный, слезне прося милости, и покроплен святою водою и перстию помазан, целовав образ чюдесный Пресвятыя Богородицы, такожде и раку преподобнаго. И абие преста трясение и два дни бе в пустыни, и ктому ничто же ему бысть. И иде здрав во своя си, прославляя Божию Матерь и преподобнаго Иосифа.

Ино чюдо 36.

Паки не умолчу проповедати преславныя Божия Матери милость и ходатайство преподобнаго отца. И аще и превосходит недостаточества ума моего, но боюся молчати, дабы не таяжде пострадати, яко и скрывый талант господина в земли. И дерзнух, надежду имея о помощи исправления на Богоматерь и Ея служителя Иосифа, елико могох, то и писах.//(л. 83 об.) 718 году в самый великий день святаго Христова Воскресения во время святыя литургии в церкви Николы Чюдотворца, что на Возиме, и егда херувимскую песнь пети начаша, тогда грех ради наших попущением Божиим дух нечистый похити человека именем Назария. И начат вопити нелепыми гласы, и плясати, и свистать, и руками плескать, яже бедне видети тогда и нестерпим страх. Сия видевши мног народ, страхом обьяти быша и нуждею оного связаша. И едва в дом его отпровадиша, и шесть дней мучи его демон, на всяк час нелепая испущая, и бияся, и бегая от людей.

И в шестый день сердоболи его приведоша его в пустыню пред чюдесный образ Богородицы. И ту со слезами молебная принося, а оный же бесновавый не преста, нелепая испущая и на образы плюя. И егда начаша его прикладывть к чюдотворному образу нуждею, оный же отвращая лице свое и ногами ковчег пиная, на нем же святый образ стоит. И вземше его из церкви, и ведоша его в часовню, идеже гроб преподобнаго Иосифа. Он же распенся в дверех часовни, и бия руками и ногами, и нелепая глаголя,//(л. 84) не хотяше внити. И спреди монах, взем бесноваваго за нос, и абие бысть кротчае, и вовлекоша его внутрь. Он же верху гроба святаго ляже, ногами и руками бия и плюя. И совлекоша его, и в конце понахиды власяницу, яже бе при гробе святем, наложиша на главу беснующагося. Он же бысть тих и глаголя: «Тако мене укрутили, уже неколи мне противитися».

И нача прикладыватися ко гробу щеками, а не целуя. И положиша персти с гроба преподобнаго во святую воду, даша ему пити. Он же стискнув уста своя, не пуская, и разведоша ему гортань нуждею и влияша. И абие постояв мало бесновавый, яко от сна возбудися, нача крестити лице свое, глаголя: «Господи, помилуй». И со слезами вси глаголаху: «Господи, помилуй». И потом припаде ко гробу преподобнаго, прощение прося. И по часе доволне взяша его монахи в хлебню за общую трапезу, понеже шесть дний не яде ничто же, ни пит, а тогда яде и пит с ними, благодаря Бога, и Пречистую Богоматерь, и угодника его преподобнаго Иосифа, иде с радостиюв в дом свой.

И на другий день сам прииде в пустыню к святой литургии, и монахи вопрошаху его: «Что ти бысть, егда плевал на образ//(л. 84 об.) Божий и Богородицы и на гроб угодника Божия?» и чего ради не хотяше внити в часовню ко гробу святаго. Он же, исповедая, глаголя: «Оставите ми, отцы, и молите Бога, и Его рождшую Пресвятую Богоматерь, и заступника нашего преподобнаго Иосифа, да не помянутся злобы моя. И ничто же ино помню, токмо егда плевах на чюдотворный образ и гроб, тогда ми являхуся мухи и мшица многи во уста лезуще. Аз же мнях, на них плевах. А егда ведоша мя в часовню, тогда аз противу себе видех черныя воробьи и иныя птицы нелепы, нападающия на мя, и ударяхуся. Аз же бияхся, мнях отбити их от себе. А егда по облечении святыя власяницы и по помазании персти бысть благо и ничто же вижу и до сего часа. И вся начах разумети. И абие здрав бысть».//(л. 85 об.)

Чюдо.

Несть добро и сему утаену быти дивному чюдеси и явлению нашего ходатая преподобнаго Иосифа, яже вашему рачению предложити помощию того хощем сего 718 лета месяца марта в 25 день в самый праздник Благовещения Пресвятыя Богородицы к вечернему пению прииде в пустыню Заоникиев пред чудесный образ жена Двиницкой волости Николского приходу отчины господина Петра Семенова сына Волчкова деревни Глебова именем Евдокия Иванова дочь Григориева жена Артемиева с сыном своим Прокопием и, во утрий день много молився со слезами, пред всеми исповедая чудо, глаголя: «Бывшу ми, рече, в разслаблении всех удов более двою лету и сего года в генваре месяце бывшу ми в зелней той болезни на одре и много стенющи, рыдая, прося помощи от Всемогущаго Бога. И абие явися мне, входя в хлевину мою дверми монах видением высок, поник, браду имея долгу, седу, доволну, в мантию и куколь оболчен, в руках жезл имея.//(л. 86) И пришед, двигнув рукою в плече мое, укрепляя и глаголя: «Востани, и с верою призови помощь Богоматери, и обещайся пешешествовати в Заоникиескую пустыню к чудотворней иконе, и исцелееши». Аз же отвещах к нему: «Господи, камо иду? Аз бо не слышах прежде тоя святыя обители, ни образа где обрести». И той ми рече: «Яже есть близ града Вологды разстоянием и во всех странах чудесми проповедуется. И аз есмь тоя обители монах именем Иосиф. Повелеваю ти вскоре не отчаятися, но имети веру, и милость получиши». И ощутився, не видех пришедшаго никого и, ужасшися, двигнув руку свою десную, начах крестити лице свое, ея же до того часа никако до персей своих донести можах. И радости наполнившися, возбудих мужа моего и сына, аще ведят пустыню Богоматери. Муж же мой рече ми: «Аз слышал, яко есть пустыня близ града, быти же не сподобихся. И тако аз почух отраду многу своей болезни, нача проповедовать явление и вкупе звати начаша и, обещание//(л. 86 об.) Богоматери и преподобному Иосифу, полагая и от того часа здравие получих».

И сия исповеда вышереченная жена и с сыном своим пев молебная и понахиду многослезне, Богоматери моление принося и преподобнаго Иосифа благодарствуя. Некий же монах тоя обители иконом Сергий, взем образы преподобных отец Димитриа и Игнатиа Прилуцких и других многих святых, указали я жене: кому есть подобен явивыйся ей? Она же из всех избра и показа на образ преподобнаго Зосимы Соловецкаго и Кирилла Новоезерскаго чудотворцов. «Сим может быть подобием лица и брадою». И потом радуяся и хваля Бога, возвратися во своя си.

Чюдо 37.

1718 июня в 27 день прииде священник церкви Воскресения Христа Бога Нашего Лещевской волости Михаил Димитриев со всем домом своим молитися Божии Матери пред чудесный образ, пев молебная пения со слезами всю нощ, над гробом преподобнаго пояше псалтырь со слезами, начат сказывать, был немощен неудобь стерпимо всеми своими тела составы. И в той болезни,//(л. 87) яко в забытии сведеся, видит при одре своем стояща человека брадою и подобием, яков Кирил Новоезерский, повелевает ему ити в пустыню Заоникиев пред чудесный образ Божии Матери, есть бо источник исцелением. Аз, иерей Михаил, видев его преподобие при возглавии своем стояща, прострох руку мою прекрестився, зря на образ его, потом ничто же видев, а от болезни здравие получих.

Чюдо 38.

Сего 718 града Вологды соборной церкви диакон Петр Михайлов был немощен неудобь стерпимо. И в той болезни всегда домовным своим не давая нимало покою, всегда при нем седяху днем, а нощию при свеще, являхуся бо ему в дому его всякия ползящия гады и рогатыя дивии мнози. И своими бе подкрепляемь протопопом Иоанном, читаху над ним святое Евнагелие и Псалтырь, ничто же ему бысть на ползу. И в той болезни пострижеся в монашеский чин и, быв в дому своем, таяжде стражда. Егда же привезен бысть своими пустыни Богоматере пред чудный Ей образ и пив персть со святою//(л. 87 об.) водой от гроба преподобнаго новаго чудотворца Иосифа, и бысть здрав, ничто же те привидении видев заступлением Божия Матере и угодником Ея новым чудотворцом Иосифом.

Чюдо 39.

1718 июля в 3 день приведоша девицу от града Вологды села Фрязинова из дому Димитриа Димитриева сына мылникова Ирину Иванову дочь рождением Замошския волости Покровского приходу. Оная девица болезновала главою и очми лет 13. В той болезни той девице лекарства многия пущали, связав, и терли халевым перьем. И многая кровь из очес ея идяше. И от таковых лечцов свет погибе очию ея. Егда же прииде в Заоникиевскую пустыню ко образу Божия Матере, вшед в часовню ко гробу преподобнаго Иосифа, начат очеса своя терти власяницею. Услышав от главы своея, яко мраз отходити начат. И приложися ко сну, и по сне видети нача, славя Божию Матерь и преподобнаго монаха Иосифа.

Чюдо.

Града Вологды из Обухова Власиевского приходу Ивана Алексиева сына Черепанова жена его Парасковия Тимофеева дочь//(л. 88) немощна была очима годищное время и не видела единем оком рук своих, приведена бысть в Заоникиев в пустыню, приведоша в часовню ко гробу преподобнаго Иосифа и начаша понахиду петь. Оная же жена, падши ко гробу с плачем возопи: «Помилуй мя, угодниче Божий, буди молебник за мя, грешную, ко святей Богородице». И в том часу отверзеся око ея, и бысть здрава, яко никогда же болев, с радостию иде в дом свой.

Чюдо 40.

Не мню праведно, ниже достойно и се умолчати, яже о чудесех Божия Матере образом содеяшася в жительство наше. Града Вологды благочестия исполнен муж некий именем Иоанн Афанасиев, доволствуя своими прибытки всегда, имея веру многу ко святым Божиим церквам и милостыню ко убогим, странныя приемля в дом свой, нагия одевая, болныя посещая. Воистинну дом его бысть пристанище убогих, такожде и жена его Иулианиа, живуще оба в заповедех Владыки Христа. Имяху же в дому своем и служащих в наказании добром,//(л. 88 об.) приспе девятомесячие время родити младенца и лежащи ей по рождении младенца. Завидя враг, не терпя милостыни даяния дому того мужа Иоанна, жене его Иулиании приключися болезнь. И изумленней бывши, ничто же смысленней и нелепая глаголющей, и мужеви своему досады многи деяв. И в той болезни пребысть годищное время. Муж ея Иоанн непрестанно милостыню творяше безчисленно. И в той болезни жену свою Иулианию по святым местом вождаше. Егда же Всеблагий Бог, хотя прославити место святое сие, еже исперва посла образ Свой и Рождшия Своея Богоматере и объятие блаженному Илариону, во иноцех Иосифу. И той милостивый муж привезе жену свою Иулианию в Заоникиевскую пустыню к чудесному образу Божия Матере и гробу новаго чудотворца Иосифа. Утреннняя пения со страхом предстоявше по утренни, вземше с нуждею, едва введохом болящую в часовню ко гробу преподобнаго и надехом на главу ея власяницу. Оная жена Иулиания начат крестити лице свое и молитву творити, и вси в той часовне бывшии страхом и радостию одержими бывше, вопиюще со слезами: «Господи, помилуй». И вземше светилник, вожгохом и начахом чести//(л. 89) канон за едино умершаго над гробом преподобнаго Иосифа, славяще Пресвятую Богородицу, таковую благодать давшую своему угоднику новому чудотворцу Иосифу. Благоверный же той муж Иоанн, сия видев милосердие Божие, усердно сокровища своя отверз и ту живущим монахом доволну даша милостыню, славяще святую Троицу, Отца, и Сына, и Святаго Духа.

Чюдо 41.

Хощу же и се вашей любви, да не утаено будет: града Вологды храма Преображения Господня, что в селе Фрязинове, священник Василий, слышав о чюдесех новаго чюдотворца блаженнаго Илариона во иноцех Иосифа в сумнителстве быв, в басни вменяя, и видев мног народ, шествующих в Заоникиев в Божии Матери к чюдесному образу и ко гробу новаго чюдотворца преподобнаго Иосифа, словесы своими пререкуя, еже бы не шествовати народу во святую обитель. Во един же от дней иде в церковь Преображения Господня, то же мысля, народи, водими духом благодати Божия, приидоша к тому иерею поклонитися//(л. 89 об.) и благословения руки его от священства прияти. Он же начат возбраняти, еже бы не шествовати во обитель к чюдесному гробу новаго чудотворца. И в той час нападе на очию его слепота, яко же на Павла апостола, егда идяше в Дамаск. Он же начат требовати вожда и пришед к церкви Преображения Господня, того иереа Василия введоша в церковь пред образ Владыки Христа. Тогда помыслив свое согрешение и похуление чудес святаго, плакася неутешно пред образом Преображения Господня, покаявся от чистаго сердца ктому не хулити чудес святаго, вскоре здравие получив, славя Божию Матерь и угодника Ея новаго чюдотворца блаженнаго Илариона во иноцех Иосифа.

Чюдо 42.

И сие новое чюдо в явление любящим истинную православную христианскую веру, ясно слышано да будет Кириллова монастыря Белоезерскаго служень сын Димитрий Михайлов сын Булучев немогл очима боле трех лет. Дед же его священник церкви Богоматери Казанския, что в//(л. 90) Кириллове служне слободе, Карп Иванов, слышав о чюдесех, деющихся образом Богоматери и новым чюдотворцем блаженным Иларионом во иноцех Иосифом, повеле ему, Димитрию, ехать в Заоникиевскую пустыню. Егда же привезен быв к чудесному образу Богоматери и ко гробу новаго чюдотворца Иосифа и возложиша на главу его власяницу, тогда во главе болезнь преста и очию видети свет начат помощию Божия Матери и молитвами служителя Ея новаго чюдотворца Иосифа.

Чюдо 43.

Аще аз, грешный раб твой, умолчати буду, то дела Божия непрестанно вопиют. Пинковской трети Фроловской деревни Ермачихи Даниил Ермолин слеп был с полгода и обещався Заоникиев пред образ Божия Матере и ко гробу новаго чюдотворца блаженнаго Илариона, во иноцех Иосифа, молебная принести. И привез его, Даниила, Рожественской волости деревни Быкова крестьянин Демид Артемиев ко гробу новаго чюдотворца Иосифа, начат очеса своя терти власяницею и припадая ко гробу новаго//(л. 90 об.) чюдотворца, бысть здрав, радостно в дом свой возвратишася, славяще Святую Троицу, Отца, и Сына, и Святаго Духа, и новаго чюдотворца Иосифа.

Чюдо 44.

Еще не умолчим проповедывати: марта в 13 день приеждали бомолцы Фроловския волости, что на Кубенце, от храму Николая Чюдотворца и святыя мученицы Парасковии, нареченныя Пятницы, церковники дьячек и пономарь Иван да Максим, Ивановы дети. И сказывали, что у того церковника Максима дочь осми лет, немогла очми годищное время велми тяжко, не видела ничто же. Отец ея и мати обещались по многим святым местом, тако же и ко врачем ходили, и ничто же успехом. В некое время мати тое девицы в нощи в видении, слышав глаголющаго с ней: «Обещайтесь итти в Заоникиев Пречистей Богородице и ко гробу преподобнаго Иосифа и молебствовать, и будет дочь ваша здрава». И начаша мы обещание полагать, что ехать Пресвятей Богородице молитися и преподобному Иосифу. И болезнь стала легчае в то же время, Бог дал здравие молитвами Богоматере и угодника Ея, и мы всею братиею тою девицу видели здраву конечне во обители Божия Матере и угодника Ея новаго чюдотворца блаженнаго Илариона, во иноцех Иосифа.//(л. 91)

Чюдо 45.

1719-го году февраля в 24 приеждал в пустыню Божия матери Тошенской волости церкви Благовещения Пресвятыя Богородицы, что на Еме, церковник Василей Михайлов, молився во всю нощ пред образом Божия Матере, припадая ко гробу новаго чюдотворца преподобнаго Иосифа. И начат сказывать со многими слезами: «В прошлом 1718 году по церковному уставу был я в мире декабря в 27 Христа славить. И приехав в дом свой наветом сопостата диавола, поидох на игрище бесовское в деревню Онцыфорово. И не дошедшу ми до той деревни, в ней же стицаются людие на сонмище бесовское, на пути ударило мене о землю. И отъяся мне ум мой, и свет очию моею погибе, и правое око мое вон выпаде. Из главы моей непрестанно кровь течаше, и не видев ничто же осмь недель ни днем, ни нощию, ни на един час не бысть мне покою, а того я не вем, как мене прихожане в дом мой когда привезоша. И домашнии мои мати и жена и вси надо мною, яко над мертвым плакаху. И начаша мене обещать во святыя места. И слышавше от многих, егда Всеблагий Бог болшими чюдесы прославив образ Свой и Рождшия Его Матери, и гроб своего служителя, новаго чюдотворца блаженнаго Илариона, во иноцех Иосифа. И слышавше домашнии моя, начаша обещатися в Заоникъев молитися. И тогда ми бысть малая отрада от болезни. А егда привезоша мене в пустыню ко образу Пресвятыя Богородицы и ко гробу преподобнаго Иосифа, тогда течение крови преста и левым оком свет видети начат. И во главе болезнь преста. И тако с великой радостию в дом свой возвратися».//(л. 91 об.)

Чюдо 46.

Сего же 719-го года марта в 4 день Авнежской волости Введенского приходу села Старово Боярина князь Григорья Федоровича Долгорукова крестьянин Михайло Иванов привозил жену свою Дарью немощну, вне уме бывшей ей недель с восм. И была при гробе новаго чюдотворца блаженнаго Илариона во иноцех Иосифа, бысть здрава.

Чюдо 47.

Не могу умолчати аз грешный Андрей излиявшася на мя милосердия Божия по долготерпению неизследованых судеб его божественных за молитвами и предстателством надежды христианския и заступницы всего мира Пресвятыя Владычицы Нашея Богородицы и Приснодевы Марии, нарицаемыя Заоникиевския. Скорбящу ми грешному Андрею за множество согрешений моих животною болезнию марта с 3-го числа прешедшаго 718-го лета, тому уже грядущу другому году. И егда же оная болезнь разсвирипеет, то каменем горящим, утробу мою отжигал, овогда же хладною водою обливахся и много лекарства и трав принимал, но никая ми полза бысть от болезни моей. И марта в 21 день, то есть в субботу Лазареву, сего настоящаго 719-ого года прииде ми в память благая мысль, еже бы ехать в Заоникъевскую пустыню и молитися Пресвятей Богородице и преподобному новому чюдотворцу Иосифу о избавлении оной болезни. Сие же и бысть, приехавшу ми в предреченную пустыню в субботу Лазареву и обнощеваху ту. И по утру, то есть в неделю Ваии, слушав утренняго пения и святой литоргии, и после литоргии Пресвятой Богородице, воздавши молебное благодарение, и по новом//(л. 92) угоднике Божии певши понахиду, поехав во град Вологду. И егда бывшу ми на поли тоя пустыни, нападе на мя великий сон. И проснувся при Спасове Прилуцком манастыре, и вторицею объят мя сон даже и до самаго града Вологды. И от того времяни за молитвами и предстателством Пресвятыя Богородицы и молитвами Божия угодника Иосифа, новаго чюдотворца, от болезни моей восприях облегчение.

Чюдо 48.

Молю вы, о благочестивейший христианский народе, приклоните ушеса сердец ваших к слышанию сладкаго чюдотворения, яже Всесилный Бог молбами Богоматери и преподобнаго отца Иосифа паче древнейших ныне содея чюдо преславно. Сего настоящаго 719-ого лета веси нарицаемой Комелской христианин некто именем Стефан по реклу Ветошкин извествуется многими, яко дошед самой своей старости, доброзвателное имя на себе носяй и обилствуя во всем. Той помянутый Стефан з ближними своими сердоболии, пришед в преславную сию обитель к чюдотворному образу Божия Матере и к целбоносному гробу преподобнаго отца Иосифа, молитвенное пение и просителны слезы возсылая, вкупе и благодарствие принося, но обаче знаменашеся в нем некая болезнь, яко еще не весма устрабивыйся от скорби своей. Потом прикосновением Пресвятаго образа Богоматери и гроба преподобнаго, и персти помазанием оный во всякой отраде своея болезни конечно бысть, нача усердно о себе поведати сице, яко «бывшу ми, рече, Всевышняго за некое мое согрешение наказующу Богу тяжкою болезнию полгодищное время, яко всем удам разслабленным бывшим, ничим можаше двигнути//(л. 92 об.) от зелнейшаго недуга. И света очию лишихся, и язык умолче, и болии дву недель не разверзе уст ко глаголанию. Домашним же моим и сердоболем многим плачем сетующим моего исхода, но Всемилостивый Бог, не хотяй смерти никому же и опромышляяй о спасении человеком, вложи мысль сердоболем моим, иже в сетовании своем начаша глаголати между себе: «Колико слышим чюдес и исцелений, подаемых от чюдес образа Богородицы и гроба преподобнаго Иосифа в Заоникиевской пустыни. Обещаем и мы сего. Ныне же довлеет и нам верою призвати Богоматери и чюдотворца. Егда же дастся отрада болящему, тогда, текше во обитель, конечное обета исполним». И абие вси с плачем зваху от души, обет полагаху, да подаст Бог милость заступлением Божия Матери и преподобнаго. Аз же слышах, усты глаголати не могий, а мыслию то же обеща, сердцем вопия к Божии Матере и преподобнаго заступление. В той час распростреся десная ми рука, бысть во отраде. Аз же дерзостию надежды двигнув и прекрести лице свое, потом и очию ми свет дадеся. Видевши же сия сердоболи неначаемое и скорое посещение Божией милости, радостно со слезами к Богоматери вопияху и преподобнаго отца в память зваху, потом вмале и язык мой движеся, и нача глаголати к сердоболем, хваля их доброе завещание. И от того часа бысть мне немала отрада, и нача глаголати сердоболем, велех вести себе во обитель к Богоматери, дабы конечное исцеление получить, обещание же совершенно исполнить. И будущим нам во граде Вологде, идеже той пустыни вновь построенная часовня стоит, и видехом ту стоящь образ Божия Матери, руце воздев, падше со слезами, прося милости, дабы не погрешить надежди своего упования некоего ради согрешения. И ту паки боляй аз, многу отраду во удех моих слышав и к сердоболем возопих: «Любимицы мои, не косните в течении своем ко пристанищу нашего упования, вижду милость Пресвятыя Богородицы, яко с нами есть». Тогда вси благодарне радостне текоша, и абие аз боляй, во мнозе отраде достигнув в святую обитель, яко еще не все уды освободишася от болезни». И быв//(л. 93) во святой обители достойное благодарение, радостно слез не пред образом Божия Матери, молебная совершивше, и на гробе преподобнаго отца Иосифа новаго чюдотворца, певше понахиду, и сподоблшеся лобызати святую власяницу, конечное исцеление получи и бысть здрав. Тогда служащии во святой церкви и вся братия тоя святыя обители, слышаще от него самого конечное милосердие Божие над ним, сами видевше, благодарственне прославиша содетеля всех Бога, и Сего рожшую Матерь Богородицу, и новаго чюдотворца ходатая онаго преподобнаго Иосифа ублажиша. Прежереченный же исцелевший муж Стефан, много благодарствив, милостыню братии дав и обет добр исполнив, здрав радуяся в дом свой возвратися. Строяй же тогда началный монах тоя пустыни с прочею братиею судиша приположенну сему дивному чюдеси быти к прежеписанным чюдесем ради хотящих впред милости исцеления душ и телес просити, дабы вси такою ж несумненною верою в надежди к чюдесному образу Пресвятыя Богородицы, и преподобнаго отца гробу текше просили, и никто же бы неверия ради своего надежди не погрешили и отчаянием душ своих не отщетили, дела же Божия умолчати убояхся, дабы не тая же пострадати, яко и неключимый раб, скрывый талант своего господина, нас же всех щедроты Всевышняго соблюдут невредимых помощию Божия Матери и молитвами преподобнаго Иосифа во веки. Аминь.

Чюдо 49.

1719-го году октября в 24 приходили Кирилова монастыря крестьянин села Колкача деревни Починка Никифор Андреев снохою своею Пелагеею, приводили с собою мужа ея Пелагеина, а ево Никифорова брата родного Симеона Андреева к чюдотворному образу Божия Матере, что Заоникиевым, и много молився со слезами пред образом Пресвятыя Богородицы и припадая ко гробу новаго чюдотворца Иосифа, целуя от власов сплетенную его власяницу. И начат сказывать пред всею братиею со многими слезами: «Был-де я, Симеон, сего настоящаго году в ыюне месяце в Кирилове//(л. 93 об.) монастыре Белоезерского, идучи домой в нощи на мху. имянуемое место то Пантелеовская гарь. И грех ради моих начат во след мене вопити демон и плесканию бывшу велику, яко в бубне или во цку велику. Аз же начах бежати от ужасти великия, едва возмогох доити до дому моего и от страху изменихся весь, едва стояти могох, к домашним от страха глаголати не могох, легох на постелю мою, трясыйся весь, тут же ляже и жена моя. И лежащу ми, видех под постелею моею воду многую, яко река течет шумящи быстриною течения. И видех под тою же постелею моею огнь велик люди несут в скалах и в сосудах великих. И хоте мене сожещи с калами и серою в сосудех и вкинуть в ту явльшуюся мне реку. Аз от страха вскочих с постели моея, побегох из хижи, в ней же лежах. Жена же моя постиже мя, ухвати, начат вопити. И выбежавши мати моя, похвативши мене за руки и ноги, начат мя бити, мати же моя не даяше мя бити, начат молити Всемилостиваго Бога и Его рождшую Богоматерь на помощь призывая. И начаша мя возить по святым церквам, ничто же ми позлы бысть, грех ради моих страдах связан по вся нощи и дни, привидения та злая видех по вся час. От немилостиваго вязания и биения от сосед и от сущих сердоболей прият немалую красту на тело мое и болезнь, и слушаше родители мои о чюдесех, деющихся во обители Божия Матери, яже Заоникиевым, поведоша мене до зде и аз начах разумети и молитву творити, токмо ми розвязаша мои руце. И аз начах креститися и сподобихся видети образ Божия Матере и гроб новаго чюдотворца Иосифа. И бысть мне благо, сия поведах со многими слезами.//(л. 94)

Чюдо 50.

Сего же года в сентябре месяце в 6-м числе приеждала из града Вологды Успенского Горнего девича монастыря игумения Афонасия Блезнина. Сама от себе она исписала епистолию своею рукою, аможе о сем и мы умолчати, дабы не там же пострадат, яко скрывший талант господина своего в земли. Аще мы умолчим, но дела Божию вопиют явлшуюся на нас милость человеколюбия Божия, прославившаго образ Свой и рождшия Его Богоматере, такожде и гроб своего служителя новаго чюдотворца Иосифа, что за Оникиевым лесом. Скорбящей ей год и шесть месяцов нутряною отравною болезнию, и егда та болезнь во утробе ея свирепити начнет дни многи, она же внестерпимо в оной болезни лежах в безпамятстве. Сестры же ея монахини ту у нея которыя пребывающия жалостию сердца тужаху об ней, зане та отравная болезнь во утробе ея хождаше, терзающе сердце ея и утробу. И к той же ея болезни приключися другая болезнь, нача болети ей правая рука, бысть толста необычно зело и не можаше ея ни двигнути, отяся по самое плечо. От тяжкия болезни и плаках из глубин сердца, прося помощи от Всемогущаго Бога, прииде во ум благая мысль, еже бы ехать в Заоникиевскую пустыню к чюдотворному образу Божии Матери и ко гробу новаго чюдотворца Иосифа, еже и бысть. И молився пред образом Богоматери, такожде приидох в часовню ко гробу чюдотворцову и стоях ту мног народ. Ту же прилучися бывший протопоп Иоанн Григорьев, она же нача болную свою руку власяницею терти, еже придета бывши близ гроба Иосифа преподобнаго. И молих того протопопа Иоана, дабы подал от лампад масла древненого и помазал бы болную ея руку. Он же, молитву сотворив, нача руку ея мазать. Она же руку свою простре и нача лице свое того часа крестити, и преста в руке ея болезнь и бысть здрава, славяще Святую Троицу, и Пречистую Богородицу, и преподобнаго.//(л. 94 об.) И сие мое исцеление неутаено буди величия ради Божия. 725 году августа в 3 день Спасова Прилуцкого монастыря иеромонах Иоасаф одержим был неверием о чудесех преподобнаго Иосифа, что бывает многия исцеления от святаго гроба его, и бысть в сумнении многом, в лож вменяя чюдеса преподобнаго. «И за такое неверие нападе на меня болезнь лютая сердечьная, и тако болезни был десять дней и паде ми на ум, что чудесем его преподобнаго отца Иосифа не верил и в ложь чюдеса его вменях. И за такое неверие нача слезно плакати и рыдати, преподобнаго на помощь призывати, того же месяца августа в 13 день в третьем часу нощи. И дарова мне Бог молитвами преподобнаго изцеление в трети час нощи в третей четверти. И ныне вседушевно верую и проповедую истино угодника Христова и подписуюсь своеручно, понеже в том вышепомянутом часу, яко в забытии быв и слышах себе именем зовома «И в третей четверти сего часа будешь здрав».//(л. 95) И сие да не утаенно будет, величия Божия Матери, яже есть в Заоникиевом 1727 году месяца марта в 9 день Вологодцкого уезду и аз Кубенского езера приеждал храма Пресвятыя Богородицы, что на Карне, Семенов крестьянин Прокофьева сына Змеева деревни Жукова Иван Степанов з дочерью своею девицею Матреною, пред чюдотворным образ Пресвятыя Богородицы пев молебная пения со многими слезами, в сущую правду пред образом Ея Богоматери и пред гробом новаго чюдотворца Иоасафа сказывал: была оная девица Матрена содержима болезнию трясовичною долгое время, и от той трясовичной болезни от огня и от озноба в продолжение многовременнаго времени приводили врачев и лекарства многая даяху. Никоея же ползы ей бысть, и во едину от нощей зело немогущу ей, яко бы и при смерти. И «слышах глаголющаго ко мне и именем мене зовущу: «Пойди в Заоникиев во обитель Божия Матери пред чюдесный Ея образ и пой молебная пения». Аз же возрех и ведех человека, при постели моей стояща, куколь на главе имуща, сединами украшен, хотех вопросити//(л. 95 об.) имени вопросити и той мне невидим бысть. Аз же, бывши во ужасе и о видинии своем и о образе явившагося мне, отцу моему и матери своей поведати начах. Отец же мой и мати моя, слышавше сия, яко единеми усты вопияху, чтобы мене вести в Заоникиев ко образу Пресвятыя Богородицы. И от того часа бысть аз здрава, отиде от мене та лютая трясавичная болезнь. И о видени человека, его же видех при постели своей несведома, понеже имени своего не поведал, а ведех образ его, написав на иконе сей, и мне, яко быти сему новому чюдотворцу Иосифу и поклоняюся иконе сей, его же в скорби своей видех, и славлю Отца, и Сына, и Святаго Духа, исцелевшую мя. Аминь.

Чюдо 53.

И сие да не утаено буди великия Божия Матери, яже есть образ Ея в Заоникиевом какову радость и надежду скорбящим точить с верою призывающим пресвятое имя Ея воистинну образ сий живоприемный и источник//(л. 96) воистинну ублажаем Тя вси роди, мати присносущнаго света во дни сия сбышася. 1727 году месяца марта в 18 день вологодского уезду Лиского волоку Ильинского приходу селца богомолка приеждала дворянская дочь девица Евдокия Ильина дочь Доловарова на самый праздник, еже есть несведанное пение предо образом Божия Матере в сущую правду еже ей исповедала: была немощна главою и очима многое время и си<..>ла обет полагая, чтобы ехать в Заоникиев ко образу Божия Матери, и молебная пения принести ко образу Ея, Богоматери, и видети бы гроб новаго чюдотворца Иосифа. И с того дни и чяса легчяе ми бысть, во главе болезнь моей преста. Егда же бысть в той во святой обители, предо образом Божия Матери всеконечно здравие получих, славя Божию Матерь, в дом свой возвратися радостно.

Чюдо 54.

Молю вы, любимицы мои, преклоните ушеса ваша на слышание сих новых чюдес, да подасть вам милость, единомыслие и безмятежное шествие <иних новаго Израиля> во след безскверныя голубицы, возле<летев>щия превыше небес, и врата породы отверши<я>, и пламенное оружие от входа едемскаго отемшия – величтво и милость. Аз, иерей Максим, исповедую новое сие милосердие на мне, недостойнем: грех ради наших прииде на жену мою Феодосию, Назарьеву дочь//(л. 96 об.) болезнь лютая. В той болезни <нрзб> ея жены моея тела бысть полгодищное время таковое ея болезни, от безумия своего начах врачев приводити и лекарства давати, негодыми бысть, но пача горшая прииде ей. И в толицы лежаше, яко мертва безгласна, яко прииде мне мысль благая: мнози здравие болящии получают во обители Божия Матери, яже есть Заоникиев от чюдеснаго Ея образа и от гроба новаго чюдотворца Иосифа. И начаз слезно просити Божию Матерь и в молитву призывати новаго чюдотворца Иосифа. И в малый час по обете моем слышах жену глаголющу ко мне, чтоб мне ехать с ней в Заоникиев пред образ Божия Матери и видети гроб чюдотворца Иосифа. И потом бысть ей легчяе. Бывши ми во обители Божия Матери, молебное свершивше, здавы в дом свой возвратишася, радующеся, славяще Божию Матерь и сослужителя Ея новаго чюдотворца Иосифа.// (л. 97)

727-го году июля в 27 день на память святых мученик Трофима и Феофила иже с ними града Вологды жытель Дионисий Феофилактов з женою своею Екатериной и с сыном Филипом и сродники своими приежали в Заоникиев пред чюдесный образ Божия Матере и ко гробу новаго чюдотворца Иосифа, привезоша с собою вышереченного Филиппа жену ево Мавру грех ради немощную, вне уме страждуще люте и нелепая глаголющии, родителей своих и чад в том исподнивающии. И в той люте болезни страждаше восмь дней, ни яды, ни пия и ко сну не прилагашеся, а когда вышеобявленную немощную с нуждею ведоша в церковь Живоначалной Троицы и ко гробу преподобнаго новаго чюдотворца Иосифа и надеша на главу ея власяницу, юже ношаше на трудолюбном своем теле преподобный Иосиф, тогда оная Мавра начат крестити лице свое, токмо молитву не творяше, а по утреннем пении//(л. 97 об.) и по освящении воды, пив по освящении святую воду с перстию от гроба преподобнаго Иосифа, бысть здрава, радостно в дом свой возвратися, славяще Святую Троицу.

1729 году месяца марта в 23 день Васьяновской волости храма Василиа преподобнаго крестьянин Петра Андреева сына Харламова деревни Коркинской Стефан Михайлов привез дочь свою Татиану возрастом по смому году, немогла рукою левою с полгодищное время. И пев молебная пения Пресвятей Богородице и преподобному чюдотворцу Иосифу, и бысть здрава, иде в дом свой, радуяся и славя Божию Матерь и преподобнаго чюдотворца Иосифа.//(л. 98)

1727-го году месяца сентеврия в 13 день вотчины преосвященнаго епископа Афанасиа Засодимской волости Ильиского (так!) приходу деревни Севрюгина приведоша жену Феклу Григорьеву дочь, Самсоновскую жену, не видала очима дванадесят лет рук своих. Егда же приложися ко образу Божия Материи и ко гробу новаго чудотворца Иосифа и нача терти очи свои власяницею, и бысть здрава.

1729-го году Вологоцкаго уезду Наремской волости Власьевскаго приходу деревни Нижной Стороны крестьянки Ивана Алексиевича Щербатова Анна Максимова дочь да Евфросиния Иванова доч исповедаша о себе: «В Божию правду были мы немошнии корчебною болезнию болшии полугоду. И октовриа 17 дня приде ко мне человек в чернеческих ризах и рече мне: «Поидите в Заоникиев монастырь пред образ Божия Матери, исцеление получите». И мы слышахом сия, начахом обет полагати, что ити в Заоникьев пред образ Божия Материи и ко гробу преподобнаго Иосифа, всеконечное здравие получили».//(л. 99)